2 Korintionan 13:1-14

13  Ta di tres biaha ku mi ta prepará pa bishitá boso. “Tur asuntu mester keda establesé a base di e testimonio* di dos òf tres testigu.”  Aunke awor mi ta leu for di boso, ta komo si fuera mi ta huntu ku boso pa di dos biaha, i mi ta bolbe spièrta esnan ku a yega di peka i tur e otronan, ku si un dia mi bini atrobe, lo mi no spar esnan ku ta hasi malu.  Asina lo mi demostrá boso ku Kristu realmente ta papia pa medio di mi. Sinembargo, Kristu no ta mustra debilidat ora e ta trata ku boso; al kontrario, e ta obra ku poder.  Sí, ta bèrdat ku ta pa motibu di debilidat* a klab’é na staka, ma pa motibu di e poder di Dios e ta bibu. Ta bèrdat tambe ku nos ta débil huntu kuné, ma nos lo biba huntu kuné pa medio di e poder di Dios ku ta obra den boso.  Sigui saminá boso mes pa sa si boso ta den e fe, sigui pone boso mes na prueba pa demostrá ki tipo di hende boso ta. Òf boso no ta realisá ku Hesukristu ta den union ku boso? Bon mirá, boso lo mester realisá esei, a ménos ku boso a pèrdè e aprobashon di Dios.  Mi ta spera sinseramente ku boso lo rekonosé ku nos sí tin su aprobashon.  Awor, nos ta pidi Dios pa boso no hasi nada malu. Mi ta pidi esaki no pa parse ku ta nos tin aprobashon, sino pasobra mi ke pa boso por hasi loke ta bon, maske por parse ku nos no tin aprobashon.  Pasobra nos no por hasi nada kontra e bèrdat, sino solamente na fabor di e bèrdat.  Sí, semper nos ta alegrá ora boso ta poderoso, maske si na e momento ei nos ta débil; i esaki ta loke nos ta pidi den orashon, esta, pa boso reahustá boso manera di pensa. 10  P’esei mi ta skirbi e kosnan akí miéntras ku mi ta leu for di boso, pa asina ora mi ta huntu ku boso mi no mester usa e outoridat ku Señor a duna mi—pa edifiká hende i no pa kibra nan—na un manera severo. 11  Finalmente, rumannan, sigui alegrá, sigui ser reahustá, sigui aseptá konsuelo, sigui pensa na armonia ku otro, sigui biba na pas; i e Dios di amor i di pas lo ta ku boso. 12  Kumindá otro ku un sunchi santu. 13  Tur e santunan ta manda kumindamentu pa boso. 14  Bondat inmeresí di nos Señor Hesukristu i e amor di Dios i tambe e spiritu santu—ku nos tur huntu ta benefisiá di dje—sea ku boso tur.

Nota na pia di página

Lit.: “boka.”
Òf: “komo ku e tabata hende.”