Bai na kontenido

Bai na kontenido

Bo Tin Yehova Su Punto di Bista di Kosnan Sagrado?

Bo Tin Yehova Su Punto di Bista di Kosnan Sagrado?

 Bo Tin Yehova Su Punto di Bista di Kosnan Sagrado?

“Vigilando kuidadosamente . . . pa no tin fornikadó ni ningun hende ku no ta apresiá kosnan sagrado.”—HEBREONAN 12:15, 16, NW.

1. Ki aktitut ku ta reina den mundu e sirbidónan di Yehova no tin?

MUNDU en general kasi no ta presta atenshon mas na kosnan sagrado. E sosiólogo franses Edgar Morin a deklará: “Tur e fundeshinan riba kua normanan moral ta basá—Dios, naturalesa, patria, historia, inteligensia—a pèrdè nan karakter apsoluto. . . . Hende mes ta skohe kua ta e norma- i balornan ku nan ke sigui.” Esaki ta un refleho di “e spiritu di mundu,” esta, “e spiritu ku ta obra awor den e yunan di desobedensia.” (1 Korintionan 2:12; Efesionan 2:2) E personanan ku a dediká nan mes na Yehova i ku di buena gana ta someté nan mes na su soberania legítimo, no tin e spiritu òf aktitut sin rèspèt ei pa ku kosnan sagrado. (Romanonan 12:1, 2) Sirbidónan di Dios mas bien ta realisá ki papel importante santidat tin den e adorashon ku nan ta rindi na Yehova. Kiko ta e kosnan den nos bida ku lo mester ta sagrado? E artíkulo aki lo konsiderá sinku kos ku ta santu pa tur sirbidó di Dios. Anto e siguiente artíkulo lo enfoká riba e santidat di nos reunionnan kristian. Pero promé, kiko e palabra “santu” ta nifiká realmente?

2, 3. (a) Kon e Skritura ta enfatisá Yehova su santidat? (b) Kon nos ta demostrá ku nos ta konsiderá e nòmber di Yehova komo santu?

2 Den e idioma hebreo bíbliko, e palabra “santu” ta transmití e idea di un kos ku ta separá. Den adorashon, “santu” ta apliká na loke ta separá òf apartá for di uso komun i koriente, es desir, loke ta ser konsiderá sagrado. Yehova ta santu den e sentido apsoluto, te na e grado máksimo. Beibel ta yam’é e “Santísimo.” (Proverbionan 9:10, NW; 30:3, NW) Den antiguo Israel, e sumo saserdote tabatin un plachi di oro pegá na su tulban ku e palabranan grabá “Santidat ta pertenesé na Yehova.” (Eksodo 28:36, 37, NW) E Skritura ta deskribí kon kerubin- i serafinnan selestial stashoná rònt di e trono di Yehova ta proklamá: ‘Santu, santu, santu, ta Yehova.’ (Isaias 6:2, 3; Revelashon 4:6-8) E ripitishon aki ta enfatisá e echo ku Yehova ta santu, limpi i puru na e grado di mas haltu. De echo, Yehova ta e Fuente di tur santidat.

3 Yehova su nòmber ta sagrado òf santu. E salmista a deklará: “Laga nan alabá bo nòmber grandi i temibel; santu e ta.” (Salmo 99:3) Hesus a siña nos pidi den orashon: “Nos Tata ku ta den shelu, bo nòmber sea santifiká [òf, “sea konsiderá sagrado; sea tratá komo santu,” NW, nota na pia di página].” (Mateo 6:9) Hesus su mama terenal, Maria, a proklamá: “Mi alma ta engrandesé Señor . . . Esun Poderoso a hasi kosnan grandi pa mi; i santu ta su nòmber.” (Lukas 1:46, 49) Komo sirbidónan di Yehova, nos ta konsiderá su nòmber komo santu i ta evitá di hasi kualke kos ku lo por trese reproche riba e nòmber santu ei. Ademas, nos tin Yehova su punto di bista di kosnan sagrado, es desir, nos ta konsiderá komo sagrado e kosnan ku e ta haña ta sagrado.—Amos 5:14, 15.

