Bai na kontenido

Bai na kontenido

 KAPÍTULO SINKU

Dios Su Regalo di Mas Grandi: E Reskate

Dios Su Regalo di Mas Grandi: E Reskate
  • Kiko ta e reskate?

  • Kon el a ser perkurá?

  • Ki benefisionan bo por haña for di dje?

  • Kon bo por mustra ku bo ta apresi’é?

1, 2. (a) Ki ora un regalo tin gran balor pa bo personalmente? (b) Dikon nos por bisa ku e reskate ta e regalo di mas balioso ku lo bo por a haña?

KUA ta e mihó regalo ku bo a yega di haña? Un regalo no mester ta karu pa e ta importante. De echo, hende no nesesariamente ta determiná e berdadero balor di un regalo a base di kuantu e ta kosta. Mas bien, ora un regalo ta hasi bo felis òf ta satisfasé un berdadero nesesidat den bo bida, e tin gran balor pa bo personalmente.

2 Di e tantísimo regalonan ku bo por spera di haña, tin un ku ta destaká riba tur. E ta un regalo di Dios pa humanidat. Yehova a duna nos hopi kos, pero su regalo di mas grandi na nos ta e sakrifisio di reskate di su Yu, Hesukristu. (Mateo 20:28) Manera nos lo bai mira den e kapítulo aki, e reskate ta e regalo di mas balioso ku lo bo por a haña, pasobra e por trese masha hopi felisidat pa bo i por satisfasé bo nesesidatnan di mas importante. E reskate realmente ta e ekspreshon di mas grandi di Yehova su amor pa bo.

 KIKO TA E RESKATE?

3. Kiko ta e reskate, i kiko nos tin ku komprondé pa nos por apresiá e regalo balioso aki?

3 Simplemente bisá, e reskate ta Yehova su medio pa libra òf salba humanidat for di piká i morto. (Efesionan 1:7) Pa kapta nifikashon di e siñansa bíbliko aki, nos tin ku repasá loke a sosodé den hòfi di Edén. Ta solamente si nos komprondé loke Adam a pèrdè na momentu ku el a peka, nos por apresiá dikon e reskate ta un regalo asina balioso pa nos.

4. Kiko bida humano perfekto a nifiká pa Adam?

4 Ora Yehova a krea Adam, el a dun’é algu realmente presioso: un bida humano perfekto. Pensa un ratu kiko esaki a nifiká pa Adam. Siendo kreá ku un kurpa i mente perfekto, nunka lo el a bira malu, bieu òf muri. Komo un hende perfekto, e tabatin un relashon spesial ku Yehova. Beibel ta bisa ku Adam tabata un “yu hòmber di Dios.” (Lukas 3:⁠38) Pues Adam tabatin un relashon íntimo ku Yehova Dios, meskos ku e relashon di un yu ku un tata amoroso. Yehova a papia ku su yu terenal, i a dun’é trabou for di kua e por a haña satisfakshon i tambe el a laga Adam sa kiko e tabata ferwagt di dje.—Génesis 1:28-30; 2:16, 17.

5. Kiko Beibel ke men ora e ta bisa ku Adam a ser trahá “segun e imágen di Dios”?

5 Adam a ser kreá “segun e imágen di Dios.” (Génesis 1:27) Esei no a nifiká ku Adam su aparensia a parse esun di Dios. Manera nos a siña den Kapítulo 1 di e buki aki, Yehova ta un spiritu invisibel. (Juan 4:24) Pues Yehova no tin un kurpa di karni i sanger. Siendo trahá segun Dios su imágen a nifiká ku Adam a ser kreá ku kualidatnan manera esnan di Dios, entre nan, amor, sabiduria, hustisia i poder. Adam tabata manera su Tata den un otro aspekto importante, e tabatin boluntat liber. Pues anto, Adam no tabata manera un mashin ku por hasi solamente loke  e ta programá pa hasi. Mas bien, e por a tuma desishonnan personal, i skohe entre loke ta bon i loke ta malu. Si el a skohe pa obedesé Dios, lo el a biba pa semper den Paradeis riba tera.

