Bai na kontenido

Bai na kontenido

IMITÁ NAN FE | SARA

Dios A Yam’é “Prinsesa”

Dios A Yam’é “Prinsesa”

SARA a kaba di traha, el a lanta para i wak leu. E tabata un muhé sabí i su sirbientenan tabata traha duru i kontentu bou di su guia. Pero, Sara tambe tabata hasi su parti. Imaginá bo kon miéntras e tabata wak leu, e tabata frega su mannan den otro pa suavisá e doló. Podisé e tabata drùk ta kose un pida lapi di paña pa sera un sker ku tabatin na nan tènt, nan hogar. Despues di tantu aña, e tela diki di lana di kabritu di e tènt a gasta debí na solo i áwaseru, loke sigur a pone Sara kòrda ku nan tabatin hopi tempu ta biba komo nomado. Solo a kuminsá baha, i e rayonan di lus a kuminsá bira oraño. Mainta el a wak Abraham * bai i awor ku anhelo e tabata wak den mesun direkshon, sperando riba dje. Su bunita kara a kuminsá bria i el a smail ora el a mira un swin di su esposo riba un seritu den serkania.

Ya un dékada a pasa ku Abraham a krusa Riu Eufrates i bai ku su famia i grupo grandi di sirbiente na Kanan. Aunke nan no tabata sa unda nan tabata bai, Sara di buena gana a apoyá su kasá riba e biahe akí komo ku e tabata sa ku su kasá lo a hunga un papel importante den Yehova su propósito di produsí un desendiente sumamente bendishoná i un nashon. Ma ki papel Sara lo a hunga? E tabata steril, i awor e tabatin 75 aña. Kisas el a puntra su mes: ‘Kon Yehova su propósito lo kumpli miéntras ku ta ami ta kasá di Abraham?’ Ta di komprondé ku e por tabata preokupá, òf asta por a pèrdè pasenshi.

Kisas nos tambe ta puntra nos mes na ki tempu Dios su promesanan lo kumpli. Nos por pèrdè pasenshi fásilmente, foral si nos ta warda pa mira un promesa ku nos ta anhelá kumpli. Pues, kiko nos por siña for di e fe fuerte akí di Sara?

“SEÑOR NO A LAGA MI”

E famia a kaba di sali for di Egipto. (Génesis 13:1-4) Nan tabata kamper den e serunan haltu ost di Bètel, òf Luz, manera e kananeonan tabata yam’é. Sara por a mira gran parti di e Tera Primintí for di e lugá haltu ei. Einan tabatin pueblitonan kananeo i kamindanan ku a hiba biaheronan na teranan leu. Pero, esakinan no tabata nada na komparashon ku Sara su tera natal. El a lanta den Ur, un stat di Mesopotamia ku tabata keda 1.900 kilometer leu. El a bai laga hopi miembro di su famia, hopi komodidat di un stat próspero ku tabatin merkado i bazarnan, su kas konfortabel ku muraya i dak i ku kisas asta tabatin un sistema di pipa di awa. Pero, si nos ta pensa ku Sara tabata wak den direkshon ost ku tristesa riba su kara, pensando riba e komodidatnan di su tera natal, e ora ei nos no konosé e señora deboto akí.

Tuma nota kiko apòstel Pablo a skirbi bou di inspirashon mas o ménos 2.000 aña despues. El a bisa tokante e fe di Sara ku Abraham: “Si di bèrdat nan a keda kòrda riba e lugá for di unda nan a sali, nan lo tabatin oportunidat pa bai bèk.” (Hebreonan 11:8, 11, 15) Ni Sara ni Abraham no a sinti nostalgia. Si nan a anhelá e kosnan di pasado, nan lo por a disidí di bai bèk. Sinembargo, si nan a bai bèk, nan lo a pèrdè e privilegio remarkabel ku Yehova tabatin pa nan. I nan sigur lo a pasa pa olvido en bes di a bira un ehèmpel di fe fuerte ku a yega na kurason di miónes di hende.

