Bai na kontenido

Bai na kontenido

 KAPÍTULO 13

Predikadónan di Reino Ta Hiba Nan Kaso Korte

Predikadónan di Reino Ta Hiba Nan Kaso Korte

PUNTO SENTRAL DI E KAPÍTULO

Manera Hesus a profetisá, su siguidónan a konfrontá oposishon di hende ku a usa medionan legal pa purba di para e trabou di prediká

1, 2. (a) Kiko e lidernan religioso a logra hasi ku e trabou di prediká, pero kon e apòstelnan a reakshoná? (b) Dikon e apòstelnan a nenga di obedesé e prohibishon ku tabatin riba e trabou di prediká?

TABATA algun siman despues di Pentekòste di aña 33, i e kongregashon kristian na Herúsalèm a kaba di forma. Pa Satanas, esaki tabata nèt un bon momento pa ataká e kongregashon i purba di kaba kuné promé ku e por a bira fuerte. Rápidamente, Satanas a manipulá e situashon di tal manera ku e lidernan religioso a prohibí e trabou di prediká e Reino. Ma e apòstelnan a sigui prediká ku kurashi, i gruponan grandi di tantu hòmber komo muhé a bira “kreyentenan den Señor.”—Echo. 4:18, 33; 5:14.

E apòstelnan a keda masha kontentu “pasobra Dios a konsiderá nan digno di ser desonrá pa kousa di Hesus su nòmber”

2 Furioso, e opositornan a bolbe ataká. E biaha akí nan a enkarselá tur e apòstelnan. Pero durante anochi, e angel di Yehova a habri e portanan di prizòn. Pa ora di dia a habri, ya e apòstelnan tabata den tèmpel ta prediká atrobe! Nan a bolbe ser arestá i hibá dilanti di e gobernantenan, kendenan a akusá e apòstelnan di a violá e dekreto ku a taha nan di prediká. Kon e apòstelnan a reakshoná? Ku kurashi nan a deklará: “Nos tin ku obedesé Dios na promé lugá, i no hende.” E gobernantenan a bira asina furioso ku nan “kier a mata e apòstelnan.” Pero nèt na e momento krítiko ei, Gamaliel, un maestro di Lei masha respetá, a sali na defensa di e apòstelnan i a spièrta e gobernantenan: “Tene kuidou . . . No mete ku e hendenan akí, ma laga nan na pas.” Sorprendentemente, e gobernantenan a tuma su konseho i a laga e apòstelnan bai. Kiko e hòmbernan fiel akí a hasi e ora ei? Sin miedu, “nan a sigui siña hende i deklará e bon notisia tokante Hesus, ku ta e Kristu.”—Echo. 5:17-21, 27-42; Pro. 21:1, 30.

3, 4. (a) Ki método, ku pa hopi tempu tabata masha efektivo, Satanas a usa pa ataká e pueblo di Dios? (b) Kiko nos lo konsiderá den e kapítulo akí i e dosnan ku ta sigui?

3 E kaso den korte ei na aña 33 tabata e promé kaso di oposishon di parti di gobièrnu kontra e kongregashon kristian, pero sigur no e último. (Echo. 4:5-8; 16:20; 17:6, 7) Te awe, Satanas a keda manipulá opositornan di adorashon berdadero pa nan instigá outoridatnan pa prohibí nos trabou di prediká. Opositornan a lanta tur tipo di akusashon kontra e pueblo di Dios. Un di nan ta ku nos ta bai kontra órden públiko, es desir, ku nos ta kana kousa problema. Un otro akusashon ta ku nos ta instigá rebelion kontra gobièrnu, i tambe nan ta bisa ku ta buki nos ta kana bende. Na e momentonan apropiá, nos rumannan a bai korte pa proba ku e akusashonnan ei ta falsu. Kiko tabata e resultado di e kasonan  akí? Kiko verediktonan di korte di dékadanan pasá tin di haber ku abo personalmente? Laga nos analisá algun kaso ku a bai dilanti di korte pa wak kon nan a yuda “defendé e bon notisia i establesé e derecho legal di predik’é.”—Flp. 1:7.

