Bai na kontenido

Bai na kontenido

 KAPÍTULO 17

Sirbidónan di e Reino Ta Haña Entrenamentu

Sirbidónan di e Reino Ta Haña Entrenamentu

PUNTO SENTRAL DI E KAPÍTULO

Skolnan teokrátiko ta prepará sirbidónan di e Reino pa kumpli ku nan asignashon

1-3. Kon Hesus a ekspandé e trabou di prediká, i ki preguntanan esei ta lanta?

DOS aña largu Hesus a prediká den henter Galilea. (Lesa Mateo 9:35-38.) El a bishitá hopi stat ku pueblito i a siña e hendenan den snoa i a prediká e bon notisia di e Reino. Tur kaminda ku el a bai prediká, gran kantidat di hende tabata basha bini serka dje. P’esei el a bisa ku “e kosecha ta grandi” i ku tabatin mester di mas trahadó.

2 Hesus a dal paso pa ekspandé e trabou di prediká. Kon? Wèl, el a manda su 12 apòstelnan “bai prediká e Reino di Dios.” (Luk. 9:1, 2) Pero probablemente e apòstelnan tabata ke sa kon nan mester a hasi e trabou akí. P’esei, promé ku Hesus a laga nan bai, el a duna nan entrenamentu meskos ku su Tata a dun’é.

3 Esaki ta lanta vários pregunta: Ki entrenamentu Hesus a haña serka su Tata? Ki entrenamentu Hesus a duna su apòstelnan? I kiko djawe? E Rei Mesiániko a entrená su siguidónan pa kumpli ku nan sirbishi? Si ta asina, kon el a hasié?

“Loke e Tata A Siña Mi, Mi Ta Papia”

4. Ki ora Hesus su Tata a siñ’é i na unda?

4 Hesus a bisa bon kla ku ta su Tata a siñ’é. Durante su sirbishi riba tera, e di: “Loke e Tata a siña mi, mi ta papia.” (Huan 8:28) Ki ora e Tata a siña Hesus i na unda? Wèl, Hesus ta e promé Yu di Dios, i evidentemente su entrenamentu a kuminsá djis despues ku Dios a kre’é. (Kol. 1:15) Hesus tabata den shelu na lado di su Tata i a pasa míles di aña skuchando i opservando Yehova, e Magnífiko Instruktor. (Isa. 30:20) Debí na esei, e Yu a risibí un edukashon úniko pa loke ta e kualidatnan, obranan i propósitonan di su Tata.

5. Ki instrukshon e Tata a duna e Yu tokante e sirbishi ku lo el a hasi riba tera?

5 Na e debido tempu, Yehova a siña su Yu tokante e sirbishi ku lo e mester a kumpli kuné riba tera. Konsiderá un profesia ku a deskribí e relashon entre e Magnífiko Instruktor i su promé Yu. (Lesa Isaías 50:4, 5.) Segun e profesia, Yehova  tabata spièrta su Yu “mainta tras mainta.” E palabranan akí ta duna e idea di un maestro ku ta lanta su alumno mainta trempan pa e por kuminsá siñ’é. Un buki di referensia bíbliko ta bisa: ‘Ta manera Yehova a tum’é na skol komo alumno i a siñ’é kiko pa prediká i kon e mester prediká.’ Den e “skol” selestial ei, Yehova a siña su Yu “kiko pa bisa i kiko pa siña hende.” (Huan 12:49) Tambe e Tata a instruí su Yu kon pa siña hende. * Anto ora Hesus tabata riba tera, el a hasi bon uso di e entrenamentu ku el a haña, no solamente dor di kumpli ku su sirbishi, sino tambe dor di entrená su siguidónan pa kumpli ku nan sirbishi.

6, 7. (a) Ki entrenamentu Hesus a duna su apòstelnan, i esei a prepará nan pa hasi kiko? (b) Hesus a sòru pa su siguidónan den nos tempu haña ki tipo di entrenamentu?

