Bai na kontenido

Bai na kontenido

Kiko Por Yuda Nos Keda Moralmente Limpi?

Kiko Por Yuda Nos Keda Moralmente Limpi?

“Limpia boso man, . . . i purifiká boso kurason.” —SANT. 4:8.

1. Kiko mundu ta pensa di puresa moral?

PURESA moral a bai fo’i moda. Hopi hende ta pensa ku homoseksualidat i relashon seksual entre hende ku no ta kasá ku otro ta kosnan masha normal. Asta den propaganda i den e mundu di entretenimentu nan ta presentá esakinan komo un estilo di bida aseptabel. (Sal. 12:8) Inmoralidat a plama asina tantu ku tin biaha ta parse ku ta imposibel pa nos hiba un bida desente. Si bo a yega di pensa asina, no desanimá. Ku yudansa di Yehova, nos por keda moralmente limpi, òf desente, den un mundu inmoral.—Lesa 1 Tesalonisensenan 4:3-5.

2, 3. (a) Dikon ta asina importante pa lucha kontra mal deseo? (b) Kiko nos lo trata den e artíkulo akí?

2 Awor bon, e promé kos ku nos mester komprondé ta ku pa hiba un bida moralmente limpi, nos mester rechasá deseonan inmoral. Dikon? Pasobra nan ta manera as ku ta atraé piská na un anzue. Debí ku nos ta imperfekto, inmoralidat por ta masha atraktivo. Si nos no rechasá pensamentu inmoral i mal deseo  mesora, nan por bira asina fuerte ku nos no ta logra resistí nan. E ora ei, asta un sirbidó di Yehova lo por aktua riba su mal deseo i kometé inmoralidat asina ku un oportunidat presentá. Manera Beibel ta bisa: “Ora nutri e deseo, e ta duna lus na piká.”—Lesa Santiago 1:14, 15.

3 Lo bo keda sorprendí kon lihé un deseo por krese i pone bo kometé un piká serio. Pero ta un alivio pa sa ku si nos aktua mesora i no laga mal deseo saka rais den nos kurason, nos por evitá no solamente e piká di inmoralidat, sino tambe su konsekuensianan amargo. (Gal. 5:16) Den e artíkulo akí nos lo bai trata tres kos ku por yuda nos den e lucha kontra mal deseo: nos amistat ku Yehova, e konsehonan di Beibel i e yudansa di rumannan maduro den kongregashon.

“HALA SERKA DIOS”

4. Dikon ta importante pa nos hala serka Yehova?

4 Pa nos haña protekshon, nos tin ku hala serka Dios. I Beibel ta bisa tur hende ku ke hala serka dje: “Limpia boso man, . . . i purifiká boso kurason.” (Sant. 4:8) Ora nos ta balorá nos amistat ku Yehova, nos ta hasi nos bèst pa tur nos akshonnan—i asta nos pensamentunan—agrad’é. Nos ta purba di tene nos kurason limpi dor di okupá nos mente ku pensamentunan puru, desente i digno. (Sal. 24:3, 4; 51:6; Flp. 4:8) Yehova ta komprondé ku nos ta imperfekto i ku nos ta inkliná na sinti deseonan ku no ta bon. Pero nos tambe mester komprondé ku ta duel e kada biaha ku nos laga pensamentunan inmoral drenta nos mente sin ku nos ta hasi nada pa rechasá nan. (Gén. 6:5, 6) Si nos meditá riba esaki, nos lo bira mas determiná pa tene nos pensamentunan limpi.

5, 6. Kon orashon por yuda nos lucha kontra deseonan inmoral?

