Bai na kontenido

Bai na kontenido

Puntonan Sobresaliente di e Buki di Echonan

Puntonan Sobresaliente di e Buki di Echonan

 E Palabra di Yehova Ta Bibu

Puntonan Sobresaliente di e Buki di Echonan

E BUKI bíbliko Echonan ta duna un relato kompletu di e establesimentu di e kongregashon kristian i su ekspanshon. E historia aki, skirbí pa Dòkter Lukas, ta un relato bibu di aktividat kristian durante 28 aña, esta, di aña 33 te ku aña 61 di nos era.

E promé parti di Echonan ta trata prinsipalmente e aktividat di apòstel Pedro, i e último parti ta trata esun di apòstel Pablo. Usando e pronòmber “nos,” Lukas ta indiká ku e tabata presente ora sierto susesonan a tuma lugá. Si nos presta atenshon na e mensahe di e buki di Echonan, nos lo haña mas apresio pa e poder di Dios su Palabra skirbí i pa Su spiritu santu. (Heb. 4:12) Ademas, esaki lo edifiká nos fe den e speransa di Reino i motivá nos pa hasi sakrifisio propio.

PEDRO A USA “E YABINAN DI E REINO”

(Echo. 1:1–11:18)

Despues ku e apòstelnan a risibí spiritu santu, nan a duna testimonio ku kurashi. Pedro a usa e promé ‘yabi di e reino di shelu’ pa habri e porta di konosementu i oportunidat pa e hudiu- i prosélitonan ku a aseptá òf “risibí su palabra” por drenta e Reino. (Mat. 16:19; Echo. 2:​5, 41) Ounke un ola di persekushon a plama e disipelnan, esaki a sirbi pa ekspandé e trabou di prediká.

Ora e apòstelnan na Yerusalèm a tende ku Samaria a aseptá e palabra di Dios, nan a manda Pedro i Juan serka nan. Pedro a usa e di dos yabi ora el a duna e samaritanonan oportunidat pa drenta e Reino. (Echo. 8:​14-17) Kisas e asombroso transformashon di Saulo di Tarso a tuma lugá denter di un aña despues di Hesus su resurekshon. Na aña 36 di nos era, Pedro a usa e di tres yabi, i e don grátis di spiritu santu a ser bashá riba hende insirkunsidá di e nashonnan.​—Echo. 10:45.

Kontesta Riba Pregunta Bíbliko:

2:​44-47; 4:​34, 35—Dikon e kreyentenan a bende nan pertenensianan i parti e plaka? Hopi hende ku a bira kreyente a bini for di lugánan leu, i nan no tabatin sufisiente rekurso pa alargá nan estadia na Yerusalèm. Apesar di esei, nan kier a keda mas tantu tempu einan pa nan por a siña mas tokante nan fe nobo i pa duna testimonio na otro hende. Pa yuda e personanan ei, algun kristian a bende nan propiedat, i e fondonan a ser distribuí entre esnan den nesesidat.

4:13—Dikon e hendenan a bisa ku Pedro i Juan “no tabata hòmber eduká ni siñá”? Nan a bisa esei pasobra Pedro i Juan no a bai e skolnan ku e rabinan tabata dirigí pa haña edukashon religioso.

5:​34-39—Kon Lukas por tabata sa loke Gamaliel a bisa durante un seshon será di e Sanedrin? Tin por lo ménos tres posibilidat: (1) Pablo, kende anteriormente tabata un alumno di Gamaliel, a informá Lukas; (2) Lukas a puntra un miembro bondadoso di e Sanedrin, manera Nikodemo; (3) Lukas a risibí e informashon aki mediante inspirashon divino.

