Bai na kontenido

Bai na kontenido

Abo Ta Dispuesto pa Hasi Sakrifisio pa e Reino?

Abo Ta Dispuesto pa Hasi Sakrifisio pa e Reino?

“Dios ta stima hende ku ta duna ku alegria.” —2 KOR. 9:7.

1. Ki sakrifisio hopi hende ta hasi, i dikon?

HENDE ta kla pa hasi sakrifisio ora ta trata di kosnan ku ta importante pa nan. Mayornan, por ehèmpel, ta duna di nan tempu, plaka i energia na bienestar di nan yunan. Atletanan hóben ku ta aspirá pa representá nan pais na e Weganan Olímpiko ta train vigorosamente vários ora pa dia, miéntras ku nan pareunan ta hunga i dibertí. Hesus tambe a hasi sakrifisio pa kosnan ku tabata importante p’e. E no a buska un bida luho ni e no tabatin yu. Mas bien, boluntariamente el a usa su bida pa promové e Reino. (Mat. 4:17; Luk. 9:58) Su siguidónan tambe a hasi hopi sakrifisio na benefisio di e Reino di Dios. Sí, komo ku e Reino tabata e kos di mas importante pa nan, nan a hasi sakrifisio pa apoy’é mas tantu posibel. (Mat. 4:18-22; 19:27) Kiko di nos? Ta bon pa nos puntra nos mes: ‘Kiko ta importante den mi bida?’

2. (a) Ki sakrifisio tur kristian berdadero mester hasi? (b) Ki sakrifisio èkstra algun ruman ta hasi?

2 Tin sierto sakrifisionan ku tur kristian berdadero mester hasi pa por tin un bon relashon ku Yehova Dios. Algun di e kosnan ku nos ta sakrifiká ta nos tempu i energia; nos ta usa esakinan pa hasi orashon, lesa Beibel, tene nos Adorashon Komo Famia, asistí na reunion i partisipá den sirbishi di vèlt. * (Hos. 1:8; Mat. 28:19, 20; Heb. 10:24, 25) I debí na nos esfuerso i e bendishon di Yehova, e trabou di prediká ta aselerando i hopi hende ta sigui basha bini na “e seru di e kas di SEÑOR.” (Isa. 2:2) Pa apoyá e Reino, tin hopi ruman ta hasi sakrifisio pa por sirbi na Bètel, yuda den konstrukshon di Salòn di Reino i di Asamblea, organisá kongresonan òf yuda despues di desasternan natural.  E trabounan, òf sakrifisionan, èkstra akí no ta un rekisito pa gana bida, pero nan ta importante pa apoyá e Reino.

3. (a) Ki benefisionan nos ta disfrutá di dje ora nos ta hasi sakrifisio pa apoyá e Reino? (b) Ki preguntanan nos lo kontestá den e artíkulo akí?

3 Awe, mas ku nunka, ta masha importante pa nos hasi tur loke nos por pa apoyá e Reino. I ta un goso pa mira ku hopi ruman ta hasi sakrifisio di buena gana pa sirbi Yehova. (Lesa Salmo 54:6.) Si nos tambe ta hasi asina, esaki ta yena nos ku goso segun ku nos ta spera e yegada di e Reino di Dios. (Deu. 16:15; Echo. 20:35) Sinembargo, nos tur mester saminá nos mes kuidadosamente i puntra nos mes: ‘Mi por hasi mas sakrifisio pa e Reino? Kon mi ta usando mi tempu, plaka, energia, kapasidat i abilidatnan? Kiko mi no mester neglishá ora mi ta hasi sakrifisio?’ Laga nos wak kiko nos por siña for di algun sakrifisio di buena gana ku hende a yega di hasi pa sirbi Yehova; esaki lo oumentá nos goso.

SAKRIFISIO DEN ISRAEL DI ANTIGWEDAT

4. Kon e sakrifisionan ku e israelitanan a hasi a benefisiá nan?

4 Den Israel di antigwedat, pa un hende por a haña pordon pa piká i risibí Yehova su aprobashon, e mester a ofresé sakrifisio. Algun di e sakrifisionan akí tabata obligatorio, miéntras ku otronan tabata ofrenda boluntario. (Lev. 23:37, 38) Un persona por a ofresé ofrendanan kimá komo ofrenda boluntario, òf regalo, na Yehova. Un ekselente ehèmpel di sakrifisio na Yehova ta esun en konekshon ku e inougurashon di e tèmpel den tempu di Sálomon.—2 Kró. 7:4-6.