6 Ki entrenamentu Hesus a duna su apòstelnan, manera a keda menshoná den introdukshon? Segun Mateo kapítulo 10, el a duna nan instrukshonnan spesífiko pa sirbishi di vèlt, entre otro, unda pa prediká (versíkulo 5, 6), ki mensahe pa prediká (versíkulo 7), e importansia di pone konfiansa den Yehova (versíkulo 9, 10), kon pa aserká e doñonan di kas (versíkulo 11-13), kiko pa hasi ora hende rechasá nan (versíkulo 14, 15) i kon pa reakshoná ora di persekushon (versíkulo 16-23). * E entrenamentu kla ku Hesus a duna su apòstelnan a prepará nan pa dirigí e trabou di prediká e bon notisia den e promé siglo.

7 Kiko di nos tempu? Hesus, e Rei di e Reino di Dios, a duna su siguidónan e asignashon di mas importante ku nan por a yega di haña, esta, prediká ‘e bon notisia di e Reino den henter e tera habitá, komo testimonio pa tur nashon.’ (Mat. 24:14) Pero e Rei a entrená nos pa kumpli ku e trabou sumamente importante akí? Klaru ku sí! For di shelu e Rei a sòru pa su siguidónan haña e entrenamentu pa sa kon pa prediká pafó di e kongregashon i kon pa kumpli ku responsabilidatnan spesial den e kongregashon.

Sirbidónan di Dios Ta Haña Entrenamentu pa Prediká e Bon Notisia

8, 9. (a) Kiko tabata e propósito prinsipal di e Skol di Ministerio Teokrátiko? (b) Kon e reunion di den siman a yuda bo bira mas efektivo den sirbishi di vèlt?

8 Pa hopi tempu e organisashon di Yehova a usa asamblea-, kongreso- i reunionnan di kongregashon—manera e Reunion di Sirbishi—pa entrená e pueblo di Dios pa sirbishi di vèlt. Pero den dékada di 1940, e esklabo fiel a kuminsá hasi areglo pa entrená e pueblo di Dios mediante vários skol.

9 Skol di Ministerio Teokrátiko. Manera nos a mira den e kapítulo anterior, nan a kuminsá tene e skol akí na 1943. Akaso e meta di e skol akí tabata pa djis entrená e studiantenan pa duna bon parti na reunionnan di kongregashon? Nò. Su propósito prinsipal tabata pa entrená e pueblo di Dios pa usa nan don di papia pa alabá Yehova den sirbishi di vèlt.  (Sal. 150:6) E skol ei a prepará tur ruman ku a inskribí den dje pa nan ta mas efektivo komo predikadó di Reino. Awor nos ta haña e tipo di entrenamentu ei na e reunion di den siman.

10, 11. Ken por inskribí awor den e Skol di Galaad, i kiko ta e meta di e programa di e skol ei?

10 Skol Bíbliko di Galaad di Watchtower. E skol akí a kuminsá djaluna 1 di febrüari 1943. E propósito original di e skol tabata pa entrená pionero i otro ruman ku ta den e trabou di tempu kompleto pa sirbi komo misionero na un òf otro parti di mundu. Pero for di òktober 2011 a kambia e rekisitonan pa inskribí. Awor e skol ta solamente pa rumannan ku ya kaba ta den un òf otro forma di sirbishi spesial di tempu kompleto, manera pionero spesial, superintendente di sirkuito i nan esposa, bètelita i misionero ku ta traha den sirbishi di vèlt pero ku no a bai e skol ainda.

11 Kiko ta e meta di e programa di Skol di Galaad? Un instruktor di hopi tempu a kontestá: “Hasi e fe di e studiantenan mas fuerte mediante un estudio kabal di e Palabra di Dios i yuda nan desaroyá e kualidatnan spiritual nesesario pa nan por enfrentá ku éksito e retonan di nan asignashon. Un otro meta fundamental di e programa ta pa inkulká den e studiantenan un deseo mas intenso pa partisipá den e trabou di prediká.”—Efe. 4:11.

12, 13. Ki efekto e Skol di Galaad tabatin riba e trabou mundial di prediká? Duna un ehèmpel.

12 Ki efekto e Skol di Galaad tabatin riba e trabou mundial di prediká? Di 1943 te ku awor, mas ku 8.500 ruman a bai e skol ei,[3] i e misioneronan entrená na Galaad a sirbi den mas ku 170 pais rònt mundu. E misioneronan a hasi bon uso di nan entrenamentu; nan a prediká ku masha entusiasmo i a entrená otro rumannan pa hasi meskos. Den hopi kaso e misioneronan a organisá e trabou den áreanan kaminda tabatin masha tiki òf niun publikadó di Reino.