4 Den e kapítulo akí nos lo konsentrá riba e manera ku nos a defendé nos derecho di tin e libertat di prediká. Anto den e dos kapítulonan ku ta sigui, nos lo analisá algun di e batayanan legal ku nos a hiba den nos lucha pa no ser parti di mundu i pa biba segun e normanan di Reino.

Hende Ku Ta Kana Kousa Problema òf Defensor Leal di e Reino di Dios?

5. Na final di dékada di 1930, dikon polis tabata arestá predikadónan di Reino, i kiko e rumannan ku tabata dirigí e organisashon tabatin pensá di hasi?

5 Na final di dékada di 1930, statnan i estadonan rònt Merka a purba di obligá Testigunan di Yehova pa buska un òf otro pèrmit legal pa nan por prediká e bon notisia públikamente. Pero nos rumannan no tabata pidi niun pèrmit, ya ku un pèrmit por keda revoká. Ademas, e rumannan tabata di opinion ku gobièrnu no tin e outoridat di stroba nan di kumpli ku e mandato ku Hesus a duna kristiannan di prediká e mensahe di Reino. (Mar. 13:10) Pues, komo resultado outoridatnan a arestá sientos di predikadó di Reino. Esei a pone ku e rumannan ku tabata dirigí e organisashon a kuminsá pensa pa bai korte. Nan kier a demostrá ku e restrikshonnan ku gobièrnu a imponé riba Testigu di Yehova su derecho di praktiká nan religion libremente tabata ilegal. Anto un insidente ku a tuma lugá na 1938 a hiba na un kaso históriko den korte. Kiko a pasa?

6, 7. Kiko a pasa ku famia Cantwell?

6 Djamars mainta 26 di aprel 1938, Newton Cantwell (di 60 aña), huntu ku su kasá Esther i nan yu hòmbernan, Henry, Russell i Jesse, a bai e stat New Haven, na Connecticut, pa pasa e dia ei den e trabou di prediká. Nan tur sinku tabata pionero spesial, i en realidat nan tabata prepará pa keda mas ku un dia for di kas. Dikon? Polis a yega di arestá famia Cantwell na vários okashon, pues nan tabata sa ku polis lo por a bolbe arestá nan. Pero esei no a desanimá nan di prediká e mensahe di Reino. Nan a yega New Haven den dos outo. Newton a kore e outo di famia, kargá ku literatura bíbliko i tokadisko portátil, miéntras ku Henry (di 22 aña) a kore un outo ku ekipo di zonido. Anto manera nan a ferwagt, despues di un par di ora polis a para nan.

7 Promé, nan a arestá Russell (di 18 aña), kaba Newton ku Esther. Djaleu, Jesse (di 16 aña) a para mira polis bai ku su mayornan i ku su ruman hòmber. Henry tabata na un otro parti di e stat ta prediká, pues Jesse a keda su so. Asina mes, el a kue su tokadisko i a sigui prediká. Dos hòmber katóliko a laga Jesse toka un disko ku un diskurso di Ruman Rutherford titulá “Enemigu.” Pero segun ku e hòmbernan tabata skucha e diskurso, nan a rabia asina  tantu ku nan kier a dal Jesse. Jesse a keda kalmu i a bira bai laga nan, pero djis despues un polis a par’é. Asina Jesse tambe a kai será. Polis no a akusá Ruman Esther Cantwell, pero sí nan a presentá kargo kontra Ruman Newton ku su dos yunan. Pero riba e mesun dia ei, nan a laga nan den libertat bou di fiansa.

8. Dikon Korte a haña Jesse Cantwell kulpabel di a kana kousa problema?

8 Un par di luna despues, na sèptèmber 1938, famia Cantwell a presentá dilanti di Korte di Promé Instansia di New Haven. Newton, Russell i Jesse a keda kondená pasobra nan a kana pidi donashon sin un pèrmit i tambe a bai kontra órden públiko, es desir, a kana kousa problema. Nan a apelá na Korte Supremo di Connecticut, i Korte a apsolvé Newton ku Russell di e akusashon di a bai kontra órden públiko pero a haña Jesse sí kulpabel. Dikon? Pasobra e dos hòmbernan katóliko ku a skucha e grabashon a testifiká den korte ku e diskurso a insultá nan religion i a pone nan rabia. E rumannan responsabel den nos organisashon a apelá e kaso na Korte Supremo di Merka, e korte mas haltu di e pais.

