Bai na kontenido

Bai na kontenido

 SIÑA BO YUNAN

Kiko Nos Por Siña for di e Kaso di un Kriminal?

Kiko Nos Por Siña for di e Kaso di un Kriminal?

Riba e plachi nos ta mira Hesus papiando ku un kriminal. E kriminal tin duele di e kosnan malu ku el a hasi i e ta pidi Hesus: “Kòrda riba mi ora bo drenta bo Reino.” Bo sa kiko Hesus ta respond’é? * Hesus ta primintié: “Di bèrdat mi ta bisa bo awe: Lo bo ta ku mi den Paradeis.”

Kon bo ta kere ku e Paradeis ei lo ta?— Pa hasi sigur ku loke nos ta kere ta korekto, laga nos papia tokante e Paradeis ku Dios a traha pa e promé hòmber i muhé: Adam ku Eva. Ta na unda e Paradeis ei tabata? Den shelu, òf riba tera?

E kontesta korekto ta riba tera. Pues, ora Hesus a bisa ku e kriminal lo ta “den Paradeis,” e tabata ke men ku lo e bai biba den Paradeis aki riba tera. Kon e Paradeis ei lo ta?— Ban wak.

Despues ku Yehova Dios a krea e promé pareha, Adam ku Eva, Beibel ta bisa ku el a pone nan den un paradeis aki riba tera. Dios a yama e lugá ei, ‘hòfi di Edén.’ Bo por imaginá kon bunita e “hòfi” ei lo tabata?— Nos por tin sigur ku e tabata un lugá masha bunita i agradabel pa biba. Ningun di nos no a yega di mira un lugá asina bunita.

Kiko abo ta pensa? Hesus lo ta aki riba tera huntu ku e kriminal?— Nò, Hesus lo ta den shelu komo Rei i lo goberná e tera. P’esei, ora Hesus a bisa e kriminal ku lo e ta kuné, Hesus tabata ke men ku lo e lant’é for di morto i sòru pa e ta bon kuidá den Paradeis riba tera. Pero dikon Hesus lo laga un hende ku tabata un kriminal biba den Paradeis?— Laga nos papia un ratu riba esaki.

 Ta bèrdat ku e kriminal akí a hasi kos masha malu mes. Pero tin miónes di hende ku a yega di biba riba tera ku tambe a hasi kos malu. Mayoria di nan a hasi malu pasobra ningun hende no a siña nan konosé Yehova ni kon e ke pa nan biba.

Ta p’esei hopi di nan, inkluso e kriminal ku Hesus a papia kuné, lo haña resurekshon pa biba den Paradeis aki riba tera. Nan lo siña kiko ta Dios su boluntat. E ora ei nan lo por demostrá ku nan ta stima Yehova.

Bo sa kon nan por demostrá esei?— Wèl, dor di obedesé Dios. Esta dushi lo ta pa biba den Paradeis huntu ku hende ku stima Yehova i otro hende!

Lesa e tekstonan akí

^ par. 3 Si bo ta lesa pa mucha, e strepi ta indikashon pa stòp i laga nan kontestá.