Bai na kontenido

Bai na kontenido

Kiko Nos Por Siña for di e Ilustrashon di e Talentonan?

Kiko Nos Por Siña for di e Ilustrashon di e Talentonan?

“El a duna e promé esklabo sinku talento di moneda di plata; e di dos esklabo, dos talento; i e di tres esklabo, ún talento.”—MAT. 25:15.

1, 2. Dikon Hesus a konta e ilustrashon di talento?

DEN e ilustrashon di talento, Hesus a mustra bon kla kiko ta e responsabilidat di su siguidónan ungí. Pero sea ku nos tin e speransa di biba den shelu òf riba tera, nos tin ku komprondé e nifikashon di e ilustrashon pasobra e tin di haber ku tur kristian berdadero.

2 Hesus a konta e ilustrashon akí ora su apòstelnan a puntr’é tokante “e señal di [su] presensia i di konklushon di e era akí.” (Mat. 24:3) Pues, e ilustrashon ta papia di susesonan ku ta kumpli den nos tempu i ku ta parti di e señal ku ta indiká ku Hesus ya ta goberná komo Rei.

3. Kiko nos ta siña for di e ilustrashonnan di Mateo kapítulo 24 i 25?

3 E ilustrashon di talento ta un di e kuater ilustrashonnan ku nos ta haña na Mateo 24:45 pa 25:46. E otro tresnan ta papia di e esklabo fiel i prudente, di e 10 bírgennan i di karné i kabritu. Nan tur ta forma parti di e kontesta ku Hesus a duna riba e pregunta tokante kiko ta e señal di su presensia. I nan tur kuater ta deskribí kualidatnan ku lo a identifiká e berdadero siguidónan di Hesus den e tempu di fin. E ilustrashonnan di e esklabo  fiel, di e bírgennan i di e talentonan ta dirigí na kristiannan ungí. Kiko nos ta siña for di e ilustrashonnan akí? Den esun di e esklabo fiel, Hesus a enfatisá ku e grupo chikitu di kristian ungí ku tin e responsabilidat di duna kuminda na e sirbidónan di kas mester ta fiel i prudente. Den esun di e bírgennan, Hesus a indiká bon kla ku tur e ungínan mester ta prepará i mester keda vigilá, ya ku nan no sa ni e dia ni e ora ku Hesus lo bini. Den esun di e talentonan, Hesus a mustra ku e ungínan mester ta diligente, es desir, nan mester traha duru pa kumpli ku nan responsabilidatnan kristian. E último ilustrashon, esun di karné i kabritu, Hesus a dirigí na hende ku tin e speransa di biba riba tera. El a enfatisá ku nan mester ta leal i apoyá e rumannan ungí di Hesus plenamente. * Laga nos analisá awor e ilustrashon di talento.

E DOÑO TA DUNA SU ESKLABONAN HOPI PLAKA

4, 5. (a) Ken e hòmber, òf doño, di e ilustrashon ta representá? (b) Kuantu un talento tabata bal den tempu di Hesus?

4 Lesa Mateo 25:14-30. Nos publikashonnan a yega di splika ku e hòmber, òf doño, den e ilustrashon ta representá Hesus i ku el a biaha pa eksterior ora el a subi na shelu na aña 33 di e promé siglo. Hesus a bisa den un ilustrashon similar ku e propósito di su biahe tabata “pa keda koroná komo rei.” (Luk. 19:12) Ma ora Hesus a subi na shelu, e no a bira Rei mesora. * Mas bien, el “a sinta na man drechi di Dios, sperando djei padilanti te ora Dios pone su enemigunan komo banki pa su pia.”—Heb. 10:12, 13.

5 Hesus a bisa ku e hòmber den e ilustrashon tabatin ocho talento; esaki tabata hopi plaka, un fortuna inmenso den e tempu ei. * Promé ku e hòmber a bai di biahe, el a repartí e talentonan entre su esklabonan pa nan hasi negoshi ku nan durante su ousensia. Meskos ku e hòmber ei, Hesus tambe tabatin algu di gran balor promé ku el a subi na shelu. Kiko esei tabata? E obra ku el a dediká su bida na dje.

