Bai na kontenido

Bai na kontenido

Burnett, Simone, Eston i Caleb

Nan A Ofresé Nan Mes di Buena Gana pa Sirbi na Paisnan di Oséano Pasífiko

Nan A Ofresé Nan Mes di Buena Gana pa Sirbi na Paisnan di Oséano Pasífiko

RENEÉ, un ruman muhé di Australia di rònt di 35 aña di edat, a lanta den un famia Testigu di Yehova masha aktivo den e sirbishi di Dios. El a konta: “Nos a muda vários biaha pa bai biba kaminda tabatin mester di mas predikadó di Reino. Mi mayornan a sòru pa nos pasa dushi, i nos tabatin un bida interesante i emoshonante. Ora mi mes a bira mama, mi tabata ke pa mi yunan tin e mesun bida dushi ku ami tabatin.”

 Shane, e kasá di Reneé, tin kasi 40 aña, i e tambe tabatin e mesun meta spiritual. El a bisa: “Despues ku nos di dos yu a nase, nos a lesa den un Toren di Vigilansia tokante un famia Testigu di Yehova ku a bai prediká ku nan yate na e islanan di Tonga, den zùitwèst di Oséano Pasífiko. * E artíkulo ei a motivá nos pa skirbi tantu e sukursal di Testigunan di Yehova na Australia komo esun na Nueva Zelandia pa puntra nan na unda tabatin mester di mas ruman pa prediká. * Wèl, nan a pidi nos pa bai Tonga, nèt e lugá ku nos a lesa di dje den e revista!”

Jacob, Reneé, Skye i Shane

Shane ku Reneé, huntu ku nan dos yunan, Jacob ku Skye, a biba mas o ménos un aña na Tonga. Ora ku a surgi un seri di disturbio polítiko einan, nan a haña nan obligá di bai Australia bèk. Ma nan a keda ku e meta di hasi mas den e sirbishi di Yehova. Na 2011, nan a bai biba na Isla di Norfolk, un isla chikitu den Oséano Pasífiko ku ta keda un 1.500 kilometer ost di Australia. Kon a bai ku nan einan? Jacob, ku awor tin 14 aña, a bisa: “Yehova no solamente a sòru pa nos, sino tambe el a laga nos pasa masha dushi den sirbishi!”

UN PROYEKTO DI FAMIA

Meskos ku e famia ei, tin hopi famia mas ku a ofresé nan mes pa bai sirbi kaminda tin mester di predikadó. Kiko a motivá nan pa hasi esei?

“Tabatin hopi hende interesá den e bon notisia, i nos kier a duna nan e chèns di tin un estudio di Beibel riba un base regular.” —Burnett

Burnett ku Simone ta un pareha di rònt di 35 aña di edat. Nan a muda pa Burketown, un pueblo aislá na Queensland, Australia, huntu ku nan dos yu hòmbernan, Eston (12 aña) ku Caleb (9 aña). Burnett a splika dikon: “Testigunan di Yehova tabata bai prediká einan ún biaha kada tres pa kuater aña. Tabatin hopi hende interesá den e mensahe di e bon notisia, i nos kier a duna nan e chèns di tin un estudio di Beibel riba un base regular.”

Jim, Jack, Mark i Karen

Mark ku Karen, kendenan awor tin 50 i piku aña, a sirbi den vários kongregashon pegá ku Sydney, Australia, promé ku nan a muda pa Nhulunbuy, un komunidat minero aislá den e Teritorio den Nort. Nan a bai einan huntu ku nan tres yunan, Jessica, Jim i Jack. Mark a konta: “Mi stima hende, p’esei mi kier a bai un lugá kaminda tin hopi trabou di hasi den kongregashon i den sirbishi.” Pero Karen tabata duda pa bai. El a bisa: “Ma despues ku Mark i otro rumannan a animá mi, m’a disidí di purba tòg. Awor mi ta kontentu ku m’a hasié!”

Benjamin, Jade, Bria i Carolyn

Na 2011, Benjamin ku Carolyn huntu ku nan dos yu muhénan chikí, Jade ku Bria, a muda di Queensland, Australia, bèk pa Ost Timor, un pais chikí den e grupo grandi di islanan di Indonesia. Ben a konta ku e ku su kasá a sirbi anteriormente komo pionero spesial den Ost Timor. I el a bisa: “E trabou di prediká tabata fasinante, i e rumannan tabata apoyá nos bon. A duel nos mashá ora nos mester a bai for di einan, pero nos tabata determiná pa bolbe. Despues, ora ku nos a haña yu, nos no a kambia nos plannan, solamente nos mester a warda un poko ku nan.” Carolyn a agregá: “Nos tabata ke pa nos yunan lanta den un ambiente di rumannan ku ta misionero, bètelita i pionero spesial i pa nan sirbishi na Yehova ta un eksperensia sumamente plasentero.”

