Bai na kontenido

Bai na kontenido

Abo Lo “Keda Vigilá”?

Abo Lo “Keda Vigilá”?

“Keda vigilá, pasobra boso no sa ni e dia ni e ora.”—MAT. 25:13.

1, 2. (a) Kiko Hesus a bisa lo pasa durante e último dianan? (b) Ki preguntanan nos lo analisá?

PURBA di imaginá Hesus sintá riba Seru di Oleifi, ku bista riba e tèmpel di Herúsalèm, miéntras ku e tabata duna un di su profesianan di mas fasinante. E tabata huntu ku kuater di su apòstelnan, esta, Pedro, Andres, Santiago i Huan, i nan a skuch’é ku masha atenshon. El a konta nan kosnan ku lo sosodé leu den futuro—den e último dianan di e mundu malbado akí—tempu ku lo e ta Rei di e Reino di Dios. El a splika nan ku durante e tempu emoshonante ei su “esklabo fiel i prudente” lo represent’é riba tera i lo duna su sirbidónan e kuminda spiritual ku nan mester.—Mat. 24:45-47.

2 Djis despues, komo parti di e mesun profesia ei, Hesus a konta e ilustrashon di e 10 bírgennan. (Lesa Mateo 25:1-13.) Den e artíkulo akí, nos lo analisá e siguiente preguntanan: (1) Kiko ta básikamente e mensahe di e ilustrashon? (2) Kon e  ungínan fiel a sigui e konseho di e ilustrashon, i ku ki resultado? (3) Kon nos kada un por benefisiá awe di e ilustrashon ei di Hesus?

KIKO TA E MENSAHE DI E ILUSTRASHON?

3. (a) Kon nos publikashonnan tabata splika e ilustrashon di e 10 bírgennan? (b) Kiko lo por sosodé si nos ta buska un nifikashon simbóliko pa delaster un detaye di e ilustrashon?

3 Nos a mira den e artíkulo anterior ku último añanan e esklabo fiel no ta konsentrá asina tantu mas riba buska e nifikashon simbóliko òf profétiko di relatonan bíbliko, sino mas bien riba e lèsnan práktiko ku nos por saka for di nan. Por ehèmpel, ántes nos publikashonnan tabata bisa ku asta e detayenan chikitu di e ilustrashon di e 10 bírgennan—manera e lampi, e zeta, e bòternan—tabatin un nifikashon simbóliko. Pero, lo ta posibel ku nos a konsentrá asina tantu riba e detayenan ei te ku nos a pèrdè for di bista e mensahe simpel i urgente di e ilustrashon? Manera nos lo bai mira, ta masha importante pa haña kontesta riba e pregunta akí.

4. (a) Ken ta e brùidehòm, i kon nos por sa esei? (b) Ken ta e bírgennan, i kon nos por sa esei?

4 Pues, kiko Hesus kier a siña nos ku e ilustrashon akí? Pa nos komprondé esei, nos mester identifiká na promé lugá e personahenan prinsipal. Ken ta e brùidehòm? Esei ta Hesus. Nos sa pasobra mas promé Hesus a kompará su mes ku un brùidehòm. (Luk. 5:34, 35) Ken ta e bírgennan? Nan ta e “tou chikitu” di kristian ungí. Kon nos por sa esei? Segun e ilustrashon, e bírgennan mester tabata prepará i ku nan lampinan sendí ora e brùidehòm yega. Wèl, Hesus a duna su siguidónan ungí kasi e mesun instrukshonnan ei. El a bisa nan: “Sea bistí i prepará i keda ku boso lampi sendí, i sea manera hende ku ta warda nan doño bini bèk for di e fiesta di kasamentu.” (Luk. 12:32, 35, 36) Ademas, tantu apòstel Pablo komo apòstel Huan a kompará e siguidónan ungí di Kristu ku bírgen puru. (2 Kor. 11:2; Rev. 14:4, nota) Pues, ta bisto ku Hesus a dirigí e konseho i spièrtamentu di e ilustrashon di Mateo 25:1-13 na su siguidónan ungí.

5. (a) Na ki tempu Hesus tabata referí ora el a konta e ilustrashon di e 10 bírgennan? (b) Dikon nos ta yega na e konklushon ei?

