Bai na kontenido

Bai na kontenido

 LÈS 9

Kon Bo Por Tin un Famia Felis?

Kon Bo Por Tin un Famia Felis?

1. Dikon ta importante pa un pareha ta kasá pa nan ta felis?

E bon notisia ta bini di Yehova, e Dios felis, ku ke pa tur famia ta felis. (1 Timoteo 1:11) E ta esun ku a establesé matrimonio. Un matrimonio legal ta esensial pa e felisidat di un famia, pasobra e ta duna tantu e pareha komo e yunan un sintimentu di siguridat. Kristiannan tin ku kumpli ku leinan lokal relashoná ku registrashon di matrimonio.—Lesa Lukas 2:1, 4, 5.

Kon Dios ta mira matrimonio? E ke pa e union entre un hòmber i un muhé ta algu permanente. Yehova ke pa esposo i esposa ta fiel na otro. (Hebreonan 13:4) E ta odia divorsio. (Malakías 2:16) Pero e ta permití un kristian divorsiá i bolbe kasa si su kasá kometé adulterio.—Lesa Mateo 19:3-6, 9.

2. Kon esposo ku esposa mester trata otro?

Yehova a krea hòmber i muhé di tal manera ku nan ta pas ku otro den matrimonio; pues kada un tin ku kumpli ku su papel. (Génesis 2:18) Komo kabes di kas, e esposo ta esun prinsipalmente responsabel pa perkurá pa e nesesidatnan material di su hogar i pa siña su famia tokante Dios. Ademas, amor pa su kasá ta pone ku e mester ta dispuesto pa hasi sakrifisio. Esposo i esposa mester stima otro i respetá otro. Komo ku nan ta imperfekto, nan mester siña pordoná otro si nan ke pa nan matrimonio ta felis.—Lesa Efesionan 4:31, 32; 5:22-25, 33; 1 Pedro 3:7.

3. Bo mester pone fin na un matrimonio ku no ta felis?

Si bo tin problema den bo matrimonio, tantu abo komo bo kasá mester hasi esfuerso pa trata otro ku amor. (1 Korintionan  13:4, 5) E Palabra di Dios no ta rekomendá separashon komo un manera pa solushoná problema ku sa presentá den matrimonio.—Lesa 1 Korintionan 7:10-13.

4. Muchanan, kiko Dios ta deseá pa boso?

Yehova ke pa boso ta felis. P’esei, e ta duna boso e mihó konseho ku boso por haña pa boso por gosa di boso hubentut. Tambe e ta deseá pa boso probechá di e sabiduria i eksperensia di boso mayornan. (Kolosensenan 3:20) Ademas, Yehova ke pa boso sinti e goso di hasi e boluntat di boso Kreador i di su Yu.—Lesa Eklesiástes 11:9–12:1; Mateo 19:13-15; 21:15, 16.

5. Mayornan, kon boso yunan por ta felis?

Boso mester traha duru pa perkurá kuminda, kas i paña pa boso yunan. (1 Timoteo 5:8) Pero pa nan por ta felis, esei so no ta basta. Tambe boso tin ku siña nan stima Dios i imitá su kualidatnan. (Efesionan 6:4) E ehèmpel ku boso ta pone den mustra amor pa Dios por tin un influensia profundo riba kurason di boso yunan. Ora boso instrukshon ta basá riba e Palabra di Dios, esei por tin un efekto positivo riba boso yunan.—Lesa Deuteronomio 6:4-7; Proverbionan 22:6.

Lo bai bon ku boso yunan ora boso ta animá nan i elogiá nan pa e kosnan bon ku nan ta hasi. Tin biaha yunan tin mester di korekshon i disiplina tambe. Asina, nan ta evitá di hasi kosnan ku por kita nan felisidat. (Proverbionan 22:15) Sinembargo, nunka disiplina mester ta demasiado severo òf kruel.—Lesa Kolosensenan 3:21.

Testigunan di Yehova a publiká vários buki spesialmente dirigí na mayornan i yunan. Tur e bukinan akí ta basá riba Beibel.—Lesa Salmo 19:7, 11.