13 Tuma por ehèmpel loke a pasa na Hapon, kaminda e predikashon organisá a para kasi kompletamente durante Promé Guera Mundial. Pa ougùstùs 1949 tabatin ménos ku 10 publikadó lokal na Hapon. Pero, pa fin di e aña ei tabatin 13 misionero entrená na Galaad ta prediká na Hapon. Hopi misionero mas a bini despues. Na prinsipio, e misioneronan a konsentrá nan esfuersonan den statnan grandi; despues, nan a muda pa otro statnan. Ku smak e misioneronan tabata animá nan studiantenan pa djòin nan den e sirbishi di pionero. E esfuerso i entusiasmo di e misioneronan a duna hopi fruta. Awor tin mas ku 216.000 proklamadó di Reino na Hapon, i kasi 40% di nan ta sirbi komo pionero! *

14. Skolnan teokrátiko ta prueba konvinsente di kiko? (Wak tambe e kuadro “ Skolnan Ku Ta Entrená Sirbidónan di Reino,” página 188.)

14 Otro skolnan teokrátiko. E Skol di Sirbishi di Pionero, e Skol Bíbliko pa Pareha Kristian i e Skol Bíbliko pa Ruman Hòmber Soltero a yuda e rumannan ku a asistí na nan desaroyá spiritualmente i a motivá nan pa dirigí e trabou di prediká  ku entusiasmo. * Tur e skolnan teokrátiko akí ta prueba konvinsente ku nos Rei a prepará su siguidónan plenamente pa kumpli ku nan sirbishi.—2 Tim. 4:5.

Ruman Hòmbernan Ta Haña Entrenamentu pa Atendé Responsabilidatnan Spesial

15. Den ki aspekto ruman hòmbernan den puesto di responsabilidat ke imitá Hesus?

15 Kòrda ku e profesia di Isaías ta bisa ku Hesus a haña lès serka Yehova. Den e “skol” selestial ei, e Yu a siña “kon pa sostené ku palabra esun ku ta kansá.” (Isa. 50:4) Hesus a pone e lès ei na práktika; tempu e tabata riba tera, el a refreská “tur ku ta traha duru i ku ta kargá.” (Mat. 11:28-30) Meskos ku Hesus, ruman hòmbernan ku ta sirbi den puesto di responsabilidat ke ta un animashon pa nan rumannan. Pa logra esei, e esklabo fiel a establesé vários skol pa yuda ruman hòmbernan kualifiká bira mas efektivo den sirbi nan rumannan.

16, 17. Kiko ta e meta di e Skol di Ministerio di Reino? (Wak tambe e nota.)

16 Skol di Ministerio di Reino. E promé klas di e skol akí a kuminsá dia 9 di mart 1959 na South Lansing, New York. Superintendentenan biahero i tambe sirbidónan di  kongregashon (ku awor yama koordinadó di kuerpo di ansiano) a haña invitashon pa asistí na un kurso di ún luna. Despues a tradusí e kurso di ingles pa otro idioma, i gradualmente e skol a kuminsá entrená ruman hòmbernan rònt mundu. *

Ruman Lloyd Barry ta duna lès na e Skol di Ministerio di Reino na Hapon, 1970

17 Kiko ta e meta di e skol akí? Wèl, e Anuario 1962 di Testigunan di Yehova a bisa lo siguiente: “Den e mundu hopi drùk akí, un superintendente di e kongregashon di Testigunan di Yehova mester ta un hende ku por organisá su bida di tal manera ku e por duna e debido atenshon na tur ruman di su kongregashon i ser un bendishon pa nan. Na e mesun tempu, e no por ta un hòmber ku ta neglishá su propio famia pa yuda e kongregashon; mas bien e mester usa sano huisio. Esta un oportunidat maravioso e sirbidónan di kongregashon na tur parti di mundu a risibí! Nan por reuní huntu na e Skol di Ministerio di Reino pa haña un entrenamentu ku lo yuda nan hasi nèt loke Beibel ta bisa ku un superintendente lo mester kumpli kuné!”—1 Tim. 3:1-7; Tito 1:5-9.