6. Ora Adam a desobedesé Dios, kiko el a pèrdè, i kon esei a afektá su desendientenan?

6 Ta bisto anto ku ora Adam a desobedesé Dios i a keda kondená na morto, el a paga un preis hopi haltu. Su piká a kost’é su bida humano perfekto huntu ku tur su bendishonnan. (Génesis 3:17-19) Lamentablemente, Adam a pèrdè e bida presioso aki no solamente pa su mes sino tambe pa su futuro desendientenan. E Palabra di Dios ta bisa: “Dor di ún hende [Adam] piká a drenta den mundu, i morto dor di piká, i asina morto a pasa pa tur hende, pasobra tur a peka.” (Romanonan 5:12) Sí, nos tur a heredá piká for di Adam. P’esei Beibel ta bisa ku el a ‘bende’ su mes i su desendientenan den sklabitut na piká i morto. (Romanonan 7:14) No tabatin ningun speransa pa Adam ni pa Eva pasobra deliberadamente nan a skohe pa desobedesé Dios. Pero kiko di nan desendientenan, kual ta inkluí nos?

7, 8. Menshoná e dos kosnan ku un reskate básikamente ta enserá.

7 Yehova a sali na yudansa di humanidat pa medio di e reskate. Kiko ta un reskate? E idea di reskate ta enserá básikamente dos kos. Na promé lugá, un reskate ta un preis ku ta ser pagá pa trese liberashon òf pa kumpra algu bèk. Lo por kompar’é ku e preis ku ta paga pa libra un persona sekuestrá. Na di dos lugá, den Beibel un reskate ta e preis ku ta kubri (òf paga) e kosto di algu. E ta meskos ku e preis ku ta ser pagá pa kubri e dañonan kousá dor di un leshon. Por ehèmpel, si un persona kousa un aksidente, lo e tin ku paga un suma ku ta korespondé kompletamente—òf ku ta igual—ku e balor di loke el a daña.

 8 Kon lo ta posibel pa kubri e pèrdida enorme ku Adam a kousa nos tur i libra nos for di sklabitut na piká i morto? Laga nos konsiderá e reskate ku Yehova a perkurá i ki benefisionan abo por haña for di dje.

KON YEHOVA A PERKURÁ E RESKATE

9. Ki klase di reskate tabata nesesario?

9 Siendo ku ta un bida humano perfekto a bai pèrdí, ningun bida humano imperfekto hamas por a paga pa hañ’é bèk. (Salmo 49:7, 8) Loke tabatin mester ta un reskate di mesun balor ku loke a bai pèrdí. Esaki ta na armonia ku e prinsipio di hustisia perfekto ku nos ta haña den e Palabra di Dios, ku ta bisa: “Bida pa bida.” (Deuteronomio 19:21) Pues, kiko lo a kubri e balor di e bida humano perfekto ku Adam a pèrdè? Tabatin mester di un otro bida humano perfekto komo “e preis di reskate” korespondiente.​—1 Timoteo 2:6.

10. Kon Yehova a perkurá e reskate?

10 Kon Yehova a perkurá e reskate? El a manda un di su yunan spiritual perfekto na tera. Pero Yehova no a manda djis kualke kriatura spiritual. El a manda esun di mas stimá, su Yu unigénito. (1 Juan 4:9, 10) Boluntariamente e Yu aki a bandoná su kas selestial. (Filipensenan 2:7) Manera nos a siña den e kapítulo anterior di e buki aki, Yehova a hasi un milager ora ku el a transferí e bida di e Yu aki pa e matris di Maria. Pa medio di Dios su spiritu santu, Hesus a nase komo un hende perfekto i no tabata bou di e kastigu di piká.—Lukas 1:35.

Yehova a duna su Yu unigénito komo un reskate pa nos

11. Kon un hende so por a sirbi komo reskate pa miónes di hende?

11 Pero kon un hende so por a sirbi komo reskate pa hopi, de echo, pa miónes di hende? Wèl pa kuminsá, kon miónes di hende a bira pekadó? Kòrda ku dor di peka, Adam a pèrdè e presioso bida humano perfekto ku e tabata poseé. Pues e no por a pas’é pa su desendientenan. Na  lugá di esei e por a pasa solamente piká i morto pa nan. Hesus, kende Beibel ta yama “e último Adam,” tabatin un bida humano perfekto, i nunka el a peka. (1 Korintionan 15:45) Den un sentido, Hesus a tuma e lugá di Adam pa e por a salba nos. Dor di sakrifiká òf entregá su bida humano perfekto i keda perfektamente obediente na Dios, Hesus a paga e preis pa e piká di Adam. Pues Hesus a trese speransa pa e desendientenan di Adam.​—Romanonan 5:19; 1 Korintionan 15:21, 22.

