Bai na kontenido

Bai na kontenido

Biba na Armonia ku e Orashon di Hesus

Biba na Armonia ku e Orashon di Hesus

“Tata, . . . glorifiká bo yu, pa bo yu por glorifiká bo.” —HUAN 17:1.

1, 2. Kiko Hesus a hasi despues ku el a selebrá e Pasku Hudiu ku su fiel apòstelnan na aña 33?

TABATA anochi lat, dia 14 di nisan di aña 33, i Hesus a kaba di selebrá e Pasku Hudiu huntu ku su amigunan di mas íntimo. E selebrashon ei a konmemorá e manera ku Dios a libra nan antepasadonan for di Egipto. Pero e fiel disipelnan di Hesus lo a eksperensiá un liberashon muchu mas grandi, un “liberashon eterno.” E siguiente dia (pero ainda e dia hudiu di 14 di nisan), Hesus lo a ser matá pa su enemigunan. Pero e atrosidat akí lo a ser transformá den un bendishon, pasobra e sanger perfekto ku Hesus a drama lo a perkurá e base pa humanidat ser librá for di piká i morto.—Heb. 9:12-14.

2 Pa hasi sigur ku nos no ta lubidá e regalo amoroso akí, Hesus a kuminsá un konmemorashon anual nobo ku a remplasá e Pasku Hudiu. El a kue un pida pan sin zürdeg, kibr’é, pas’é pa kada un di su 11 apòstelnan fiel i a bisa nan: “Esaki ta representá mi kurpa ku lo mi duna pa boso. Sigui hasi esaki na mi memoria.” Asina tambe el a kue un kopa di biña kòrá i a bisa nan: “E kopa akí ta representá e pakto nobo a base di mi sanger ku lo mi drama pa boso.”—Luk. 22:19, 20.

3. (a) Ki kambio grandi a tuma lugá despues di Hesus su morto? (b) Kua ta algun pregunta ku ta bon pa nos pensa ariba segun ku nos ta analisá e orashon di Hesus ku tin pará na Huan kapítulo 17?

3 Pronto lo a yega un fin na e pakto di Lei ku tabatin entre Dios i e nashon di Israel. Na su lugá lo a bini un pakto nobo entre Yehova i Hesus su siguidónan ungí. Hesus no tabata ke pa su siguidónan bira manera e nashon di Israel. E israelitanan tabata masha dividí, tantu riba tereno religioso komo sosial, i esei  a trese gran reproche riba e nòmber di Dios. (Huan 7:45-49; Echo. 23:6-9) Na kontraste, Hesus tabata ke pa su siguidónan traha den union ku otro di manera ku nan lo a trese gloria pa e nòmber di Dios. Pues, kiko Hesus a hasi? El a pidi su Tata yudansa den e orashon di mas bunita ku un hende lo por tin e onor di lesa. (Huan 17:1-26; wak e promé plachi.) Segun ku nos ta analisá e orashon ei, nos por puntra nos mes: ‘Dios a kontestá Hesus su orashon? Ami ta biba na armonia ku e orashon ei?’

LOKE TABATA MAS IMPORTANTE PA HESUS

4, 5. (a) Kiko nos ta siña for di e promé parti di e orashon di Hesus? (b) Kon Yehova a kontestá e petishon ku Hesus a hasi pa su mes?

4 Hesus a keda papia te lat ku su disipelnan i a siña nan hopi kos maravioso tokante Dios. Ora el a kaba, el a hisa su kara na shelu i a bisa: “Tata, e ora a yega; glorifiká bo yu, pa bo yu por glorifiká bo, pa asina, meskos ku bo a dun’é outoridat riba tur hende, e por duna tur esnan ku bo a dun’é bida eterno. . . . Mi a glorifiká bo riba tera i a kaba ku e trabou ku bo a duna mi pa hasi. Pues awor, Tata, duna mi gloria banda di bo, e mesun gloria ku mi tabatin banda di bo promé ku mundu a eksistí.”—Huan 17:1-5.