5 Na di dos lugá, nos mester sa ta na ki periodo di tempu e konseho di Hesus ta apliká. Loke el a bisa na final di e ilustrashon ta yuda nos sa esei. E di: “E brùidehòm a yega.” (Mat. 25:10) E Toren di Vigilansia di 15 di yüli 2013 a splika ku den e profesia di Mateo kapítulo 24 i 25 Hesus a referí ocho biaha na su binida, yegada òf bolbementu, i ku e palabranan ei ta un tradukshon di e mesun verbo griego. Pues, den kada un di e referensianan ei, Hesus tabata papia di e momento durante e tribulashon grandi ku lo e bini pa husga i destruí e mundu malbado akí. Ke men, ora Hesus a konta e ilustrashon di e 10 bírgennan, e tabata referí na e tempu di fin. Pero e momento kulminante di e ilustrashon, esta, e yegada di e brùidehòm, ta sosodé durante e tribulashon grandi.

6. A base di e konteksto, kiko ta e mensahe di e ilustrashon di e 10 bírgennan?

6 Pues, kiko ta básikamente e mensahe di e ilustrashon akí? Kòrda riba e konteksto di e relato. Na Mateo kapítulo 24, Hesus a kaba di papia di “e esklabo fiel i prudente,” esta, un grupo chikí di hòmber ungí ku lo a dirigí e siguidónan di Kristu  durante e último dianan. Hesus a spièrta e grupo ei ku nan mester keda fiel. Despues, den Mateo kapítulo 25, Hesus a konta e ilustrashon di e 10 bírgennan komo un spièrtamentu pa tur su siguidónan ungí ku ta biba den e último dianan: Nan mester “keda vigilá” pa nan no pèrdè nan rekompensa di bai shelu. (Mat. 25:13) Laga nos sigui analisá e ilustrashon i wak kiko e ungínan a hasi pa keda alerta.

E UNGÍNAN A SIGUI E KONSEHO DI E ILUSTRASHON

7, 8. (a) Kon bini e bírgennan prudente tabata prepará? (b) Kon e ungínan a demostrá ku nan ta prepará pa yegada di e Brùidehòm?

7 E ilustrashon di Hesus ta enfatisá ku e bírgennan “prudente” sí tabata kla pa e yegada di e brùidehòm. Kon bini? Pa dos motibu: nan a prepará nan mes bon i nan a keda vigilá. Tur e 10 bírgennan mester a keda lantá durante anochi i warda yegada di e brùidehòm; nan tabatin ku tene nan lampinan sendí i keda vigilá te ora e yega. Pero kontrali na e sinku bírgennan “bobo,” esnan prudente sí a prepará nan mes, ya ku nan a bai ku mas zeta den nan bòter pa por si akaso esun den nan lampi kaba. Kiko di e ungínan? Nan tambe a prepará nan mes pa ora Hesus yega?

8 Klaru ku sí. E ungínan ku ta biba den e tempu di fin a hasi meskos ku e bírgennan prudente; nan a prepará nan mes pa kumpli fielmente ku nan asignashon te na fin. Nan a kalkulá e gastu di rindi sirbishi fiel i a realisá for di prinsipio ku nan lo tin ku renunsiá hopi benefisio material ku e mundu di Satanas ta ofresé. Nan ta determiná pa sirbi Yehova fielmente, no djis pasobra e fin ta serka, sino pa motibu ku nan ta stim’é i ke ta leal na dje i na Hesus. Nan ta mantené nan integridat i ta rechasá e aktitut materialista, inmoral i egoista di mundu. Pues, meskos ku e bírgennan prudente ku nan lampi, e ungínan ta kla prepará i ta “bria komo kargadó di lus den mundu,” miéntras ku nan ta warda ku pasenshi riba yegada di e Brùidehòm, maske por parse ku e ta tarda.—Flp. 2:15.

9. (a) Kon Hesus a spièrta su disipelnan pa e peliger di pega soño, i kiko esei a indiká? (b) Kon e ungínan a reakshoná riba e gritu: “Ata e brùidehòm!”? (Wak tambe e nota.)

9 E bírgennan prudente no solamente mester a prepará nan mes bon, ma tambe nan mester a keda vigilá. Pero Hesus a bisa ku tur 10 bírgen “a kabishá i pega soño” ora nan tabata warda riba e brùidehòm, ku aparentemente a tarda pa yega. Kiko Hesus kier a siña ku esaki? Wèl, esei a indiká ku asta un persona ku ta deseá di keda alerta por “pega soño,” es desir, por bira débil den karni òf ser distraí, miéntras ku e ta warda riba e yegada di Kristu. E ungínan fiel ta hasi kaso di e spièrtamentu ei i ta hasi hopi esfuerso pa keda alerta. Den e ilustrashon, tur e bírgennan a reakshoná ora ku meianochi nan a tende: “Ata e brùidehòm!” Pero ta esnan prudente so a keda vigilá te na su yegada. (Mat. 25:5, 6; 26:41) Kiko di e ungínan fiel djawe? Durante e último dianan, nan tambe a reakshoná riba e gritu: “Ata e brùidehòm!” Kon? Nan a keda vigilá i a rekonosé e señal ku ta indiká ku e Brùidehòm ta serka di yega. * Laga nos konsentrá awor riba e momento kulminante di e ilustrashon.