5. Ki areglo Yehova a hasi na benefisio di hende pober?

5 Yehova ta un Dios amoroso i e tabata komprondé ku no ta tur hende por a duna mes tantu. P’esei, el a rekerí pa kada israelita duna loke e tabata por. Yehova su lei a stipulá ku mester a hasi sakrifisio di bestia i drama esakinan su sanger. E sakrifisionan akí lo a bira “un sombra di e kosnan bon ku lo a bini” pa medio di su Yu, Hesus. (Heb. 10:1-4) Pero Yehova no tabata irasonabel. Por ehèmpel, si un persona no por a ofresé un toro, kabritu òf karné, Dios lo a aseptá ofrenda di pichon. Pues, asta hende pober por tabatin e goso di ofresé sakrifisio na Yehova. (Lev. 1:3, 10, 14; 5:7) Pero, aunke Yehova a aseptá diferente sorto di  bestia komo sakrifisio, tabatin dos rekisito ku tur hende ku a hasi sakrifisio boluntario mester a kumpli kuné.

6. Kiko tabata e rekisitonan pa un hende ku kier a hasi sakrifisio, i dikon tabata importante pa kumpli ku e rekisitonan akí?

6 Pa di promé, e persona mester a duna lo mihó ku e tabatin. Yehova a bisa e nashon ku tur loke nan ta ofresé mester ta sin defekto òf di bon kalidat pa nan por a “wòrdu aseptá,” òf risibí Yehova su aprobashon. (Lev. 22:18-20) Pues, si e bestia tabatin defekto, Yehova lo no a aseptá esaki komo sakrifisio. Di dos, e persona ku ta ofresé e sakrifisio mester tabata limpi i sin mancha. Si e persona no tabata limpi, e mester a hasi un ofrenda pa piká òf un ofrenda di kulpa pa e por a drecha su relashon ku Yehova promé i despues e por a ofresé un ofrenda boluntario. (Lev. 5:5, 6, 15) Esaki tabata un asuntu serio. Yehova a stipulá ku si un hende tabata impuru i e kome tòg di un sakrifisio di komunion, ku a inkluí ofrenda boluntario, lo el a ser kòrtá kitá for di e pueblo. (Lev. 7:20, 21) Di otro banda, si un persona tabatin un bon relashon ku Yehova i su ofrenda tabata sin defekto, lo e por a disfrutá di un bon konsenshi i su goso lo tabata inmenso.—Lesa 1 Krónikanan 29:9.

SAKRIFISIO DEN NOS TEMPU

7, 8. (a) Ki goso hopi ruman tin ora nan ta hasi sakrifisio na benefisio di e Reino? (b) Ki rekursonan nos por usa pa e gloria di Yehova?

7 Awe tambe, hopi ruman ta dispuesto pa traha duru den Yehova su sirbishi, i esaki ta hasi Yehova masha kontentu. Ora nos ta traha duru na benefisio di nos rumannan den fe, nos tambe ta haña goso. Un ruman hòmber ku ta yuda den konstrukshon di Salòn di Reino i tambe despues di desaster natural a bisa ku ta difísil pa e deskribí e satisfakshon ku e ta sinti ora e ta sirbi den e maneranan akí. El a bisa: ‘Tur e trabou i esfuerso ta bale la pena ora mi mira e apresio di e rumannan i kon kontentu nan ta keda ora nan drenta nan Salòn di Reino nobo òf ora nan haña yudansa despues di un desaster natural.’

Hopi ofrenda tabata boluntario, meskos ku e sakrifisionan ku nos ta hasi awe (Wak paragraf 7-13)

8 Yehova su organisashon semper a buska oportunidat pa apoyá e Reino. Na 1904, Ruman C. T. Russell a skirbi: ‘Nos kada un tin ku konsiderá nos mes komo mayordomo nombrá pa Señor di nos mes tempu, poder, plaka, etcetera i nos mester hasi  nos máksimo esfuerso pa usa e rekursonan akí lo mihó posibel, pa e gloria dje Doño,’ esta, Yehova. No tin duda, nos tin ku hasi sakrifisio pa nos ofresé sakrifisio na Yehova. I esaki sigur ta trese hopi bendishon. (2 Sam. 24:21-24) Awor, kon nos por hasi mihó uso di nos rekursonan?