9, 10. (a) Kiko tabata e veredikto di Korte Supremo di Merka den e kaso di famia Cantwell? (b) Kon nos ta benefisiá di e veredikto ei te awe?

9 Kuminsando dia 29 di mart 1940, Presidente di Korte Supremo, Charles E. Hughes, huntu ku 8 hues a skucha e argumentonan presentá pa Ruman Hayden Covington, un abogado di Testigunan di Yehova. * Ora e fiskal di Estado di Connecticut a presentá su argumentonan den un intento pa proba ku Testigunan di Yehova tabata kana kousa problema, un di e huesnan a puntr’é: “No ta  asina ku e mensahe ku Kristu Hesus a prediká tabata impopular den su tempu?” E fiskal a kontest’é: “Ta bèrdat, i si mi ta kòrda mi Beibel bon, e ta bisa tambe kiko a pasa ku Hesus pa motibu ku el a kana prediká e mensahe ei.” E palabranan ei a bisa tur kos! Sin ku e fiskal a ripará, el a agrupá Testigunan di Yehova huntu ku Hesus, anto Estado huntu ku esnan ku a kondená Hesus. Dia 20 di mei 1940, Korte Supremo unánimamente a dikta fayo na fabor di Testigunan di Yehova.

Hayden Covington (dilanti, meimei) i Glen How (banda robes), huntu ku algun ruman, bandonando sala di korte despues di un viktoria legal

10 Dikon e veredikto ei di Korte tabata importante? Wèl, e veredikto a duna mas protekshon na hende su derecho di praktiká nan religion di manera ku niun gobièrnu federal, di estado ni lokal no por a usa medionan legal pa limitá libertat di religion. Ademas, Korte a haña ku e komportashon di Jesse ‘no a forma niun menasa pa pas i órden públiko.’ Pues, e veredikto a establesé bon kla ku Testigunan di Yehova no ta bai kontra órden públiko. Esaki tabata un viktoria legal desisivo pa e sirbidónan di Dios! Kon nos ta benefisiá di esei te awe? Un abogado ku ta Testigu di Yehova a bisa: “E derecho di praktiká nos religion libremente, sin miedu di restrikshonnan inhustu, ta permití nos awe, komo Testigu di Yehova, di kompartí e mensahe di speransa ku otro hende den nos komunidat.”

Instigadó di Rebelion Kontra Gobièrnu òf Predikadó di e Bèrdat?

Quebek Su Odio Ardiente Kontra Dios, Kristu i Libertat Ta un Bèrgwensa pa Henter Canada

11. Ki kampaña nos rumannan na Canada a tene, i dikon?

11 Den dékada di 1940, Testigunan di Yehova na Canada a konfrontá oposishon feros. P’esei, na 1946, nos rumannan a tene un kampaña di 16 dia pa informá e públiko tokante e manera ku Estado tabata kita hende su derecho di libertat di religion. Durante e periodo ei, e rumannan a parti un tratado titulá Quebek Su Odio Ardiente Kontra Dios, Kristu i Libertat Ta un Bèrgwensa pa Henter Canada. E tratado akí di 4 página a denunsiá detayadamente e kasonan di disturbio instigá pa klero, di abusu polisial i di atake di multitutnan violento ku tabata tuma lugá kontra nos rumannan den e provinsia di Quebek. E tratado a bisa: “Arestonan ilegal di Testigunan di Yehova ta sigui. Tin mas o ménos 800 akusashon kontra Testigunan di Yehova na Montreal i den áreanan alrededor.”

12. (a) Kon opositornan a reakshoná riba e kampaña ku e tratado? (b) Nos rumannan a ser akusá di ki krímen? (Wak tambe e nota.)

12 Promé Minister di Quebek, Maurice Duplessis, den estrecho kooperashon ku kardinal katóliko romano Villeneuve, a reakshoná riba e tratado dor di deklará un “guera sin miserikòrdia” kontra di Testigunan di Yehova. E kantidat di kaso kontra nos a bira dòbel rápidamente i a yega 1.600 kaso. Un ruman muhé pionero a bisa: “Polis a arestá nos asina tantu biaha ku nos a pèrdè konteo.” Ki krímen e Testigunan ku tabata parti e tratado a kometé? Nan a ser akusá di ta kana publiká “difamashon ku ta instigá rebelion kontra gobièrnu.” *

13. Ken tabata e proménan ku outoridatnan a hiba korte akusá di ta instigá rebelion kontra gobièrnu, i kiko tabata e veredikto di korte?

