Bai na kontenido

Bai na kontenido

 TÓPIKO PRINSIPAL | MENTIRA KU TA ALEHÁ HENDE FOR DI DIOS

E Mentira Ku Dios Ta Kruel

E Mentira Ku Dios Ta Kruel

LOKE HOPI HENDE TA KERE

“Alma di hende ku muri den un estado di piká mortal ta baha bai fièrnu mesora despues di morto, kaminda nan ta sufri e kastigu di fièrnu: ‘kandela eterno.’” (Katesismo di Iglesia Katóliko) Algun lider religioso ta bisa ku fièrnu ta un kondishon di separashon kompleto for di Dios.

LOKE BEIBEL TA BISA

“E alma ku peka lo muri.” (Ezekiel 18:4) “E mortonan no sa nada.” (Eklesiástes 9:5) Pues, si e alma ta muri i e mortonan no ta konsiente di nada, kon un hende por sufri den “kandela eterno” òf sinti e doló di ta pa semper separá for di Dios?

Den Beibel, e palabranan griego i hebreo tradusí hopi biaha komo “fièrnu” en realidat ta referí na e graf komun di humanidat. Por ehèmpel, Beibel ta referí na un profesia tokante Hesus: “Lo bo no laga mi alma den graf [“fièrnu,” E Testament Nobo].” (Echonan 2:27) Ta opvio ku Hesus no tabata den un lugá di tormento òf alehá for di Dios, sino den graf.

DIKON ESEI MESTER INTERESÁ BO

Hende ku ta haña ku Dios ta kruel no ta sinti nan atraí na dje. Rocío, ku ta biba na México, a bisa: “For di tempu mi tabata chikí nan a siña mi di un fièrnu di kandela. Mi tabatin asina tantu miedu di Dios ku mi no a kere ku e tin bon kualidat. M’a pensa ku semper e ta rabiá i ku e no ta tolerá nada.”

Loke Beibel ta bisa realmente tokante e huisionan di Dios i e kondishon di e mortonan a yuda Rocío haña un otro punto di bista di Dios. El a bisa: “Mi a sinti un alivio—komo si fuera un karga emoshonal grandi a baha for di mi lomba. Mi a kuminsá kere ku Dios ke lo mihó pa nos, ku e stima nos i ku ami tambe por stim’é. E ta manera un tata ku ta tene man di su yunan i ke lo mihó pa nan.”Isaías 41:13.

Miedu di fièrnu di kandela a pone hopi hende trata na hiba un bida deboto, ma Dios no ke pa nos sirbié pa motibu di miedu. Hesus mes a bisa: “Bo tin ku stima Yehova bo Dios.” (Marko 12:29, 30) Ademas, ora nos realisá ku Dios no ta inhustu, nos por konfia tambe den su huisionan di futuro. Sí, meskos ku Eliú, amigu di Yòb, nos tambe lo por bisa ku tur konfiansa: “Leu sea di Dios di hasi maldat, i di e Todopoderoso di kometé inikidat.”Yòb 34:10.