Promé Reinan 6:1-38
6 Den e di kuater aña di Sálomon su reinado na Israel, esta, den e di 480 aña despues ku e israelitanan* a sali for di Egipto, Sálomon a kuminsá traha tèmpel* di Yehova* den luna di zif* (esta, den e di dos luna).
2 E tèmpel* ku Rei Sálomon a traha pa Yehova tabata 60 kodo* largu, 20 kodo hanchu i 30 kodo haltu.
3 E veranda* dilanti di e lugá Santu* tabata 20 kodo hanchu, mes hanchu ku e tèmpel, i 10 kodo largu.
4 El a traha bentana ku tabata konsistí di kozein di diferente tamaño. Pues, un banda di e bentananan tabata mustra hanchu i e otro banda tabata smal.
5 Ademas, el a traha un edifisio èkstra, pegá na e murayanan di e tèmpel; e edifisio ei a bai rònt di e murayanan* di e tèmpel, esta, e murayanan di e lugá Santu* i e murayanan di e kamber te patras.* E edifisio èkstra tabata konsistí di vários kompartimentu.
6 Kada kompartimentu di e promé piso di e edifisio èkstra tabata sinku kodo hanchu; kada kompartimentu di e piso meimei tabata seis kodo hanchu, i kada kompartimentu di e di tres piso tabata shete kodo hanchu. E murayanan parti paden tabata trahá na un manera ku nan por a karga e balkinan* sin ku mester a bora pa pega e balkinan na e murayanan.
7 Sálomon a laga konstruí e tèmpel ku piedra ku nan a kap na midí pa, durante e konstrukshon, no tabatin zonido di batimentu di martin, di hacha ni di ningun otro hèrmènt di heru.
8 E entrada di e promé piso tabata keda na banda drechi di e tèmpel. Anto tabatin un trapi ku tabata lora bai ariba na e di dos piso i na e di tres piso.
9 Sálomon a sigui traha riba e tèmpel te kab’é. El a traha dak di e tèmpel ku balki i tabla di palu di seda.
10 E edifisio èkstra di tres piso ku el a traha rònt di e tèmpel tabatin vários kompartimentu. Kada un di e pisonan di e edifisio ei tabata sinku kodo haltu. Divishon di e pisonan tabata di palu di seda ku tabata konektá ku e tèmpel.
11 Anto Yehova a manda e siguiente mensahe pa Sálomon:
12 “Si bo biba na armonia ku mi leinan i tene bo mes na mi dekretonan i kumpli ku tur mi mandamentunan, lo mi kumpli ku e promesa ku mi a hasi na bo tata, David, relashoná ku bo, esta, relashoná ku e tèmpel akí ku bo ta trahando.
13 Lo mi biba huntu ku e israelitanan, i lo mi no bandoná mi pueblo Israel.”
14 Sálomon a sigui konstruí e tèmpel i kab’é.
15 El a fura e murayanan di paden ku palu di seda. Sí, el a fura tur e murayanan di paden ku tabla di palu di seda, for di ariba te abou. Anto el a pone flur di palu di yenefer.
16 Te patras den e tèmpel, el a skòt un espasio, i asina el a traha un kamber di 20 kodo ku el a fura, for di ariba te abou, ku palu di seda. E kamber ei tabata e lugá Santísimo.*
17 Anto e lugá Santu,* ku tabata keda enfrente di e lugá Santísimo, tabata 40 kodo largu.
18 Riba e palunan di seda ku nan a usa pa fura parti paden di e tèmpel tabatin figura di fruta manera pampuna* i figura di flor. Paden tabata kompletamente furá ku palu di seda; bo no por a mira niun piedra.
19 Sálomon a prepará e kamber te patras den e tèmpel pa pone e arka di pakto di Yehova den dje.
20 E kamber ei tabata 20 kodo largu, 20 kodo hanchu i 20 kodo haltu. Sálomon a fura e kamber ei kompletamente ku oro puru. Anto el a fura e altar ku palu di seda.
