Bai na kontenido

Bai na kontenido

Nan A Ofresé Nan Mes di Buena Gana pa Sirbi na New York

Nan A Ofresé Nan Mes di Buena Gana pa Sirbi na New York

UN PAR di aña pasá, Cesar ku su kasá, Rocio, tabatin un bida kómodo na California. Cesar tabata traha fultaim den e ramo di ventilashon, kalefakshon i èrko, i Rocio tabata traha partaim na un ofisina di dòkter. Nan tabatin nan mes kas, i nan no tabatin yu. Pero algu a sosodé ku a kambia nan bida. Kiko esei ta?

Na òktober 2009, e sukursal di Merka a manda un karta pa tur kongregashon den e pais. Den e karta nan pidi rumannan ku ta spesialisá den un sierto fishi pa ofresé nan mes komo boluntario pa sirbi temporalmente na Bètel, pa nan yuda ku e trabounan di ekspanshon di e fasilidatnan di sukursal na Wallkill, New York. Asta rumannan ku a pasa e edat pa sirbi na Bètel por a yena e solisitut. Cesar ku Rocio a konta: “Debí na nos edat, nos tabata sa ku nunka mas nos lo haña un oportunidat asina pa sirbi na Bètel. Pues, pa nada di mundu nos lo no kier a pèrdè e chèns akí!” Mesora e pareha a yena nan solisitut.

Algun di e boluntarionan ku ta traha na Warwick

Mas ku un aña a pasa, sin ku Cesar ku Rocio a tende algu di Bètel. Asina mes, nan a hasi algun kos pa simplifiká nan bida. Cesar a konta: “Nos a transformá nos garashi den un flèt pa nos por a hür e kas ku otro hende.” Kaba nan a sali for di e kas di nan soño—un kas di shete kamber ku nan a traha apénas algun aña promé—i a bai biba den e flèt. Cesar a sigui bisa: “E kambionan akí ku nos a hasi lo a permití nos aseptá un invitashon pa bai Bètel, dado kaso esei sosodé.” Kiko a pasa despues? Rocio a konta: “Un luna despues ku nos a bai biba den nos flèt, nos a haña e invitashon pa sirbi komo boluntario temporal na Wallkill. Nos a mira bon kla ku ora nos a simplifiká nos bida, nos a duna Yehova algu p’e bendishoná.”

Jason, Cesar i William

YEHOVA TA BENDISHONÁ NAN SAKRIFISIO

Meskos ku Cesar ku Rocio, sientos di ruman a hasi sakrifisio pa nan por yuda ku e trabou di konstrukshon ku ta tumando lugá den e estado di New York. Algun ta apoyando e trabou di  ekspanshon na Wallkill, miéntras ku un grupo grandi tin e privilegio di yuda ku konstrukshon di e sede mundial na Warwick. * Hopi pareha kasá a bai laga nan kas bunita, nan bon trabou i asta nan bestianan di kas pa sirbi Yehova mas plenamente. Kon Yehova a reakshoná? El a bendishoná nan spiritu di sakrifisio? Klaru ku sí!

Way

Tuma por ehèmpel Way, un elèktrishèn, ku su kasá Debra. Nan tur dos tin kasi 60 aña di edat, i nan a bende nan kas i mayoria di nan pertenensianan na Kansas i a bai biba na Wallkill pa sirbi komo komiuter. * Aunke nan mester a hasi vários kambio den nan bida pa logra esei, nan ta sinti ku e sakrifisionan tabata bale la pena. Debra a bisa di su trabou na Bètel: “Tin biaha mi ta sinti komo si fuera mi ta den un di e esenanan di Paradeis ku ta mustra trahamentu di kas ku bo ta mira den nos publikashonnan!”

Melvin ku Sharon a bende nan kas na Sur Carolina pa nan por a bai traha na Warwick. Aunke no tabata fásil pa hasi e sakrifisionan ei, nan ta sinti ku ta un privilegio di por yuda ku un proyekto históriko asina. Nan a bisa: “Bo ta sinti bo hopi bon, pasobra bo sa ku bo ta logrando algu ku lo benefisiá bo rumannan rònt mundu.”

