Bai na kontenido

Bai na kontenido

Bo Ta Mira Mas Aleu ku Aparensia?

Bo Ta Mira Mas Aleu ku Aparensia?

DON, un Testigu di Yehova na Canada, ta hasi su bèst pa papia ku hende ku ta biba riba kaya. E ta konta kiko a pasa ku un di e hendenan ei: “Peter tabata un di e hendenan di mas sushi ku mi a yega di mira riba kaya. E tabata un hende ku masha mal manera i tabata sa kon pa tene hende leu for di dje. E tabata rechasá tur hende ku kier a yud’é.” Pero tòg, pa 14 aña largu, ku pasenshi Don a hasi su bèst pa keda amigabel ku e hòmber akí.

Un dia, Peter a puntra Don: “Dikon bo ta wòri ku mi? Tur otro hende ta djis laga mi na pas. Dikon bo ta interesá den mi?” Ku takto Don a mustr’é tres teksto pa purba di yega na su kurason. Pa di promé, Don a puntra Peter si e tabata sa ku Dios tin un nòmber personal i a bis’é pa lesa Salmo 83:18. Despues, pa Don mustra Peter dikon e ta interesá den dje, el a lag’é lesa Romano 10:13 i 14, ku ta splika ku “tur hende ku invoká e nòmber di Yehova lo ser salbá.” Finalmente, Don a lesa Mateo 9:36, ku ta bisa: “Ora el a mira e multitut, el a haña duele di nan, pasobra nan tabata soyá i deskuidá, manera karné sin wardadó.” Kaba el a pidi Peter pa lesa e teksto pa su mes. Ku awa na wowo, Peter a puntra Don: “Ami ta un di e karnénan akí?”

Peter a kuminsá hasi kambio. El a dal un baño, kòrta su barba i bisti paña ku Don a dun’é. Anto Peter a sigui tene su kurpa limpi.

Peter tabatin un dagboek. E anotashonnan na komienso di su dagboek tabata tristu i skur, pero despues su anotashonnan a kambia. Un di nan a bisa: “Awe mi a siña Dios su nòmber. Awor, ora mi hasi orashon, mi por hasi orashon na Yehova. Ta maravioso pa sa Dios su nòmber. Don a bisa mi ku Yehova por ta mi Amigu, un persona ku  semper por skucha mi, sin importá ki ora mi papia kuné òf kiko mi papia kuné.”

E último anotashonnan di Peter tabata dirigí na su rumannan; i el a bisa asin’akí:

“Awe mi no ta sinti mi bon. Mi ta kere ku mi edat a subi. Pero asta si esaki ta mi último dia, mi sa ku lo mi mira mi amigu [Don] den Paradeis atrobe. Si bo ta lesando esaki, ta pasobra mi no t’ei mas. Pero si na mi entiero boso mira un hòmber diferente for di otro hende, papia kuné i por fabor lesa e buki blou akí [e tabata referí na E berdad cu ta hiba na bida eterna ku el a haña años promé]. * E ta bisa ku un dia lo mi bolbe mira mi amigu den Paradeis. Mi ta kere e kos akí ku henter mi kurason. Boso ruman hòmber stimá, Peter.”

Despues di e entiero, Peter su ruman muhé Ummi a splika: “Mas o ménos dos aña pasá, Peter a tuma kontakto ku mi. Pa promé biaha den hopi aña, e tabata parse kontentu. El a asta smail.” El a konta Don: “Lo mi lesa e buki akí pasobra kualke kos ku por a yega na kurason di mi ruman mester ta algu spesial.” Ademas, Ummi a bai di akuerdo pa un Testigu di Yehova analisá e buki Kiko Beibel Ta Siña Realmente? kuné.

Nos tambe por mira mas aleu ku aparensia, ekspresá berdadero amor i tene pasenshi ku tur tipo di hende. (1 Tim. 2:3, 4) Ora nos hasi esei, nos por motivá hende, manera Peter, pa kambia, hende ku kisas no tin un aspekto muchu agradabel pero ku tin bon kurason. Nos por tin sigur ku Dios, kende “ta wak kurason,” lo laga e bèrdat krese den kurason di hende ku ta dispuesto pa aseptá e bèrdat.—1 Sam. 16:7; Huan 6:44.

^ par. 7 Publiká pa Testigunan di Yehova, pero e no ta disponibel mas.