Bai na kontenido

Bai na kontenido

Un hende muhé sabí ta respetá su konsenshi

 E PUNTO DI BISTA BÍBLIKO

Aborto

Aborto

Tur aña miónes di hende ta kometé aborto deliberadamente; un kantidat ku ta surpasá poblashon di hopi pais.

Un desishon personal òf un kuestion di moralidat?

LOKE HENDE TA BISA

Tin vários motibu pakiko hende muhé ta kometé aborto, por ehèmpel, problema ekonómiko, problema ku nan partner, e deseo di ta liber pa sigui studia òf e echo ku nan no ke ta un mama soltero. Pero tin otronan ta mira aborto komo algu kontra regla di moralidat; nan ta haña ku un hende muhé ku kometé aborto no ta kumpli ku e responsabilidat ku e tin komo mama.

LOKE BEIBEL TA BISA

Den Dios su bista, bida ta sagrado, spesialmente bida di hende. (Génesis 9:6; Salmo 36:9) E prinsipio akí ta konta tambe pa un bebi ku ta den matris di su mama. Esei ta un lugá safe ku Dios a diseñá spesialmente pa e por desaroyá. Un eskritor di Beibel a bisa: “Bo a wef mi, forma mi den barika di mi mama. Bo wowonan a mira mi supstansia sin forma; i e dianan ku tabata stipulá pa mi, tur tabata skirbí den bo buki.”—Salmo 139:13, 16.

Dios su punto di bista enkuanto un bebi ku no a nase ainda ta ser reflehá den e Lei ku el a duna e nashon di Israel i tambe den e konsenshi ku el a duna nos. E Lei di Dios ta bisa ku si un hòmber “dal un muhé na estado” i e yu muri, e asesino mester a paga ku su propio bida, es desir, “bida pa bida.” (Éksodo 21:22, 23) Ta klaru ku un hues mester a tene kuenta ku e sirkunstansia i e intenshon di esnan enbolbí.—Numbernan 35:22-24, 31.

Ademas, Dios a duna hende un konsenshi. Ora un hende muhé ta hasi kaso di su konsenshi, i ta respetá bida di su bebi ku no a nase ainda, su konsenshi ta na pas. * Pero si e no hasi kaso di su konsenshi, su konsenshi lo molesti’é òf asta konden’é. (Romanonan 2:14, 15) Sí, tin estudionan ku ta mustra ku hende muhé ku a kometé aborto tin mas chèns di haña depreshon òf sinti ansiedat.

Pero kiko si kriamentu di un yu ta bira hopi difísil, spesialmente si e embaraso no tabata planiá? Wak kiko Dios ta primintí esnan ku lealmente ta biba di akuerdo ku su normanan: “Ku hende leal, lo bo aktua ku lealtat; ku hòmber [òf muhé] balente, liber di falta, bo ta trata di manera liber di falta.” (Salmo 18:25, NW) Nos ta lesa tambe: “SEÑOR ta stima hustisia i no ta bandoná su santunan.”—Salmo 37:28.

“Nan konsenshi . . . ta duna testimonio i, pa medio di nan mes pensamentunan, nan ta keda akusá òf asta diskulpá.”Romanonan 2:15.

 Kiko si bo a kometé aborto?

LOKE HENDE TA BISA

Ruth *, un mama soltero, a bisa: “Mi tabatin tres yu chikitu kaba i mi tabata sinti ku mi no por a kria un di kuater yu. P’esei mi a kometé aborto. Pero despues m’a sinti ku mi a hasi algu horibel.” Akaso el a hasi algu ku Dios no por pordoná?

LOKE BEIBEL TA BISA

Hesukristu a revelá kiko Dios ta pensa ora el a bisa: “Mi no a bini pa yama hende hustu, sino pa yama pekadó pa nan arepentí.” (Lukas 5:32) Sí, ora nos ta sinti remordimentu pa motibu di algu malu ku nos a hasi i nos ta pidi Dios pordoná nos, e ta hasi esei libremente, asta si nos a kometé un piká grave. (Isaías 1:18) Salmo 51:17 ta bisa: “Un kurason arepentí i kibra, o Dios, bo no ta despresiá.”

Fuera di un konsenshi limpi, Dios ta duna esnan ku arepentí pas mental ora nan akudí humildemente na dje den orashon. Filipensenan 4:6 i 7 ta bisa: “Pa medio di orashon i súplika huntu ku gradisimentu, laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason i boso mente.” * Ruth a studia Beibel i a deshogá su mes serka Dios den orashon, i asina el a haña pas mental. Ademas, el a haña sa ku serka Dios “tin pordon.”—Salmo 130:4.

[Dios] no a trata ku nos segun nos pikánan, ni a paga nos segun nos inikidatnan.”Salmo 103:10.

^ par. 8 Un posibel peliger pa sea e bida di e mama òf di e bebi no ta hustifikashon pa kometé un aborto. Si durante e parto un pareha mester skohe entre e bida di e mama i esun di e yu, ta e pareha mester disidí kiko nan ta hasi. Pero apesar di esei, den hopi pais desaroyá, progreso riba tereno di medisina ta pone ku e tipo di kasonan ei ta sosodé masha poko.

^ par. 12 A kambia e nòmber.

^ par. 14 E speransa di resurekshon tambe por duna un hende pas mental. Wak e “Pregunta di Lektor” den La Atalaya di 15 di aprel 2009. E artíkulo ta trata prinsipionan di Beibel ku ta indiká e posibilidatnan di resurekshon ku tin pa un bebi ku a muri promé ku e nase.