Dikon Nos Tin Rèspèt Profundo pa Hesus

4. Dikon Beibel ta deskribí Hesus komo “Esun Santu”?

4 Komo e yu “unigénito” di e Dios santu, Yehova, Hesus a ser kreá santu. (Juan 1:14;  Kolosensenan 1:15; Hebreonan 1:1-3) P’esei Beibel ta yam’é “Esun Santu di Dios.” (Juan 6:69) El a keda ku su santidat ora ku Dios a transferí su bida for di shelu pa tera, pasobra tabata bou di poder di spiritu santu ku Maria a duna lus na Hesus. Un angel a bisa Maria: “Spiritu santu lo bin riba bo . . . esun santu ku tin ku nase lo wòrdu yamá e Yu di Dios.” (Lukas 1:35) Den orashon na Yehova, kristiannan na Yerusalèm a referí dos biaha na Dios su Yu komo “bo Yu santu Hesus.”—Echonan 4:27, 30.

5. Ki mishon sagrado Hesus a kumpli kuné riba tera, i dikon su sanger ta presioso?

5 Hesus tabatin un mishon sagrado pa kumpli kuné miéntras ku e tabata riba tera. Na momento di su boutismo na aña 29 di nos era, el a ser ungí komo Sumo Saserdote di e gran tèmpel spiritual di Yehova. (Lukas 3:21, 22; Hebreonan 7:26; 8:1, 2) Ademas, lo e tabatin ku entregá su bida komo un sakrifisio. E sanger ku el a drama lo a perkurá e reskate pa medio di kua pekadónan humano lo por a haña salbashon. (Mateo 20:28; Hebreonan 9:14) P’esei nos ta konsiderá e sanger di Hesus komo sagrado, “presioso.”—1 Pedro 1:19.

6. Kiko ta nos aktitut pa ku Kristu Hesus, i dikon?

6 Demostrando ku nos tin un profundo rèspèt pa nos Rei i Sumo Saserdote, Kristu Hesus, apòstel Pablo a skirbi: “Dios a halsa [su Yu] te na e halturanan, i a dun’é e nòmber ku ta riba tur nòmber, ku pa e nòmber di Hesus tur rudia mester dobla, di esnan ku ta den shelu, i riba tera, i bou di tera, i ku tur lenga mester konfesá ku Hesukristu ta Señor, pa e gloria di Dios Tata.” (Filipensenan 2:9-11) Nos ta demostrá ku nos tin Yehova su punto di bista di kosnan sagrado ora nos ta someté nos mes gososamente na nos Lider i Rei reinante, Kristu Hesus, e Kabes di e kongregashon kristian.—Mateo 23:10, NW; Kolosensenan 1:18.

7. Kon nos ta mustra nos sumishon na Kristu?

7 Sumishon na Kristu ta enserá tambe ku nos ta mustra e debido rèspèt pa e hòmbernan ku e ta usa pa hiba delantera den e trabou ku e ta dirigiendo awor. Nos mester rekonosé ku e papel di esnan ungí pa spiritu santu ku ta forma e Kuerpo Gobernante ta un responsabilidat sagrado. Esei ta konta tambe pa papel di e superintendentenan ku nan a apuntá den e sukursalnan, distritonan, sirkuitonan i kongregashonnan. P’esei e areglo aki ta meresé nos rèspèt profundo i sumishon.—Hebreonan 13:7, 17.

Un Pueblo Santu

8, 9. (a) Den ki sentido e israelitanan tabata un pueblo santu? (b) Kon Yehova a inkulká den e israelitanan e prinsipio di santidat?

8 Yehova a sera un aliansa ku Israel. E relashon aki a duna e nashon nobo ei un status òf posishon spesial. Nan a ser santifiká òf poné apart. Yehova mes a bisa nan: “Boso mester ta santu pa mi, pasobra ami, SEÑOR, ta santu; i mi a apartá boso for di e pueblonan pa boso ta di mi.”—Levítiko 19:2; 20:26.