5 Tuma nota ku Hesus a kuminsá su orashon menshonando e kosnan ku tabata mas importante p’e. Na promé lugá, el a pidi pa su Tata selestial ser glorifiká, i esaki ta kuadra ku e promé petishon di su orashon modelo: “Tata, laga bo nòmber sea santifiká.” (Luk. 11:2) Na di dos lugá, el a hasi orashon pa su disipelnan; el a pidi Dios dun’é e outoridat p’e ‘por duna nan bida eterno.’ Finalmente, Hesus a pidi algu pa su mes, bisando: “Tata, duna mi gloria banda di bo, e mesun gloria ku mi tabatin banda di bo promé ku mundu a eksistí.” Yehova a skucha e orashon di su Yu fiel i a rekompens’é ku asta mas ku loke el a pidi. Dios a dun’é “un nòmber ku ta mas ekselente ku esun di nan.”—Heb. 1:4.

‘SIÑA KONOSÉ E ÚNIKO DIOS BERDADERO’

6. Kiko e apòstelnan mester a hasi pa nan haña bida eterno, i kon nos por sa ku nan a logra hasi esaki?

6 Hesus a menshoná tambe den su orashon kiko nos komo pekadó tin ku hasi pa nos haña e regalo inmeresí di bida eterno. (Lesa Huan 17:3.) El a bisa ku nos tin ku ‘siña konosé’ Dios i Kristu. Kon nos por hasi esei? Un manera ta di hasi nos bèst pa siña tur loke nos por tokante Yehova i su Yu. Pero esei so no ta basta. Tambe nos mester praktiká loke nos ta siña i asina eksperensiá e goso ku esaki ta duna. E apòstelnan ya a hasi e dos kosnan akí ku ta hiba na bida, pasobra Hesus a sigui bisa den orashon: “Mi a duna nan e palabranan ku bo a duna mi, i nan a aseptá nan.” (Huan 17:8) Pero pa nan haña bida eterno, nan mester a sigui meditá riba e palabranan di Dios i pone nan na práktika den nan bida di tur dia. Akaso e apòstelnan a keda hasi esaki pa restu di nan bida riba tera? Definitivamente ku sí. Nos sa esei pasobra nan tur su nòmber ta skirbí pa semper riba e 12 piedranan di fundeshi di e Herúsalèm Nobo ku ta den shelu.—Rev. 21:14.

7. Kiko “konosé” Dios ta nifiká, i dikon esei ta asina importante?

7 Segun ekspertonan di idioma griego, por tradusí e ekspreshon “siña konosé” tambe ku “mester sigui konosé.” E dos ideanan tin kasi e mesun nifikashon i ta referí na un proseso kontinuo ku ta nesesario pa yega na e resultado deseá, esta, e privilegio di “konosé” Dios. Pero pa un  hende por konosé e Persona di mas importante den universo, esei ta nifiká mas ku djis sa kiko ta Dios su propósito i kualidatnan. Konosé Yehova ta enserá ku nos ta stima Yehova profundamente i tin un amistat será kuné i ku nos rumannan. Beibel ta splika ku “ken ku no ta stima no a siña konosé Dios.” (1 Huan 4:8) Pues, konosé Dios ta enserá tambe ku nos ta obedes’é. (Lesa 1 Huan 2:3-5.) Ki un gran privilegio di por ta entre esnan ku konosé Yehova! Pero nos tin ku tene kuidou pa nos no pèrdè e amistat presioso ei, manera a pasa ku Hudas Iskariot. P’esei laga nos traha duru pa fortalesé nos amistat ku Yehova. Si nos hasi esei, ku tempu nos lo bini na remarke pa haña e regalo inmeresí di bida eterno.—Mat. 24:13.

“PA MOTIBU DI BO NÒMBER”

8, 9. Kiko tabata e kos di mas importante pa Hesus ora e tabata riba tera, i kua tradishon siguramente el a rechasá?

8 Despues di lesa e orashon di Hesus na Huan kapítulo 17, nos ta mira klaramente ku Hesus tabatin un amor profundo pa su apòstelnan, ku tabata einan huntu kuné, pero tambe pa su futuro disipelnan. (Huan 17:20) Ma a la bes nos tin ku komprondé ku nos salbashon no tabata e kos di mas importante pa Hesus. For di prinsipio te na final di su sirbishi riba tera, su propósito prinsipal tabata pa santifiká i glorifiká e nòmber di su Tata. Por ehèmpel, ora ku e tabata den e snoa di Názarèt i a splika kiko tabata su enkargo, el a lesa for di e ròl di Isaías: “E spiritu di Yehova ta riba mi, pasobra el a ungi mi pa deklará bon notisia na hende pober.” Nos por tin sigur ku ora Hesus a lesa esei, el a pronunsiá e nòmber di Dios bon kla.—Luk. 4:16-21.