 13 Na 1947, e promé kaso basá riba e akusashon di ta instigá rebelion kontra gobièrnu a presentá den korte. Tabata e kaso di un ruman hòmber, Aimé Boucher, ku su yu muhénan Gisèle (di 18 aña) i Lucille (di 11 aña). Nan a parti e tratado Quebek Su Odio Ardiente den e área pegá ku nan kunuku, den e serunan pa zùit di Siudat Quebek. Pero e rumannan akí sigur no a duna e impreshon di ta hende ku ta kana kousa problema i ku no ta respetá lei. Ruman Boucher tabata un hòmber humilde i suave ku tabata atendé su kunuku chikitu sin molestiá niun hende i ku de bes en kuando tabata bai den stat ku su kitoki halá pa kabai. Pero asina mes, su famia mester a soportá algun di e maltratonan menshoná den e tratado. E hues ku a presidí e kaso den Korte di Promé Instansia tabatin masha rabia riba Testigunan di Yehova, i el a nenga di permití e rumannan presentá evidensia ku a proba ku famia Boucher tabata inosente. Na lugá di esei, el a aseptá e ponensia di fiskal ku e tratado a instigá rabia òf agreshon i ku pa e motibu ei mester a deklará famia Boucher kulpabel. Básikamente, pa e hues, tabata un krímen pa papia e bèrdat! Aimé ku Gisèle a keda kondená pa difamashon ku ta instigá rebelion kontra gobièrnu, i asta e mucha chikitu, Lucille, a pasa dos dia será den prizòn. E rumannan a apelá na Korte Supremo di Canada, e korte di mas haltu di e pais, i esaki a bai di akuerdo pa trata e kaso.

14. Kiko e rumannan na Quebek a hasi durante e añanan di persekushon?

14 Mientrastantu, nos rumannan balente di Quebek a sigui prediká e mensahe di Reino apesar di e atakenan violento i implakabel, i hopi biaha ku resultadonan sobresaliente. Durante e kuater añanan despues ku a kuminsá ku e kampaña ku e tratado na 1946, e kantidat di Testigu di Yehova na Quebek a oumentá di 300 pa 1.000! *

15, 16. (a) Kiko tabata e veredikto di Korte Supremo di Canada den e kaso di famia Boucher? (b) Ki efekto e viktoria akí tabatin riba nos rumannan i otro hende?

15 Na yüni 1950, Korte Supremo di Canada kompleto, ku a konsistí di nuebe hues, a trata e kaso di Aimé Boucher. Seis luna despues, dia 18 di desèmber 1950, Korte a dikta fayo na nos fabor. Dikon? Ruman Glen How, un abogado di Testigunan di Yehova, a splika ku Korte a bai di akuerdo ku e argumento ku defensa a presentá, esta, ku por papia di ‘instigá rebelion kontra gobièrnu’ si esei ta hiba na violensia òf na lantamentu kontra di gobièrnu. Ma e tratado “no tabatin niun di e tipo di instigashonnan ei; pues e tabata un forma legal di libertat di ekspreshon.” Ruman How a agregá: “Mi a mira personalmente kon Yehova a duna nos e viktoria.” *

16 E desishon di Korte Supremo tabata en bèrdat un viktoria rotundo pa e Reino di Dios. E veredikto a eliminá e base pa tur e otro 122 kasonan pendiente den kua a akusá e Testigunan na Quebek di difamashon ku ta instigá rebelion kontra gobièrnu. Es mas, e veredikto di Korte a nifiká ku awor tur siudadano di Canada i  di e Komunidat di Nashonnan Britániko tabatin e libertat di ekspresá nan preokupashon pa ku e manera ku gobernantenan ta dirigí nan pais. Ademas, e viktoria akí a kibra e atake ku Iglesia i Estado di Quebek tabata hiba kontra e libertatnan di Testigunan di Yehova. *

Hende Ku Ta Kana Bende Buki òf Predikadó di e Reino di Dios?