Bètelitanan na Australia

9. Kiko e prinsipio na Lukas 10:2-4 ta siña nos enkuanto uso di nos tempu?

9 Nos tempu. Ta eksigí hopi tempu i esfuerso pa tradusí i imprimí nos literatura, konstruí lugánan di adorashon, organisá kongreso, yuda ora di desaster natural i pa hasi hopi otro trabou nesesario. Anto nos tin solamente 24 ora den ún dia. No opstante, Hesus a duna un prinsipio ku por yuda nos. Ora el a manda su disipelnan bai prediká, el a bisa nan pa “no para kumindá ningun hende na kaminda.” (Luk. 10:2-4) Dikon Hesus a duna nan e instrukshon ei? Un eksperto riba tereno di Beibel a bisa ku den tempu di Hesus, ora hende tabata kumindá otro, nan no tabata djis bùig kabes òf duna man. Mas bien, nan tabata kumindá otro ku hopi brasamentu i bùigmentu i nan tabata asta tira nan kurpa plat abou na suela. Tur esaki a tuma tempu. Hesus no tabata animando su siguidónan pa nan demostrá mal manera. Nò, e tabata ke yuda nan mira ku e tempu ku nan tabatin ta limitá i ku nan mester a hasi bon uso di nan tempu, hasiendo e kosnan di mas importante. (Efe. 5:16) Nos por apliká e prinsipio akí pa nos por tin mas tempu pa yuda ku e trabounan na fabor di e Reino?

Publikadónan di Reino na un Salòn di Reino na Kenia, Afrika

10, 11. (a) Kua ta algun manera ku nos donashonnan pa e obra mundial ta ser usá? (b) Ki prinsipio na 1 Korintionan 16:1 i 2 por yuda nos?

10 Nos plaka. Ta kosta hopi plaka pa finansiá e aktividatnan relashoná ku e Reino. Tur aña, miónes di dòler ta bai na gastunan di superintendentenan biahero, pioneronan spesial i misioneronan. Desde aña 1999, mas ku 24.500 Salòn di Reino a ser konstruí den paisnan di ménos rekurso. Asina mes, ainda tin mester di kasi 6.400 Salòn di Reino. Tur luna, un 100 mion Toren di Vigilansia i ¡Despertad! ta ser imprimí. Tur esaki ta ser sostené pa donashon boluntario.

11 Apòstel Pablo a duna un prinsipio ku nos por sigui ora nos ke duna kontribushon. (Lesa 1 Korintionan 16:1, 2.) Bou di inspirashon, el a animá su rumannan na Korinto pa no warda te fin di siman pa wak kiko nan a sobra pa nan por kontribuí, ma pa apartá loke nan por kontribuí for di komienso di siman. Meskos ku den promé siglo, awe rumannan ta plania adelantá pa kontribuí generosamente ku loke nan por. (Luk. 21:1-4; Echo. 4:32-35) Yehova ta balorá e spiritu generoso akí di su pueblo.

Un miembro di un Komité Regional di Konstrukshon ku ta traha boluntariamente na Tuxedo, New York, Merka

12, 13. Ki pensamentu por stroba algun ruman di usa nan energia, kapasidat i abilidatnan plenamente pa apoyá e Reino, pero kon Yehova por yuda nan?

12 Nos energia, kapasidat i abilidatnan. Ora nos ta hasi esfuerso pa usa nos energia, kapasidat i abilidatnan na benefisio di e Reino, Yehova ta sostené nos. El a primintí ku lo e yuda nos ora nos ta kansá. (Isa. 40:29-31) Bo ta sinti ku bo no ta kapas pa yuda ku e trabou òf ku otronan por hasié mihó ku bo? Si ta asina, kòrda ku Yehova por yuda nos tur bira mas ábil, manera el a hasi ku Bezaleel i Aholiab.—Éks. 31:1-6; wak e promé plachi.

13 Yehova ta animá nos pa no laga nada stroba nos di duna lo mihó ku nos por. (Pro. 3:27) Durante rekonstrukshon di e tèmpel, Yehova a urgi e hudiunan na Herúsalèm pa pensa seriamente riba loke nan tabata hasiendo pa sostené e trabou. (Ageo 1:2-5) Nan a ser distraí i a stòp di enfoká riba e trabou di Yehova. P’esei, ta bon pa nos puntra nos mes: ‘Yehova su boluntat  ta e kos di mas importante den mi bida?’ Sí, ta bon pa nos pensa seriamente tokante nos bida. I si nos por hasi mas pa apoyá e Reino di Dios den e último dianan akí, laga nos plania kon pa logra esei.