PREPARÁ BON PROMÉ KU MUDA

Hesus a bisa su siguidónan: “Kua di boso ku ke traha un toren no ta sinta kalkulá e gastu promé pa wak si e tin sufisiente pa kab’é?” (Luk. 14:28) Asina tambe, ora un famia tin pensá di muda pa un otro lugá, ta masha importante pa nan plania bon. Kiko asina e preparashon ta enserá?

DEN SENTIDO SPIRITUAL: Ben a bisa: “Nos kier a bai pa sirbi e rumannan, no pa ta un karga pa nan. P’esei, promé ku nos a muda, nos a sòru di hasi nos mes mas fuerte den sentido spiritual. Tambe nos a dediká mas tempu na sirbishi i na otro aktividatnan di kongregashon.”

Jacob, menshoná anteriormente, a konta: “Promé ku nos a bai biba na Isla Norfolk, nos a lesa hopi historia di bida den E Toren di Vigilansia i ¡Despertad! tokante famianan ku a bai sirbi kaminda tabatin mester di mas predikadó. Nos a papia tokante e difikultatnan ku nan a haña nan kuné i kon Yehova a yuda nan.” Jacob su ruman muhé Skye, di 11 aña, a agregá: “Ami a hasi hopi orashon, tantu mi so komo huntu ku Mami ku Papi.”

DEN SENTIDO EMOSHONAL: Reneé a konta: “Nos tabata biba den un área ku mi tabata gusta mashá,  pegá ku mi famia i amigunan. Lo tabata fásil pa mi keda biba einan. Pero en bes di konsentrá riba loke mi tabata bai pèrdè, mi a pensa riba e benefisionan ku e mudansa lo tabatin pa mi famia.”

DEN SENTIDO KULTURAL: Hopi famia ta kuminsá buska informashon tokante e lugá kaminda nan ta bai biba pa prepará nan mes. Mark a bisa ku nan a lesa tur loke nan por a haña tokante Nhulunbuy. Ademas, e rumannan di einan a manda korant di e stat pa nan, ya asina nan por a familiarisá nan mes ku e hendenan lokal i ku nan kultura.

Shane, kende a bai biba na Isla Norfolk, a agregá: “Mas ku tur kos, m’a purba di demostrá kualidatnan kristian. Mi tabata sa ku si mi ta sinsero, suave, onesto i trahadó, lo mi por a pas den kualke kultura na mundu.”

E DIFIKULTATNAN

Rumannan ku tabatin éksito ora nan a bai prediká na otro lugá ta enfatisá e importansia di ta fleksibel i positivo ora topa ku difikultatnan inesperá. Laga nos wak algun ehèmpel:

Reneé a bisa: “M’a siña ku tin mas manera di hasi sierto kos. Por ehèmpel, ora laman ta brutu na Isla Norfolk, e barkunan no por drenta haf i komestibel ta bira skars i mas karu. Pues, mi mester a siña kushiná ku loke tin den kas.” Shane, kasá di Reneé, a agregá: “Tambe nos mester a ahustá nos manera di gasta sèn, pa asina nos keda den nos presupuesto di siman.”

Nan yu, Jacob, a menshoná un otro difikultat. E di: “Den nos kongregashon nobo tabatin solamente shete ruman mas; tur tabata hende grandi. Pues, mi no tabatin niun amigu di mi edat! Pero despues ku m’a traha ku e rumannan den sirbishi, nos a bira bon amigu di otro.”

Algu similar a pasa ku Jim, kende awor tin 21 aña. El a bisa: “E kongregashon di mas serka di Nhulunbuy ta keda 725 kilometer leu, pues nos ta probechá lo máksimo di asamblea i kongreso. Nos ta yega trempan pa nos por disfrutá di e kompania di e rumannan. E okashonnan ei ta e momentonan di mas emoshonante di aña!”

 “KONTENTU KU NOS A BINI AKINAN”

Rònt mundu tin masha hopi ruman ku a bai yuda prediká na otro lugá i ku a mira pa nan mes ku ‘ta e bendishon di Yehova ta hasi riku,’ manera Beibel ta bisa.—Pro. 10:22.

Mark a bisa: “E bendishon di mas grandi tabata e efekto ku nos mudansa tabatin riba nos yunan. E dosnan mas grandi tin pleno konfiansa ku Yehova ta kuida esnan ku pone e Reino na promé lugá. E konfiansa ei ta algu ku plaka no por kumpra.”

Shane a komentá: “Mi ta hopi mas será ku mi kasá i ku mi yunan. Ora mi tende nan konta kiko Yehova a hasi pa nan, mi ta sinti un gran satisfakshon.” Su yu Jacob a agregá: “M’a pasa asina dushi! Mi ta masha kontentu ku nos a bini akinan.”

^ par. 3 Wak e artíkulo “Amigunan di Dios Riba e Islanan di Tonga,” den E Toren di Vigilansia di 15 di desèmber 2004, página 8-11.

^ par. 3 Na 2012, e sukursal di Australia i esun di Nueva Zelandia a djòin pa forma e sukursal di Australasia.