17. Kon algun gobièrnu ta purba di limitá nos aktividat di prediká?

17 Meskos ku e promé kristiannan, e sirbidónan di Yehova djawe “no ta hasi negoshi ku e palabra di Dios.” (Lesa 2 Korintionan 2:17.) Tòg tin gobièrnu ta purba di limitá nos aktividat di prediká via leinan ku ta regulá komèrsio. Laga nos konsiderá dos kaso den kua korte a duna un veredikto riba e kuestion si Testigunan di Yehova ta kana hasi negoshi òf hiba un mensahe di Dios.

18, 19. Kon outoridatnan na Dinamarka a purba di imponé restrikshon riba e trabou di prediká?

18 Dinamarka. Dia 1 di òktober 1932 a drenta na vigor un lei ku a bisa ku tabata ilegal pa bende material imprimí sin un pèrmit di hasi negoshi òf di bende kos riba kaya. Pero nos rumannan no a pidi niun pèrmit. E siguiente dia, sinku publikadó a pasa henter dia ta prediká na Roskilde, un pueblito ku a keda un 30 kilometer for di e kapital, Kopenhagen. Na final di e dia, nan no por a haña un di e publikadónan, August Lehmann. Logá, el a ser arestá, akusá di tabata bende kos sin pèrmit.

19 Dia 19 di desèmber 1932, August Lehmann a presentá den korte. El a konta ku e tabata bishitá kas di hende pa ofresé nan literatura bíbliko, ma el a nenga ku ta negoshi e tabata hasi. E Korte di Promé Instansia a bai di akuerdo kuné i a deklará: “E akusado . . . ta den posishon di mantené su mes finansieramente i no a haña niun benefisio ekonómiko ni tabatin intenshon di haña esei. Al kontrario, su aktividatnan a kous’é pèrdida finansiero.” Korte a dikta na fabor di e Testigunan i a bisa ku no por karakterisá e aktividat di Lehmann komo “negoshi.” Pero e opositornan di e pueblo di Dios tabata determiná pa imponé restrikshon riba e trabou di prediká den henter e pais. (Isa. 10:1) E fiskal a keda apelá e kaso te na Korte Supremo di e pais. Kon nos rumannan a reakshoná?

20. Kiko tabata e veredikto di Korte Supremo di Dinamarka, i kon nos rumannan a reakshoná?

20 E siman promé ku e oudiensia di Korte Supremo, Testigunan di Yehova den henter Dinamarka a oumentá nan aktividat di prediká. Djamars 3 di òktober 1933, Korte Supremo a anunsiá su desishon. Nan a bai di akuerdo ku Korte di Promé Instansia, esta, ku August Lehmann no a kibra niun lei. E veredikto akí a nifiká ku Testigunan di Yehova por a sigui prediká libremente. Pa ekspresá nan gratitut na Yehova pa e viktoria legal akí ku el a duna nan, e rumannan a oumentá nan aktividat di prediká mas ainda. Despues di e desishon ei di Korte, nos rumannan na Dinamarka por a sigui kumpli ku nan sirbishi te awe, sin interferensia di gobièrnu.

Testigunan di Yehova ku kurashi na Dinamarka den dékada di 1930

21, 22. Kiko tabata e desishon di Korte Supremo di Merka den e kaso di Ruman Murdock?

 21 Merka. Riba djadumingu, 25 di febrüari 1940, polis a arestá un ruman hòmber pionero, Robert Murdock, Jr., huntu ku shete otro Testigu di Yehova, miéntras nan tabata prediká den e stat Jeannette, serka di Pittsburgh, Pennsylvania. Nan a haña un kondena pasobra nan no a paga pa un pèrmit pa ofresé literatura. Ora nan a apelá, Korte Supremo di Merka a bai di akuerdo pa trata e kaso.

22 Dia 3 di mei 1943, Korte Supremo a anunsiá su veredikto ku a sostené e posishon di e Testigunan. Korte tabata kontra di e eksigensia ku e Testigunan mester a buska un pèrmit, pasobra esei lo a nifiká ku nan tabatin ku “paga pa gosa di un derecho ku Konstitushon Federal ta duna nan.” Korte a anulá e ordenansa di e stat pasobra esei a ‘limitá libertat di prensa i a imponé restrikshon riba e libertat di praktiká religion.’ Ora ku Hues William O. Douglas a presentá e opinion di mayoria di e huesnan di e korte, el a deklará ku e aktividat di Testigunan di Yehova “ta abarká mas ku prediká; e ta abarká mas ku partimentu di literatura religioso. E ta un kombinashon di nan dos.” El a agregá: “E forma di aktividat religioso akí ta di gosa di e mesun distinshon . . . ku adorashon den iglesia i predikashi for di prekstul.”