 REKOMPENSA PA ESNAN PRUDENTE I KASTIGU PA ESNAN BOBO

10. E kòmbersashon entre e bírgennan ta lanta ki pregunta?

10 Kisas e parti mas straño di e ilustrashon ta kasi na final ora ku e bírgennan prudente ta nenga di yuda esnan bobo. (Lesa Mateo 25:8, 9.) Esei ta hala nos atenshon pasobra e ta lanta e pregunta: Dikon fiel kristiannan ungí lo nenga di yuda hende ku ta pidi yudansa? Wèl, pa haña e kontesta nos tin ku kòrda ta na ki tempu e ilustrashon akí ta kumpli. Manera nos a wak kaba, awor nos ta komprondé ku Hesus, e Brùidehòm, ta yega pa husga i ehekutá huisio kasi na final di e tribulashon grandi. Pues, probablemente e kòmbersashon entre e bírgennan ta referí na loke lo tuma lugá djis promé ku e huisio ei. Dikon nos ta bisa esaki? Pasobra pa e tempu ei, ya e ungínan fiel lo a haña nan seyo final.

11. (a) Kiko lo sosodé djis promé ku e tribulashon grandi kuminsá? (b) Kiko e bírgennan prudente kier a indiká ora nan a manda esnan bobo bai kumpra zeta?

11 Pues anto, promé ku e tribulashon grandi kuminsá, tur e ungínan fiel lo a haña nan seyo final. (Rev. 7:1-4) Esei ke men ku, for di e momento ei, ta sigur ku nan lo bai shelu. Pero pensa awor riba e añanan promé ku e tribulashon grandi kuminsá. Kiko lo pasa ku e ungínan ku no a keda vigilá i a bira infiel? Nan lo no haña e seyo final, pues nan lo no bai shelu. Pa ora e tribulashon grandi kuminsá, ya otro kristiannan fiel lo a ser ungí i lo a remplasá nan. Anto ora esnan ku a bira infiel mira e destrukshon di tur religion falsu, probablemente nan lo keda di shòk. Dikon? Pasobra podisé ta e ora ei numa nan lo realisá ku nan no ta kla pa yegada di e Brùidehòm. Pero kiko lo pasa si e ora ei di anochi nan pidi yudansa tur desesperá? E ilustrashon di Hesus ta duna e kontesta. E bírgennan prudente ta nenga di duna esnan bobo un poko di nan zeta i ta manda nan bai kumpra serka e bendedónan. Pero kòrda ku ta “meianochi.” Ta ken lo bende nan zeta e ora ei? Niun hende. Loke e bírgennan prudente ke bisa nan ta ku ya ta muchu lat pa nan haña yudansa.

12. (a) Durante e tribulashon grandi, kiko lo pasa ku e ungínan ku a bira infiel i no a haña e seyo final? (b) Ki final ta warda hende ku ta manera e bírgennan bobo?

12 Asina tambe durante e tribulashon grandi, e ungínan fiel no por yuda niun ku a bira infiel. Lo ta muchu lat. Kiko lo pasa ku esnan infiel? Meskos ku a pasa ku e bírgennan bobo ku a bai kumpra zeta. Hesus a konta: “E brùidehòm a yega, i e bírgennan ku tabata kla a drenta huntu kuné den e fiesta di kasamentu, i porta a sera.” Ora Kristu yega den su gloria kasi na final di e tribulashon, lo e reuní e ungínan fiel den shelu. (Mat. 24:31; 25:10; Huan 14:1-3; 1 Tes. 4:17) Kaba lo e sera porta, i esnan ku ta manera e bírgennan bobo lo no por drenta. Na e momento ei kisas nan lo kuminsá sklama: “Señor, Señor, habri pa nos!” Pero nan lo haña e mesun kontesta ku e personanan ku a ser husgá komo kabritu. Hesus lo bisa nan: “Di bèrdat mi ta bisa boso: Mi no konosé boso.” Esta un final lamentabel!—Mat. 7:21-23; 25:11, 12.