SAKRIFISIO SEGUN LOKE NOS TIN

14, 15. (a) Kon e ehèmpel di rumannan di ménos rekurso ta animá nos? (b) Kiko mester ta nos deseo?

14 Hopi hende ta biba den áreanan kaminda tin hopi pobresa i bida ta sumamente difísil. Nos organisashon ta purba di “kompensá” loke nos rumannan ku ta biba den paisnan ei ta falta. (2 Kor. 8:14) Pero asta rumannan di ménos rekurso ta balorá e privilegio di duna. I Yehova ta keda masha kontentu ora e ta mira kon e rumannan akí ta duna tur loke nan por ku alegria.—2 Kor. 9:7.

15 Den un pais masha pober na Afrika, algun ruman ta separá pida chikitu di nan hardin pa e Reino. Kon asina? Wèl, e plaka ku nan risibí despues ku nan bende e kosecha ku e sekshon ei produsí nan ta usa pa sostené e obra di Reino. Ora ku a plania pa konstruí un Salòn di Reino den e pais ei, e rumannan lokal tabata kla pa yuda. Pero e proyekto mester a kuminsá nèt den temporada di plantashon. Asina mes, komo ku e rumannan tabata determiná pa yuda, nan tabata traha den dia riba e Salòn di Reino i anochi nan tabata okupá nan mes ku nan plantashon. Ki un ekselente spiritu di sakrifisio propio! Esaki ta laga nos kòrda riba nos rumannan di promé siglo ku tabata biba na Masedonia. Aunke nan tabata “masha pober,” tòg nan a supliká Pablo pa laga nan kontribuí pa e proyekto ku tabata andando. (2 Kor. 8:1-4) Di mes manera, laga nos kada un ‘duna manera nos por, konforme e bendishon ku Yehova a duna nos.’—Lesa Deuteronomio 16:17.

16. Kon nos por hasi sigur ku nos sakrifisionan ta aseptabel pa Yehova?

16 Ora nos ta hasi sakrifisio, nos tin ku tene kuidou sí pa nos no neglishá loke ta mas importante. Kon asina? Wèl, meskos ku e israelitanan di antigwedat, nos tambe mester hasi sigur ku e sakrifisionan ku nos ta hasi boluntariamente ta aseptabel pa Dios. Nos mester kòrda ku nos famia i nos relashon ku Yehova ta nos responsabilidatnan di mas importante. Pues, e echo ku nos ta usa nos tempu i rekursonan na benefisio di otronan no mester pone ku nos ta neglishá e spiritualidat òf bienestar físiko di nos famia. Pasobra, bon mirá, nos lo ta dunando algu ku nos no tin. (Lesa 2 Korintionan 8:12.) Ademas, ta importante pa nos sigui fortalesé nos relashon ku Yehova. (1 Kor. 9:26, 27) I nos por tin sigur ku si nos sigui biba na armonia ku prinsipionan bíbliko, nos sakrifisionan lo hasi nos felis i nan lo ta “spesialmente aseptabel” pa Yehova.

NOS SAKRIFISIONAN TA DI GRAN BALOR

17, 18. Kon nos ta sinti enkuanto nos rumannan ku ta hasi sakrifisio pa e Reino, i kiko nos tur mester pensa ariba?

17 Na moda di papia, hopi ruman ta ‘basha nan mes manera un ofrenda di bibida’ mediante e esfuersonan ku nan ta hasi pa apoyá e Reino. (Flp. 2:17) Nos tin gran apresio pa e rumannan ku ta demostrá un spiritu asina. Ademas, nos palabranan di elogio ta bai pa esposa i yunan di e ruman hòmbernan ku ta dirigí e trabou di Reino pa nan generosidat i e spiritu di sakrifisio propio ku nan ta desplegá.

18 No tin duda, trabou duru ta nesesario pa apoyá e Reino. P’esei, laga nos tur hasi orashon i pensa seriamente kon nos por duna mas tantu posibel na Yehova. Si nos hasi esei, nos lo risibí hopi bendishon, awor i muchu mas ainda “den e era ku ta bini.”—Mar. 10:28-30.

^ par. 2 Wak e artíkulo “Hasi Sakrifisio di Henter Alma pa Yehova” den E Toren di Vigilansia di 1 di yanüari 2012, página 23-27.