5 Yehova lo duna nos e yudansa nesesario pa lucha kontra pensamentunan inmoral si nos pidié yuda nos. Pa medio di orashon nos ta hala serka dje i e, na su turno, tambe ta hala serka nos. Lo e duna nos su spiritu santu na abundansia pa duna nos e forsa pa resistí pensamentunan inmoral i asina keda limpi. Pues, bisa Yehova ku bo ke pa e meditashon di bo kurason, esta, bo pensamentunan, agrad’é. (Sal. 19:14) Nos por pidié humildemente pa saminá nos i yuda nos mira si nos tin kualke “kaminda di maldat”—kualke deseo òf pensamentu inkorekto—ku lo por hiba nos na piká. (Sal. 139:23, 24) Nos ta pidi Yehova kontinuamente pa yuda nos keda firme ora nos haña nos ku tentashon?—Mat. 6:13.

6 Tin biaha, nos kriansa òf kondukta di pasado ta pone ku nos ta sinti nos mes atraí na kosnan ku Yehova ta kondená. Asta ora esei ta e kaso, Dios por yuda nos hasi e kambionan nesesario pa asina nos por hasi loke ta agrad’é. Tuma, por ehèmpel, Rei David. Despues ku el a kometé adulterio ku Bètsabé, el a roga Yehova: “Krea den mi un kurason limpi, . . . i renobá un spiritu rekto den mi.” (Sal. 51:10, 12) Aunke e deseo pa kometé inmoralidat ta masha fuerte, Yehova por hasi nos deseo pa obedes’é asta mas fuerte ku mal deseo. Aunke mal deseo por ta ankrá den nos kurason i nos tin masha problema pa tene nos pensamentunan limpi, Yehova por yuda nos obedesé su mandamentunan i hiba un bida limpi. E por yuda nos resistí pensamentunan impuru.—Sal. 119:133.

Si nos ripará ku un mal deseo ta kuminsá saka rais den nos kurason, nos tin ku rank’é mesora (Wak paragraf 6)

“KUMPLI KU E PALABRA”

7. Kon Beibel por protehá nos kontra mal deseo?

7 Un di e maneranan ku Yehova ta kontestá  nos orashonnan ta pa medio di su Palabra. E sabiduria di Beibel ta “na promé lugá puru.” (Sant. 3:17) Si nos ta lesa e Palabra di Dios tur dia i ta meditá riba loke nos ta lesa, esei lo yuda nos protehá nos mente kontra pensamentunan inmoral. (Sal. 19:7, 11; 119:9, 11) Ademas, den Beibel nos ta haña ehèmpel- i konsehonan útil ku por yuda nos pa no entregá na mal deseo.

8, 9. (a) Kiko a hiba un mucha hòmber na peka ku un muhé inmoral? (b) Den ki situashonnan aktual nos por apliká e spièrtamentu di Proverbionan kapítulo 7?

8 Proverbionan 5:8 ta bisa: “Tene bo kaminda leu for di e adúltera [e muhé inmoral], i no yega serka di su porta di kas.” Un hende ku no ta hasi kaso di e konseho ei ta kore un peliger grandi, manera Proverbionan kapítulo 7 ta mustra. Einan nos ta lesa di un mucha hòmber ku a bai dal un keiru banda di e kas di un muhé inmoral. Tabata birando anochi. E muhé, ku kisas tabata bistí na un manera provokativo, a aserká e hóben, kue tene, sunch’é i bis’é kosnan ku a lanta deseonan den dje ku e no a logra resistí i al final el a tene relashon ku e muhé. Parse ku e hóben no a sali kas ku e intenshon di kometé inmoralidat. E no tabatin eksperensia i tabata falta  komprondementu. Ma awor e tabatin ku biba ku e konsekuensianan desastroso di su akshon. Mihó el a keda leu for di e muhé!—Pro. 7:6-27.