18. Kon henter e pueblo di Dios ta benefisiá di e Skol di Ministerio di Reino?

 18 Henter e pueblo di Dios ta benefisiá di e Skol di Ministerio di Reino. Kon asina? Wèl, ora ansiano- ku sirbidónan ministerial ta pone na práktika loke nan a siña na e skol, nan lo ta un animashon pa nan rumannan, meskos ku Hesus tabata pa su disipelnan. Abo no ta apresiá e aktonan di bondat di un ansiano òf sirbidó ministerial kariñoso? Kisas un di nan a papia un palabra bondadoso ku bo, a skucha bo ku atenshon òf a bishitá bo pa animá bo. (1 Tes. 5:11) E hòmbernan kualifiká ei ta un berdadero bendishon pa nan kongregashon!

19. Kua skol mas e Komité di Siñansa ta supervisá, i kiko ta e propósito di e skolnan ei?

19 Otro skolnan teokrátiko. E Komité di Siñansa di Kuerpo Gobernante ta supervisá tambe otro skolnan ku ta entrená ruman hòmbernan ku ta sirbi den puesto di responsabilidat den e organisashon. E propósito di e skolnan ei ta pa yuda rumannan responsabel—ansiano di kongregashon, superintendente di sirkuito i miembro di Komité di Sukursal—kumpli na un manera mas efektivo ku e tantísimo responsabilidatnan ku nan tin. E kursonan ei basá riba Beibel ta animá e ruman hòmbernan pa mantené nan propio spiritualidat i pa hasi uso di prinsipionan di Beibel ora nan ta trata ku e karnénan presioso ku Yehova a konfia na nan kuido.—1 Ped. 5:1-3.

E promé klas di Skol di Entrenamentu Ministerial ku nan a tene na Malawi, 2007

20. Dikon Hesus por a bisa ku ta ‘Yehova a siña nos tur,’ i kiko bo ta determiná pa hasi?

20 Nos por mira klaramente anto ku e Rei Mesiániko a sòru pa su siguidónan ta bon entrená. Tur e entrenamentu akí a bini di ariba bai abou: Yehova a entrená su Yu, i e Yu a entrená su siguidónan. P’esei Hesus por a bisa ku ta ‘Yehova a siña nos tur.’ (Huan 6:45; Isa. 54:13) Laga nos ta determiná pa saka pleno probecho di e entrenamentu ku nos Rei a pone disponibel pa nos. Anto no lubidá ku e propósito prinsipal di tur e entrenamentunan akí ta pa yuda nos keda spiritualmente fuerte pa nos por kumpli ku nos sirbishi kabalmente.

^ par. 5 Kon nos por sa ku e Tata a siña e Yu kon pa siña hende? Wèl, pensa riba esaki: E echo ku Hesus a usa masha hopi ilustrashon, òf parábola, ora e tabata siña hende a kumpli ku un profesia skirbí siglonan promé ku el a nase. (Sal. 78:2; Mat. 13:34, 35) Esei ta indiká bon kla ku Yehova, e Outor di e profesia ei, a determiná hopi tempu di antemano ku su Yu lo a usa ilustrashon pa siña hende.—2 Tim. 3:16, 17.

^ par. 6 Vários luna despues, Hesus “a nombra 70 otro disipel i a manda nan dos dos” bai prediká. Nan tambe el a entrená.—Luk. 10:1-16.

^ par. 13 Algun ruman a asistí mas ku un biaha na e Skol di Galaad.

^ par. 14 Pa mas detaye tokante e impakto ku e misioneronan entrená na Galaad tabatin riba e trabou di prediká na mundu, wak kapítulo 23 di e buki Testigunan di Yehova—Proklamadónan di e Reino di Dios (na spañó).

^ par. 16 Awor e Skol pa Predikadó di Reino a bini na lugá di e último dos skolnan ei.

Awor tur ansiano ta benefisiá di e Skol di Ministerio di Reino; durashon di e seshonnan ta varia i ta tene nan kada tantu aña. For di 1984, sirbidónan ministerial tambe ta haña entrenamentu na e skol akí.