Bai na kontenido

Bai na kontenido

 TÓPIKO PRINSIPAL | DIKON BO MESTER TA ONESTO?

Ta Bale La Pena Ser Onesto

Ta Bale La Pena Ser Onesto

“Nos tin e konfiansa ku nos tin un konsenshi limpi, i nos ke komportá nos mes na un manera onesto den tur kos.”—Hebreonan 13:18.

Den Beibel, e palabra griego original tradusí komo “onesto” ta nifiká literalmente “algu ku di naturalesa ta bon.” E por nifiká tambe algu bunita den sentido moral.

Pues, ku bon motibu kristiannan ta tuma na pechu e palabranan inspirá di apòstel Pablo, ku ta bisa: “Nos ke komportá nos mes na un manera onesto den tur kos.” Kiko e palabranan ei ta nifiká?

UN LUCHA DI PADEN

Mayoria di hende ta wak nan mes den spil tur dia promé ku nan sali kas. Dikon? Pasobra nan ke lusi. Pero tin algu hopi mas importante ku bisti bon i peña nèchi. Sin duda, e persona ku nos ta di paden por sea laga nos lusi mas òf daña nos aparensia.

E Palabra di Dios ta bisa bon kla ku nos ta inkliná na hasi loke ta malu. Génesis 8:21 ta bisa en parte: “E intenshon di kurason di hende ta malu for di su hubentut.” P’esei, si nos ke ta onesto, nos tin ku lucha kontra nos tendensianan pekaminoso. Apòstel Pablo a duna un deskripshon bibu di su lucha ora el a bisa: “Realmente, mi tin plaser den e lei di Dios segun e hende ku mi ta di paden, pero mi ta mira den mi kurpa un otro lei ku ta bringa kontra e lei di mi mente. I e lei di piká akí tin mi prezu.”—Romanonan 7:22, 23.

Por ehèmpel, si nos haña nos den un tentashon pa hasi algu desonesto, nos no tin pakiko di sede na e impulsonan ei, komo si fuera nos no tin dominio riba nos akshonnan. Ta keda na nos pa disidí kiko nos ta hasi. Ora nos rechasá un mal pensamentu, nos por keda onesto maske hende rònt di nos ta desonesto.

KON PA GANA E LUCHA

Pa nos por ta hende onesto, nos mester tin norma moral haltu. Pero, lamentablemente, mayoria di hende ta mas preokupá ku nan aparensia ku nan norma- i balornan. Komo resultado, nan ta onesto solamente ora ta kumbiní nan. E buki The (Honest) Truth About Dishonesty ta pon’é asin’akí: “Básikamente, nos ta gaña te asina leu ku nos por sigui kere ku nos ta hende onesto.” Pero, tin algu ku por yuda nos disidí si nos por hustifiká un falta di onrades? Klaru ku sí.

Miónes di hende rònt mundu a haña sa ku Beibel por yuda nos den esei. Su normanan moral no tin komparashon. (Salmo 19:7) Beibel ta un buki ku ta duna konseho konfiabel riba tereno di bida di famia, empleo, moralidat i hende su relashon ku Dios, i te awe esakinan ta práktiko. Su lei- i prinsipionan ta benefisioso pa hende di tur nashon, rasa, tribu i pueblo. Ora nos lesa Beibel,  meditá riba dje i apliká loke e ta bisa, nos por train nos kurason pa ta onesto i rekto.

Pero nos ta biba den un mundu moralmente degradá ku ta pone hopi preshon riba nos pa konformá nos ku su normanan. P’esei, si nos ke gana den e lucha pa hiba un bida onesto, konosementu di Beibel no ta sufisiente. Nos mester di Dios su sosten, i p’esei nos tin ku pidié yuda nos. (Filipensenan 4:6, 7, 13) Ora nos hasi esei, nos lo haña e kurashi nesesario pa para firme pa loke ta korekto i ser onesto den tur kos.

BENEFISIO DI SER ONESTO

Hitoshi, kende nos a menshoná den e promé artíkulo, tin e reputashon di ta un trahadó onesto, i esei a benefisi’é masha hopi. Awor e ta traha pa un doño di trabou ku ta balorá su onestidat. Hitoshi a bisa: “Mi ta gradisidu ku mi por a haña un trabou ku ta laga mi keda ku un konsenshi limpi.”

Otro hende tambe tin e mesun sintimentu. Konsiderá ehèmpel di algun hende ku a saka benefisio ora nan a apliká e prinsipio di Beibel pa “komportá nos mes na un manera onesto den tur kos.”

  • Un Konsenshi Limpi

    “M’a kita fo’i skol tempu mi tabatin 13 aña pa asina mi por a djòin un grupo di ladron. Komo resultado, 95 porshento di mi entrada tabata bini di aktividatnan ilegal. Ku tempu mi a kasa, i ami ku mi kasá a tuma un kurso di Beibel serka Testigunan di Yehova. Ora nos a siña ku Yehova * Dios ta odia práktikanan desonesto, nos a kambia nos manera di biba. Na aña 1990 nos a dediká nos bida na Yehova i a batisá komo Testigu di Yehova.”—Proverbionan 6:16-19.

    “Ántes mi kas tabata yen yen di kos hòrtá, pero awor no mas; p’esei mi ta sinti ku mi tin un konsenshi limpi. Ora mi pensa bèk riba tur e añanan ku mi tabata kana hòrta, mi ta gradisí Yehova pa su gran miserikòrdia ku el a mustra na mi. Awor mi por bai drumi trankil tur anochi sabiendo ku Yehova ta kontentu ku mi.”—Cheryl, Irlanda.

    “Ora mi doño di trabou a haña sa ku mi a rechasá soborno di un posibel kliente, el a bisa mi: ‘Bo Dios a hasi bo ègt un persona konfiabel! Ta un bendishon ku nos tin bo komo trahadó huntu ku nos.’ Komo ku mi ta onesto den tur kos, mi por tin un konsenshi limpi dilanti di Yehova Dios. Ademas, mi por yuda mi famia i otronan pa ta meskos.”—Sonny, Hong Kong.

  • Pas Mental

    “Mi ta asistènt ehekutivo na un banko internashonal. Den e trabou akí, bira riku ta mas importante ku ser un persona onesto. Pues e punto di bista komun ta: ‘Ki malu tin ora bo ta un tiki desonesto si bo ta bira riku i yuda e ekonomia?’ Pero, komo ku mi ta onesto, mi tin pas mental. Mi doño di trabou sa ku lo mi no gaña nan ni gaña pa nan. Mi ta determiná pa keda onesto i ta kla pa wanta kualke konsekuensia ku esei lo por trese kuné.”—Tom, Merka.

  • Rèspèt Propio

    “Mi supervisor na trabou a bisa mi pa gaña tokante algun kos ku a disparsé na ofisina, pero mi a nenga di hasi esei. Ora nan a gara e ladronnan, mi doño di trabou a gradisí mi ku mi tabata onesto. Bo mester tin kurashi pa bo ta onesto den un mundu desonesto. Pero al final, nos ta gana e konfiansa i rèspèt di otronan.”—Kaori, Hapon.

E rekompensa di por tin un konsenshi limpi, pas mental i rèspèt propio ta demostrá ku ta bale la pena ser onesto. Abo no ta di akuerdo ku esei?

^ par. 18 Beibel ta bisa ku Dios su nòmber ta Yehova.