9 Algu similar lo por pasa ku nos? Por sosodé ku nos ta aktua ku falta di komprondementu i ta eksponé nos mes na situashonnan peligroso ku ta lanta deseonan inkorekto den nos. Por ehèmpel, mas lat anochi tin mas chèns ku televishon ta presentá programanan ku no ta apropiá pa kristian. Kiko lo por pasa si nos ta sinta kambia kanal djis pa wak kiko tin na televishon? Ademas, ta peligroso pa klek riba lenk di Internet ku nos no sa na kua website nan ta bai i pa bishitá chat room òf website ku tin propaganda pa wak pornografia òf ku ta ofresé servisionan seksual. Ora nos ta frekuentá websitenan asina, diripiente nos por haña nos ku kosnan inmoral. Lo no ta mas difísil e ora ei pa nos keda moralmente limpi?

10. Dikon flirtmentu ta peligroso? (Wak e promé plachi.)

10 Beibel ta duna nos konseho tambe tokante e manera pa trata ku e sekso opuesto. (Lesa 1 Timoteo 5:2.) E pasashi ei ta mustra bon kla ku flirtmentu no ta bon. Tin hende ta pensa ku no tin nada malu si nan ta flirt ku mirada, gesto òf ku e lenguahe di nan kurpa, ya ku no tin niun kontakto físiko. Ma kristiannan ta duna atenshon romántiko solamente na nan kasá òf na e persona ku nan lo ke kasa kuné. Ora dos hende ta flirt ku otro, nan por kuminsá haña pensamentunan impuru ku por hiba na piká seksual serio. No balotá e peliger ei. El a pasa ku hopi hende kaba.

11. Ki bon ehèmpel Yosef a laga pa nos?

11 Yosef a laga un bon ehèmpel pa nos. Ora e kasá di su doño, Potifar, a purba di sedusié, el a rechas’é. Ma e muhé no a legumai e asuntu. Dia aden dia afó e tabata pidi Yosef “pa ta serka dje.” (Gén. 39:7, 8, 10) Segun un analista di Beibel, ta komo si fuera e muhé a invitá Yosef pa nan pasa un ratu huntu nan dos so, ku e speransa ku Yosef lo a tuma e inisiativa pa bai mas leu. Ma Yosef tabata determiná pa no duna e muhé e impreshon ku e tabata gusta e avansenan romántiko ei. E no a flirt ku e muhé, i el a nenga di reakshoná riba e flirtmentu di e muhé; asina el a evitá ku mal deseo a krese den su kurason. Finalmente, ora e kasá di Potifar a purba di oblig’é pa tene relashon kuné, Yosef no a dun’é un chèns. El “a laga su paña den man di e muhé i a hui, i a sali bai pafó.”—Gén. 39:12.

12. Dikon nos sa ku loke nos ta wak por afektá nos kurason?

12 Beibel ta spièrta nos tambe ku nos wowo por afektá nos kurason i krea mal deseo seksual. Hesus a bisa: “Ken ku sigui wak un muhé ku pashon, ya kaba a kometé adulterio kuné den su kurason.” (Mat. 5:28) Kòrda ku ta esei ta loke a pasa ku Rei David: “For di riba dak el a mira un muhé ta baña.” (2 Sam. 11:2) Na e momento ei e mester a bira su kara i pensa riba otro kos, pero e no a hasié. Esaki a pon’é kuminsá deseá e muhé di un otro hòmber, i el a kometé adulterio kuné.

13. (a) Dikon nos tin ku sera un pakto ku nos wowonan? (b) Kiko e pakto ei ta enserá?

13 Si nos ke rechasá fantasianan inmoral, nos tin ku ‘sera un aliansa—òf un pakto—ku nos wowonan,’ manera Yòb a hasi. (Yòb 31:1, 7, 9) Na moda di papia, nos ta palabrá seriamente ku nos mes ku nos lo no permití nos wowonan wak otro hende ku intenshonnan inmoral. Esaki ke men ku nos lo kita nos bista mesora si nos mira un plachi sensual òf erótiko riba kòmpiuter,  bòrchi di propaganda, portada di revista òf kualke otro kaminda.