6, 7. Kiko e talentonan ta representá?

6 E trabou di prediká tabata masha importante pa Hesus i, komo resultado, hopi hende a bira su disipel. (Lesa Lukas 4:43.) Pero e tabata sa ku ainda tabatin hopi trabou di hasi i ku mas hende lo a aseptá e bon notisia. De echo, el a bisa su disipelnan: “Hisa boso kara wak e kunukunan; nan ta kla pa kosechá.” (Huan 4:35-38) Kiko e tabata ke men ku esei? Wèl, e tabata pensa riba e tantísimo hendenan di bon kurason, kendenan ku tempu lo a bira su disipel. Meskos ku un bon kunukero lo no bai laga un kunuku ku ta kla pa kosechá, Hesus tampoko lo no a bai laga e hendenan ei pa nan kuenta. P’esei, djis promé ku el a subi na shelu, el a bisa su disipelnan: “Bai, i hasi hende di tur nashon mi disipel.” (Mat. 28:18-20) Pues, Hesus a konfia nan ku un tarea importante, un tesoro masha balioso: e sirbishi kristian.—2 Kor. 4:7.

7 Kiko nos por konkluí for di esaki? Bon mirá, ora Hesus a duna su siguidónan e tarea pa bai hasi disipel, el a “enkargá nan ku su pertenensianan,” sí, ku su talentonan.  (Mat. 25:14) Ku otro palabra, e talentonan ta representá e responsabilidat di prediká i hasi disipel.

8. Aunke e esklabonan no a haña e mesun kantidat di talento, kiko e doño a ferwagt di nan?

8 Hesus a konta ku e doño tabatin tres esklabo. El a duna e promé esklabo sinku talento, e otro dos talento i e último un talento so. (Mat. 25:15) Aunke e esklabonan no a haña e mesun kantidat di talento, e doño a ferwagt sí ku nan tur tres lo ta diligente i hasi negoshi ku e talentonan. Kiko esaki ta nifiká? Hesus ta ferwagt ku su siguidónan ta hasi nan bèst den e trabou di prediká. (Mat. 22:37; Kol. 3:23) Na Pentekòste di aña 33, e disipelnan di Hesus a kuminsá hasi negoshi ku e talentonan. Ora nos lesa e buki di Echonan, nos ta mira bon kla kon duru nan a traha den e trabou di prediká i di hasi disipel. *Echo. 6:7; 12:24; 19:20.

HASIENDO NEGOSHI KU E TALENTONAN DEN E TEMPU DI FIN

9. (a) Kiko e dos esklabonan fiel a hasi ku e talentonan, i kiko esaki ta indiká? (b) Kiko ta e papel di e ‘otro karnénan’?

9 Den e tempu di fin, spesialmente di 1919 en adelante, e fiel kristiannan ungí a  hasi bon negoshi ku e talentonan di e Doño. Meskos ku e promé dos esklabonan di e ilustrashon, e rumannan ungí a hasi nan bèst den e trabou di prediká. Den e ilustrashon, un esklabo a haña sinku talento i e otro dos talento. Akaso esaki tin un nifikashon spesial? Nò. E punto ta ku tur dos a traha duru i a gana dòbel e kantidat ku nan a risibí. Pero kiko ta e papel di e ‘otro karnénan,’ es desir, e kristiannan ku tin e speransa di biba riba tera? Nan tin un papel importante! Den Hesus su ilustrashon di karné i kabritu, nos ta mira ku nan tin e privilegio di apoyá e rumannan ungí di Kristu. Durante e tempunan krítiko di e último dianan akí, e dos gruponan ta traha unidamente, komo “ún tou,” den e trabou di prediká i hasi disipel.—Huan 10:16.