7:59—Esteban tabata hasi orashon na Hesus? Nò. Adorashon—i p’esei tambe, orashon—mester ta dirigí na Yehova Dios so. (Luk. 4:8; 6:12) Bou di sirkunstansianan normal, Esteban lo a hasi orashon na Yehova den e nòmber di Hesus. (Juan 15:16) Pero den e kaso aki, Esteban a haña un vishon di “e Yu di hende pará na man drechi di Dios.” (Echo. 7:56) Esteban tabata bon konsiente ku Dios a duna Hesus e poder di resusitá e mortonan. P’esei, el a papia direktamente ku Hesus i a pidié pa kòrda riba dje durante e resurekshon. Pues, e no a hasi orashon na Hesus.​—Juan 5:​27-29.

Lès pa Nos:

1:8. E trabou mundial di predikashon ku Testigunan di Yehova ta hasi no por ser realisá sin yudansa di e spiritu santu.

4:36–5:11. Hosé di Chipre tabatin e beinam Barnabas, ku ta nifiká “Yu di Konsolashon.” Podisé e apòstelnan a dun’é e nòmber Barnabas pasobra e tabata un hòmber kariñoso i bondadoso ku gusta yuda hende. Nos mester ta manera é i no manera Ananias i Safira, kendenan a usa engaño, hipokresia i maña.

9:​23-25. Ora nos ta hui di nos enemigunan pa por sigui prediká, esei no ta un akto di kobardia.

9:​28-30. Si dunamentu di testimonio den sierto barionan òf na sierto personanan bira peligroso—den sentido moral, físiko òf spiritual—nos mester ta prudente i selektivo pa loke ta e ora i lugá di prediká.

9:31. Durante tempunan relativamente trankil, nos mester hasi esfuerso pa fortifiká nos fe mediante estudio i meditashon. Esaki lo yuda nos kana den temor di Yehova dor di apliká loke nos ta siña i ser diligente den nos sirbishi.

 PABLO A PREDIKÁ DILIGENTEMENTE

(Echo. 11:19–28:31)

Na aña 44 di nos era, Agabo a bai Antiokia, kaminda Barnabas i Saulo tabatin “henter un aña” ta siña e hendenan. Agabo a profetisá di “un hamber grandi” ku a tuma lugá dos aña despues. (Echo. 11:​26-28) “Despues ku nan a kaba di kumpli ku nan ministerio,” Barnabas i Saulo a regresá Antiokia. (Echo. 11:​29, 30; 12:25) Na aña 47—rònt di 12 aña despues ku Saulo a kombertí—mandá pa spiritu santu, Barnabas i Saulo a bai riba nan biahe di misionero. (Echo. 13:​1-4) Na aña 48, nan a regresá Antiokia, “unda nan a ser konfiá ku e bondat inmeresí di Dios.”​—Echo. 14:26NW.

Mas o ménos nuebe luna despues, Pablo (konosí tambe komo Saulo) a skohe Silas komo su kompañero i a kuminsá su di dos gira. (Echo. 15:40) Timoteo i Lukas a djòin Pablo na kaminda. Lukas a keda na Filipos miéntras ku Pablo a sigui bai Atenas i despues Korinto, kaminda el a topa ku Akila i Prisila. I einan, el a keda un aña i seis luna. (Echo. 18:11) Pablo a laga Timoteo i Silas na Korinto, i huntu ku Akila i Prisila el a nabegá rumbo pa Siria na prinsipio di aña 52. (Echo. 18:18) Akila ku Prisila a kompañá Pablo te na Efeso, kaminda nan dos a keda atras.

Despues ku Pablo a keda algun tempu na Antiokia di Siria, el a kuminsá su di tres gira na aña 52. (Echo. 18:23) Na Efeso, ‘e palabra di Yehova tabata sigui krese i prevalesé.’ (Echo. 19:20) Pablo a keda rònt di tres aña einan. (Echo. 20:31) Na Pentekòste di aña 56, Pablo tabata na Yerusalèm. Despues ku el a ser arestá, el a duna testimonio sin miedu na e outoridatnan. Na Roma nan a pone apòstel Pablo bou di aresto den su mes kas pa dos aña. (rònt di 59-61) I for di einan, el a haña maneranan pa prediká tokante e Reino i siña hende “enkuanto Señor Hesukristu.”​—Echo. 28:​30, 31.