9 For di ora Yehova a funda e nashon di Israel, el a inkulká den e israelitanan e prinsipio di santidat. Yehova a dekretá pena di morto pa e persona ku a djis mishi ku e seru  kaminda e Dies Mandamentunan tabata ser duná. Pues den un sentido Seru Sinaí a ser konsiderá komo sagrado. (Eksodo 19:12, 23) E israelitanan mester a konsiderá e saserdosio i e tabernakel ku su mobilario tambe komo sagrado. (Eksodo 30:26-30) Kiko ta e situashon den e kongregashon kristian?

10, 11. Dikon nos por bisa ku e kongregashon kristian di ungínan ta sagrado, i ki efekto esaki tin riba e “otro karnénan”?

10 E kongregashon kristian di ungínan ta sagrado den bista di Yehova. (1 Korintionan 1:2) De echo, henter e grupo di kristian ungí riba tera na kualke momento durante di historia ta ser kompará ku un tèmpel santu, ounke no ta nan ta forma e gran tèmpel spiritual di Yehova. Pa medio di su spiritu santu Yehova ta biba den e tèmpel ku nan ta representá. Apòstel Pablo a skirbi: “Den [union ku Kristu Hesus] henter e edifisio, siendo bon hinká den otro, ta krese pa bira un tèmpel santu den Señor; den kende boso tambe ta wòrdu trahá konhuntamente pa ta un lugá-di-biba pa Dios den spiritu.”—Efesionan 2:21, 22; 1 Pedro 2:5, 9.

11 Pablo a skirbi mas aleu na kristiannan ungí: “Boso no sa ku boso ta e tèmpel di Dios, i ku e spiritu di Dios ta biba den boso? . . . E tèmpel di Dios ta santu, i esei ta loke boso ta.” (1 Korintionan 3:16, 17) Pa medio di su spiritu, Yehova ta “biba” entre e ungínan i ta “kana meimei di nan.” (2 Korintionan 6:16) Kontinuamente e ta guia su “esklabo” fiel. (Mateo 24:45-47) E “otro karnénan” ta apresiá e privilegio ku nan tin di por asosiá ku e grupo aki konsiderá komo un “tèmpel.”—Juan 10:16; Mateo 25:37-40.

Kosnan Sagrado den Nos Bida Kristian

12. Kiko ta kosnan ku ta sagrado den nos bida, i dikon?

12 Pues anto, no ta un sorpresa ku hopi kos den bida di e miembronan ungí di e kongregashon kristian i di nan kompañeronan ta ser konsiderá sagrado. Nos relashon ku Yehova ta un kos sagrado. (1 Krónikanan 28:9; Salmo 36:7) E ta asina presioso pa nos ku nos no ta permití nada ni niun persona bin entre nos i nos Dios, Yehova. (2 Krónikanan 15:2; Santiago 4:7, 8) Orashon ta hunga un papel importante den yuda nos mantené un relashon íntimo ku Yehova. Orashon tabata asina sagrado pa profeta Daniel ku asta ora ku su bida tabata na peliger el a sigui fiel den su kustumber di  hasi orashon na Yehova. (Daniel 6:7-11) Beibel ta kompará “e orashonnan di e santunan,” esta, di kristiannan ungí, ku e sensia usá den adorashon na e tèmpel. (Revelashon 5:8; 8:3, 4; Levítiko 16:12, 13) E simbolismo ei ta enfatisá e kondishon sagrado di orashon. Ta ki un gran privilegio nos tin di por komuniká ku e Soberano di universo! Nada straño ku nos ta konsiderá orashon komo sagrado den nos bida!

