Bai na kontenido

Bai na kontenido

Nos Lo Kana den Nos Integridat!

Nos Lo Kana den Nos Integridat!

 Nos Lo Kana den Nos Integridat!

“Pa loke t’ami, lo mi kana den mi integridat.”​—SAL. 26:11.

1, 2. Kiko Jòb a bisa di su integridat, i Jòb kapítulo 31 ta indiká kiko tokante Jòb?

DEN pasado, hende tabatin kustumber di pisa kos den un balansa ku tabata konsistí di un bara horizontal ku tabatin un skalchi kologá na kada banda. E bara ei tabata balansá riba un pènchi ku tabata pegá presis meimei di e bara. Den un di e skalchinan nan tabata pone loke mester a pisa i den e otro nan tabata pone un peso. E pueblo di Dios mester a usa balansa i peso na un manera onesto.​—Pro. 11:1.

2 Ora e bon hòmber Jòb tabata sufri na man di Satanas, el a bisa: “Laga [Yehova] pisa mi ku balansa eksakto, i laga Dios konosé mi integridat.” (Jòb 31:6) En konekshon ku esei, Jòb a menshoná un kantidat di situashon ku por pone un hende ku ta mantené su integridat na prueba. Ma Jòb mes a pasa e prueba ku éksito, manera su palabranan na Jòb kapítulo  31 ta indiká. Su bon ehèmpel por motivá nos pa aktua meskos kuné i bisa ku e mesun konvikshon ku David: “Ma pa loke t’ami, lo mi kana den mi integridat.”​—Sal. 26:11.

3. Pakiko ta importante pa keda fiel na Dios tantu den kos grandi komo den kos chikitu?

3 Ounke Jòb a pasa den prueba severo, el a keda fiel na Dios. Algun hende lo asta bisa ku su integridat firme bou di prueba severo tabata algu ekstraordinario. Nos no ta pasa den tur loke Jòb a pasa aden. Ma pa demostrá ku nos ta íntegro i ta apoyá e soberania di Dios, nos mester keda fiel na dje den tur kos, tantu den kos grandi komo den kos chikitu.​—Lesa Lukas 16:10.

Integridat Moral Ta Sumamente Importante

4, 5. Komo un hende íntegro, kiko Jòb no a hasi?

4 Pa nos mantené nos integridat na Yehova, nos tin ku pega na su normanan moral, manera Jòb a hasi. El a deklará: “Mi a sera un aliansa ku mi wowonan; kon anto mi por a wak un bírgen? . . . Si mi kurason a wòrdu sedusí dor di un muhé, òf si mi a lur na porta di mi bisiña, laga mi esposa mula pa un otro, i laga otronan drumi kuné.”​—Jòb 31:​1, 9, 10.

5 Jòb tabata determiná pa mantené su integridat na Dios, i p’esei el a evitá di keda wak un muhé ku mal deseo. Komo hòmber kasá, Jòb no a flirt ku hende muhé soltero ni purba kuminsá un romanse ku esposa di otro hòmber. Den e Sermon Riba Seru, Hesus a bisa algu impaktante relashoná ku moralidat seksual—un punto ku sigur hende ku ta mantené nan integridat no mester lubidá.​—Lesa Mateo 5:​27 i 28.

No Usa Métodonan Tramposo

6, 7. (a) Meskos ku den e kaso di Jòb, kiko Dios ta usa pa midi nos integridat? (b) Dikon nos no mester ta hende tramposo òf engañoso?

6 Nos no por usa métodonan tramposo si nos ke ta hende ku ta mantené nan integridat. (Lesa Salmo 5:6.) Jòb a bisa: “Si mi a anda ku falsedat, i mi pia a pura bai tras di engaño, laga [Yehova] pisa mi ku balansa eksakto, i laga Dios konosé mi integridat.” (Jòb 31:​5, 6) Yehova ta pisa tur hende den un “balansa eksakto.” Meskos ku den e kaso di Jòb, Dios ta usa su norma perfekto di hustisia pa midi nos integridat komo su sirbidónan dediká.