Kontesta Riba Pregunta Bíbliko:

14:​8-13—Dikon e hendenan na Listra a yama “Barnabas Júpiter” (Zeus) i Pablo “Merkurio” (Hermes)? Zeus tabata e gobernante di e diosnan den mitologia griego, i su yu hòmber Hermes tabata konosí pa su elokuensia. Siendo ku Pablo ta esun ku a hiba delantera ora di papia, e hendenan na Listra a yam’é Hermes i Barnabas nan a yama Zeus.

16:​6, 7—Dikon spiritu santu a prohibí Pablo i su kompañeronan di prediká den e distritonan di Asia i Bitinia? Tabatin masha poko trahadó. P’esei, spiritu santu a dirigí nan na teritorionan ku tabata mas fruktífero.

18:​12-17—Dikon Prokónsul Galion no a interferí ora e opservadónan a kuminsá bati Sóstenes? Podisé Galion a pensa ku e hòmber ku aparentemente tabata e lider di e multitut ku a ataká Pablo tabata hañando loke el a meres’é. Sin embargo, ta parse ku e insidente aki tabatin bon resultado, ya ku esaki a pone ku Sóstenes a kombertí i bira kristian. Despues, Pablo a papia di Sóstenes komo “nos ruman.”​—1 Kor. 1:1.

18:18—Ki promesa Pablo a hasi? Algun erudito ta pensa ku Pablo a hasi un promesa di nazareo. (Num. 6:​1-21) Sin embargo, Beibel no ta bisa ta ki promesa òf voto Pablo a hasi. Ademas, e Skritura no ta menshoná si ta promé òf despues ku Pablo a kombertí el a hasi e promesa òf voto ei. Beibel no ta bisa tampoko si ta e ora ei el a hasi e promesa ni si ta kumpli el a kaba di kumpli kuné. Sea kual sea tabata e kaso, no tabata malu pa hasi e promesa òf voto ei.

Lès pa Nos:

12:​5-11. Nos por i mester hasi orashon pa nos rumannan.

12:​21-23; 14:​14-18. Herodes tabata kla pa aseptá gloria ku hende mester a duna solamente na Dios. Ki un aktitut distinto for di esun di Pablo i Barnabas! Mesora i enfátikamente, nan sí a rechasá alabansa i onor ku nan no a meresé. Nos no mester deseá pa hende duna nos gloria pa nada ku nos por logra den sirbishi di Yehova.

14:​5-7. Un aktitut kouteloso por yuda nos keda aktivo den sirbishi.​—Mat. 10:23.

14:22. Kristiannan ta ferwagt tribulashon. Nan no ta purba skapa di esaki dor di komprometé nan fe.​—2 Tim. 3:12.

16:​1, 2Hóbennan kristian mester traha duru den nan sirbishi na Dios den e kongregashon i buska Yehova su yudansa pa nan por tin un bon reputashon.

16:3. Nos mester hasi tur loke nos por na armonia ku prinsipionan bíbliko pa hasi e bon nobo aseptabel pa otro hende.​—1 Kor. 9:​19-23.

20:​20, 21. Predikashon di kas pa kas ta un rasgo masha importante di nos ministerio.

20:24; 21:13. Mantené nos integridat na Dios ta mas importante ku preservá nos bida.

21:​21-26. Nos mester ta ansioso i dispuesto pa aseptá bon konseho.

25:​8-12. Awe, kristiannan por i mester hasi uso di e medionan legal disponibel den nan “defensa i konfirmashon di e evangelio” òf bon nobo.​—Fil. 1:7.

26:​24, 25. Nos mester papia “palabranan di bèrdat i di sano huisio” ounke nan ta lokura pa “un hende ku no ta spiritual.”​—1 Kor. 2:14.

[Plachi na página 11]

Na ki tempu Pedro a usa “e yabinan di e reino”?

[Plachi na página 11]

E trabou mundial di predikashon no por ser hasí sin yudansa di e spiritu santu