Kenneth

Kenneth, un kontratista penshoná, ku su kasá Maureen, tin rònt di 55 aña. Nan a muda for di California pa bin traha riba e proyekto di Warwick. Pa nan por a hasi esei, nan a laga un ruman muhé den kongregashon kuida nan kas i nan a pidi nan famianan tira bista riba e tata di Kenneth ku ya tabata basta grandi. Akaso ta duel nan ku nan mester a hasi sakrifisio pa sirbi na Bètel? Nò! Kenneth a bisa: “Nos ta sakando masha benefisio. Ta klaru ku nos ta haña nos ku sierto desafio, pero nos ta hibando un bida ku ta duna nos masha satisfakshon, i di kurason nos ta rekomendá tur ku por pa purba e sirbishi akí.”

KON PA SUPERÁ OPSTÁKULO

Mayoria di ruman ku a ofresé nan mes pa yuda tabatin ku superá sierto opstákulo. Por ehèmpel, William ku Sandra, kendenan ta riba 60 aña, tabata disfrutá di un bida kómodo na Pennsylvania. Nan tabatin un kompania di traha piesa di mashin ku tabatin 17 trahadó i ku tabata drei bon. Nan tabata sirbi den e kongregashon kaminda nan a lanta fo’i chikí, i mayoria di nan famianan tabata biba den e área ei. Pues, ora e oportunidat  a presentá pa nan sirbi komo komiuter na Wallkill, nan tabata sa ku esei lo a nifiká yama tur hende ayó, sí, tur kos ku nan a kustumbrá kuné. William ta rekonosé ku esei tabata e reto di mas grandi pa nan. Pero despues di a hasi hopi orashon, e pareha a disidí di muda tòg, i esei ta un paso ku nan no ta lamentá. William a bisa: “No tin nada ku bo por kompará ku e goso di por forma parti di tur esaki i di sirbi huntu ku e famia di Bètel. Ami ku Sandra ta mas felis ku nunka!”

Algun di e parehanan ku ta traha na Wallkill

Ricky tabata direktor di proyektonan di konstrukshon na Hawai, i el a haña e invitashon pa bin yuda ku e proyekto di Warwick komo komiuter. Su kasá, Kendra, tabata ke p’e aseptá e invitashon. Pero un kos so tabata preokupá nan, i ku rason: e bienestar di nan yu hòmber Jacob di 11 aña. Nan tabata puntra nan mes si lo ta sabí pa e famia bai biba na e estado di New York. Nan yu hòmber lo por a adaptá su mes na e ambiente totalmente diferente ei?

Ricky a konta: “Un di nos prioridatnan tabata pa haña un kongregashon ku hóbennan spiritualmente fuerte. Nos tabata ke pa Jacob tin bon asosiashon.” Pero al final, e kongregashon ku nan a bai tabatin tiki mucha pero vários bètelita. Ricky a sigui konta: “Despues di nos promé reunion einan, mi a puntra Jacob kiko e tabata pensa di e kongregashon nobo, ya ku no tabatin niun mucha di su edat. E di ku mi: ‘Tata, no preokupá. E mucha hòmbernan di Bètel lo ta mi amigunan.’”

Jacob ku su mayornan a sera amistat ku e bètelitanan di nan kongregashon

I asina a sosodé. E bètelitanan hóben a sera amistat ku Jacob. Ku ki resultado? Ricky a konta: “Un anochi, m’a pasa banda di e kamber di mi yu i m’a mira ku e lus ta sendé ainda. M’a kere ku lo mi a gar’é ta hunga un wega di kòmpiuter, logá ta Beibel e tabata lesa! Ora m’a puntr’é ta kiko e ta hasiendo, e di ku mi: ‘Mi ta un bètelita hóben, i mi ta bai lesa e Beibel den ún aña.’” Di mes Ricky ku Kendra ta masha kontentu, no solamente pasobra Ricky por partisipá den e trabou di konstrukshon na Warwick, sino tambe pasobra nan mudansa ta kontribuyendo na e desaroyo spiritual di nan yu.—Pro. 22:6.