12. Kiko a keda probá dor di Hesus su sufrimentu?

12 Beibel ta deskribí en detaye e sufrimentu ku Hesus a soportá promé ku su morto. El a haña sota hopi severo, el a ser klabá kruelmente na un palu i a sufri un morto agonisante riba un staka di tormento. (Juan 19:1, 16-18, 30; artíkulo di Apèndiks, “Dikon Kristiannan Berdadero No Ta Usa Krus den Adorashon”) Dikon tabata nesesario pa Hesus sufri asina tantu? Den un kapítulo mas despues den e buki aki, nos lo mira ku Satanas a kuestioná si Yehova lo tin sirbidónan humano ku lo keda fiel bou di prueba. Dor di perseverá fielmente apesar di gran sufrimentu, Hesus a duna e mihó kontesta posibel riba e desafio di Satanas. Hesus a duna prueba ku un hende perfekto ku tin boluntat liber por a mantené integridat perfekto na Dios sin importá kiko Diabel hasi. Yehova lo mester tabata hopi kontentu ku e fieldat di su Yu stimá!—Proverbionan 27:11.

13. Kon e reskate a ser pagá?

13 Kon e reskate a ser pagá? Riba e di 14 dia di e luna hudiu nisan na aña 33 di nos era, Dios a permití hende ehekutá su Yu perfekto i sin piká. Di e manera ei Hesus a sakrifiká su bida humano perfekto “un biaha pa semper.” (Hebreonan 10:10) Riba e di tres dia despues ku Hesus a muri, Yehova a resusit’é na bida komo un persona spiritual. Den shelu, Hesus a presentá na Dios e balor di su bida humano perfekto sakrifiká komo un reskate na fabor  di e desendientenan di Adam. (Hebreonan 9:24) Yehova a aseptá e balor di Hesus su sakrifisio komo e reskate nesesario pa libra humanidat for di sklabitut na piká i morto.—Romanonan 3:23, 24.

KON BO POR BENEFISIÁ DI E RESKATE

14, 15. Pa haña “pordon di [nos] pikánan,” kiko nos tin ku hasi?

14 Apesar di nos kondishon pekaminoso, nos por risibí bendishonnan sumamente balioso dor di e reskate. Laga nos konsiderá algun di e benefisionan tantu aktual komo den futuro di e regalo di mas grandi aki di Dios.

15 Pordon di piká. Dor di imperfekshon heredá, nos tin un berdadero lucha pa hasi loke ta korekto. Nos tur ta peka sea ku palabra òf ku akshon. Pero pa medio di Hesus su sakrifisio di reskate, nos por risibí “pordon di [nos] pikánan.” (Kolosensenan 1:​13, 14) Sin embargo, pa nos haña e pordon ei, nos mester ta realmente arepentí. Tambe nos tin ku roga Yehova humildemente i pidié pordon a base di nos fe den e sakrifisio di reskate di su Yu.—1 Juan 1:8, 9.

16. Kiko ta hasi posibel ku nos por adorá Dios ku un konsenshi limpi, i ki balor un konsenshi limpi tin?

16 Un konsenshi limpi dilanti Dios. Un mal konsenshi fásilmente por hiba na desesperashon i por laga nos sinti ku nos no ta bal nada. Sin embargo, mediante e pordon ku a bira posibel dor di e reskate, Yehova bondadosamente ta duna nos e oportunidat di ador’é ku un konsenshi limpi apesar di nos imperfekshon. (Hebreonan 9:13, 14) Dor di esaki nos por papia ku Yehova ku konfiansa. Pues, nos por aserk’é libremente den orashon. (Hebreonan 4:14-16) Si nos mantené un konsenshi limpi, esei ta duna nos pas mental, e ta promové rèspèt propio i ta kontribuí na felisidat.

17. Ki bendishonnan a bira posibel pasobra Hesus a muri pa nos?

 17 E speransa di bida eterno den un paradeis riba tera. Romanonan 6:23 ta bisa: “E pago di piká ta morto.” E mesun versíkulo ta agregá: “Ma e don di grasia [òf, regalo] di Dios ta bida eterno den Kristu Hesus, nos Señor.” Den Kapítulo 3 di e buki aki, nos a trata e bendishonnan di e binidero Paradeis riba tera. (Revelashon 21:3, 4) Tur e futuro bendishonnan ei, inkluso bida eterno den salú perfekto, a bira posibel pasobra Hesus a muri pa nos. Pa nos risibí e bendishonnan ei, nos tin ku mustra ku nos ta apresiá e regalo di e reskate.