7 Si nos bira hende tramposo òf engañoso, nos lo no ta manteniendo nos integridat na Dios. Hende íntegro a “renunsiá e kosnan skondí pa motibu di bèrgwensa” i no ta “kana ku astusia.” (2 Kor. 4:​1, 2) Pero kiko si nos kuminsá papia òf aktua na un manera tramposo i pone ku un ruman den fe mester pidi Dios yudansa? Malu pa nos! E eskritor di un salmo a kanta: “Den mi aflikshon mi a sklama na SEÑOR, i el a kontestá mi. Libra mi alma, o SEÑOR, for di lepnan mentiroso, for di lenga engañoso.” (Sal. 120:​1, 2) Ta bon pa kòrda ku Dios por wak loke nos ta di paden, i e ta ‘pone nos kurason i mente na prueba’ pa determiná si en bèrdat nos ta personanan íntegro.​—Sal. 7:​8, 9.

Trata Otro Hende Bon

8. Kon Jòb a trata otro hende?

8 Pa nos mantené nos integridat, nos mester ta manera Jòb, kende tabata hustu, humilde i bondadoso ku otro hende. El a bisa: ‘Si mi a  despresiá derecho di mi esklabo hòmber òf esklabo muhé ora nan a lanta un keho kontra mi, kiko mi por hasi anto ora Dios lanta; i ora ku e yama mi pa duna kuenta, kiko lo mi kontest’é? No ta Esun ku a traha mi den barika a traha nan? I no ta e Mesun a forma nos den barika?’​—Jòb 31:​13-15.

9. (a) Menshoná algun kualidat ku Jòb a demostrá den su trato ku su sirbidónan. (b) Kon nos tin ku trata otro hende?

9 Aparentemente, no tabatin ningun prosedura kompliká pa trata kasonan hurídiko den tempu di Jòb. Tabata atendé esakinan na un manera organisá, i asta un esklabo por a kuminsá un kaso den korte. Jòb a trata su sirbidónan na un manera hustu i miserikòrdioso. Si nos ke kana den integridat, nos tin ku demostrá e kualidatnan ei, foral si nos ta sirbi komo ansiano den e kongregashon kristian.

Sea Generoso, No Golos

10, 11. (a) Kon nos por sa ku Jòb tabata un hòmber generoso i kla pa yuda otro hende? (b) Jòb 31:​16-25 por laga nos kòrda riba ki konseho bíbliko ku a ser duná despues?

10 Jòb tabata un hòmber generoso i kla pa yuda otro hende; e no tabata egoista ni golos. El a bisa: “Si mi . . . a hasi wowo di e biuda faya, òf a kome mi boka di kuminda mi so, i e huérfano no a kome for di dje, . . . si mi a mira un hende peresé pa falta di paña, . . . si mi a lanta mi man kontra e huérfano, pasobra mi a mira ku mi tabatin yudansa den e porta di stat, laga mi skouder sali for di su lugá, i mi brasa wòrdu kibrá na èlebog.” Ademas, Jòb lo no tabata íntegro si el a deklará ku oro ta ‘su konfiansa.’​—Jòb 31:​16-25.

11 Tal bes e ekspreshonnan poétiko ei ta laga nos kòrda riba e palabranan akí di disipel Santiago: “Esaki ta e religion puru i sin mancha den bista di nos Dios i Tata: bishitá [òf, “kuida,” NW] huérfano i biuda den nan aflikshon, i konserbá bo mes liber di mancha di mundu.” (Sant. 1:27) Tambe nos por kòrda e siguiente spièrtamentu di Hesus: “Tene kuidou, i warda boso di tur golosidat; pasobra bida di hende no ta konsistí di e abundansia di e kosnan ku e tin.” Anto Hesus a sigui ku un ilustrashon tokante un hòmber riku i golos ku a muri, pasobra e no tabata “riku pa ku Dios.” (Luk. 12:​15-21) Pa nos ta hende íntegro, nos no mester sede na inklinashonnan pekaminoso manera kudishi òf golosidat. Golosidat ta idolatria pasobra ora un hende anhelá un kos na un manera haragan, e kos ta desviá su atenshon for di Yehova i ta bira manera un dios p’e. (Kol. 3:5) Integridat i golosidat no ta bai ku otro!

No Desviá for di Adorashon Berdadero

12, 13. Ki ehèmpel Jòb a pone den e asuntu di evitá idolatria?

12 Hende ku ta mantené nan integridat no ta desviá for di adorashon puru. Jòb sigur no a hasi esei, pasobra el a deklará: “Si mi a opservá solo ora ku e tabata bria, òf luna moviendo den splendor, i mi kurason a wòrdu engañá na sekreto, i mi man a tira un sunchi for di mi boka, esaki tambe lo tabata un inikidat ku mester a wòrdu husgá, pasobra lo mi a nenga e Dios aya riba.”​—Jòb 31:​26-28.