14. Kiko nos mester hasi pa nos keda moralmente limpi?

14 Kiko si bo ta sinti ku den bo lucha kontra mal deseo bo tin ku traha riba algun aspekto di loke nos a kaba di trata? Wèl, tuma akshon mesora. Pone e konseho di e Palabra di Dios na práktika; asina bo ta evitá di kometé piká i lo bo por keda puru.—Lesa Santiago 1:21-25.

“YAMA E ANSIANONAN”

15. Dikon ta importante pa nos pidi yudansa si nos tin problema den nos lucha kontra mal deseo?

15 Kiko si nos tin problema pa resistí mal deseonan seksual? No lubidá ku nos ta konta ku rumannan maduro i kapas ku gustosamente lo yuda nos. Klaru ku no ta fásil pa papia tokante un asuntu asina personal, pero si bo tuma un kurashi i deshogá bo serka un ruman maduro, lo e por yuda bo deskubrí peligernan ku kisas bo no a ripará promé. Podisé bo ta bezig ta minimisá bo problema òf hustifiká bo akshonnan. (Pro. 18:1; Heb. 3:12, 13) E ruman lo por yuda bo korigí e inklinashon ei. Esaki lo permití bo hasi e kambionan nesesario pa bo no pèrdè e aprobashon di Yehova.

16, 17. (a) Kon e ansianonan por yuda hende ku tin problema pa resistí mal deseo? Duna un ehèmpel. (b) Dikon ta importante pa rumannan ku ta wak pornografia pidi yudansa mesora?

16 E ansianonan den nos kongregashon ta esnan mihó kualifiká pa yuda nos. (Lesa Santiago 5:13-15.) Un yònkuman di Brazil tabatin años ta lucha kontra mal deseo. El a konta: “Mi tabata sa ku Yehova no tabata gusta mi pensamentunan, pero mi tabatin muchu bèrgwensa di konta un hende.” Afortunadamente, un ansiano a realisá ku e yònkuman tabatin mester di yudansa i a anim’é pa laga e ansianonan yud’é. Ku ki resultado? E hóben a bisa: “E ansianonan tabata masha kariñoso i komprensivo ku mi. Esei a sorprendé mi, pasobra mi tabata sinti ku mi no a meresé un trato asina. Nan a skucha mi ku atenshon. Nan a usa Beibel pa kòrda mi ku Yehova stima mi, i nan a hasi orashon ku mi. Tur esei a yuda mi aseptá e konseho ku nan a duna mi for di Beibel.” Añanan despues, e yònkuman akí a hasi bon progreso spiritual, i el a komentá: “Awor mi sa ku ta mihó bo buska yudansa ku lucha bo so kontra mal deseo.”

17 Ta importante pa pidi yudansa foral si bo tin e kustumber di wak pornografia. Mas bo tarda pa buska yudansa, mas grandi e chèns ta bira ku mal deseo ta pone bo kometé un piká ku ta hasi daño na e hendenan rònt di bo i susha e nòmber di Yehova. Hopi ruman a pidi e ansianonan yuda nan i a aseptá nan konsehonan, ya ku nan kier a agradá Yehova i keda den e kongregashon.—Sant. 1:15; Sal. 141:5; Heb. 12:5, 6.

NO ENTREGÁ!

18. Kiko bo ta determiná pa hasi?

18 Yehova lo mester ta sintié hopi orguyoso di su sirbidónan, pasobra apesar ku e mundu di Satanas ta bai di malu pa pió, nan sí ta luchando tur ku tin pa rechasá mal pensamentu i pa obedesé Yehova su normanan moral haltu. Pues, no entregá! Laga nos keda serka di Yehova, i aseptá e guia ku e ta duna nos pa medio di su Palabra i e kongregashon kristian. Si nos keda moralmente limpi, nos lo sinti un gran pas i satisfakshon. (Sal. 119:5, 6) I den futuro, despues ku Satanas ser eliminá, nos lo tin e privilegio di biba pa semper den un mundu liber di su influensia inmoral.