10. Menshoná un aspekto di e señal ku ta proba ku nos ta den e tempu di fin.

10 E Doño naturalmente ta spera resultado. Manera nos a mira, e disipelnan fiel di e promé siglo a traha diligentemente den e trabou di prediká i hasi disipel i a oumentá e pertenensianan di e Doño. Pero ora Hesus a konta e ilustrashon, e tabata papia di e tempu di fin. E siguidónan di Kristu djawe ta kumpli ku e trabou akí? Sí! Awe e kampaña di mas grandi den historia ta tumando lugá relashoná ku e trabou di prediká i hasi disipel. Debí na e trabou duru di tur siguidó di Kristu, sientos di míles di persona ta batisá tur aña i ta djòin e fila di predikadó di Reino. Tur esaki ta mustra bon kla ku e trabou di prediká ta un parti importante di e señal ku Hesus a duna tokante e tempu di fin. Sin duda, e Doño ta masha kontentu ku su trahadónan!

Kristu a enkargá su sirbidónan ku algu masha balioso: e responsabilidat di prediká (Wak paragraf 10)

KI DIA E DOÑO TA BINI PA HASI KUENTA?

11. Dikon nos ta bisa ku Hesus lo hasi kuenta ku su esklabonan durante e tribulashon grandi?

11 Hesus lo bini pa hasi kuenta ku su esklabonan ora fin di e tribulashon grandi ta serka. Dikon nos ta yega na e konklushon ei? Den e profesia di Mateo kapítulo 24 i 25, Hesus a papia vários biaha di su binida. Por ehèmpel, el a bisa ku hende “lo mira e Yu di hende bini riba e nubianan di shelu.” Esaki ta referí na e periodo durante  e tribulashon grandi ora ku Hesus lo husga hende. Tambe Hesus a urgi su siguidónan ku lo ta na bida durante e último dianan pa nan keda alerta. El a bisa nan: “Boso no sa ki dia boso Señor ta bini” i “e Yu di hende ta bini na un ora ku boso no ta pensa.” (Mat. 24:30, 42, 44) Pues, ora Hesus a bisa ku e “doño di e esklabonan ei a bolbe, i el a hasi kuenta ku nan,” e tabata referí evidentemente na e momento ku é lo bini pa husga hende i destruí e mundu di Satanas. *Mat. 25:19.

12, 13. (a) Kiko e doño ta bisa e dos promé esklabonan, i dikon? (b) Ki ora e ungínan ta haña nan seyo final? (Wak tambe e kuadro “ Nan Ta Duna Kuenta ora Nan Muri.”) (c) Ki rekompensa hende ku ser husgá komo karné lo haña?

12 Segun e ilustrashon, ora e doño a bolbe, el a mira ku e dos promé esklabonan—esun ku a haña sinku talento i esun ku a haña dos talento—a hasi nan trabou fielmente i a gana dòbel e kantidat di talento. Anto e doño ta bisa tur dos esklabo meskos: “Hopi bon, mi bon i fiel esklabo! Bo tabata fiel riba poko kos. Lo mi enkargá bo ku hopi kos.” (Mat. 25:21, 23) Pues, kiko nos por ferwagt ora ku e Doño, Hesukristu, bini pa ehekutá huisio den futuro?

13 Djis promé ku e tribulashon grandi kuminsá, e ungínan diligente—representá pa e dos esklabonan—lo haña e aprobashon final di Dios. Esei ta nan seyo final. (Rev. 7:1-3) Anto promé ku Armagedon, Hesus lo duna nan nan rekompensa selestial, esta, bida den shelu. Kiko lo pasa ku e kristiannan ku tin e speransa di biba riba tera i ku a apoyá e rumannan di Kristu den e trabou di prediká? Nan lo ser husgá komo karné i lo haña e privilegio di biba pa semper riba tera bou di e Reino di Dios.—Mat. 25:34.

UN ESKLABO FLOHO I MALBADO

14, 15. Akaso Hesus a indiká ku un kantidat grandi di kristian ungí lo bira floho i malbado? Splika esei.

