Bai na kontenido

Bai na kontenido

 BEIBEL TA KAMBIA BIDA DI HENDE

“Mi A Kuminsá Pensa Seriamente Kon Lo Para ku Mi Bida”

“Mi A Kuminsá Pensa Seriamente Kon Lo Para ku Mi Bida”
  • NASÍ NA AÑA: 1941

  • PAIS NATAL: AUSTRALIA

  • SU PASADO: PROBLEMA KU HUMAMENTU I BEBEMENTU

MI PASADO:

Mi a lanta na Warialda, New South Wales. Warialda ta un pueblito ku hopi kunuku kaminda nan ta kria karné i baka, i ta planta grano i bèrdura. E pueblo ta limpi i ku masha poko kriminalidat.

Mi ta e yu mayó di un famia di dies yu. Ora mi tabatin 13 aña, mi a kuminsá traha pa yuda mi famia. Komo ku mi no tabatin hopi skol, mi tabata traha den kunuku. Ora mi tabatin 15 aña di edat, mi tabata kuida bestia i mansa kabai.

E echo ku mi tabata traha den kunuku tabatin su banda bon i su banda malu. Di un banda, mi a gusta tantu e trabou komo e ambiente mashá. Mi tabatin kustumber di sinta pafó anochi banda di un kampvür i tabata wak e luna i e shelu yen di strea. I tambe mi tabata disfrutá di e aire fresku i e holó agradabel di mondi. Esaki a pone mi pensa ku mester tin un Persona ku a krea tur e kosnan maravioso ei. Di otro banda, algun hende ku mi tabata traha kuné tabatin un mal influensia riba mi. Hopi biaha nan tabata papia palabra malu i tabata huma hopi sigaria. P’esei, no a dura muchu ku ami tambe a kuminsá huma i papia palabra malu.

Ora mi a kumpli 18 aña, mi a muda bai e stat Sydney. Mi a purba drenta servisio militar, pero nan no a aseptá mi pasobra mi no tabatin hopi skol. Mi a haña un trabou i a keda biba un aña na Sydney. Ta durante e periodo ei mi a topa ku Testigunan di Yehova pa promé biaha. Mi a aseptá un invitashon pa bai un di nan reunionnan, i mesora mi a mira ku nan siñansanan ta basá riba Beibel.

Pero poko tempu despues, mi a disidí di bai biba bèk den kunuku. I finalmente mi a keda biba na e pueblo Goondiwindi, Queensland. Mi a haña un trabou, i mi a kasa. Pero lamentablemente, mi a kuminsá bebe tambe.

 Ami ku mi kasá a haña dos yu hòmber. Despues ku nan a nase, mi a kuminsá pensa seriamente kon lo para ku mi bida. Mi a kòrda loke mi a tende na e reunion di e Testigunan na Sydney, i mi a disidí ku mi tin ku hasi kambio.

Mi a haña un edishon bieu di E Toren di Vigilansia ku e adrès di e sukursal di Testigunan di Yehova na Australia. Mi a skirbi nan un karta pa pidi yudansa. I nan a manda un Testigu amabel i kariñoso pa bin bishitá mi. Djis despues, el a kuminsá duna mi lès di Beibel.

BEIBEL A KAMBIA MI BIDA:

Segun ku mi tabata studia Beibel, mi a bin komprondé ku mi mester hasi kambionan grandi den mi bida. Un teksto di Beibel ku a hasi un impakto riba mi tabata 2 Korintionan 7:1. E teksto ei ta animá nos pa “limpia nos mes di tur impuresa di karni.”

Mi a disidí di stòp di huma i di bebe di mas. No tabata fásil pa mi hasi kambio, pasobra pa hopi tempu e bisionan ei tabata un parti di mi bida. Pero, mi tabata determiná pa hiba un bida ku ta agradá Dios. Loke a yuda mi tabata e prinsipio bíbliko na Romanonan 12:2 ku ta bisa: “Stòp di laga e mundu akí forma boso, ma transformá boso mes dor di renobá boso mente.” Mi a realisá ku si mi ke stòp ku e bisionan ei, mi mester kambia mi manera di pensa i kuminsá mira e kosnan ei manera Dios ta mira nan, esta, komo algu masha dañino. Ku Dios su yudansa mi a logra stòp di huma i di bebe di mas.

“Mi a realisá ku si mi ke stòp ku e bisionan ei, mi mester kambia mi manera di pensa”

Pero, loke mi a haña mas difísil ainda tabata pa stòp di papia palabra malu. Mi tabata sa ku Beibel ta konsehá na Efesionan 4:29 pa “no laga ningun palabra putrí sali for di boso boka.” Tòg, no ta mesora mi a logra stòp di papia palabra malu. Loke a yuda mi ta ora mi a meditá riba e palabranan di Isaías 40:26 ku ta papia di e shelu yen di strea. E teksto ta bisa: “Hisa bo wowo wak ariba i mira ta ken a krea e streanan akí; Esun ku ta guia nan ehérsito segun nan kantidat, ta e ta yama nan tur na nan nòmber; pa motibu di e grandesa di su forsa i su poder ningun di nan no ta falta.” Mi a pensa ku si Dios tin asina tantu poder ku e por a krea e universo inmenso, ku mi tabata gusta kontemplá, lo e mester por duna mi forsa pa hasi kambio den mi bida pa mi por agrad’é. Ku hopi orashon i esfuerso, gradualmente mi a logra stòp di papia palabra malu.

E BENEFISIONAN:

Komo un kuidadó di bestia, mi no tabatin masha oportunidat di kòmbersá ku hende pasobra tabatin masha poko hende ta biba kaminda mi tabata traha. Pero, e entrenamentu ku mi a haña na e reunionnan di Testigunan di Yehova a siña mi kon pa papia. Por ehèmpel, esei a yuda mi pa papia di e bon notisia di e Reino di Dios ku otro hende.Mateo 6:9, 10; 24:14.

Durante e último añanan, mi a sirbi komo ansiano den kongregashon i pa mi ta un privilegio pa hasi tur loke ta na mi alkanse pa yuda mi rumannan den fe. I e bendishon di mas grandi ku mi tin ta di sirbi Yehova huntu ku mi esposa fiel i amoroso i nos yunan presioso.

Mi ta gradisidu ku Yehova a instruí mi aunke mi no tabatin hopi skol. (Isaías 54:13) I mi ta kompletamente di akuerdo ku loke Proverbionan 10:22 ta bisa: “Ta e bendishon di SEÑOR ta hasi riku.” Ami ku mi famia ta ansioso pa siña mas tokante Yehova i pa sirbié pa semper.