Bai na kontenido

Bai na kontenido

Wak e Bon Kualidatnan Ku un Hende Tin

Wak e Bon Kualidatnan Ku un Hende Tin

Kiko Ta e Problema?

Hende ku ta sinti ku nan ta masha importante por promové prehuisio. Un persona asina por pensa ku e ta mihó ku otro hende. E ta mira hende ku ta diferente for di dje komo hende inferior. Tur hende por kai den e trampa akí. Encyclopaedia Britannica ta bisa: ‘Hende di mayoria di kultura ta pensa ku nan manera di biba, manera di bisti, nan kuminda, kustumber, kreensia, norma i balor, etcetera, ta mihó ku esnan di hende di otro kultura.’ Kiko por yuda nos pa no kai den e trampa akí?

Prinsipio di Beibel

“Ku humildat, konsiderá ku otro hende ta superior na boso.”—FILIPENSENAN 2:3.

Kiko e versíkulo akí ta siña nos? Pa nos no pensa ku nos ta mas ku otro hende; nos mester ta humilde. Ora nos ta humilde, nos ta realisá ku otro hende ta mihó ku nos den sierto aspekto di bida. Ningun kultura no ta bon den tur kos.

Tuma Stefan komo ehèmpel. Stefan a lanta na un pais komunista. El a logra vense prehuisio kontra hende di pais ku no ta komunista. El a bisa: “Mi ta kere ku pa vense prehuisio ta importante pa konsiderá otro hende komo superior na nos. Mi no sa tur kos i mi por siña algu for di tur hende.”

Kiko Bo Por Hasi?

Purba di ta realístiko i atmití ku bo ta hasi fout. Rekonosé ku tin kos ku otro hende ta hasi mihó ku bo. No pensa ku tur hende di un sierto grupo ta meskos.

En bes di pensa malu di un persona di un sierto grupo, puntra bo mes:

Rekonosé ku otro hende ta mihó ku bo den sierto aspekto

  • ‘Akaso e kualidatnan ku mi no ta gusta di e persona ei realmente ta malu, òf nan ta djis diferente?’

  • ‘E persona ei lo por haña fayo den mi?’

  • ‘Den ki aspekto, e persona akí ta mihó ku mi?’

Si bo kontestá e preguntanan akí na un manera onesto, lo bo por vense e prehuisio ku bo tin i lo bo por yega na atmirá e kosnan bon di e persona ei.