14 E último esklabo di e ilustrashon a dera su talento en bes di hasi negoshi kuné; e no a ni sikiera depositá e plaka na banko p’e haña poko interes. E esklabo akí a demostrá un mal aktitut, ya ku el a traha deliberadamente kontra e interesnan di e doño. Ku rason, e doño a yam’é “floho i malbado” i a kita esun talento for di dje i a duna e promé esklabo esaki. Anto el a benta e esklabo malbado “den e skuridat ku tin pafó.” “Ei ta kaminda lo e yora i morde riba djente.”—Mat. 25:24-30; Luk. 19:22, 23.

15 Tuma nota di e detaye akí: Hesus a bisa ku un di e tres esklabonan a skonde su talento. Akaso Hesus kier a indiká ku  un tersera parti di e kristiannan ungí lo ta floho i malbado? Nò. Laga nos wak e konteksto. Den e ilustrashon di e esklabo fiel i prudente, Hesus a papia di un esklabo ku ta kometé maldat i bati e otro esklabonan. Pero e no tabata profetisá einan ku lo lanta un grupo di ungí ku lo hasi malu. Mas bien, e tabata spièrta e esklabo fiel pa nan no demostrá e aktitut di e mal esklabo ei. Asina tambe, den e ilustrashon di e 10 bírgennan, Hesus no tabata ke mustra ku mitar di e ungínan lo ta manera e sinku bírgennan bobo. Simplemente el a spièrta su rumannan spiritual tokante kiko lo pasa si nan no ta prepará i alerta. * P’esei ta rasonabel pa nos konkluí ku den e ilustrashon di talento, Hesus no tabata ke men ku den e tempu di fin un kantidat grandi di kristian ungí lo a bira floho i malbado. En realidat, Hesus tabata spièrta su siguidónan ungí ku nan mester sigui traha duru—‘hasiendo negoshi’ ku nan talento—i no bira manera e esklabo floho i malbado.—Mat. 25:16.

16. (a) Kiko nos ta siña for di e ilustrashon di talento? (b) Kon e artíkulo akí a yuda nos komprondé e ilustrashon di talento? (Wak e kuadro “ Un Komprondementu Mas Kla di e Ilustrashon di Talento.”)

16 Kiko ta e dos lèsnan ku nos ta siña for di e ilustrashon di talento? E promé lès ta ku Kristu, e Doño, a enkargá su esklabonan ungí ku algu masha balioso: e trabou di prediká i hasi disipel. E di dos lès ta ku Kristu ta ferwagt ku nos tur ta traha duru den e trabou di prediká. Si nos perseverá fielmente den e trabou akí i keda leal i obedesidu na Hesus, nos por tin sigur ku lo e rekompensá nos.—Mat. 25:21, 23, 34.

^ par. 3 E Toren di Vigilansia di 15 di yüli 2013, página 21-22, paragraf 8-10, ta splika ken ta e esklabo fiel i prudente. E artíkulo anterior ku nos a kaba di konsiderá ta splika ken ta e bírgennan. E Toren di Vigilansia di 15 di òktober 1995, página 23-28, i e siguiente artíkulo den e revista akí, ta splika e ilustrashon di karné i kabritu.

^ par. 5 Den tempu di Hesus, un talento tabata ekivalente na 6.000 denario. Un obrero tabata gana un denario pa dia, pues lo e tabatin ku traha un 20 aña p’e gana ún talento.

^ par. 8 Despues di morto di e apòstelnan, Satanas a fomentá apostasia, i esei a plama den tur kongregashon. Pa hopi siglo, e trabou di prediká no a bai na un manera organisá ni konstante. Pero tur esei lo a kambia durante e tempu di “kosecha,” esta, e último dianan. (Mat. 13:24-30, 36-43) Pa mas informashon, wak E Toren di Vigilansia di 15 di yüli 2013, página 9-12.

^ par. 11 Pa mas informashon, wak E Toren di Vigilansia di 15 di yüli 2013, página 7-8, paragraf 14-18.

^ par. 15 Wak paragraf 13 di e artíkulo “Abo Lo ‘Keda Vigilá’?” den e revista akí.