NAN NO TA PREOKUPÁ PA NAN FUTURO

Luis ku Dale

Ku tempu, e proyektonan di konstrukshon na Wallkill i Warwick lo terminá. Pues, e rumannan ku nan a invitá pa bin yuda sa ku nan sirbishi di Bètel tambe lo yega na su fin. Akaso nan ta tur preokupá tokante kiko nan lo hasi òf unda nan lo bai despues? Niun ora so! Hopi di nan ta sinti meskos ku dos pareha di Flórida ku tin 50 i piku aña. John,  un kontratista, ku su kasá, Carmen, ta sirbi komo boluntario temporal na Warwick. Nan a bisa: “Nos a mira kon te ku awor Yehova a duna nos tur loke nos tabatin mester. Pues, nos tin sigur ku Yehova no a trese nos te aki, kaba p’e bandoná nos.” (Sal. 119:116) Luis ta diseñá sistemanan di sprenkler pa paga kandela, i e ku su kasá, Quenia, ta sirbi na Wallkill. Nan a bisa: “Nos a mira kaba kon Yehova su man generoso a satisfasé tur nos nesesidatnan material. Aunke nos no sa kon, ki ora ni na unda, nos tin sigur ku lo e sigui perkurá pa nos.”—Sal. 34:10; 37:25.

 “ASINA TANTU BENDISHON, KU BOSO LO NO TIN SUFISIENTE LUGÁ PA KONTEN’É”

John ku Melvin

Mayoria di ruman ku a ofresé nan mes pa yuda ku e trabou di konstrukshon na New York lo por a haña sufisiente motibu pa no bini. Pero nan a pone Yehova na prueba, manera e ta invitá nos pa hasi: “Pone mi na prueba [i wak] si mi lo no habri pa boso e bentananan di shelu, i basha asina tantu bendishon, ku boso lo no tin sufisiente lugá pa konten’é.”—Mal. 3:10.

Kiko di abo? Bo tambe lo pone Yehova na prueba i wak kon e ta bendishoná bo rikamente? Hasi orashon i analisá si bo por yuda, sea na New York òf na kualke otro proyekto di konstrukshon teokrátiko. Si bo hasi esei, lo bo mira kon Yehova ta rekompensá bo.—Mar. 10:29, 30.

Gary

Dale ku Cathy, di Alabama, ta rekomendá e tipo di sirbishi akí sinseramente. Dale ta un ingeniero sivil, i nan ta sirbiendo na Wallkill. Nan a bisa: “Si bo tin e kurashi di purba algu otro for di loke bo a kustumbrá kuné, lo bo haña e oportunidat di mira e spiritu di Yehova den akshon.” Awor, kiko bo tin ku hasi si bo ke ofresé bo mes? Dale a bisa: “Simplifiká, simplifiká i, despues, simplifiká un poko mas. Hamas lo bo lamentá esei!” Gary, di Nort Carolina, a traha 30 aña komo supervisor den trabou di konstrukshon. E ku su kasá, Maureen, a bisa ku un di e bendishonnan ku nan ta disfrutá di dje na Warwick ta ku nan ta “haña chèns di sera konosí i traha ku hopi ruman maravioso, kendenan a pasa kasi henter nan bida ta sirbi Yehova na Bètel.” Gary a agregá: “Pa sirbi na Bètel, bo tin ku hiba un bida simpel, i esei ta e mihó manera di biba den e mundu akí.” Jason, kende tabata traha pa un kontratista ku ta instalá sistemanan di koriente, huntu ku su kasá, Jennifer, di Illinois, ta bisa ku traha na Wallkill riba un proyekto di Bètel ta “ègt duna bo un idea kon bida lo ta den e mundu nobo.” Jennifer a agregá: “Ta masha impreshonante pa sinti ku Yehova ta apresiá tur loke bo ta hasiendo i ku esaki ta un invershon den e futuro ku e ta preparando pa nos. Es mas, Yehova ta sòru pa bo ser rekompensá rikamente.”

^ par. 6 Wak e Anuario 2014 di Testigunan di Yehova (na spañó), página 12-13.

^ par. 7 Rumannan ku ta partaim komiuter ta traha un òf mas dia pa siman na Bètel, pero nan tin nan propio fuente di entrada i ta biba pafó di Bètel.