Bai na kontenido

Bai na kontenido

Bo Bida Despues di Divorsio

Bo Bida Despues di Divorsio

“Mi a sinti manera henter mi mundu a bini abou. Un dia tur kos ta kana nèchi, i diripiente b’a pèrdè tur kos.”​—MARK, * un aña divorsiá.

“Mi kasá a kòrta mi orea ku un mucha muhé mes yòn ku nos yu muhé. Ora nos a divorsiá, mi a skapa di su mal genio i esei a duna mi sierto alivio. Pero na mes momento mi a sinti mi humiá i menospresiá.”​—EMMELINE, 17 aña divorsiá.

Algun hende ta divorsiá ku e speransa ku esei lo drecha nan bida, miéntras ku otronan ke salba nan matrimonio, pero no por evitá ku nan kasá ta bai laga nan. Ma kasi tur hende ku divorsiá ta ripará ku despues nan bida ta bira mas duru ku nan a ferwagt. De echo, si bo a divorsiá resientemente, lo bo ripará ku esei ta un di e kosnan ku ta kousa mas strès den bida. P’esei, lo ta bon pa bo analisá algun konseho práktiko for di Beibel ku lo por yuda bo enfrentá e retonan ku un divorsio ta trese kuné.

RETO 1: SINTIMENTUNAN NEGATIVO.

E strès ku problema finansiero, kriamentu di yu i soledat ta trese kuné por bira kasi insoportabel, i sintimentunan negativo no ta bai mesora tampoko. E sikólogo Judith Wallerstein (awor defuntu) a bisa ku algun hende, añanan despues di nan divorsio, ainda ta sinti nan traishoná i bandoná. Pa nan, “bida ta yen di inhustisia, desepshon i sintimentu di soledat.”

KIKO BO POR HASI?

  • Deshogá bo mes. Kisas bo ta sinti falta di e persona ku ainda bo ta stima. Asta si bo relashon kuné  no tabata muchu djaki te aya, kisas bo ta sinti bo tristu pasobra bo no tin e felisidat ku bo a ferwagt di haña den matrimonio. (Proverbionan 5:18) P’esei, no tene bèrgwensa di, na moda di papia, saka “tempu pa yora” bo ferdrit.—Eklesiástes 3:1, 4.

  • No isolá bo mes. Aunke tin momento ku bo ke ta bo so pa bo deshogá bo mes, no ta sabí pa bo isolá bo mes pa hopi tempu. (Proverbionan 18:1) I ora bo ta papia ku bo amigunan, konsentrá riba kosnan positivo; evitá di keha muchu tokante bo eks kasá—asta si bo tin motibu bálido pa hasi esei—sino hende lo kita pia for di bo. Si bo tin ku tuma desishonnan importante despues di bo divorsio, buska yudansa serka un persona di konfiansa.

  • Kuida bo salú. E strès ku divorsio ta trese kuné sa kousa problema ku salú, manera preshon haltu òf migrèn. P’esei ta importante pa bo kome salú, hasi ehersisio i sosegá bon.—Efesionan 5:29.

  • Deshasí di e kosnan ku por bolbe lanta bo rabia kontra bo eks kasá òf kosnan ku bo no tin mester di dje. Pero warda dokumento importante sí. Si kosnan manera potrèt di kasamentu por kousa doló, warda nan pa boso yunan.

  • Kombatí pensamentu negativo. Olga, kende a divorsiá despues ku su esposo a bira infiel na dje, a bisa: “Tur ora bai mi tabata puntra mi mes, ‘Kiko é tin ku ami no tin?’” Pero manera Olga a realisá despues, keda ripití pensamentu negativo por resultá den “un spiritu abatí.”—Proverbionan 18:14.

    Hopi hende ta haña ku ora nan skirbi nan pensamentunan, nan por kontrolá i ordená nan manera di pensa mihó. Si bo disidí di hasi esaki, purba di bini ku un pensamentu nobo i positivo pa remplasá esun negativo ku bo ta luchando kuné. (Efesionan 4:23) Wak e dos ehèmpelnan akí:

    Ántes: Ta mi falta ku mi eks a bira infiel na mi.

    Awor: Mi fayonan no a duna mi eks kasá derecho di gaña mi ku un otro hende.

    Ántes: M’a tira e mihó añanan di mi bida afó ku e hòmber robes.

    Awor: Lo mi ta mas felis si mi wak padilanti, i no patras.

  • Ignorá komentarionan ofensivo. Algun amigu i famia, sin ningun mal intenshon, por bisa kosnan desagradabel òf asta inapropiá den bo kaso, manera: ‘Tòg e no tabata un bon kasá pa bo’ òf ‘Dios ta odia divorsio.’ * Ku bon motibu, Beibel ta konsehá: “No tuma na serio tur palabra ku wòrdu papiá.” (Eklesiástes 7:21) Martina, kende tin dos aña divorsiá, a bisa: “En bes di pensa muchu riba komentarionan fuera di lugá, mi ta purba di mira kosnan for di e punto di bista di Dios. Su pensamentunan ta mas haltu ku esnan di nos.”—Isaías 55:8, 9.

