Génesis 46:1-34
46 Pues, Israel a kohe tur loke e tabatin* i kuminsá ku su biahe. Ora ku el a yega Berseba,+ el a ofresé sakrifisio na e Dios di su tata, Ísak.+
2 Anto durante anochi, Dios a papia ku Israel den un vishon. Dios a yam’é: “Yákòb, Yákòb!” Israel a kontestá: “Ata mi akí!”
3 Dios a bis’é: “Ami ta e Dios berdadero, e Dios di bo tata.+ No tene miedu di bai Egipto, pasobra einan lo mi laga bo desendientenan bira un nashon grandi.+
4 Mi mes lo bai Egipto ku bo, i mi mes lo trese bo bèk for di einan.+ I Yósef lo sera bo wowo ora bo muri.”*+
5 Despues di esei, Yákòb a sali for di Berseba. E yu hòmbernan di Israel a transportá nan tata, Yákòb, huntu ku nan yunan i nan kasánan den e garoshinan ku Fárao a manda pa transportá Yákòb.
6 Nan a bai ku tur nan tounan di bestia i ku tur nan pertenensianan ku nan a akumulá na Kánan. Pues, Yákòb a yega Egipto ku tur su desendientenan.
7 El a bai Egipto ku su yu hòmbernan, su ñetunan, su yu muhénan i su ñetanan, sí, ku tur su desendientenan.
8 Esakinan ta nòmber di e yu hòmbernan di Israel,+ esta, e yunan di Yákòb, ku a bai Egipto: E yu mayó di Yákòb tabata Ruben.+
9 Ruben tabata tata di Hánòk, Palú, Hèzròn i Karmi.+
10 Símeòn+ tabata tata di Yémuèl, Yamin, Óhad, Yakin, Zóhar i Saul.+ Saul tabata yu di un muhé kananeo.
11 Levi+ tabata tata di Gèrsòn, Kóhat i Merari.+
12 Huda+ tabata tata di Er, Ónan, Sela,+ Péres+ i Zera.+ Er i Ónan a muri na Kánan.+
Péres tabata tata di Hèzròn i Hámul.+
13 Ísakar tabata tata di Tola, Púa, Yòb i Símròn.+
14 Zébulòn+ tabata tata di Séred, Élòn i Yalel.+
15 Eseinan ta e yu hòmbernan di Lea ku el a haña ku Yákòb na Padan-Áram. Su yu muhé Dina+ tambe a nase einan. Na tur, Yákòb ku Lea tabatin 33 desendiente.*
16 Gad+ tabata tata di Zifion, Hagui, Suni, Èsbòn, Eri, Arodi i Areli.+
17 Áser+ tabata tata di Imna, Isúa, Isúi i Berías. Nan tabatin un ruman muhé ku tabata yama Sera.
Berías tabata tata di Héber i Málkiel.+
18 Eseinan ta e yu hòmbernan di Zilpa,+ e kriá ku Lában a duna su yu muhé Lea. Na tur, Yákòb ku Zilpa tabatin 16 desendiente.*
19 Raquel, kasá di Yákòb, a haña dos yu hòmber: Yósef+ i Bènyamin.+
20 Na Egipto, Yósef a bira tata di Mánases+ i Efraím.+ Nan mama tabata Ásenat,+ yu muhé di Potifera, kende tabata saserdote di Òn.*
21 Bènyamin+ tabata tata di Bela, Béker, Ásbel, Gera,+ Náman, Ehi, Ròs, Mupim, Hupim+ i Ard.+
22 Na tur, Yákòb ku Raquel tabatin 14 desendiente.*
23 Dan+ tabata tata di* Husim.+
24 Nèftali+ tabata tata di Yázel, Guni, Yézer i Silèm.+
25 Eseinan ta e yu hòmbernan di Bilha, e kriá ku Lában a duna su yu muhé Raquel. Na tur, Yákòb ku Bilha tabatin 7 desendiente.*
26 Na tur, 66 desendiente* di Yákòb a bai Egipto huntu kuné.+ Esei ta sin konta e esposanan di e yu hòmbernan di Yákòb.
27 Yósef tabatin 2 yu hòmber* ku a nase na Egipto. Na tur, 70 famia* di Yákòb a bai Egipto.+
28 Yákòb a manda Huda+ bai dilanti pa bisa Yósef ku e ta na kaminda pa Gósen. Ora nan a yega Gósen,+
29 Yósef a manda prepará su garoshi, i el a sali bai topa su tata, Israel, na Gósen. Asina ku Yósef a mira Israel, Yósef a bras’é i yora basta ratu.*
30 Israel a bisa Yósef: “Awor mi por muri trankil, pasobra mi a mira bo i mi sa ku bo ta na bida ainda.”
31 Yósef a bisa su ruman hòmbernan i e hendenan di kas di su tata: “Laga mi bai bèk pa mi informá Fárao+ i bis’é: ‘Mi rumannan i e hendenan di kas di mi tata ku tabata na Kánan a bini serka mi.+
32 E hòmbernan ta wardadó di karné,+ i nan ta kria bestia.+ Nan a trese nan tounan i tur loke nan tin.’+
33 Ora Fárao manda yama boso i puntra boso: ‘Ki trabou boso ta hasi?,’
34 boso mester bis’é: ‘Mi señor, for di nos hubentut, nos ta kria bestia, meskos ku nos antepasadonan.’+ Kisas lo e laga boso biba na Gósen,+ pasobra e egipsionan tin masha rabia riba* wardadó di karné.”+
Nota
^ Òf: “a reuní tur e hendenan ku tabata di dje.”
^ Lit.: “lo pone su man riba bo wowonan.”
^ Òf: “Na tur, e almanan di e yu hòmbernan i di e yu muhénan di Yákòb tabata 33.”
^ Òf: “alma.”
^ Esta, Heliópolis.
^ Òf: “alma.”
^ Lit.: “E yu hòmbernan di Dan tabata.”
^ Òf: “alma.”
^ Òf: “66 alma ku tabata desendiente.”
^ Òf: “2 alma.”
^ Òf: “alma.”
^ Òf: “i yora bes tras bes riba su skouder.”
^ Òf: “tin asko di.”
