ABIGAIL tabata den un situashon difísil pa motibu di dos hòmber ku tabata mashá rabiá. Un di e hòmbernan ei tabata su kasá Nábal, un hòmber ònbeskòp i di mala fe. E otro hòmber tabata David, un bon hòmber ku tabata un sirbidó fiel di Yehova i kende lo a bira e futuro rei di Israel. Sinembargo, Nábal a hasi algu ku a pone David rabia masha hopi mes. Anto awor, bida di Abigail i di tur e hòmbernan di kas di Nábal tabata na peliger. Nábal su esposa Abigail tabata inteligente i bunita. Pero, lo e tabatin mester di kurashi tambe pa trata ku e situashon difísil ei.

E promé bes ku Abigail a skucha loke Nábal a hasi ku David tabata ora un sirbidó di Nábal a bin bis’é loke a sosodé i a spièrt’é di peliger ku tabata na kaminda. David tabata na kaminda huntu ku 400 di su hòmbernan, i nan tabata determiná pa kousa daño na Nábal “i henter su kas.” Dikon? Wèl, David a pidi Nábal pa kuminda. David su petishon tabata rasonabel, pasobra David i su hòmbernan tabata manera un muraya fuerte rònt di Nábal, su wardadónan di karné i su tounan di karné. Aunke ku Saul a fòrsa David pa hui i a persiguié sin motibu, David lealmente a sigui defendé Israel i su pueblo kontra di hende ku tabata purba di invadí i ataká e israelitanan. Pero, ora David a manda algun di su hòmbernan serka Nábal pa pidié pa kuminda, Nábal a rous nan i insultá nan. El a asta bisa ku David tabata djis un sirbidó ku a hui for di su shon.

E sirbidó di Nábal tabata sa ku lo e no por a rasoná ku Nábal i kambia su punto di bista di e asuntu. De echo, e sirbidó a bisa Abigail: “Nos shon no ta sirbi pa nada; niun hende no por papia kuné.” Pero, e tabata sa ku Abigail sí lo a skuch’é, i ku lo el a hasi loke ta korekto. Kiko Abigail lo a hasi?

E no a drenta pániko. Pero, e tabata sa ku e mester a hasi algu lihé. Pues, lihé lihé Abigail a kohe un kantidat grandi di kuminda i a pone nan riba algun buriku. Anto el a bisa su sirbidónan pa bai su dilanti ku e regalonan. Abigail a bai nan tras riba su mes buriku. E no a konta Nábal nada. Probablemente e tabata sa ku si el a konta Nábal, Nábal lo a strob’é di hasi loke ta korekto.

Abigail a kore riba su buriku via un kaminda den seru, i e serunan tabata stroba hende di mir’é. P’esei, David i su hòmbernan ku tabata bai den su direkshon no a mir’é mesora. Pero, ora nan a topa ku otro, Abigail a baha lihé lihé for di su buriku i a bai mesora serka David, kende  tabata mashá rabiá. Abigail a kai na rudia dilanti di David i a roga David pa skuch’é. Sin duda, ta su humildat a pone ku David a skuch’é.

Abigail a tuma responsabilidat pa tur loke su esposo a hasi, i Abigail a rekonosé ku David tabatin bon motibu pa ta rabiá ku Nábal, kende a aktua na un manera bobo. Despues, Abigail a kòrda David di tur loke el a hasi pa Yehova i tur loke Yehova a hasi p’e. Anto ku Yehova lo no tabata ke pa David mata ningun hende inosente, i pa despues e lamentá i sinti remordimentu. Ademas, el a bisa David ku Yehova lo a establesé su kas pa semper i libr’é for di tur su enemigunan. Pues, ta bisto ku Abigail tabata sa ku Yehova a skohe David pa ta e siguiente rei di Israel.

Abigail su palabranan sabí i amabel a yuda kalma David. David a bisa: “Alabá sea Yehova, Dios di Israel, ku a pone bo den mi kaminda awe.” Ademas, David a elogiá Abigail pa su sabiduria, i humildemente el a sigui Abigail su konseho. El a bisa: “Mi a skucha bo.”

Nábal no tabata sa di nada ku a sosodé. E anochi ei e tabata na un bankete real ku el a organisá, i el a bira “stòmburachi.” P’esei, Abigail no a konta Nábal nada e anochi ei, el a warda te ora di dia habri ora Nábal no tabata burachi mas. Pero, Nábal tabatin e mesun mal beis di semper. Apesar di esei, Abigail a konta Nábal tur loke a pasa. Kisas el a ferwagt ku Nábal lo a grit’é i kisas asta dal e, pero esei no a sosodé. Kon bini? Ora Nábal a skucha loke a sosodé, “su kurason a kasi para. Nábal a paralisá, bira manera piedra.” Anto mas o ménos dies dia despues, “Yehova a pone un fin na Nábal su bida.” Pues, Yehova a kastigá Nábal pa e manera ku el a trata David, kende tabata su sirbidó ungí. Ademas, Yehova a bendishoná Abigail pasobra el a libr’é for di un matrimonio ku tabata teribel.

Pero, Yehova a bendishoná Abigail mas ainda. Ora David a haña sa ku Nábal a muri, el a pidi Abigail pa kasa kuné. Abigail a bai di akuerdo. Ku tempu David a bira rei, promé di Huda i despues di henter Israel. Anto Abigail a dun’é un yu hòmber. Na un okashon, enemigu di Dios su pueblo a sekuestrá Abigail. Pero Abigail su bon esposo, ku tabatin yen di kurashi, a reskat’é.

Lesa e relato di Beibel:

• 1 Sámuèl 25:​1-43; 30:​1-6, 16-20

Pa trata huntu:

Den ki manera Abigail a demostrá kurashi?

1. 3. Dikon Nábal mester tabata gradisidu pa e yudansa di David su sòldánan? (ia 77-78 §9-10) B

   Bo kontesta

   Hanan Isachar/Alamy Stock Photo

2. 4. Kiko Abigail tabata ke men ora el a bisa ku Yehova “lo warda [David su] bida bon wardá den su saku di bida”? (1 Sám. 25:29; it-S “Vida” §45)

   Bo kontesta

 Pensa Riba e Lèsnan

• Kiko esposonan por siña for di David, kende a sigui Abigail su konseho? C

  Bo kontesta

• Kiko ruman muhénan ku ta kasá ku un persona ku no ta sirbi Yehova por siña for di Abigail?

  Bo kontesta

• Kon abo por demostrá kurashi den bo bida meskos ku Abigail?

  Bo kontesta

Meditá Riba Yehova i Su Propósito

• Kiko e relato akí ta siña mi tokante di Yehova?

  Bo kontesta

• Kon e relato akí ta konektá ku Yehova su propósito?

  Bo kontesta

• Kiko lo mi tin gana di puntra Abigail ora e ser resusitá?

  Bo kontesta