13 Jòb no a adorá kosnan sin bida. Si su kurason a ser engañá den sekreto ora el a mira solo òf luna, i si su ‘man a tira un sunchi for di su boka’ den un akto di idolatria, lo el a bira un adoradó di dios falsu ku a bira lomba pa Dios. (Deu. 4:​15, 19) Pa nos mantené nos integridat na Dios, nos tin ku evitá tur forma di idolatria.​—Lesa 1 Juan 5:21.

No Sea Renkoroso ni Hipókrita

14. Dikon nos por bisa ku Jòb no tabata un hòmber malisioso?

14 Jòb no tabata un hòmber malisioso ni kruel. E tabata sa ku un persona íntegro no por tabatin e karakterístikanan ei, pasobra el a bisa: “Mi a regosihá den destrukshon di mi enemigu, òf a sinti mi gosá ora maldat a bini riba dje?  Nò, mi no a permití mi boka peka dor di pidi un maldishon pa su bida.”​—Jòb 31:​29, 30.

15. Pakiko no ta korekto pa gosa ora algu malu pasa un hende ku ta odia nos?

15 Nunka Jòb, un hòmber rekto, no a gosa ora algu malu a pasa un hende ku a odi’é. Un proverbio ku a ser skirbí mas despues a spièrta: “No gosa ora bo enemigu kai, i no laga bo kurason ta kontentu ora ku e trompeká, pa SEÑOR no mira esaki i keda mal kontentu, i e kita su rabia for di riba dje.” (Pro. 24:​17, 18) Komo ku Yehova por lesa kurason, e sa si nos ta gosa den sekreto ora algu malu pasa un otro hende, i sigur lo e no aprobá tal aktitut. (Pro. 17:5) Dios por tuma medida kontra nos pa esei, pasobra e ta bisa: “Ami lo tuma vengansa. Ami lo paga bèk.”​—Deu. 32:35BPK.

16. Kon nos por ta hospitalario maske nos no ta riku?

16 Jòb tabata hospitalario. (Jòb 31:​31, 32) Ounke kisas nos no ta riku, tòg nos por ‘praktiká hospitalidat.’ (Rom. 12:13) Nos por invitá hende bin kome algu simpel serka nos, i kòrda ku ‘un tayó di bèrdura kaminda tin amor ta mihó ku un toro gòrdá ku tin odio huntu kuné.’ (Pro. 15:17) Asta un kuminda simpel, den kompania di un ruman kristian i den un ambiente di amor, por ta un okashon plasentero i spiritualmente edifikante.

17. Pakiko nos no mester purba skonde piká serio?

17 E hospitalidat ku Jòb a brinda otro hende sigur a edifiká nan spiritualmente, pasobra Jòb no tabata hipókrita. E no tabata manera e hendenan malbado ku a slùip drenta den e kongregashon di promé siglo i ku a “labia hende pa nan saka probecho.” (Hudas 3, 4, 16) Tampoko Jòb no a tapa su piká ni ‘skonde su inikidat den su bus,’ pa temor ku otro hende lo a menospresi’é si nan a haña sa di dje. E tabata dispuesto pa laga Dios samin’é, na kende lo e tabatin ku konfesá si tabata nesesario. (Jòb 31:​33-37) Si nos kometé un piká serio, laga nos no purba skonde e mal echo ei pa skapa kara. Kon nos por demostrá ku nos ta hasi esfuerso pa mantené nos integridat? Esei ta ora nos ta rekonosé nos fayo, repentí, buska yudansa spiritual i hasi tur loke ta posibel pa rektifiká e mal echo.​—Pro. 28:13; Sant. 5:​13-15.

Un Hòmber Íntegro Dilanti di Tribunal

18, 19. (a) Pakiko nos por bisa ku nunka Jòb no a probechá di ningun hende? (b) Kiko Jòb tabata dispuesto pa hasi si e tabata kulpabel?

18 Jòb tabata un hòmber onesto i hustu. P’esei, e por a bisa: “Si mi tera ta sklama na shelu kontra mi i si tur su riolnan ta yená ku lágrima, si mi no a duna hende nan pago hustu o si mi a laga trahadónan di kunuku púluwe [traha duru], sin mizerikòrdia, [laga] mata di sumpiña nase na lugá di trigo, yerba shimaron na lugá di sebada.” (Jòb 31:​38-40BPK) Nunka Jòb no a kue tereno di otro hende ni probechá di su trahadónan. Meskos kuné, nos tin ku mantené nos integridat na Yehova tantu den kosnan grandi komo den kosnan chikitu.