21 Sálomon a fura parti paden di e tèmpel ku oro puru. I dilanti di e kamber te patras, ku tambe tabata furá ku oro, el a span un kadena di oro.
22 Sí, el a fura parti paden di e tèmpel kompletamente ku oro. E altar ku tabata serka di e kamber te patras tambe el a fura kompletamente ku oro.
23 Den e kamber te patras, el a traha dos kerubin di palu di pino. Kada kerubin tabata dies kodo haltu.
24 Kada ala di e promé kerubin tabata sinku kodo. Pues, di un punta di ala pa e otro punta di ala tabata dies kodo.
25 E alanan di e di dos kerubin tambe tabata dies kodo. Pues, e dos kerubinnan tabatin mesun tamaño i mesun forma.
26 Tur dos kerubin tabata dies kodo haltu.
27 Anto Sálomon a pone e dos kerubinnan banda di otro den e kamber te patras.* E alanan di e kerubinnan tabata habrí di manera ku un ala di kada kerubin tabata mishi ku un banda di muraya. Anto nan otro ala tabata topa ku otro nèt meimei di e kamber.
28 Sálomon a fura e kerubinnan ku oro.
29 Anto tur e murayanan parti paden di e tèmpel, esta, e murayanan di e lugá Santísimo i e murayanan di e lugá Santu, el a fura ku palu ku tabatin figura di kerubin, di palma i di flor riba nan.
30 Anto el a kubri flur di e dos kambernan ei di e tèmpel ku oro.
31 Pa e kamber te patras, el a traha un porta di dos blat di palu di pino, kozein (e di sinku parti*) i pilá na kada banda.
32 E dos blatnan di e porta tabata di palu di pino. Sálomon a laga traha figura di kerubin, figura di palma i figura di flor den e blatnan di e porta. Anto el a fura e porta, e kerubinnan i e palmanan ku oro.
33 El a traha kozein di palu di pino pa entrada di e lugá Santu* (e di kuater parti*)
34 i dos porta di palu di yenefer. Kada porta tabata konsistí di dos blat ku skarnir ku a pone e portanan habri di tur dos banda.
35 Sálomon a laga traha figura di kerubin, di palma i di flor den e blatnan di e portanan. Anto el a kubri e figuranan ku un la fini di oro.
36 Pa e plenchi chikitu,* el a laga traha un kurá di tres kareda di piedra, kòrtá na midí, i un rei di balki di palu di seda.
37 Den e di 4 aña, den luna di zif,* nan a pone fundeshi pa tèmpel* di Yehova.
38 I den e di 11 aña, den luna di bul* (esta, e di ocho luna), e tèmpel* a keda kla, den tur detaye i segun plan. Pues, Sálomon a traha e tèmpel den shete aña.
Nota na pia di página
^ Lit.: “e yunan di Israel.”
^ Lit.: “kas.”
^ Wak Ap. B8.
^ Wak Ap. B15.
^ Esaki tabata referí solamente na e lugá Santu i e lugá Santísimo.
^ Un kodo tabata 44,5 cm. Wak Ap. B14.
^ Esta, entrada òf e área parti dilanti di e tèmpel.
^ Lit.: “e tèmpel.”
^ Esta, e tres bandanan.
^ Lit.: “e tèmpel.”
^ Esta, e lugá Santísimo.
^ Òf: “e biganan.”
^ Òf: “e kamber te patras.”
^ Lit.: “e tèmpel.”
^ Posiblemente, e fruta Citrullus colocynthis.
^ Esta, e lugá Santísimo.
^ Posiblemente, esaki tabata referí na e kozein di porta òf na e midínan di e porta.
^ Lit.: “e tèmpel.”
^ Posiblemente, esaki tabata referí na e kozein di porta òf na e midínan di e porta.
^ Esta, plenchi di saserdote.
^ Wak Ap. B15.
^ Lit.: “kas.”
^ Wak Ap. B15.
^ Lit.: “kas.”