9 Hopi promé ku Hesus a bini na mundu, lidernan religioso hudiu tabata siña e hendenan pa no usa e nòmber di Dios. Nos por tin sigur ku Hesus a rechasá e tradishon ei kategórikamente. El a bisa su opositornan: “Mi a bini den nòmber di mi Tata, ma boso no ta aseptá mi; si un otro hende a bini den su mes nòmber, e ora  ei sí boso lo a asept’é.” (Huan 5:43) Anto un par di dia promé ku su morto, Hesus a bolbe indiká kiko tabata e kos di mas importante den su bida ora el a pidi den orashon: “Tata, glorifiká bo nòmber.” (Huan 12:28) Pues, no ta straña nos ku den e orashon ku nos ta analisando awor tambe ta bisto ku e kos di mas importante den e bida di Hesus tabata pa e duna gloria na e nòmber di su Tata.

10, 11. (a) Kon Hesus a hasi e nòmber di su Tata konosí? (b) Dikon e disipelnan di Hesus ta hasi e nòmber di Yehova konosí?

10 Hesus a pidi den orashon: “Mi a hasi bo nòmber konosí na e hendenan ku tabata den mundu i ku bo a duna mi. Nan tabata di bo, i bo a duna mi nan, i nan a kumpli ku bo palabra. Ademas, mi ta bini serka bo i no ta keda den mundu mas; ma nan sí ta keda den mundu. Tata Santu, protehá nan pa motibu di bo nòmber ku bo a duna mi, pa nan por ta ún meskos ku nos ta ún.”—Huan 17:6, 11.

11 Ora Hesus a hasi e nòmber di su Tata “konosí” na su disipelnan, el a hasi mas ku djis pronunsiá e nòmber ei. Hesus a yuda nan komprondé ken Yehova ta. El a siña nan tokante Dios su kualidatnan maravioso i e manera amoroso ku e ta trata nos. (Éks. 34:5-7) Es mas, awor ku e ta Rei den shelu, e ta sigui yuda su disipelnan hasi e nòmber di Yehova konosí rònt mundu. Ku ki meta? Pa yuda mas hende siña konosé Yehova promé ku fin di e sistema malbado akí. I ora e fin yega, Yehova lo libra su testigunan leal i tur hende lo konosé su gran nòmber!—Eze. 36:23.

“PA ASINA MUNDU POR KERE”

12. Kua ta e tres kosnan ku ta nesesario pa nos por logra hasi e trabou ku ta salba bida?

12 Tempu Hesus tabata riba tera, el a traha duru pa yuda su disipelnan vense nan debilidatnan. Esaki tabata esensial pa nan por a kaba ku e trabou ku Hesus a kuminsá. El a bisa den orashon: “Meskos ku bo a manda mi den mundu, ami tambe a manda nan den mundu.” Pero Hesus a enfatisá tres kos ku ta sumamente nesesario pa nan por a logra hasi e trabou akí ku ta salba bida. Di promé, el a pidi pa su disipelnan no ta parti di e mundu impuru di Satanas. Di dos, el a pidi pa nan por obedesé e bèrdat ku tin den e Palabra di Dios i asina ser santifiká, es desir, keda limpi. Di tres, Hesus a supliká vários biaha pa e mesun laso di amor ku tin entre e ku su Tata por eksistí entre su disipelnan i yuda nan keda uní. En bista di esaki, nos kada un mester puntra nos mes: ‘Ami ta biba na armonia ku e tres kosnan akí ku Hesus a menshoná den su orashon?’ Hesus tabatin e konfiansa ku si su disipelnan a hasi e kosnan ei, hopi hende lo a aseptá nan mensahe.—Lesa Huan 17:15-21.