13. Kua forsa ta santu, i kon nos mester permitié funshoná den nos bida?

13 Tin un forsa den bida di kristiannan ungí i di nan kompañeronan ku definitivamente nan ta konsiderá sagrado: e spiritu santu. E spiritu ei ta e forsa aktivo di Yehova, i komo ku semper e ta aktua na armonia ku e boluntat di e Dios santu, e ta ser yamá korektamente “spiritu santu” òf “e spiritu di santidat.” (Juan 14:26; Romanonan 1:4) Pa medio di spiritu santu, Yehova ta duna su sirbidónan e poder pa prediká e bon nobo. (Echonan 1:8; 4:31) Yehova ta duna su spiritu na “esnan ku ta obedes’é,” esta, na esnan ku ta “kana segun e spiritu” i no segun deseonan di karni. (Echonan 5:32; Galationan 5:16, 25; Romanonan 8:5-8) E forsa poderoso aki ta hasi posibel ku kristiannan por produsí e “fruta di e spiritu”—es desir, kualidatnan ekselente—i “un kondukta santu i deboto.” (Galationan 5:22, 23; 2 Pedro 3:11) Si nos ta konsiderá spiritu santu komo sagrado, nos lo evitá di hasi kualke kos ku lo por hasié tristu òf strob’é di obra den nos bida.—Efesionan 4:30.

14. Ki privilegio e ungínan ta konsiderá komo sagrado, i kon e otro karnénan tambe ta kompartí e privilegio aki?

14 E privilegio ku nos tin di karga e nòmber di e Dios santu, Yehova, i di ser su Testigunan ta un otro kos ku nos ta konsiderá sagrado. (Isaias 43:10-12, 15) Yehova a kualifiká kristiannan ungí pa nan ta “sirbidónan di un aliansa nobo.” (2 Korintionan 3:5, 6) Komo tal, nan tin e tarea di prediká e bon nobo òf “evangelio aki di e reino” i di “hasi tur e nashonnan disipel.” (Mateo 24:14; 28:19, 20) Nan ta kumpliendo fielmente ku e enkargo aki, i miónes di hende mansu manera karné ta reakshonando faborablemente, bisando simbólikamente na e ungínan: “Laga nos bai ku boso, pasobra nos a tende ku Dios ta ku boso.” (Zakarias 8:23) E personanan mansu aki gososamente ta sirbi den sentido spiritual komo ‘kunukero’ i ‘kuidadó di kunuku’ pa e ‘sirbidónan ungí di nos Dios.’ Den e manera ei, e otro karnénan ta di gran yudansa pa e ungínan i ta duna nan un man pa nan por kumpli ku nan ministerio na un eskala mundial.—Isaias 61:5, 6.

15. Ki aktividat apòstel Pablo a konsiderá sagrado, i dikon nos tambe ta mir’é meskos?

15 Apòstel Pablo tabata un kristian ku a konsiderá su sirbishi òf ministerio públiko komo un kos sagrado òf santu. El a referí na su mes komo “un sirbidó públiko di Kristu Hesus p’e nashonnan, okupando [su] mes den e trabou santu di e bon nobo di Dios.” (Romanonan 15:16, NW) Den Pablo su karta na e kristiannan na Korinto, el a referí na su ministerio komo un “tesoro.” (2 Korintionan 4:1, 7) Mediante nos ministerio públiko, nos ta hasi konosí “e deklarashonnan sagrado di Dios.”  (1 Pedro 4:11, NW) P’esei, sea ku nos ta di e grupo ungí òf di e otro karnénan, nos ta konsider’é un privilegio di por partisipá den e trabou di duna testimonio.

