Bai na kontenido

Bai na kontenido

 KONSEHO PA UN BIDA DI FAMIA FELIS

Bo Por Tin Éksito den Bo di dos Matrimonio

Bo Por Tin Éksito den Bo di dos Matrimonio

HERMAN: * “Despues di tabatin 34 aña kasá, mi esposa a muri di kanser. Ora m’a bolbe kasa, mi esposa Linda semper a sinti ku mi tabata kompar’é ku mi promé kasá. Pa kolmo, hopi biaha mi amigunan tabata papia di kon bon hende mi promé kasá tabata, i esaki tabata molestiá Linda mashá.”

LINDA: “M’a sinti ku mi tabata kai chikí den tur kos na komparashon ku Herman su promé kasá. E tabata un hende suave ku bon manera i tur hende tabata stim’é. Tin biaha mi tabata puntra mi mes si un dia lo mi por bira mes bon pa Herman manera é tabata.”

Herman ku Linda ta felis i kontentu ku nan a topa otro. Linda, kende tabata un muhé divorsiá, asta ta yama Herman su “prínsipe azul.” Sinembargo, manera nan mes ta atmití, un di dos matrimonio por trese reto- i situashonnan ku no tabata eksistí den e promé matrimonio. *

Si bo a kasa pa di dos biaha, kon bo ta mira bo di dos matrimonio? Un esposa ku yama Tamara, kende a kasa tres aña despues di su divorsio, a bisa: “Ora bo kasa pa promé biaha, bo tin e sintimentu spesial ku bo matrimonio lo dura pa semper. Pero den bo di dos matrimonio, kisas bo no ta sinti esei mas pasobra semper bo ta kòrda ku bo promé matrimonio a terminá.”

Sinembargo, hopi pareha a haña berdadero felisidat den nan di dos matrimonio. Nan tabatin éksito den nan matrimonio; bo tambe por tin éksito!  Kon? Laga nos analisá tres difikultat ku un di dos matrimonio por trese kuné i kon prinsipionan di Beibel por yuda. *

DIFIKULTAT 1: E RETO PA BO PROMÉ MATRIMONIO NO AFEKTÁ ESUN AKTUAL.

Ellen ku ta biba na Suráfrika a konta: “Mi no por djis lubidá tur e momentonan agradabel di mi promé matrimonio, foral ora nos biaha bai na e mesun lugánan kaminda ami ku mi eks esposo tabata bai den fakansi. Tin biaha, sin ku mi sa, mi ta kuminsá kompará mi esposo aktual ku mi promé kasá.” Di otro banda, si bo partner tabata kasá un biaha kaba, bo por sinti bo malu si tur ora bai e ta papia tokante su promé matrimonio.

Krea rekuerdonan nobo ku por uni boso dos komo pareha

SUGERENSIA: Komprondé ku no ta realístiko pa ferwagt ku abo òf bo partner lo djis lubidá un promé matrimonio, foral si el a dura hopi. Algun hende ta atmití ku sin ku nan por a yuda asta nan a yega di yama nan kasá aktual na nòmber di nan promé kasá. Kon bo por dil ku e tipo di situashonnan akí? Beibel ta konsehá: “Purba komprondé otro.”—1 Pedro 3:8, New Century Version.

No bira yalurs i prohibí bo kasá aktual di bisa algu di su promé matrimonio. Si e ta sinti gana di papia tokante su matrimonio ku su promé kasá, komprondé p’e i skuch’é. I no konkluí mesora ku e ta komparando bo ku su promé kasá. Ian, kende a bolbe kasa dies aña pasá, a bisa: “Mi esposa Kaitlyn nunka a konsiderá e tema di mi promé matrimonio komo tabú. Mas bien, el a mira esei komo un oportunidat pa haña sa kiko a hasi mi e persona ku mi ta awe.” Bo por asta haña ku e tipo di kòmbersashonnan ei lo yuda bo hala sera mas na bo partner.

Konsentrá riba e bunita kualidatnan ku bo kasá aktual tin. Ta bèrdat ku bo partner por falta algun kualidat òf abilidat ku bo eks kasá tabatin. Pero muy probablemente tin otro áreanan den kua bo kasá aktual ta sobresalí. P’esei, traha pa fortalesé bo relashon ku bo kasá aktual, ‘sin kompar’é ku otro hende.’ Reflekshoná riba loke bo ta gusta di bo kasá i duna balor na esei. (Galationan 6:4) Un hòmber ku yama Edmond, kende a kasa dos biaha, a splik’é asin’akí: “Meskos ku bo no ta haña dos amistat ku ta meskos, asina tampoko bo no ta haña dos matrimonio ku ta meskos.”

Kon bo por balansá e bunita rekuerdonan di bo promé matrimonio ku e bida ku bo a kuminsá ku bo kasá nobo? Jared a bisa: “Un biaha mi a splika mi esposa ku mi promé matrimonio tabata manera un bunita buki ku ami ku mi promé kasá a skirbi. De bes en kuando lo mi por habrié, les’é i reflekshoná riba nos bon eksperensianan. Pero mi no ta biba den e buki ei. Mas bien, ami ku mi esposa ta skirbiendo nos propio buki huntu i aki ta kaminda mi ta biba felismente awor.”

PURBA ESAKI: Puntra bo partner si e ta sintié malu ora bo ta papia tokante bo promé matrimonio. Determiná ki ora lo ta mihó pa no papia tokante bo promé matrimonio.