En bes di wak pasado, Sara a wak padilanti. P’esei el a sigui apoyá su esposo durante su biahe den e pais, a yud’é desarmá tènt, muda ku e tou i bolbe arma tènt. Pero ainda e tabatin ku enfrentá otro prueba- i kambionan. Yehova a bolbe konfirmá su promesa na Abraham, pero ainda e no a menshoná nada di Sara.—Génesis 13:14-17; 15:5-7.

Awor, Sara a haña ku tabata tempu p’e papia ku Abraham tokante un plan ku e tabatin na mente. Imaginá kon su kara tabata kambia segun ku e tabata bisa: “Awor mira, SEÑOR no a laga mi haña yu.” Despues el a pidi su kasá pa haña yu ku su kriá, Hagar. Bo por imaginá bo kon difísil lo tabata pa Sara pidi su kasá algu asina? Awe, esaki por parse algu straño, pero den antigwedat no tabata nada straño pa un hòmber tuma un di dos kasá, òf un konkubina, pa asina e produsí un desendiente. * Bo ta kere ku kisas Sara a hasi e petishon ei pasobra el a pensa ku di e manera ei Dios su propósito di produsí un nashon pa medio di Abraham su desendiente lo a kumpli? En todo kaso, e tabata dispuesto pa hasi un sakrifisio difísil. Kon Abraham a reakshoná? Nos ta lesa ku el “a skucha bos di [Sara].”—Génesis 16:1-3.

Akaso e relato ke laga nos komprondé ku Yehova a animá Sara pa pidi Abraham algu asina? Nò. Mas bien, loke el a pidi ta revelá ku e tabatin un punto di bista humano. El a kere ku ta Yehova a kousa su problemanan, i e no por a imagin’é ku Dios lo por tabatin un otro solushon. Sara su solushon lo a trese doló i problema p’e mes. Asina mes su idea a demostrá ku e no tabata egoista. Den un mundu kaminda mayoria di biaha hende ta pone nan mes interes promé ku tur otro kos, Sara su spiritu di sakrifisio propio ta sobresalí, no ta bèrdat? Nos lo imitá Sara su fe si nos ta dispuesto pa pone Dios su propósito promé ku nos propio interesnan.

“BO A HARI”

No muchu tempu despues Hagar a sali na estado. Awor ku e tabatin un yu di Abraham den su barika, kisas el a sinti ku e tabata mas importante ku Sara, i p’esei a kuminsá despresi’é. Esei tabata un gòlpi fuerte pa Sara ku no por a haña yu. Sara, ku pèrmit di Abraham i ku e apoyo di Dios, a skual Hagar na un manera ku Beibel no ta revelá. E añanan a bula bai despues ku Hagar a duna lus na su yu hòmber, Ismael. (Génesis 16:4-9, 16) E siguiente biaha ku e relato ta menshoná ku nan a haña un mensahe for di Yehova, Sara ya tabatin 89 aña i Abraham 99 aña. Anto ki un mensahe esaki tabata!

Un biaha mas Yehova ta primintí su amigu Abraham ku lo E multipliká su desendiente. Ademas, Dios a kambia su nòmber. Te na e momento ei, e tabata konosí komo Abram. Pero Yehova a dun’é e nòmber Abraham, ku ta nifiká “tata di hopi nashon.” I awor pa promé bes, Yehova a papia di e papel ku Sara lo tabatin den kumplimentu di su propósito. Yehova a kambia su nòmber Sarai, ku kisas ta nifiká algu manera “pleitista,” (NW) i yam’é Sara, e nòmber ku nos konosé mihó. Kiko e nòmber Sara ta nifiká? E ta nifiká “prinsesa.” (Wak nota na Génesis 17:15, BPK.) Yehova a splika dikon el a skohe e nòmber ei pa e señora stimá akí, ora el a bisa Abraham: “Lo Mi bendishon’é i pa medio di dje lo Mi duna bo un yu hòmber; sí, lo Mi bendishon’é i lo e bira mama di hopi nashon. Asta lo tin rei den su desendientenan.”—Génesis 17:5, 15, 16, BPK.

