DAVID su bida a kambia kompletamente! Un tempu, Saul tabata stima i konfia David. David tabata Saul su kargadó di arma, i mas despues el a asta bira komandante di e ehérsito di Rei. Pero, e situashon a kambia i David mester a hui pa su bida, pasobra Saul tabata purba di mat’é. Aunke ku Dios a primintí David ku lo e bira rei, na e momento ei, e tabata skondí den desierto pa protehá su mes i e 600 hòmbernan ku tabata huntu kuné.

Saul a bira un rei malbado. Saul tabata asina yalurs riba David ku el a haña hopi rabia, i el a asta purba di mata David mas ku un bes. Un biaha, ora David tabatin oportunidat pa mata Saul, e no a hasi esei. En bes ku Saul tabata gradisidu, el a sigui purba di mata David. Pues, David a bai skonde den e desierto serka di e stat Zif. Pero, algun hòmber di Zif a bai bisa Saul ku David tabata skondí einan. Esei tabata di dos biaha ku e hòmbernan di Zif a traishoná David i bisa Saul unda e tabata. Ora nan a bisa Saul, mesora el a persiguí David.

Kiko David lo a hasi? Ora David a tende ku Saul a bin persiguié te den desierto, el a manda algun hòmber pa haña sa si di bèrdat Saul tabata den bisindario. Aunke ku Saul su ehérsito tabatin 3.000 hòmber, David no a drenta pániko. De echo, ta rònt di e tempu ei el a skirbi: “Dios ta mi ayudante. Yehova ta ku e hendenan ku ta apoyá mi.” (Sal. 54:4; introdukshon) Pues, anochi David a disidí di bai kaminda Saul a establesé su kampamentu. David a puntra si un hende tabata dispuesto pa baha bai e kampamentu di Saul huntu kuné.

Abisai a bisa ku lo e bai ku David. Abisai tabata subrino di David. E tabata un guerero ku hopi kurashi, pero tin biaha e tabata sin miserikòrdia. Ora David i Abisai a drenta e kampamentu di Saul ketu ketu, nan a realisá ku tur hende tabata drumí. De echo, ta Yehova a laga tur e hòmbernan kai den un soño profundo pa asina nan no tende nada. Anto Rei Saul tambe tabata morto na soño! No tabatin ningun hende ta vigil’é i su sper tabata hinka den tera banda di su kabes.

Kiko David lo a hasi na e okashon ei? Lo tabata fásil pa e mata Saul. Esei lo por tabata e oportunidat pa David libra su mes for di Saul. E lo no tabatin ku hui mas i por fin lo e por a bira rei. Abisai no por a komprondé dikon David no kier a mata Saul pa kaba. Pues el a flùister i bisa David: “Ata, Dios a entregá bo enemigu den bo man awe. Por fabor, laga mi klab’é ku e sper akí den tera. Lo mi klab’é den un solo biaha; mi no mester hasié dos biaha.”

 Sin duda, David ainda tabata kòrda e último bes ku el a hañ’é den un situashon similar. Ora ku David tabata den e desierto di En-Guedi, Saul a drenta e kueba kaminda David tabata skondí. Komo ku Saul no a realisá ku David tabata skondí einan, lo tabata fásil pa David mata Saul. Pero, David no a hasi Saul daño. El a djis kòrta pida rant di e mantel ku Saul tabatin bistí. Pero, asta esei a molestiá David su konsenshi. David tabata desapuntá den su mes, pasobra el a trata e rei ungí di Yehova ku falta di rèspèt.

E anochi ei, probablemente lo tabata difísil pa David konvensé Abisai pa no mata Saul. David tabata sa ku Abisai tambe tabata hui konstantemente for di Saul. Tur e hòmbernan ku tabata huntu ku David lo tabatin masha gana pa Saul stòp di persiguí nan. Pero, asina mes David no a hasi Saul daño. El a korigí Abisai, kende tabata kla pa mata Saul i a anim’é pa tene pasenshi. David a sigurá Abisai ku e palabranan akí: “Yehova mes lo [mata Saul], òf lo yega e dia ku lo e muri un morto natural, òf lo e pèrdè su bida den bataya.” Despues, el a bisa ku konvikshon: “Ami sí lo no saka mi man kontra un persona ku Yehova a ungi.”

David tabata konvensí ku Yehova lo a kastigá Saul na su debido tempu. Den e salmo ku a ser sitá mas promé, David a skirbi lo siguiente tokante di Yehova: “Dios lo paga mi enemigunan ku e maldat ku nan ta hasi ku otro hende.” (Sal. 54:5) Pues, David i Abisai a bai for di Saul su kampamentu i a bai para na un distansia riba kabes di un seru. E ora ei, na bos haltu David a grita Saul i su sòldánan. David a skual e hòmbernan di Saul pasobra nan no a protehá nan rei. Anto el a bisa Saul pa no pèrdè su tempu i sigui persiguié. Pasobra, e no ta su enemigu, e ta manera “un simpel pruga” ku no tabata un menasa pa e rei. Saul a sinti masha bèrgwensa, i el a atmití: “Mi a hasi kos di bobo; mi a faya pisá.”

Akaso Saul a kambia despues di esei? Nò. Anto probablemente David tabata sa ku Saul lo no a kambia. Pero, David tabata kontentu ku e tabatin kurashi pa hasi loke ta korekto. Di e manera ei, el a agradá Yehova. Anto ku tempu Yehova a bendishoná su sirbidó fiel den manera ku nunka lo e no por a imaginá.

Lesa e relato di Beibel:

• 1 Sámuèl 16:21; 18:​5-14; 23:19; 24:​3-7; 26:​1-25

Pa trata huntu:

Den ki manera David a demostrá kurashi durante e parti akí di su bida?

 Hasi Mas Investigashon

1. 1. Aunke Abisai tin ora tabata impulsivo i sin miserikòrdia, kon el a defendé Yehova su pueblo i apoyá David ku kurashi? (it-S “Abisai” §3-5)

   Bo kontesta

2. 2. Dikon David a kompará su mes ku “patrishi den seru”? (1 Sám. 26:20; it-S “Perdiz” §4) A

   Bo kontesta

   Ekaterina Kolomeets/stock.adobe.com

3. 3. Dikon David tabatin mester di pasenshi? (w17.08 6-7 §14-15)

   Bo kontesta

4. 4. Kon David a sigui mustra ku e tabata modesto asta dékadanan despues di e susesonan den e relato akí? (w21.09 10 §8) B

   Bo kontesta

 Pensa Riba e Lèsnan

• Aunke Saul a kometé hopi eror, David a respetá su outoridat. Kon nos por imitá David den e manera ku nos ta trata ku:

  • nos mayornan? C

    Bo kontesta

  • hende ku tin outoridat den gobièrnu? D

    Bo kontesta

  • ansiano di kongregashon? E

    Bo kontesta

• David a pensa riba loke lo agradá Yehova i a demostrá kurashi pa hasi loke ta korekto. Den ki situashon kisas nos mester tin kurashi pa tuma bon desishon?

  Bo kontesta

• Den ki otro manera lo bo por demostrá kurashi meskos ku David a demostrá den e relato akí?

  Bo kontesta

Meditá Riba Yehova i Su Propósito

• Kiko e relato akí ta siña mi tokante di Yehova?

  Bo kontesta

• Kon e relato akí ta konektá ku Yehova su propósito?

  Bo kontesta

• Kiko lo mi tin gana di puntra David ora e ser resusitá tokante e periodo akí di su bida?

  Bo kontesta