Bai na kontenido

Bai na kontenido

“Si Kingsley Por, Mi Tambe Por!”

“Si Kingsley Por, Mi Tambe Por!”

KINGSLEY a kuminsá ku su parti di lesamentu di Beibel ora el a sinti un tek riba su skouder. Esaki tabata su promé parti den e Skol di Ministerio Teokrátiko. Ku masha kuidou el a pronunsiá kada palabra, sin falta niun sílaba. Pero warda! Dikon e no tabata wak den su Beibel?

Kingsley tabata siegu i a biba na Sri Lanka. E no tabata tende bon, i e mester a usa un ròlstul p’e por a move. Kon el a siña konosé Yehova i logra kualifiká pa partisipá den e Skol di Ministerio Teokrátiko? Laga mi splika.

E promé biaha ku m’a topa Kingsley, m’a keda impreshoná pa e deseo ku e tabatin di siña e bèrdat ku tin den e Palabra di Dios. El a yega di studia Beibel ku vários Testigu, i su ehemplar na braille di e buki Conocimentu cu Ta Hiba na Bida Eterno tabata tur gastá. * M’a ofres’é un estudio di Beibel i el a aseptá, pero tabatin dos problema grandi.

Di promé, Kingsley tabata biba ku vários otro hende den un kas di kuido. Komo ku semper tabatin zonido den background i Kingsley no tabata tende bon, mi tabatin ku papia masha duru mes. De echo, tur hende den e kas di kuido tabata skucha nos estudio semanal!

 Di dos, Kingsley tabatin masha problema pa lesa i kapta hopi informashon, pues su progreso tabata slo. Pues, pa e periodo di estudio por ta mas produktivo, e tabata prepará masha bon mes: E tabata lesa e buki bes tras bes, buska e tekstonan den su Beibel na braille i despues pensa kon pa kontestá e preguntanan. E método akí a resultá masha efektivo. Durante e estudio, e tabata sinta pia krusá riba un klechi i tabata splika ku entusiasmo i ku stèm masha duru loke el a komprondé. No a dura muchu ku m’a kuminsá bishit’é dos biaha pa siman i kada estudio tabata dura dos ora!

KINGSLEY TA BAI REUNION I TA PARTISIPÁ

Kingsley ku Paul

Kingsley tabata ansioso pa bai reunion na Salòn di Reino, pero esei no tabata fásil. E tabatin mester di yudansa pa sinta den su ròlstul, pa hink’é den outo i pa baha drenta den Salòn di Reino. Ma e rumannan tabata yud’é bùrt pa bùrt i pa nan esei tabata un privilegio. Durante reunion, Kingsley tabata sinta ku un spiker na su orea, i e tabata skucha ku atenshon i asta duna komentario!

Despues ku Kingsley a studia pa un tempu, el a disidí di skirbi su nòmber den e Skol di Ministerio Teokrátiko. Dos siman promé ku su promé parti di lesamentu di Beibel, m’a puntr’é si el a praktiká. Mesora el a kontestá mi: “Sí, Ruman. M’a praktiká un 30 biaha asina.” M’a felisit’é pa su esfuerso i a puntr’é si mi por tende e lesamentu. El a habri su Beibel, pone su dede riba e teksto di braille i kuminsá lesa. Pero m’a nota ku su dedenan no tabata move riba e blachi manera un hende siegu ta hasi normalmente. Logá, el a siña henter e lesamentu di Beibel fo’i kabes!

Mi no por a kere. Awa tabata basha for di mi wowo segun ku mi tabata wak e ku atenshon. Ora Kingsley a kaba di lesa, m’a puntr’é kon bini e por a kòrda henter e teksto asina bon siendo ku ta 30 biaha so el a praktiká. El a kontestá mi: “Nò, Ruman. M’a praktiká un 30 biaha pa dia.” Imaginá bo! Mas ku un luna largu, Kingsley a sinta lesa riba su klechi, i el a keda lesa e versíkulonan te ora ku e tabata sa nan fo’i kabes.

Por fin a yega e dia ku Kingsley tabatin su promé parti. Ora el a kaba di lesa, e rumannan a bati man ku smak. Hopi ruman a yora ora nan a mira e determinashon di e studiante nobo akí di e skol. Un publikadó, ku a stòp di duna parti den skol pasobra e tabata bira nèrvioso, a pidi pa bolbe skirbi su nòmber den skol. Dikon? El a bisa: “Si Kingsley por, mi tambe por!”

Dia 6 di sèptèmber 2008, despues di a studia Beibel pa tres aña, Kingsley a simbolisá su dedikashon na Yehova mediante boutismo. El a sirbi Dios fielmente te na su morto dia 13 di mei 2014, i el a muri ku e speransa di sigui sirbi Yehova den Paradeis ku vigor i salú perfekto. (Isa. 35:5, 6)—Segun e relato di Paul McManus.

^ par. 4 Publiká na 1995. No ta disponibel mas.