KON BO POR MUSTRA BO APRESIO?

18. Dikon nos mester ta gradisidu na Yehova ku el a duna e reskate?

18 Dikon nos mester ta sumamente gradisidu na Yehova pa e reskate? Wèl, un regalo ta mas presioso ainda ora ku e dunadó mester a sakrifiká su tempu, i hasi hopi esfuerso òf gastu pa duna nos e regalo. Nos ta keda profundamente konmoví ora nos mira ku un regalo ta un ekspreshon di e dunadó su amor sinsero pa nos. Di tur regalo, e reskate ta esun di mas presioso, pasobra Dios a hasi e sakrifisio di mas grandi den historia dor di a dun’é. Juan 3:16 ta bisa:  “Dios a stima mundu asina tantu, ku el a duna su Yu unigénito.” E reskate ta e prueba mas sobresaliente di Yehova su amor pa nos. Tambe e ta prueba di Hesus su amor, pasobra boluntariamente el a entregá su bida na nos fabor. (Juan 15:13) P’esei e regalo di e reskate mester konvensé nos ku Yehova i su Yu ta stima nos komo hende individual.—Galationan 2:20.

Siña mas tokante Yehova ta un manera pa mustra ku bo ta apresiá su regalo di e reskate

19, 20. Den ki maneranan bo por demostrá ku bo ta apresiá Dios su regalo di e reskate?

19 Pero kon abo por demostrá ku bo ta apresiá Dios su regalo di e reskate? Na promé lugá, siña mas tokante e Gran Dunadó, Yehova. (Juan 17:3) Un estudio di Beibel hasiendo uso di e publikashon aki lo yuda bo hasi esei. Segun ku bo konosementu di Yehova ta oumentá, bo amor p’e lo bira mas profundo. Anto na su turno, e amor ei lo duna bo e deseo di agrad’é.—1 Juan 5:3.

20 Demostrá ku bo tin fe òf ta kere den Hesus su sakrifisio di reskate. Hesus mes a bisa: “Esun ku kere den e Yu tin bida eterno.” (Juan 3:36) Kon nos por demostrá ku nos ta kere òf tin fe den Hesus? No djis ku boka so. “Fe sin obranan ta morto,” segun Santiago 2:⁠26. Sí, berdadero fe ta keda probá pa medio di “obranan,” es desir, pa medio di nos akshonnan. Un manera pa demostrá ku nos ta kere òf tin fe den Hesus ta dor di hasi nos bèst pa imit’é no solamente den loke nos ta bisa sino tambe den loke nos ta hasi.—Juan 13:15.

21, 22. (a) Dikon nos mester asistí na e konmemorashon anual di e Sena di Señor? (b) Kiko e Kapítulonan 6 i 7 lo splika?

21 Asistí na e konmemorashon anual di e Sena di Señor. Riba e anochi di 14 di nisan di aña 33, Hesus a introdusí un konmemorashon spesial ku Beibel ta yama “e Sena di Señor.” (1 Korintionan 11:20; Mateo 26:26-28) Esaki ta ser yamá tambe e Memorial (òf, Konmemorashon) di e morto di Kristu. Hesus a instituyé pa yuda su apòstelnan  kòrda—i tambe tur kristian berdadero ku a bin despues di nan—ku pa medio di su morto komo un ser humano perfekto, el a duna su bida komo un reskate. Relashoná ku e konmemorashon aki, Hesus a ordená: “Hasi esaki na mi rekuerdo.” (Lukas 22:19) Tenementu di e Memorial ta rekordá nos di e gran amor ku tantu Yehova komo Hesus a demostrá en konekshon ku e reskate. Nos por mustra nos apresio pa e reskate dor di ta presente na e Konmemorashon anual di e morto di Hesus. *

22 E reskate aki ku Yehova a perkurá ta en bèrdat un regalo sumamente balioso. (2 Korintionan 9:14, 15) E regalo tan presioso aki por benefisiá asta e hendenan ku a muri. E Kapítulonan 67 lo splika kon.

^ par. 21 Pa mas informashon tokante e nifikashon di e Sena di Señor, wak e artíkulo di Apèndiks “E Sena di Señor—Un Konmemorashon Ku Ta Onra Dios.”