Yehova su pakto di produsí un desendiente ku lo a bendishoná tur nashon lo a kumpli mediante e yu hòmber di Sara. E nòmber ku Dios a skohe pa e yu tabata Isak, ku ta nifiká “e ta hari.” Na promé instante, ora Abraham a tende di Yehova su propósito pa bendishoná Sara ku un yu di su mes, Abraham “a tira su kurpa abou ku su kara te na suela i a hari.” (Génesis 17:17) E tabata asombrá i masha kontentu. (Romanonan 4:19, 20) I kiko di Sara?

No muchu tempu despues, tres hòmber estranhero a bini na e tènt di Abraham. Aunke nan a yega den un higra di solo, e pareha biehitu akí mesora a pura pa yama nan bishitantenan bon biní. Abraham a bisa Sara: “Hasi lihé, prepará tres midí di hariña fini, mans’é, i traha pan.” Den antigwedat, mustramentu di hospitalidat a enserá hopi trabou. Abraham no a laga tur e trabou pa su kasá i a pura pa mata un toro yòn i prepará mas kuminda i bibida. (Génesis 18:1-8) E “hòmbernan” akí a resultá di ta angel di Yehova. Muy probablemente, apòstel Pablo tabatin e suseso akí na mente ora el a skirbi: “No lubidá di mustra hospitalidat, pasobra pa medio di esei, algun, sin ku nan tabata sa, a risibí angel komo huéspet.” (Hebreonan 13:2) Abo por imitá e ekselente ehèmpel di hospitalidat di Abraham ku Sara?

Sara tabata gusta mustra hospitalidat

Ora un di e angelnan a ripití e promesa di Dios pa Abraham ku Sara lo a duna lus na un yu hòmber, Sara tabata for di nan bista den su tènt ta skucha. E idea di duna lus na su edat a pars’é asina straño ku e no por a yuda, i el a hari den su mes, bisando: “Awor ku mi a bira bieu, lo mi tin plaser, mi esposo siendo bieu tambe?” E angel a hasi Sara un pregunta stret pa korigié: “Por tin algu ku ta muchu difísil pa SEÑOR?” E manera ku Sara a reakshoná tabata manera kualke hende lo a hasi; e tabatin miedu i kier a defendé su mes. El a respondé: “Mi no a hari.” E angel a kontest’é: “Nò, ma bo a hari sí!”—Génesis 18:9-15.

E echo ku Sara a hari a demostrá ku e tabata falta fe? Nò, di ningun manera. Beibel ta bisa: “Pa medio di fe tambe Sara a risibí poder pa konsebí desendiente, asta ora el a pasa e edat di haña yu, ya ku el a konsiderá ku esun ku a hasi e promesa ta fiel.” (Hebreonan 11:11) Sara tabata konosé Yehova i tabata sa ku Yehova por kumpli ku kualke promesa ku e hasi. Nos tur mester di un fe fuerte asina. Pues nos lo hasi bon di siña konosé e Dios ku Beibel ta papia di dje mihó. Ora nos hasi esei, nos lo mira ku Sara tabatin bon motibu pa konfia den Dios. Yehova di bèrdat ta fiel i ta kumpli ku tur promesa ku e hasi. Anto tin biaha, e por hasi esei na un manera ku lo sorprendé nos i pone nos hari.

“SKUCH’É”

Yehova a bendishoná Sara pa su fe fuerte

Ku 90 aña di edat, por fin Sara por a disfrutá di e momento ku el a spera riba dje henter su bida. El a duna lus na un yu hòmber pa su esposo, kende ya tabatin 100 aña. Abraham a yama e bebi Isak, òf “e ta hari,” nèt manera Dios a bisa. Nos por imaginá kon Sara, kansá pero ku un smail briante riba su kara, a bisa: “Dios a hasi mi hari; tur hende ku tende lo hari huntu ku mi.” (Génesis 21:6) E regalo milagroso akí di Yehova sigur a hasi Sara kontentu pa restu di su bida. Pero tambe el a trese responsabilidatnan grandi p’e.