23. Dikon e viktorianan ku nos rumannan tabatin den korte na 1943 ta importante pa nos awe?

 23 E veredikto akí di Korte Supremo tabata un viktoria legal sumamente importante pa e pueblo di Dios, pasobra el a konfirmá loke nos realmente ta: predikadónan kristian, no hende ku ta kana bende buki. Riba e dia memorabel ei na 1943, Testigunan di Yehova a gana 12 di nan 13 kasonan dilanti di Korte Supremo, inkluso e kaso di Murdock. E desishonnan akí di korte a fungi komo un presedente poderoso den kasonan hudisial mas resien den kua nos opositornan a bolbe kuestioná nos derecho di prediká e mensahe di Reino públikamente i di kas pa kas.

“Nos Tin Ku Obedesé Dios na Promé Lugá, i No Hende”

24. Kiko nos ta hasi ora gobièrnu prohibí nos trabou di prediká?

24 Komo sirbidónan di Yehova, nos ta apresiá mashá ora gobièrnunan ta duna nos e derecho legal di prediká e mensahe di Reino libremente. Pero ora nan prohibí nos trabou di prediká, nos ta simplemente ahustá nos métodonan, i sigui ku nos trabou den kualke otro manera posibel. Meskos ku e apòstelnan, “nos tin ku obedesé Dios na promé lugá, i no hende.” (Echo. 5:29; Mat. 28:19, 20) Pero tambe nos ta apelá na e kortenan pa kita e prohibishon ku a pone riba nos aktividatnan. Laga nos konsiderá dos ehèmpel.

25, 26. Kiko a pasa na Nicaragua ku a hiba na un kaso den Korte Supremo, i kiko tabata e resultado?

25 Nicaragua. Dia 19 di novèmber 1952, Donovan Munsterman, un misionero i e sirbidó di sukursal, a bai na e Departamento di Imigrashon na e kapital, Managua. Nan a manda yam’é p’e presentá dilanti di hefe di e departamento, Komandante Arnoldo García. E komandante a bisa Donovan ku ‘ta prohibí tur Testigu di Yehova na Nicaragua pa sigui prediká nan doktrinanan i di promové nan aktividatnan religioso.’ Ora ku Donovan a puntr’é dikon, Komandante García a splik’é ku Testigunan di Yehova no tabatin  pèrmit di e minister pa hasi esei i ku nan ta ser akusá di ta komunista. Ta ken a akusá nos? Klero katóliko.

Rumannan na Nicaragua durante e prohibishon

26 Mesora Ruman Munsterman a apelá e kaso serka e Ministerio di Gobernashon i Religion i tambe serka Presidente Anastasio Somoza García, pero sin resultado. Pues, e rumannan a ahustá nan métodonan di prediká. Nan a sera e Salòn di Reino, kuminsá reuní den gruponan mas chikitu i a stòp di prediká den kaya, pero nan a sigui prediká e mensahe di Reino. Na e mesun tempu, nan a entregá un petishon na Korte Supremo di Nicaragua pa anulá e prohibishon. Kasi tur korant a papia di e prohibishon i di e kontenido di e petishon, i Korte Supremo a bai di akuerdo pa trata e kaso. Kiko tabata e resultado? Dia 19 di yüni 1953, Korte Supremo a publiká su desishon unánime ku tabata na fabor di Testigunan di Yehova. Korte a haña ku e prohibishon a violá e garantianan konstitushonal ku ta duna un individuo e libertat di ekspresá su mes, di tin su propio konsenshi i di praktiká su kreensianan. Ademas, Korte a duna òrdu pa restorá e relashon entre e gobièrnu di Nicaragua i Testigunan di Yehova na su estado anterior.

27. Dikon e hendenan di Nicaragua a keda masha asombrá ku e desishon di Korte Supremo, i kon e rumannan a mira e viktoria ei?

