Promé Sámuèl 27:1-12
-
E filisteonan ta duna David Zíklag (1-12)
27 David a bisa den su mes:* ‘Tardi òf trempan, Saul lo mata mi. Ta mihó mi hui bai+ teritorio di e filisteonan ya e ora ei Saul lo fada di sigui buska mi den henter teritorio di Israel.+ Asina lo mi skapa for di su man.’
2 E ora ei, David i e 600 hòmbernan+ ku tabata huntu kuné a kohe kaminda pa bai serka Ákis,+ yu hòmber di Maok i rei di Gat.
3 David i e hòmbernan ku tabata huntu kuné, kada hòmber ku e hendenan di su kas, a bai biba na Gat, serka Ákis. David a bai ku su dos esposanan: Ahínoam+ di Yézrel i Abigail+ di Karmelo, biuda di Nábal.
4 Ora Saul a tende ku David a hui bai Gat, el a stòp di persiguí David.+
5 David a bisa Ákis: “Si mi señor ta haña ta bon, laga mi bai un di e otro statnan den kunuku pa keda biba ayanan. Mi no ta mira pakiko mi shon su sirbidó mester keda biba serka mi shon den e stat real.”
6 E dia ei mes, Ákis a duna David Zíklag.+ P’esei, te dia djawe, Zíklag ta pertenesé na e reinan di Huda.
7 Awor, David a biba un aña i kuater luna den teritorio di e filisteonan.+
8 Durante e periodo ei, vários biaha, e tabata sali ku e hòmbernan ku tabata huntu kuné pa bai ataká e gesuritanan,+ e girzitanan i e amalekitanan.+ E personanan ei tabata biba den e teritorio kuminsando for di Telam bai Shur+ i yega te frontera di Egipto.
9 Kada bes ku David a ataká e teritorionan ei, e no tabata laga ningun hende hòmber ni ningun hende muhé na bida.+ E tabata bai ku nan karnénan, nan toronan, nan bakanan, nan burikunan, nan kamelnan i nan pañanan. Despues, e tabata bai bèk serka Ákis.
10 Semper Ákis tabata puntr’é: “Kua lugá bo a asaltá awe?” David tabata kontest’é: “Mi a bai Huda, parti zùit.”*+ Òf David tabata kontest’é: “Mi a bai parti zùit den teritorio di e yeramelitanan.”+ Òf David tabata bis’é: “Mi a bai parti zùit den teritorio di e keneonan.”+
11 David no tabata spar bida di ningun hende hòmber ni di ningun hende muhé pa niun hende no trese nan Gat. David tabata bisa: “Mester evitá ku nan ta bai papia riba nos i bisa: ‘David a hasi esaki; David a hasi esaya.’” (Anto tur e tempu ku el a biba den teritorio di e filisteonan, e tabatin kustumber di hasi esei.)
12 Ákis tabata kere David. Ákis a pensa: ‘Siguramente, David lo keda mi sirbidó pa semper, pasobra su pueblo Israel lo ta odi’é.’*