Tempu Isak tabatin sinku aña di edat, e famia a tene un fiesta pa selebrá e echo ku el a kita for di pechu. Pero no ta tur kos a kana bon. Nos ta lesa ku Sara “a mira” un problema ku a sigui persistí. Ismael, Hagar su yu di 19 aña, tabata tenta e chikitin Isak. Anto esaki no tabata djis pa prèt. Despues apòstel Pablo, bou di inspirashon, a yama loke Ismael a hasi un persekushon. Sara a mira e tentamentu akí pa loke e tabata: un menasa serio kontra bienestar di su yu. Sara tabata sa bon bon ku Isak tabata mas ku djis su yu; e tabatin un papel importante den e propósito di Yehova. Pues Sara a tuma un kurashi i a papia stret ku Abraham. El a pidi Abraham pa manda Hagar i Ismael bai.—Génesis 21:8-10; Galationan 4:22, 23, 29.

Kon Abraham a reakshoná? Nos ta lesa: “E  asuntu a duel Abraham mashá pa motibu di su yu hòmber.” Abraham tabata stima Ismael i su amor di tata a pone ku e no por a mira mas ayá di e asuntu. Ma Yehova si a mira e asuntu bon kla i p’esei el a intervení. Nos ta sigui lesa: “Ma Dios a bisa Abraham: ‘No tene duele pa motibu di e mucha ni pa motibu di bo kriá; kiko ku Sara bisa bo, skuch’é, pasobra ta dor di Isak bo desendientenan lo wòrdu kontá.’” Yehova a sigurá Abraham ku e lo a perkurá pa Hagar i su yu, i fiel Abraham a obedes’é.—Génesis 21:11-14.

Sara tabata un bon kasá pa Abraham i komplemento p’e. E no a djis bisa su kasá algu pa kishikí su orea. Ora Sara a mira un problema, algu importante ku por tabatin un efekto riba e famia i nan futuro, el a papia frankamente ku su esposo. Nos no mester mira su frankesa komo un falta di rèspèt. De echo, despues apòstel Pedro, kende tambe tabata kasá, a referí na loke Sara a hasi komo un ehèmpel ekselente di un esposa ku a mustra rèspèt profundo pa su esposo. (1 Korintionan 9:5; 1 Pedro 3:5, 6) En realidat, si Sara a keda ketu tokante e asuntu ei, lo el a falta rèspèt pa Abraham, pasobra esei lo por a trese konsekuensianan grave pa Abraham i henter e famia. Ku amor Sara a bisa loke mester a ser bisá.

Hopi esposa ta balorá Sara su bunita ehèmpel. For di dje nan ta siña kon pa komuniká habrí i respetuosamente ku nan kasá. Tin biaha, algun esposa kisas ta deseá pa Yehova intervení manera el a hasi den kaso di Sara. Asina mes, nan ta siña for di Sara su fe fuerte, amor i pasenshi.

Yehova a yama Sara “prinsesa,” pero Sara no a eksigí un trato spesial

Aunke Yehova mes a yama e señora stimá akí “prinsesa,” Sara no a eksigí un trato spesial. P’esei, no ta nada straño ku tempu el a muri na edat di 127 aña, Abraham a ‘tene rou pa Sara i a yor’é.’ * (Génesis 23:1, 2) E tabata sinti masha falta di su “prinsesa” stimá. Sin duda, Yehova Dios tambe ta sinti falta di e señora fiel akí i tin tur intenshon pa resusit’é den paradeis riba tera. Tantu Sara komo tur hende ku ta imitá su fe, lo haña felisidat, pas i bida eterno.—Huan 5:28, 29.

^ par. 3 Eigenlijk, e pareha tabata yama Abram ku Sarai; pero despues Dios a kambia nan nòmber. Pa mas fásil, nos lo usa e nòmbernan ku nan ta konosí p’e.

^ par. 10 Yehova a permití pa un hòmber tin mas ku un kasá i konkubina pa un tempu, pero despues el a duna Hesukristu e mandato pa restorá e norma original di matrimonio, esta, di tin un solo esposa, ku el a establesé den e hòfi di Edén.—Génesis 2:24; Mateo 19:3-9.

^ par. 25 Sara ta e úniko hende muhé ku Beibel ta menshoná su edat na momento di su morto.