19 Jòb a papia dilanti di su tres kompañeronan i tambe e yònkuman Eliú tokante e manera ku el a hiba su bida. El a invitá ken ku por tabatin un keho kontra dje pa presentá nan akusashon kontra e registro di su bida, ku tabatin su “firma” bou di dje. Si a keda probá ku Jòb tabata kulpabel, e tabata dispuesto pa tuma su kastigu. Di manera ku el a presentá su kaso i a warda riba sentensia di e korte divino. Asina “e palabranan di Jòb a terminá.”​—Jòb 31:​35, 40.

 Bo Por Mantené Bo Integridat

20, 21. (a) Kiko a yuda Jòb mantené su integridat? (b) Kon nos amor pa Dios por krese?

20 Jòb por a mantené su integridat pasobra e tabata stima Dios, i Yehova na su turno a stim’é i a yud’é. Jòb a bisa Yehova: “Bo a duna mi bida i miserikòrdia, i bo kuido a preservá mi spiritu.” (Jòb 10:12) Ademas, Jòb a mustra amor na otro hende, ya ku e tabata sa ku ken ku keda sin stima su próhimo òf tene miserikòrdia di dje lo pèrdè su temor respetuoso pa e Todopoderoso. (Jòb 6:14NW) Pues, hende íntegro ta stima Dios i nan próhimo.​—Mat. 22:​37-40.

21 Nos por desaroyá amor pa Dios ora nos ta lesa su Palabra tur dia i meditá riba loke esaki ta revelá tokante dje. Pa medio di nos orashonnan sinsero, nos por alabá Yehova i gradisié pa e bondat ku e ta mustra na nos. (Fil. 4:​6, 7) Tambe nos por kanta na Yehova i benefisiá di asosiashon regular ku su pueblo. (Heb. 10:​23-25) Ademas, nos amor pa Dios lo krese segun ku nos ta sali den sirbishi i deklará “e bon nobo di su salbashon.” (Sal. 96:​1-3) Den e maneranan ei nos por mantené nos integridat, meskos ku e eskritor di un salmo ku a kanta: “Enkuanto ami, hala serka Dios ta bon pa mi. Den e Señor Soberano Yehova mi a pone mi refugio.”​—Sal. 73:28NW.

22, 23. Kon nos awe ta demostrá ku nos ta apoyá e soberania di Yehova, meskos ku e personanan íntegro di pasado?

22 Atraves di siglo, Yehova a duna hende íntegro diferente asignashon. Por ehèmpel, Noe a traha un arka i tabata “un predikadó di hustisia.” (2 Ped. 2:5) Josué a hiba e israelitanan e Tera Primintí, i e úniko motibu pakiko el a logra esei tabata pasobra el a lesa e “buki di lei . . . di dia i anochi” i a sigui su instrukshonnan. (Jos. 1:​7, 8) E kristiannan di promé siglo a hasi disipel i tabata reuní ku regularidat pa studia e Skritura.​—Mat. 28:​19, 20.

23 Ora nos ta prediká e mensahe di hustisia, hasi disipel, apliká konseho di Beibel i asistí huntu ku nos rumannan na reunion, asamblea i kongreso, nos ta apoyá e soberania di Yehova i ta mantené nos integridat. E aktividatnan ei ta duna nos kurashi, ta hasi nos spiritualmente fuerte i ta yuda nos kumpli ku e boluntat di Dios. No ta asina difísil pa mantené integridat i kumpli ku e boluntat di nos Tata selestial pasobra nos tin su sosten i esun di su Yu. (Deu. 30:​11-14; 1 Rei. 8:57) Ademas, nos tin e respaldo di henter nos hermandat, ku tambe ta kana den integridat i onra Yehova komo nan Señor Soberano.​—1 Ped. 2:17.

Kon Lo Bo Kontestá?

• Kon nos mester mira Yehova su normanan moral?

• Ki kualidatnan di Jòb spesialmente ta atraé bo?

• Manera Jòb 31:​29-37 ta indiká, kon Jòb a komportá su mes?

• Dikon ta posibel pa nos mantené nos integridat na Dios?

[Preguntanan di Estudio]

[Plachi na página 29]

Jòb a mantené su integridat na Yehova. Nos tambe por!

[Plachi na página 32]

Nos por mantené nos integridat!