Bai na kontenido

Bai na kontenido

 TÓPIKO PRINSIPAL: ABO TA HAÑA KU DIOS TA KRUEL?

Dikon Algun Hende Ta Bisa Ku Dios Ta Kruel?

Dikon Algun Hende Ta Bisa Ku Dios Ta Kruel?

KIKO bo ta pensa di e pregunta riba portada di e revista akí? Awe, mas i mas hende ta hasi nan mes e pregunta ei òf asta a yega na e konklushon ku Dios ta kruel.

Por ehèmpel, algun sobrebibiente di desaster natural ta puntra nan mes: “Dikon Dios ta permití e kosnan akí sosodé? E no ta interesá den nos? Asina kruel e ta?”

Tin otro hende ta keda sorprendí ora nan lesa sierto relatonan den Beibel, manera por ehèmpel e Diluvio di tempu di Noe. Nan ta puntra nan mes: ‘Kon un Dios di amor por a mata asina tantu hende? Ta asina kruel e ta?’

Abo tambe a yega di puntra bo mes esei? Bo tin problema pa rasoná ku un hende ku ta puntra su mes si Dios ta kruel? Sea kual sea e kaso, lo ta bon pa analisá e siguiente pregunta.

DIKON NOS TA ODIA KRUELDAT?

Esei ta pasobra nos tin un sentido di bon i malu. Den e aspekto akí nos ta masha diferente for di bestia, ya ku nos Kreador a traha nos den ‘su imágen.’ (Génesis 1:27) Ku otro palabra, Dios a duna nos e kapasidat pa reflehá su kualidat- i normanan moral, esta, su sentido di bon i malu. Awor pensa riba esaki: Si nos a haña e sentido ei for di Dios i p’esei ta odia loke ta kruel, esei no ta proba ku Dios tambe ta odia krueldat?

E konklushon lógiko akí ta kuadra tambe ku loke Dios ta bisa di su mes den su Palabra: “Mi kamindanan ta mas haltu ku boso kamindanan, i mi pensamentunan mas haltu ku boso pensamentunan.” (Isaías 55:9) Awor si nos ta haña ku Dios ta kruel, nos no ta bisando nèt lo kontrali, esta, ku nos kamindanan ta mas haltu ku esun di Dios? Pero promé ku nos yega na e konklushon ei, lo ta bon pa nos haña mas prueba. P’esei, en bes di puntra nos mes si Dios ta kruel, kisas nos tin ku puntra nos mes kiko ta duna nos e impreshon ku e ta kruel. Pero promé, laga nos analisá kiko ke men ser kruel.

Ora nos bisa ku un hende ta kruel, de fakto nos ta husgando su intenshonnan. Un persona kruel gusta mira otro hende sufri i no ta sinti duele ora e mira sufrimentu. Por ehèmpel, un tata ku ta disipliná su yu pasobra e gusta mir’é sufri ta un tata kruel. Ma si e ta disipliná su yu pa e eduk’é i proteh’é, nos ta haña ku e ta un bon tata. Pues, si nos no sa dikon un persona ta aktua di un sierto manera, ta fásil pa malinterpretá su intenshonnan.

Teniendo kuenta ku esei, ban analisá e dos motibunan ku ta pone algun hende bisa ku Dios ta kruel. Nan ta e desasternan natural ku nos ta mira awe i e huisionan di Dios menshoná den Beibel. E echonan realmente ta mustra ku Dios ta kruel?