Bai na kontenido

Bai na kontenido

 BEIBEL TA KAMBIA BIDA DI HENDE

“Hopi Hende Tabatin Rabia Riba Mi”

“Hopi Hende Tabatin Rabia Riba Mi”
  • NASÍ NA AÑA: 1978

  • PAIS NATAL: CHILE

  • SU PASADO: SUMAMENTE VIOLENTO

MI PASADO:

Mi a lanta na Santiago, kapital di Chile, den un bario kaminda uso di droga, gang i kriminalidat tabata na òrdu di dia. Tempu mi tabatin sinku aña, mi tata a ser asesiná. Despues di esei, mi mama a bai biba ku un hòmber masha kruel ku tabata maltratá nos regularmente. Ainda mi tin e sikatrisnan emoshonal di e añanan ei.

Segun ku mi tabata krese, influensianan negativo a pone mi bira un hóben sumamente violento. Mi a kuminsá skucha músika heavy metal, bebe di mas i de bes en kuando usa droga. Hopi biaha mi tabata haña mi metí den pelea di kaya ku bendedónan di droga, kendenan na vários okashon a purba di likidá mi. Un biaha, un gang rival a kontratá un asesino notorio pa mata mi, pero mi a skapa ku solamente un hinká. Na un otro okashon, un grupo di bendedó di droga a pone un revòlver na mi kabes i a trata na kologá mi.

Na 1996, mi a namorá di un mucha muhé ku yama Carolina, i na 1998 mi a kasa kuné. Despues ku nos promé yu a nase, mi a kuminsá haña miedu ku debí na mi karakter violento lo mi por a bira meskos ku mi tata di kriansa i maltratá mi famia. Di manera ku mi a buska yudansa na un sentro di reabilitashon. E tratamentu médiko i terapia ku mi a risibí no a duna resultado. Ainda, kualke kos chikí tabata pone mi bira furioso; mi no tabatin dominio riba mi mes. Den un intento pa no hasi mas daño na mi famia, mi a trata di kometé suisidio. Afortunadamente, mi no a logra.

Aunke mi tabata un ateista pa hopi aña, leu ayá mi tabata kere ku tin un Dios. P’esei, pa un tempu mi tabata bai un iglesia evangelista. Entre tantu, mi kasá a kuminsá studia Beibel ku Testigunan di Yehova. Mi tabatin masha rabia riba e Testigunan, i hopi biaha mi tabata papia palabra malu ku nan. Pero, pa mi sorpresa, semper nan tabata respondé mi na un manera pasífiko.

Un dia, Carolina a bisa mi pa lesa Salmo 83:18 den mi Beibel. E versíkulo ei ta mustra bon kla ku e nòmber di Dios ta Yehova. Esei a sorprendé mi, pasobra den mi religion mi a  siña tokante un dios, pero no tokante Yehova. Anto na prinsipio di aña 2000, mi tambe a kuminsá studia Beibel ku e Testigunan.

BEIBEL A KAMBIA MI BIDA:

Segun ku mi tabata progresá, mi a siña ku Yehova ta un Dios kompasivo i pordonadó, anto esei tabata un konsuelo pa mi. Por ehèmpel, na Éksodo 34:6 i 7, Beibel ta deskribí Yehova komo un Dios “yen di kompashon i grasia, kende no ta rabia lihé i kende ta abundá den miserikòrdia i bèrdat; kende ta mantené miserikòrdia pa milnan, kende ta pordoná inikidat, transgreshon i piká.”

Mi a siña ku Yehova ta un Dios kompasivo i pordonadó, anto esei tabata un konsuelo pa mi

Tòg, no tabata fásil pa mi apliká loke mi tabata siña. Mi tabata konvensí ku nunka lo mi por a kontrolá mi karakter violento. Kada biaha ku mi tabata faya, Carolina tabata animá mi na un manera amoroso. E tabata pone mi kòrda ku Yehova tabata tuma nota di mi esfuersonan. Su apoyo a duna mi e forsa pa sigui purba agradá Yehova, maske hopi bes mi tabata mira mi mes komo un kaso pèrdí.

Riba un dia, Alejandro, mi maestro, a pidi mi lesa Galationan 5:22 i 23. E versíkulonan ei ta bisa ku e fruta di Dios su spiritu ta “amor, goso, pas, pasenshi, amabilidat, bondat, fe, suavedat, dominio propio.” Alejandro a splika mi ku e úniko manera ku lo mi por a desaroyá e kualidatnan ei ta ku yudansa di e spiritu santu di Dios, i no riba mi mes forsa. E bèrdat ei a kambia mi punto di bista por kompleto.

Mas despues, mi a asistí na un kongreso grandi di Testigunan di Yehova. E òrdu, limpiesa i kompañerismo ku mi a mira einan a konvensé mi ku mi a haña e religion berdadero. (Huan 13:34, 35) Mi a batisá na febrüari 2001.

E BENEFISIONAN:

Yehova a transformá mi di un persona violento pa un persona pasífiko. Mi a sinti ku Yehova a saka mi for di e lodo ku mi tabata aden. Hopi hende tabatin rabia riba mi, pero mi no por tuma nan na malu. Sinembargo, awor mi ta sirbi Yehova pasífikamente huntu ku mi kasá i mi dos yu hòmbernan.

Mi famia i mi amigunan di ántes no por kaba di kere kuantu mi a kambia. Komo resultado, hopi di nan a mustra interes pa siña e bèrdatnan di Beibel. Mi tabatin e privilegio tambe di yuda otronan siña konosé Yehova. Mi ta sumamente kontentu pa mira kon siñansa bíbliko a transformá nan bida tambe!