Bai na kontenido

Bai na kontenido

 TÓPIKO PRINSIPAL | BEIBEL TA UN BUKI DI DIOS?

Beibel Ta Eksakto den Tur Sentido

Beibel Ta Eksakto den Tur Sentido

Sientífikamente Eksakto

AUNKE Beibel no ta un buki di siensia, e ta eksakto ora e ta papia di fenómenonan di naturalesa. Laga nos wak algun ehèmpel riba tereno di meteorologia i genétika.

METEOROLOGIA: KIKO TA KOUSA ÁWASERU?

METEOROLOGIA

Beibel ta bisa: “[Dios] ta hala e gotanan di awa trese ariba; for di neblina nan ta destilá áwaseru, ku e nubianan ta laga basha.”—Yòb 36:27, 28.

Akinan, Beibel ta deskribí e tres partinan prinsipal di e siklo di awa. Dios, kende ta e fuente di kalor di solo, “ta hala e gotanan di awa trese ariba.” Kon? Awa ta (1) evaporá bai ariba. Despues, e ta (2) kondensá i forma nubia ku na su turno ta laga awa sea (3) yobe, sneu òf hagel. Ainda meteorólogonan no por kaba di komprondé kompletamente tur e detayenan di e fenómeno akí. Ta interesante ku Beibel ta hasi e pregunta: “Tin hende ku por komprondé moveshon di e nubianan?” (Yòb 36:29) Pero, e Kreador sí ta komprondé e siklo di awa i a sòru pa e eskritornan di Beibel skirbi detayenan eksakto tokante e siklo akí. I el a hasi esei hopi tempu promé ku sientífikonan por a splika e prinsipionan básiko di e proseso akí.

GENÉTIKA: KON ÈMBRIO HUMANO TA DESAROYÁ?

GENÉTIKA

E eskritor di Beibel Rei David a bisa Dios: “Bo wowo a mira asta mi èmbrio, i den bo buki tur su partinan a ser skirbí.” (Salmo 139:16, NW) Na un manera poétiko, David ta bisa ku un èmbrio ta desaroyá segun loke ta skirbí di antemano den un “buki,” òf mapa. Anto figurá bo, esaki a ser skirbí un 3.000 aña pasá!

Sinembargo, ta te rònt di aña 1860 ku Gregor Mendel, un botániko australiano, a deskubrí e prinsipionan básiko di genétika. Anto te na aprel 2003 numa investigadónan a determiná sekuensia di e genome humano, ku tin tur e informashon genétiko pa forma e kurpa humano. Sientífikonan a kompará e kódigo genétiko ku un dikshonario yen di palabra ku ta konsistí di e lèternan di álfabet. E palabranan, na moda di papia, ta e instrukshon genétiko ku ta laga e selebro, kurason, pulmon i man ku pia desaroyá den e sekuensia korekto i na e momento apropiá. Pues, ta na su lugá ku sientífikonan a yama e genome “e buki di bida.” Kon e eskritor di Beibel David por a skirbi un informashon asina ekesakto? El a atmití humildemente: “E spiritu di [Yehova] a papia pa medio di mi, i su palabra tabata riba mi lenga.” *2 Samuel 23:2.

 Beibel Ta Profetisá Futuro ku Eksaktitut

ORA ta trata di subida òf kaida di imperionan i statnan, ta masha difísil, òf mihó bisá, kasi imposibel, pa sa ki ora i kon susesonan asina lo tuma lugá. Pero Beibel sí a profetisá tokante e destrukshon di statnan i imperionan poderoso ku luho di detaye. Laga nos wak dos ehèmpel.

E KAIDA I DESTRUKSHON DI BABILONIA

Babilonia di antigwedat tabata e kurason di un imperio poderoso ku pa hopi siglo tabatin masha influensia riba e parti wèst di Asia. Dado momento, e tabata e stat di mas grandi na mundu. Pero un 200 aña promé, Dios a inspirá e eskritor di Beibel Isaías pa profetisá ku un konkistadó ku yama Siro lo a derotá Babilonia i ku nunka mas hende lo no biba einan. (Isaías 13:17-20; 44:27, 28; 45:1, 2) Di bèrdat e profesia akí a kumpli?

HISTORIA

Wèl, na òktober di aña 539 promé ku Kristu, Siro e Grandi a konkistá Babilonia den ún anochi. Ku tempu, e kanalnan ku tabata sòru pa e region fértil den bisindario haña awa a yena ku tera i a sera pa falta di mantenshon. Ya pa aña 200 despues di Kristu, nan tabata bisa ku ningun hende no tabata biba mas den e área ei, i te awe Babilonia ta un ruina. Presis manera Beibel a profetisá, Babilonia a keda “kompletamente desolá.”—Yeremías 50:13.

Kon e eskritor di Beibel por tabata sa presis kiko lo bai pasa den futuro? Beibel ta bisa ku esaki tabata un “deklarashon formal kontra Babilonia ku Isaías yu di Ámos a mira den vishon.”—Isaías 13:1, NW.

NÍNIVE LO A BIRA “SEKU MANERA UN DESIERTO”

Un tempu hende tabata konsiderá e arkitektura di Nínive, kapital di e Imperio Asirio, un obra maestral. E stat tabata orguyoso di su kayanan hanchu, hardinnan públiko, tèmpelnan i palasionan enorme. Tòg, profeta Sofonías a profetisá ku e stat impreshonante akí lo a bira “un lugá inhabitá, seku manera un desierto.”—Sofonías 2:13-15, BPK.