‘Perfekshoná Santidat den Temor di Dios’

16. Kiko lo yuda nos evitá di bira hende “ku no ta apresiá kosnan sagrado”?

16 Apòstel Pablo a spièrta su kompañeronan kristian pa nan no bira personanan “ku no ta apresiá kosnan sagrado.” El a konsehá nan pa mas bien nan ‘sigui tras di santifikashon,’ “vigilando kuidadosamente . . . pa ningun rais venenoso nase i kousa difikultat i pa hopi no ser kontaminá p’e.” (Hebreonan 12:14-16, NW) E ekspreshon “rais venenoso” ta referí na e poko hendenan den e kongregashon kristian ku kisas ta kritiká e manera ku kosnan ta ser hasí. Por ehèmpel, kisas nan no ta di akuerdo ku Yehova su punto di bista relashoná ku e santidat di matrimonio òf ku ta nesesario pa mantené puresa moral. (1 Tesalonisensenan 4:3-7; Hebreonan 13:4) Òf podisé nan ta partisipá den kòmbersashonnan apóstata, “papiamentu bano ku ta violá loke ta santu,” presentá pa esnan ku “a desviá dje bèrdat.”—2 Timoteo 2:16-18, NW.

17. Dikon e ungínan konstantemente tin ku hasi esfuerso pa reflehá Yehova su punto di bista di santidat?

17 Pablo a skirbi na su rumannan ungí: “Stimánan, laga nos purifiká nos mes di tur impuresa di karni i spiritu, i asina perfekshoná nos santidat den e temor di Dios.” (2 Korintionan 7:1) E deklarashon aki ta mustra ku kristiannan ungí, “partisipantenan den un yamada selestial,” konstantemente tin ku hasi esfuerso pa duna prueba ku nan ta reflehá Yehova su punto di bista di santidat den tur aspekto di nan bida. (Hebreonan 3:1) Meskos tambe apòstel Pedro a stimulá su rumannan engendrá pa spiritu santu: “Komo yunan obedesidu, no konformá boso ku e pashonnan ku boso tabatin ántes den boso ignoransia, ma meskos ku Esun Santu ku a yama boso, boso mes tambe sea santu den tur boso kondukta.”—1 Pedro 1:14, 15.

18, 19. (a) Kon miembronan di e “multitut grandi” ta mustra ku nan tin e punto di bista di Yehova di kosnan sagrado? (b) Ki otro rasgo sagrado di nos bida kristian nos lo konsiderá den e siguiente artíkulo?

18 Kiko di e miembronan di e “multitut grandi,” kendenan lo sobrebibí “e gran tribulashon”? Nan tambe tin ku duna prueba ku nan tin Yehova su punto di bista di kosnan sagrado. Den e buki di Revelashon, nan ta ser deskribí komo rindiendo “sirbishi sagrado” [NW] na Yehova riba e plenchi terenal di su tèmpel spiritual. Nan a pone fe den Kristu su sakrifisio di reskate, i simbólikamente “a laba nan pañanan i a hasi nan blanku den e sanger di e Lamchi.” (Revelashon 7:9, 14, 15) Esaki ta duna nan un posishon limpi dilanti Yehova i ta pone nan bou di e obligashon di “purifiká [nan] mes di tur impuresa di karni i spiritu, i asina perfekshoná [nan] santidat den e temor di Dios.”

19 Un rasgo importante den bida di kristiannan ungí i di nan kompañeronan ta ku regularmente nan ta reuní huntu pa adorá Yehova i studia su Palabra. Yehova ta konsiderá e reunionnan di su pueblo komo un kos sagrado. Den e siguiente artíkulo nos lo trata kon i pakiko nos mester tin Yehova su punto di bista den e asuntu masha importante aki.

Komo Repaso

• Ki punto di bista mundano sirbidónan di Yehova no tin?

• Dikon Yehova ta e Fuente di tur loke ta santu?

• Kon nos ta mustra rèspèt pa e santidat di Kristu?

• Kiko ta e kosnan ku nos mester konsiderá sagrado den nos bida?

[Preguntanan di Estudio]

[Plachi na página 23]

Den antiguo Israel, nan mester a konsiderá e saserdosio i e tabernakel ku su mobilario komo sagrado

[Plachi na página 24]

E kristiannan ungí riba tera ta forma un tèmpel santu

[Plachinan na página 25]

Orashon i nos ministerio públiko ta privilegionan sagrado