13. (a) Dikon nos no mester konkluí ku hopi ungí lo bira infiel? (b) Dikon nos por bisa ku e ilustrashon di Hesus ta revelá su konfiansa den e ungínan? (Wak e promé plachi.)

13 Akaso Hesus kier a bisa ku hopi ungí lo bira infiel i ku lo mester remplasá nan? Nò. Kòrda e ilustrashon di “e esklabo fiel i  prudente” ku Hesus a duna na Mateo kapítulo 24. Ei, el a papia di un esklabo malbado. Pero e no tabata ke men ku e esklabo fiel i prudente lo bira un esklabo malbado; ta djis un spièrtamentu e tabata duna. Algu paresido ta sosodé den e ilustrashon di e 10 bírgennan. Sinku bírgen tabata prudente i sinku tabata bobo. Di manera ku kada ungí tin ku disidí si lo e ta prepará i si lo e keda vigilá, òf si lo e aktua na un manera bobo i infiel. Apòstel Pablo tambe a duna kristiannan ungí un spièrtamentu similar. (Lesa Hebreonan 6:4-9; kompará ku Deuteronomio 30:19.) Aunke e spièrtamentu di Pablo tabata firme, el a demostrá konfiansa den su rumannan pasobra el a bisa nan ku nan lo risibí nan rekompensa. E spièrtamentu ku Hesus ta duna e ungínan den e ilustrashon di e 10 bírgennan tambe ta demostrá ku e tin konfiansa den nan. Kristu sa ku kada un di su siguidónan ungí por keda fiel i haña e rekompensa selestial!

UN LÈS BALIOSO PA E ‘OTRO KARNÉNAN’

14. Kon e ‘otro karnénan’ tambe por benefisiá di e ilustrashon di e 10 bírgennan?

14 Hesus a dirigí e ilustrashon di e 10 bírgennan na su siguidónan ungí. Akaso esei ke men ku e ‘otro karnénan’ no por siña nada for di dje? (Huan 10:16) Klaru ku nò. Kòrda ku e mensahe di e ilustrashon ta masha simpel i kla: “Keda vigilá.” De echo, Hesus a yega di bisa: “Loke mi ta bisa boso, mi ta bisa tur hende: Keda vigilá.” (Mar. 13:37) Hesus ta ferwagt ku tur su disipelnan ta prepará pa sirbié fielmente i ta keda alerta. Pues, tur kristian mester imitá e bon ehèmpel di e ungínan i pone e trabou di prediká na promé lugá den nan bida. Nos mester kòrda tambe ku e bírgennan bobo a pidi esnan prudente pa duna nan un poko di nan zeta. Ma esnan prudente no a duna nan. Kiko nos ta siña for di esaki? Wèl, nos no por ferwagt ku otro hende lo ta fiel pa nos, keda den e bèrdat pa nos òf keda alerta pa nos. Nos kada un lo tin ku duna kuenta i rason na Hesus, e Hues hustu apuntá pa Yehova. Nos mester ta prepará, pasobra Hesus ta bini pronto!

No sea manera e bírgennan bobo ku a pidi zeta, pasobra niun hende no por keda fiel pa nos ni keda vigilá pa nos

15. Dikon e kasamentu di Kristu ku su brùit ta algu emoshonante pa tur kristian?

15 Tur kristian ta masha emoshoná ku e suseso mas importante di e ilustrashon: e kasamentu. Despues di e guera di Armagedon, e ungínan lo bira e brùit di Kristu den shelu. (Rev. 19:7-9) Tur hende riba tera lo benefisiá di e kasamentu selestial ei, pasobra debí na e union ei humanidat por fin lo tin un gobièrnu perfekto. P’esei, sea ku nos tin e speransa di biba den shelu òf riba tera, nos tur tin ku hasi kaso di e lès di e ilustrashon di e 10 bírgennan. Laga nos hasi esfuerso sinsero pa ta prepará i pa keda vigilá, ya asina nos por disfrutá di e futuro maravioso ku Yehova tin wardá pa nos.

^ par. 9 Den e ilustrashon tin un periodo di tempu entre e gritu “Ata e brùidehòm!” (versíkulo 6) i e momento mes ku e brùidehòm ta yega (versíkulo 10). Durante e último dianan, e ungínan a keda alerta; nan a komprondé e señal di e presensia di Kristu, pues nan sa ku Hesus ta goberná kaba komo Rei den e Reino di Dios. Pero tòg nan tin ku keda vigilá te ora ku e yega finalmente.