Den siglo 7 promé ku Kristu, Babilonia i Media a uni forsa i a destruí Nínive kompletamente. Segun un obra di konsulta, e ora ei e stat di Nínive “a keda den olvido pa 2.500 aña.” Pa un tempu, hende tabata asta duda ku Nínive a yega di eksistí. Ta te meimei di siglo 19 numa arkeólogonan a deskubrí e ruinanan di Nínive. Aktualmente, e lugá ta bayendo atras i ta na merset di vandalistanan. P’esei, Global Heritage Fund a atvertí: “E ruinanan di Nínive lo por keda derá pa semper un biaha mas.”

For di ken Sofonías a haña e informashon akí di antemano? E mes a bisa ku tabata “e palabra di SEÑOR.”—Sofonías 1:1.

 Beibel Ta Kontestá e Preguntanan Mas Importante di Bida

BEIBEL ta kontestá e preguntanan mas importante di bida na un manera satisfaktorio. Laga nos wak algun ehèmpel.

DIKON TIN ASINA TANTU MALDAT I SUFRIMENTU?

Beibel ta papia hopi riba e tópiko akí. E ta splika:

  1. “Hende a ehersé outoridat riba un otro hende pa su daño.”Eklesiástes 8:9.

    Gobernante inkompetente i korupto a kousa hopi sufrimentu pa hende.

  2. “Tempu i suseso imprevisto ta alkansá nan tur.”—Eklesiástes 9:11, NW.

    Kosnan inesperá por sosodé ku nos tur: Nos por bira víktima di un malesa serio, un aksidente òf un desaster natural na kualke lugá òf momento.

  3. “Pa medio di ún hende piká a drenta mundu, i morto pa medio di piká.”Romanonan 5:12.

    Na prinsipio, ora Dios a krea e promé pareha humano, no tabata eksistí ni imperfekshon ni morto. Piká “a drenta mundu” ora nan a disidí di desobedesé nan Kreador.

Beibel ta splika pakiko hende ta sufri. Pero no esei so, e ta primintí tambe ku Dios lo kaba ku maldat i “seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas.”—Revelashon 21:3, 4.

KIKO TA PASA KU NOS ORA NOS MURI?

Beibel ta splika ku ora un hende ta morto, e no sa nada ni e no por hasi nada. Eklesiástes 9:5 ta bisa: “E bibunan sa ku nan lo muri, ma e mortonan no sa nada.” Ora un hende muri, “su pensamentunan ta peresé.” (Salmo 146:4) Pues morto ta pone fin na tur aktividat selebral, inkluso nos sinku sentidonan (bista, oido, olfato, takto i smak). P’esei, ora nos muri, nos no por move, sinti ni pensa mas.

Ademas di splika kiko ta e kondishon di e mortonan, Beibel ta duna nos un bunita speransa tambe. Kiko esei ta? E speransa ku Dios lo lanta hende for di e soño profundo, esta, morto, pa medio di e resurekshon.—Oséas 13:14; Huan 11:11-14.

KIKO TA E PROPÓSITO DI BIDA?

Beibel ta bisa ku Yehova Dios a krea tantu hende hòmber komo hende muhé. (Génesis 1:27) Ta p’esei Beibel ta yama e promé hende hòmber, Adam, “yu di Dios.” (Lukas 3:38) Dios a krea hende ku un propósito: Pa e por sera un amistat ku su Tata  selestial i hiba un bida felis i produktivo riba tera pa semper. Pa e motibu ei, Dios a krea hende ku un inklinashon spiritual, esta, ku e deseo di ke siña tokante Dios. I ta p’esei Beibel ta bisa: “Felis ta esnan ku ta konsiente di nan nesesidat spiritual.”—Mateo 5:3.

Ademas, Beibel ta bisa: “Felis ta esnan ku ta tende e palabra di Dios i ta kumpli kuné!” (Lukas 11:28) Beibel ta yuda nos siña tokante Dios. Pero no esei so. Tambe e ta yuda nos pa nos por tin un bida mas felis i un speransa pa futuro.

Kon Bo Por Bira Amigu di e Outor di Beibel?

DESPUES ku miónes di hende rònt mundu a haña prueba, nan a yega na e konklushon ku Beibel no ta djis un obra literario di antigwedat. Nan a keda konvensí ku Beibel ta inspirá pa Dios; e medio ku e ta usa pa komuniká ku hende, inkluso abo tambe. Den Beibel Dios ta invitá bo pa siña konos’é i pa bira su amigu. Beibel ta primintí: “Hala serka Dios, i lo e hala serka [bo].”—Santiago 4:8.

Ora bo lesa Beibel, bo ta haña un bunita oportunidat. Kiko esei ta? Meskos ku ora bo lesa un buki bo ta haña un idea ta kiko e outor tin na mente, asina tambe Beibel ta yuda bo mira kiko su Outor divino, esta, Dios, ta pensa i sinti. Pensa un ratu kiko esei por nifiká pa abo. Bo por haña sa kiko ta e pensamentunan i sintimentunan di bo Kreador. Ademas, Beibel ta yuda bo haña sa:

Bo ta interesá pa haña sa mas? Gustosamente Testigunan di Yehova lo ke yuda bo haña sa mas. Nan por sòru pa bo haña un kurso grátis di Beibel. E kurso por yuda bo hala mas serka di e Outor divino di Beibel, Yehova Dios.

E artíkulo akí a trata algun prueba ku Beibel ta un buki inspirá pa Dios. Pa mas informashon, wak kapítulo 2 di e buki Kiko Beibel Ta Siña Realmente? publiká pa Testigunan di Yehova. Bo por download e buki akí for di www.jw.org/pap

Ademas, bo por wak e vidio Ken Ta e Outor di Beibel riba www.jw.org/pap

Bai na PUBLIKASHON > VIDIO

^ par. 10 Beibel ta bisa ku Dios su nòmber ta Yehova.—Revelashon 4:11.