27 E hendenan di Nicaragua a keda masha asombrá ku Korte Supremo a dikta fayo na fabor di Testigunan di Yehova. Te ku e tempu ei, e influensia di klero tabata asina fuerte ku Korte tabata evitá di ta na konflikto ku nan. Ademas, funshonarionan di gobièrnu tabatin asina tantu poder ku rara bes Korte tabata bai kontra di nan desishonnan. Nos rumannan tabata konvensí ku nan a haña e viktoria akí pasobra nan Rei a protehá nan i pasobra nan a sigui prediká.—Echo. 1:8.

28, 29. Ki kambio inesperá a tuma lugá na Zaire meimei di dékada di 1980?

28 Zaire. Meimei di dékada di 1980, tabatin rònt di 35.000 Testigu di Yehova na Zaire, ku awor yama Repúblika Demokrátiko di Congo. Sukursal tabata konstruyendo un fasilidat nobo pa por a atendé e oumento kontinuo den aktividatnan di Reino. Na desèmber 1985, nan a tene un kongreso internashonal na e kapital, Kinshasa, i tabatin delegado for di hopi parti di mundu. En total tabatin 32.000 hende ku a yena e stadion di e stat. Despues di esei, e situashon a kuminsá kambia pa Testigunan di Yehova. Kiko a sosodé?

29 Ruman Marcel Filteau, un misionero di Quebek, Canada, kende a pasa den e persekushon na man di e régimen di Duplessis, tabata sirbi na Zaire e tempu ei. El a konta kiko a pasa: “Dia 12 di mart 1986, e rumannan responsabel a risibí un karta ku a deklará e asosiashon di Testigunan di Yehova di Zaire ilegal.” E prohibishon tabata firmá pa e presidente di e pais, Mobutu Sese Seko.

30. Ki desishon importante e Komité di Sukursal mester a tuma, i kiko nan a disidí di hasi?

30 E siguiente dia, e emisora di radio nashonal a anunsiá: “Nunka mas nos lo bolbe tende di Testigunan di Yehova na [Zaire].” Mesora persekushon a kuminsá. E hendenan a destruí Salònnan di Reino, i nan a hòrta nos rumannan, arestá nan, enkarselá nan i  bati nan. Nan a sera asta muchanan Testigu di Yehova den prizòn. Dia 12 di òktober 1988, gobièrnu a konfiská e pertenensianan di nos organisashon, i Guardia Sivil (un unidat di ehérsito) a okupá e propiedat di sukursal. E rumannan responsabel a entregá un apelashon serka Presidente Mobutu, pero nan no a haña kontesta. E ora ei e Komité di Sukursal mester a tuma un desishon importante: Apelá na Korte Supremo òf warda? Timothy Holmes, kende tabata un misionero i e tempu ei koordinadó di e Komité di Sukursal di e pais, ta kòrda: “Nos a pidi Yehova sabiduria i guia.” Despues ku e komité a deliberá, kompañá ku orashon, nan a yega na e konklushon ku no tabata e momento oportuno pa tuma akshon legal. Na lugá di esei, nan a konsentrá riba kuida e rumannan i buska maneranan pa sigui ku e trabou di prediká.

“Durante e periodo di e kaso, nos a mira kon Yehova por kambia kos”

31, 32. Ki desishon remarkabel Korte Supremo di Zaire a tuma, i ki efekto esei tabatin riba nos rumannan?

31 Vários aña a pasa. E preshon riba Testigunan di Yehova a mengua i tabatin mas rèspèt pa derechonan humano den e pais. E Komité di Sukursal a konkluí ku awor sí tabata tempu pa apelá e prohibishon serka e Korte Supremo di Hustisia di Zaire. Remarkablemente, Korte Supremo a bai di akuerdo pa trata e kaso. Anto dia 8 di yanüari 1993, kasi shete aña despues di e prohibishon presidensial, Korte a dikta ku e akshon di gobièrnu kontra di Testigunan di Yehova tabata ilegal, i nan a kita e prohibishon. Figura bo! E huesnan ei a riska nan bida anulando un desishon di e presidente di e pais! Ruman Holmes a bisa: “Durante e periodo di e kaso, nos a mira kon Yehova por kambia kos.” (Dan. 2:21) E viktoria ei a fortalesé e fe di nos rumannan. Nan a sinti ku ta nos Rei Hesus a dirigí su pueblo pa sa ki ora i kon pa aktua.