  • Hasi orashon na Dios. Dios ta animá su sirbidónan pa ‘tira tur nan inkietut riba dje,’ foral den tempu di angustia.—1 Pedro 5:7.

PURBA ESAKI: Skirbi e tekstonan di Beibel ku bo ta haña ta útil riba algun papelitu i laga nan kaminda bo por mira nan tur ora. Ademas di e tekstonan ku nos a menshoná kaba, hopi hende divorsiá a benefisiá di esakinan tambe: Salmo 27:10; 34:18; Isaías 41:10 i Romanonan 8:38 i 39.

Laga e Palabra di Dios sostené bo den tempu difísil

RETO 2: BO TRATO KU BO EKS KASÁ.

Juliana, kende tabatin 11 aña kasá, a bisa: “Mi a roga mi esposo pa e keda. Pero despues ku el a bai laga mi, mi a rabia pisá kuné i ku e muhé ku el a bai biba kuné.” Hopi hende divorsiá ta keda masha rabiá ku nan eks pa añanan largu. Sinembargo, den algun  kaso nan ta haña nan fòrsá ta komuniká ku nan eks kasá regularmente, spesialmente si nan tin yu.

KIKO BO POR HASI?

  • Keda kortes ku bo eks kasá. Limitá bo na asuntunan nesesario, i sea breve i al kaso. Hopi hende divorsiá a haña ku e aserkamentu akí ta kontribuí na pas.—Romanonan 12:18.

  • Evitá di provoká bo eks kasá. Spesialmente ora bo sinti ku bo ta bou di atake, apliká e konseho sabí di Beibel: “Esun ku midi su palabranan tin konosementu.” (Proverbionan 17:27) Si bo sinti ku un kòmbersashon ta bai sali for di man, mihó bo bisa: “Laga mi pensa riba loke bo a bisa i nos ta papia despues.”

  • Separá bo asuntunan mas tantu posibel for di esnan di bo eks kasá, inkluso papelnan legal, finansiero i médiko.

PURBA ESAKI: E siguiente biaha ku bo papia ku bo eks kasá, si un di boso dos bira defensivo òf infleksibel, sugerié pa para e kòmbersashon òf wak si boso por sigui trata e asuntu via e-mail.—Proverbionan 17:14.

RETO 3: KON PA YUDA BOSO YUNAN ADAPTÁ NA E SITUASHON NOBO.

Maria ta kòrda kon kosnan a sigui djis despues di su divorsio: “Mi yu muhé mas chikí tabata yora so i a kuminsá pishi kama atrobe. I aunke mi yu muhé mas grandi a purba di skonde su sintimentunan, mi por a mira un kambio den dje tambe.” Lamentablemente, bo por sinti ku awor ku bo yunan tin mas mester di bo, bo no tin e tempu òf energia emoshonal pa yuda nan.

KIKO BO POR HASI?

  • Animá bo yunan pa papia ku bo tokante nan sintimentunan, aunke tin biaha nan por bisa bo kosnan ‘for di kontròl.’—Yòb 6:2, 3.

  • Kada ken mester hunga sú ròl. Aunke bo mester di apoyo emoshonal i bo yu ke duna bo esei, no ta hustu ni saludabel pa ferwagt di un yu p’e yuda resolvé problema di hende grandi. (1 Korintionan 13:11) Evitá tambe di hasi bo yu bo persona di konfiansa òf di kombertié den un mediadó òf mensahero entre abo ku bo eks kasá.

  • No hasi muchu kambio den e bida di bo yu. Lo ta bon si bo por keda biba mes kaminda ku bo ta biba awor i sigui ku bo kustumbernan di tur dia. Pero mas importante ainda, mantené un bon rutina spiritual, inkluso lesamentu di Beibel i adorashon komo famia.—Deuteronomio 6:6-9.

PURBA ESAKI: Buska un oportunidat un di e dianan akí pa bisa bo yunan kuantu bo stima nan i ku no ta nan a pone abo ku eks kasá habri for di otro. Kontestá nan preguntanan sin tira falta riba bo eks kasá.

Despues di bo divorsio, bida ta sigui. Melissa, kende tabatin 16 aña kasá, a bisa: “Ora mi a divorsiá, mi a bisa mi mes: ‘Nunka mi a deseá pa mi bida kue e rumbo akí.’” Tòg, apesar di su sirkunstansianan di bida, awor e ta mas kontentu. El a bisa: “Unabes mi a stòp di purba kambia pasado, mi ta sinti mi muchu mas mihó.”

^ par. 2 A kambia algun nòmber den e artíkulo akí.

^ par. 18 Ta bèrdat ku Dios ta odia un divorsio traishonero. Pero si un persona bira infiel na su kasá, Dios ta duna e kasá inosente e derecho pa disidí si e ke divorsiá òf nò. (Malakías 2:16; Mateo 19:9) Wak e artíkulo “E Punto di Bista Bíbliko—Ki Tipo di Divorsio Dios Ta Odia?” den e ¡Despertad! di 8 di febrüari 1994, publiká pa Testigunan di Yehova.

PUNTRA BO MES . . .

  • Mi a duna mi mes e tempu pa deshogá mi mes despues di mi divorsio?

  • Kon mi por stòp di karga kualke renkor ku mi tin ainda kontra mi eks kasá?