Un persona humilde ta mustra rèspèt pa otro hende. E no ta arogante ni e no ta spera pa otro hende trat’é na un manera spesial. Al kontrario, e ta mustra interes den otro hende i ta dispuesto pa siña for di nan.

Tin hende ta pensa ku un persona humilde ta un persona débil. Pero esei no ta bèrdat, pasobra un hende humilde tin kurashi pa atmití su foutnan i aseptá su limitashonnan.

• Un yu ku ta humilde lo tin mas amigu. E buki The Narcissism Epidemic ta bisa: “Por lo general, hende ku ta humilde ta bai bon ku otro hende” i “tin mas sintimentu pa otro hende.”

• Un yu ku ta humilde lo tin un mihó futuro. Si bo yu siña for di chikitu pa ta humilde, esei lo benefisi’é awor i den futuro, por ehèmpel, ora e tin ku buska trabou. Dr. Leonard Sax a skirbi: “Un hóben ku ta pensa ku e ta masha kos i no ta mira su mes defektonan, lo duna un mal impreshon ora e ser entrevistá pa un trabou.” El a bisa tambe: “Pero un hóben ku ta realmente interesá den loke e entrevistadó tin di bisa, tin mas chèns di haña trabou.” *

Yuda bo yu pa e tin un punto di bista balansá di su mes.

PRINSIPIO DI BEIBEL: “Si un hende ta kere ku e ta masha kos siendo ku e no ta nada, ta su mes e ta gaña.”—Galationan 6:3.

• Tene kuidou pa no duna bo yu speransa falsu. Ekspreshonnan manera “Tur bo soñonan por bira realidat” i “Abo por bira kiko ku bo ke” por zona atraktivo, pero hopi biaha esei no ta loke ta sosodé den bida real. Bo yu tin mas chèns di bai bon den bida si e tin metanan rasonabel i ta traha duru pa logra esakinan.

• Elogiá bo yu pa kosnan spesífiko. Djis bisa bo yu ku e ta esun mihó no ta anim’é pa ta humilde. P’esei ta mihó pa elogi’é pa kosnan spesífiko ku el a hasi bon.

• Pone un límite na e kantidat di tempu ku bo yu tin mag di dediká na retnan sosial. Hopi biaha, hende ta usa retnan sosial pa gaba tokante nan talentonan i nan logronan, esei ta nèt kontrali ku humildat.

•   Animá bo yu pa pidi despensa mas pronto posibel. Yuda bo yu mira kiko el a hasi robes i yud’é atmití su eror.

Animá bo yu pa mustra apresio.

PRINSIPIO DI BEIBEL: “Mustra ku boso ta gradisidu.”—Kolosensenan 3:15.

• Apresio pa kreashon. Yunan mester opservá naturalesa pa nan por komprondé ku nos tin mester di aire pa hala rosea, awa pa bebe i kuminda pa kome. Usa e ehèmpelnan ei pa yuda bo yu balorá i apresiá e maravianan den Dios su kreashon.

• Apresio pa hende. Kòrda bo yu ku semper lo tin un hende ku ta mihó kuné den algu i ku ta bon pa e atmirá abilidat di otro hende i siña for di nan en bes di bira yalurs riba nan.

• Ekspresá apresio. Siña bo yu pa yama danki di kurason. Siñ’é tambe ku ora nos ta mustra apresio, esei ta yuda nos keda humilde.

Siña bo yu ku ta importante pa yuda otro hende.

PRINSIPIO DI BEIBEL: “Ku humildat, konsiderá ku otro hende ta superior na boso. No buska boso mes interes so, ma tambe interes di otro hende.”—Filipensenan 2:3, 4.

• Siña bo yu hasi trabou di kas. Si bo no laga bo yu hasi trabou di kas, en realidat bo ta bisando bo yu: “Abo ta muchu importante pa hasi e tipo di trabou ei!” Sinembargo, e mester komprondé ku e tin ku kumpli ku e trabounan di kas promé, anto despues e por bai hunga. Lag’é mira ku trabou di kas ta benefisiá henter famia i ku nan tur lo apresi’é i respet’é si e hasi trabou di kas.

• Siña bo yu ku ta un onor pa sirbi otro hende. Ora bo yu ta sirbi otro hende, esei lo yud’é bira un persona maduro. P’esei animá bo yu pa opservá i wak ken tin mester di yudansa i kiko e por hasi pa yuda nan. Anto ora e yuda otro hende, elogi’é i apoy’é.