Kristiannan di promé siglo a kolaborá ku spiritu santu pa keda uní ku otro (Wak paragraf 13)

13. Kon Yehova a kontestá e orashon di Hesus den e promé siglo?

13 Ora nos studia e buki di Echonan, ku ta bini despues di e kuater Evangelionan, nos por mira ku Yehova a kontestá e orashon di Hesus. E kongregashonnan den e promé siglo tabata konsistí di hudiu i hende no hudiu, riku i pober, katibu i shon. Pues, tabatin hopi chèns ku lo a surgi desunion. Pero e kristiannan tabata asina uní ku apòstel Pablo a kompará nan ku diferente parti di un kurpa humano ku tabatin Hesus komo nan kabes. (Efe. 4:15, 16) E tipo di union ei meimei di e mundu dividí di Satanas tabata un logro milagroso! Esaki tabata posibel solamente ku yudansa di Yehova su poderoso spiritu santu.—1 Kor. 3:5-7.

Rònt mundu, e pueblo di Yehova ta uní

(Wak paragraf 14)

14. Kon Yehova a kontestá e orashon di Hesus den nos tempu?

14 Lamentablemente, e union milagroso akí a disparsé despues di morto di e  apòstelnan. Manera a ser profetisá, a surgi un gran apostasia ku a hiba na e sektanan dividí di kristiandat. (Echo. 20:29, 30) Pero na aña 1919, Hesus a libra su siguidónan ungí for di e gara di religion falsu i a trese nan huntu den “e laso perfekto di union.” (Kol. 3:14) Ki efekto nan predikashon uní tabatin riba e restu di mundu? Mas ku 7 mion “otro karné” for di “tur nashon, tribu, pueblo i idioma” ta djòin e ungínan di Dios den un solo tou uní. (Huan 10:16; Rev. 7:9) Esta un kontesta espektakular di e orashon di Hesus! El a pidi Yehova: “Pa asina mundu por sa ku ta abo a manda mi i ku bo ta stima nan meskos ku bo ta stima mi.”—Huan 17:23.

UN KONKLUSHON KONMOVEDOR

15. Ki petishon spesial Hesus a hasi pa su disipelnan ungí?

15 Mas promé riba e anochi di 14 di nisan, Hesus a duna “gloria,” òf onor, na su apòstelnan ora ku el a sera un pakto ku nan pa nan goberná huntu kuné den su Reino. (Luk. 22:28-30; Huan 17:22) Pues awor Hesus a pidi lo siguiente den orashon pa tur ku lo a bira su siguidó ungí: “Tata, mi ke pa esnan ku bo a duna mi tambe por ta kaminda mi ta, pa nan por mira e gloria ku bo a duna mi, pasobra bo a stima mi promé ku a funda mundu.” (Huan 17:24) En bes di bira yalurs, e otro karnénan di Hesus ta keda masha kontentu pa nan kompañeronan ungí, i esei ta un prueba mas di e union ku tin entre tur kristian berdadero awe.

16, 17. (a) Kiko Hesus a bisa na final di su orashon ku lo e sigui hasi? (b) Kiko nos mester sigui hasi?

16 Mayoria di hende na mundu, bou di influensia di nan lidernan religioso, ta skohe pa no hasi kaso di e evidensia kla ku Yehova tin un pueblo ku ta uní i ku realmente konos’é. Den tempu di Hesus tambe esaki a sosodé. P’esei el a konkluí su orashon ku e palabranan konmovedor akí: “Tata hustu, en bèrdat mundu no konosé bo; ma ami sí konosé bo, i esakinan sa ku ta abo a manda mi. I mi a hasi bo nòmber konosí na nan i lo mi sigui hasié konosí, pa nan por demostrá e amor ku bo a stima mi kuné i pa mi por ta den union ku nan.”—Huan 17:25, 26.

17 Ta ken por nenga ku Hesus a biba na armonia ku su orashon? Komo Kabes di e kongregashon, e ta sigui yuda nos hasi e nòmber i propósito di su Tata konosí. Laga nos sigui someté nos mes na su outoridat dor di obedesé ku smak e mandamentu ku el a duna pa prediká i hasi disipel. (Mat. 28:19, 20; Echo. 10:42) Ademas, laga nos sigui hasi esfuerso pa keda un pueblo uní. Di e manera ei nos lo ta bibando na armonia ku e orashon di Hesus, i esei lo resultá den gloria pa e nòmber di Yehova i den nos felisidat eterno.