Rumannan na Repúblika Demokrátiko di Congo ta kontentu ku nan libertat di adorá Yehova

 32 Unabes ku nan a kita e prohibishon, sukursal tabatin mag di trese misionero den e pais, traha un ofisina di sukursal nobo i importá literatura bíbliko. * Sirbidónan di Dios rònt mundu ta keda masha kontentu pa mira kon Yehova ta protehá e bienestar spiritual di su pueblo!—Isa. 52:10.

“Yehova Ta Mi Ayudante”

33. Kiko nos ta siña for di e repaso breve akí di algun kaso den korte?

33 Nos repaso di algun bataya legal ta proba ku Hesus a kumpli ku su promesa: “Lo mi duna boso palabra i sabiduria ku tur boso opositornan huntu lo no por resistí ni kontradisí.” (Lesa Lukas 21:12-15.) Algun biaha tabata bisto ku den nos tempu tambe Yehova a lanta hende manera Gamaliel pa protehá su pueblo òf a motivá hues- i abogadonan balente pa defendé hustisia. Yehova a hasi e armanan di nos opositornan stòmpi. (Lesa Isaías 54:17.) Oposishon no por para e trabou di Dios.

34. Dikon nos viktorianan legal ta asina remarkabel, i kiko nan ta proba? (Wak tambe e kuadro “ Viktorianan Importante den Korte Supremo Ku A Benefisiá e Predikashon di Reino.”)

34 Dikon nos viktorianan legal ta asina remarkabel? Pensa un ratu riba esaki: Testigunan di Yehova no ta hende ku tin hopi influensia ni ta hende prominente. Nos no ta vota ni sostené kampañanan polítiko ni purba di influensiá polítikonan. Ademas, esnan entre nos ku ta haña nan mes dilanti di korte supremo por lo general ta ser konsiderá ‘hende gewon ku no tin muchu edukashon.’ (Echo. 4:13) Pues, for di un punto di bista humano, un korte di hustisia no tin hopi motibu pa yuda nos i duna un veredikto ku ta bai kontra nos opositornan religioso i polítiko. Apesar di tur esei, bes tras bes kortenan a disidí na nos fabor! Nos viktorianan legal ta proba ku nos ta kana “den kompania di Kristu, sí, komo personanan mandá pa Dios, den bista di Dios.” (2 Kor. 2:17) Pues, huntu ku apòstel Pablo, nos ta deklará: “Yehova ta mi ayudante; lo mi no tin miedu.”—Heb. 13:6.

^ par. 9 E kaso akí, Cantwell Kontra Estado di Connecticut, tabata e promé di 43 kaso ku a bini dilanti di Korte Supremo di Merka ku Ruman Hayden Covington a bringa na defensa di e rumannan. El a muri na 1978. Su esposa biuda, Dorothy, a sirbi fielmente te na su morto na aña 2015, na edat di 92 aña.

^ par. 12 E akusashon tabata basá riba un lei ku a data for di aña 1606. E lei ei a permití un hurado deklará un persona kulpabel si nan ta haña ku loke e persona ei a bisa a fomentá rabia òf agreshon kontra gobièrnu, maske loke el a bisa tabata bèrdat.

^ par. 14 Na 1950 tabatin 164 ruman den sirbishi di tempu kompleto na Quebek, inkluso 63 graduado di Galaad ku boluntariamente a aseptá un asignashon einan apesar ku oposishon feros tabata warda nan.

^ par. 15 Ruman W. Glen How tabata un abogado ku kurashi, kende di 1943 pa 2003 a bringa ku masha abilidat sientos di bataya legal pa Testigunan di Yehova na Canada i den eksterior.

^ par. 16 Pa mas detaye di e kaso akí, wak e artíkulo “E Bataya No Ta di Boso, ma di Dios” den e ¡Despertad! di 22 di aprel 2000, página 18-24.

^ par. 32 Ku tempu, e Guardia Sivil a sali for di e propiedat di sukursal; pero e rumannan a konstruí e sukursal nobo na un otro sitio.