DIFIKULTAT 2: AMIGUNAN NO SA KON PA TRATA BO KASÁ NOBO.

Javier, kende a bolbe kasa despues ku e tabatin seis aña divorsiá, a bisa: “Pa algun tempu despues ku nos a kasa, mi kasá tabatin e impreshon ku mi amigunan tabata blo studi’é.” Un esposo ku yama Leo tabatin ku trata ku un otro situashon. El a konta: “Den mi presensia, algun persona tabata bisa mi kasá kuantu nan tabata stima su eks esposo i ku nan ta sinti su falta mashá.”

SUGERENSIA: Purba di pone bo mes den sapatu di bo amigunan. Ian, menshoná anteriormente, a bisa: “Mi ta kere ku e amigunan di ántes ta sinti nan straño ora nan tin ku asosiá ku solamente mitar di e pareha ku nan a konosé. Tin biaha nan por tin asta problema ku esei.” Pues, ‘sea rasonabel i demostrá pleno suavedat pa ku tur hende.’ (Tito 3:2) Duna bo famia i amigunan tempu pa nan por ahustá nan mes na e situashon nobo. Meskos ku bo matrimonio a kambia, asina tambe bo amistatnan por kambia. Javier, menshoná ariba, a bisa “ku segun tempu tabata pasa, e ku su kasá a hasi esfuerso pa bolbe sera ku nan amistatnan di ántes.” Anto el a agregá: “Pero loke tambe a yuda nos ta di hasi esfuerso komo pareha pa sera amistatnan nobo.”

 Tene kuenta ku e sintimentunan di bo partner ora bo ta huntu ku bo amigunan di ántes. Por ehèmpel, si den un kòmbersashon e tema tokante bo promé matrimonio bini padilanti, mustra takto i sano huisio pa bo kasá aktual no sintié ekskluí. Un proverbio den Beibel ta bisa: “Palabra papiá pa loko ta hùrt hende profundamente, palabra na ora ta trese alivio.”—Proverbionan 12:18BPK.

PURBA ESAKI: Purba antisipá kua ta e aktividatnan sosial ku por krea un situashon ferfelu pa abo òf pa bo kasá. Konsiderá adelantá kon lo ta e mihó manera pa trata ku e pregunta- i komentarionan ku bo amigunan por hasi relashoná ku bo promé matrimonio.

DIFIKULTAT 3: MIEDU DI KONFIA BO PARTNER NOBO PASOBRA ESUN PROMÉ NO TABATA FIEL.

Andrew, kende su promé kasá a bandon’é, a bisa: “Mi tabatin masha miedu di bolbe bira víktima di traishon.” Awor ku e ta kasá ku Riley, el a bisa: “Hopi bes mi tabata puntra mi mes si mi ta mes bon ku Riley su promé kasá. Mi tabatin asta miedu pa e no lanta un dia bisa mi ku mi no ta sirbi, anto bai laga mi pa un otro.”

SUGERENSIA: Papia habrí ku bo kasá tokante bo preokupashonnan. Beibel ta bisa: “Plannan ta frakasá pa falta di deliberashon.” (Proverbionan 15:22BPK) Mas Andrew ku Riley a ‘deliberá’ tokante nan preokupashonnan, mas nan a siña konfia otro. Andrew a bisa: “M’a bisa Riley ku ami sí lo no kore divorsiá for di dje komo un manera fásil pa sali for di problema, i el a sigurá mi ku e tambe ta pensa meskos. Pokopoko pero sigur mi a bin siña konfi’é kompletamente.”

Si bo partner tabata víktima di traishon den su promé matrimonio, hasi tur loke bo por pa gana su konfiansa. Por ehèmpel, Michel ku Sabine—ámbos a bini di un promé matrimonio frakasá—a kumbiní ku otro pa laga otro sa ora nan tin kontakto ku nan eks kasá. Sabine a bisa: “E kompromiso akí ta un protekshon pa nos, i e ta laga nos sinti nos sigur.”—Efesionan 4:25.

PURBA ESAKI: Limitá bo kòmbersashonnan privá ku e sekso opuesto, sea personalmente, na telefòn òf online.

Hopi segundo matrimonio tabatin éksito i boso tambe por logra esei. Al fin i al kabo, kompará ku bo promé matrimonio, awor bo konosé bo mes mihó. Andrew, menshoná anteriormente, a bisa: “Mi a haña un gran konsuelo den mi matrimonio ku Riley. Durante e 13 añanan ku nos tin kasá, nos a logra forma un relashon hopi será ku otro—unu ku nos no ke pèrdè pa nada di mundu.”

^ par. 3 A kambia e nòmbernan.

^ par. 5 Naturalmente, ta hasi un gran diferensia si un matrimonio a terminá pa motibu di divorsio òf morto. E artíkulo akí ta diseñá pa yuda un hende tin éksito den su di dos matrimonio sin importá kon su promé matrimonio a terminá.

^ par. 7 Pa mas informashon enkuanto e difikultatnan ku lantamentu di yu di kriansa por trese kuné, wak e seri di artíkulo di portada “Klave Ku Por Yuda Famia di Kriansa Ser Felis” di e ¡Despertad! di aprel 2012 publiká pa Testigunan di Yehova.

PUNTRA BO MES . . .

  • Kua ta algun di e kualidatnan di mi kasá ku mas mi ta balorá?

  • Si den un kòmbersashon e tema tokante mi promé matrimonio bini padilanti, kon mi por trata e asuntu na un manera ku ta laga mi partner aktual sintié trankil i balorá?