Bai na kontenido

Bai na kontenido

Di Bèrdat Mundu Ta Bai Kaba?

Di Bèrdat Mundu Ta Bai Kaba?

Kisas bo a yega di tende ku Beibel ta papia di fin di mundu. (1 Huan 2:17) Esei ta nifiká ku hende lo stòp di eksistí? I kiko di nos planeta, lo e bira un lugá desolá sin bida riba dje? Òf lo e ser destruí kompletamente?

BEIBEL SU KONTESTA PA TUR E PREGUNTANAN EI TA NÒ!

Kiko Lo Sigui Eksistí?

HENDE

Loke Beibel ta bisa: Dios “no a krea [tera] pa e keda bashí, ma el a form’é pa e wòrdu habitá.”—ISAÍAS 45:18.

NOS PLANETA

Loke Beibel ta bisa: “Un generashon ta bai i un generashon ta bin, ma tera ta permanesé pa semper.”—EKLESIÁSTES 1:4.

KIKO ESEI TA NIFIKÁ? Beibel ta mustra bon kla ku nos planeta nunka lo ser destruí i ku semper lo tin hende riba dje. Pero, kiko fin di mundu ta nifiká anto?

PENSA RIBA ESAKI: Beibel ta kompará fin di e mundu akí ku loke a sosodé den tempu di Noe. E tempu ei, nos planeta tabata “yen di violensia.” (Génesis 6:13) Ma Noe tabata un hende hustu, p’esei Dios no a destruyé ni su famia. Pero, Dios a manda un diluvio i a destruí tur e hendenan malbado. Beibel ta konta loke a pasa: “E mundu di e tempu ei a ser destruí ora el a keda inundá ku awa.” (2 Pedro 3:6) Asina e mundu di e tempu ei a yega na su fin. Bo a ripará kiko a ser destruí? No nos planeta, ma e hendenan malbado. Pues, ora Beibel ta papia di fin di mundu, e no ke men ku nos planeta lo ser destruí. Mas bien, e ta referí na fin di hende malbado i di tur e kosnan malu ku ta pasa riba tera.

 Kiko Lo Stòp di Eksistí?

PROBLEMA I MALDAT

Loke Beibel ta bisa: “Aki poko tempu e malbado lo no t’ei mas; maske kuantu bo buska su lugá, lo e no t’ei. Ma e humildenan lo heredá e tera, i lo deleitá nan mes den pas abundante.”—SALMO 37:10, 11.

KIKO ESEI TA NIFIKÁ? E diluvio den tempu di Noe no a kaba ku maldat pa semper. Despues di e diluvio, hende malbado a bolbe kuminsá hasi bida di hende difísil. Pero un djis akí, Dios lo kaba ku maldat unabes i pa semper. Manera e salmista a bisa: “E malbado lo no t’ei mas.” Dios lo kaba ku tur maldat mediante su Reino—un gobièrnu mundial den shelu ku lo goberná riba hende hustu aki riba tera.

PENSA RIBA ESAKI: Kiko ta bai pasa ku e gobièrnunan riba mundu? Nan lo apoyá Dios su Reino? Beibel ta bisa ku nò. Nan lo ta asina bobo di bai kontra e Reino di Dios. (Salmo 2:2) Anto kiko lo pasa despues? Dios su Reino lo remplasá tur e gobièrnunan ei i “lo dura pa semper.” (Daniel 2:44) Pero, dikon no por djis laga e gobièrnunan humano keda?

 Gobernashon Humano TIN KU BAI

Loke Beibel ta bisa: “No ta keda na hende pa dirigí su pasonan.”—YEREMÍAS 10:23.

KIKO ESEI TA NIFIKÁ? Dios no a krea hende pa goberná. Ni maske kuantu nan purba, nan no por goberná otro hende ni solushoná nan problemanan.

PENSA RIBA ESAKI: Britannica Academic ta bisa ku kada gobièrnu riba su mes no por “solushoná problemanan mundial manera pobresa, hamber, malesa, desaster natural, guera i otro tipo di violensia.” Anto wak kiko e ta sigui bisa: “Algun hende . . . ta pensa ku ta un gobièrnu mundial so por trese berdadero solushon pa tur e problemanan ei.” Pero asta si tur gobièrnu humano sera kabes, mundu tòg lo ta den man di hende imperfekto ku no por solushoná tur e problemanan ku nos a menshoná. Dios su Reino ta e úniko gobièrnu ku tin poder pa solushoná tur problema unabes i pa semper.

P’esei, segun Beibel, fin di mundu no ta algu ku bon hende mester tin miedu di dje. Manera bo a mira, fin di mundu ta nifiká fin di hende malbado i di tur e kosnan malu ku ta pasa riba tera. Pues, e ta algu ku nos ta anhelá na dje pasobra Dios lo remplasá e mundu yen di problema akí pa un mundu nobo!

Awor, ki dia esei ta bai pasa? Den e siguiente artíkulo, lo bo haña Beibel su kontesta.