Sigui pa e contenido

Kico Testigonan di Jehova Ta Kere Aden?

Kico Testigonan di Jehova Ta Kere Aden?

Como testigonan di Jehova, nos ta haci nos esfuerso pa pega na e forma di cristianismo cu Hesus a siña y cu su apostelnan tambe a sigui. E articulo aki ta splica brevemente nos creencianan basico.

  1. Dios. Nos ta adora e unico Dios berdadero, e Haltisimo y Creador di tur cos. Su nomber ta Jehova. (Salmo 83:18; Revelacion 4:11) E ta e Dios di Abraham, Moises y Hesus.—Exodo 3:6; 32:11; Juan 20:17.

  2. Bijbel. Pa nos, Bijbel ta Dios su mensahe pa humanidad. (Juan 17:17; 2 Timoteo 3:16) Loke nos ta kere aden ta basa riba tur loke e 66 bukinan di Bijbel ta contene, cu ta inclui tanto e “Testament Bieu” como e “Testament Nobo.” Profesor Jason D. BeDuhn a skirbi tocante loke testigonan di Jehova ta kere aden bisando cu “henter nan creencia y accionnan ta basa riba Bijbel y nan no ta dicidi adelanta kico lo mester ta para skirbi den dje.” *

    E echo cu nos ta acepta henter Bijbel no kiermen cu nos ta fundamentalista, esta, hende cu ta pega estrictamente na e interpretacion literal di e Scritura. Nos ta reconoce cu algun parti di Bijbel ta skirbi den forma simbolico y cu no mester interpreta esaki literalmente.​—Revelacion 1:1.

  3. Hesus. Nos ta sigui e siñansanan y ehempel di Hesucristo y ta dun’e honor como nos Salbador y Yiu di Dios. (Mateo 20:28; Echonan 5:31) Pues, nos ta cristian. (Echonan 11:26) Sinembargo, pa medio di un estudio di Bijbel nos a haya sa cu Hesus no ta e Dios Todopoderoso y cu Bijbel no ta apoya e doctrina di Trinidad.—Juan 14:28.

  4. E Reino di Dios. Esaki ta un gobierno real cu ta den cielo y no algo den curason di cristiannan. Lo e reemplasa gobierno humano y cumpli cu e proposito cu Dios tin pa Tera. (Daniel 2:44; Mateo 6:9, 10) Esaki lo sosode pronto pasobra segun Bijbel nos ta biba den e “ultimo dianan.”—2 Timoteo 3:1-5; Mateo 24:3-14.

    Hesus ta Rey di e Reino di Dios den cielo. El a cuminsa goberna na aña 1914.—Revelacion 11:15.

  5. Salbacion. Pa medio di e sacrificio di rescate di Hesus nos por ser libra di pica y morto. (Mateo 20:28; Echonan 4:12) Pa beneficia di e sacrificio aki, hende no solamente mester pone fe den Hesus, sino tambe nan mester cambia nan bida y batisa. (Mateo 28:19, 20; Juan 3:16; Echonan 3:19, 20) Y e fe ey nan ta demostr’e cu nan accionnan. (Santiago 2:24, 26) Sinembargo, salbacion no ta algo cu nos merece; nos por hay’e solamente pa medio di “e bondad inmereci di Dios.”—Galationan 2:16, 21.

  6. Cielo. Jehova Dios, Hesucristo y e angelnan fiel ta biba den e region spiritual. * (Salmo 103:19-21; Echonan 7:55) Un cantidad chikito di hende, un total di 144.000, lo ser resucita pa bay yuda den cielo y pa goberna cu Hesus den e Reino.—Daniel 7:27; 2 Timoteo 2:12; Revelacion 5:9, 10; 14:1, 3.

  7. Tera. Dios a crea Tera pa hende por biba pa semper riba dje. (Salmo 104:5; 115:16; Eclesiastes 1:4) Lo e bendiciona hende obediente cu salud perfecto y bida eterno den un paradijs riba Tera.—Salmo 37:11, 34.

  8. Maldad y sufrimento. Bijbel ta splica cu un angel a rebeldia contra Dios. Asina maldad y sufrimento a cuminsa existi. (Juan 8:44) E angel aki, cu despues di e rebeldia a ser yama “Diabel” y “Satanas”, a convence e prome pareha humano pa join e. E consecuencianan pa nan descendientenan tabata desastroso. (Genesis 3:1-6; Romanonan 5:12) Pa por resolve e cuestionnan cu Satanas a lanta, Dios a permiti maldad y sufrimento, pero lo e no permiti esaki pa semper.

  9. Morto. Ora un persona muri, e ta stop di existi. (Salmo 146:4; Eclesiastes 9:5, 10) E mortonan no ta sufri den un fierno di candela.

    Miles di miyones di hende lo bolbe biba ora Dios resucita nan. (Echonan 24:15) Sinembargo, esnan cu lo haya resureccion y cu no kier acepta e normanan di Dios lo ser destrui pa semper y lo no por biba nunca mas.—Revelacion 20:14, 15.

  10. Famia. Manera Dios a establece for di principio, pa nos, matrimonio ta e union entre un homber y un muher. Y e unico motibo valido pa divorcio ta inmoralidad sexual. (Mateo 19:4-9) Nos ta convenci cu e consehonan cu Bijbel ta duna ta yuda haci famianan feliz.—Efesionan 5:22–6:1.

  11. Nos adoracion. Nos no ta adora cruz ni niun otro imagen. (Deuteronomio 4:15-19; 1 Juan 5:21) Nos adoracion ta inclui e siguiente cosnan importante:

  12. Nos organisacion. Nos organisacion ta consisti di varios congregacion. Cada congregacion ta ser supervisa pa un grupo di anciano. Sinembargo, e ancianonan no ta forma parti di un clase di clero ni nan no ta ricibi niun tipo di salario. (Mateo 10:8; 23:8) Nos no ta cobra diesmo ni no ta pasa collect na niun di nos reunionnan. (2 Corintionan 9:7) Tur nos actividadnan ta ser financia pa donacion boluntario y anonimo.

    Un grupo chikito di cristian madura, conoci como Cuerpo Gobernante, ta dirigi e actividadnan di testigonan di Jehova rond mundo for di nos oficina principal.—Mateo 24:45.

  13. Nos union. Rond mundo nos tur tin e mesun creencianan. (1 Corintionan 1:10) Tambe nos ta haci esfuerso pa evita tur tipo di division social, etnico of racial. (Echonan 10:34, 35; Santiago 2:4) Aunke nos ta uni, cada un di nos ta liber pa tuma nos mes decision. Cada Testigo ta uza su consenshi biblicamente entrena pa tuma decision.—Romanonan 14:1-4; Hebreonan 5:14.

  14. Nos conducta. Nos ta purba pa no ta egoista, pero pa semper demostra berdadero amor den tur loke nos ta haci. (Juan 13:34, 35) Nos ta evita cos cu Dios no ta aproba manera mal uzo di sanger cu ta inclui transfusion di sanger. (Echonan 15:28, 29; Galationan 5:19-21) Nos ta pacifico y no ta participa den guera. (Mateo 5:9; Isaias 2:4) Nos ta respeta gobierno di e pais caminda nos ta biba y ta obedece su leynan basta nan no ta bay contra ley di Dios.—Mateo 22:21; Echonan 5:29.

  15. Nos relacion cu otro hende. Hesus a duna e siguiente mandamento: “Stima bo prohimo mescos cu bo mes.” Tambe, el a bisa cu cristiannan “no ta parti di mundo.” (Mateo 22:39; Juan 17:16) Pues, nos ta purba di “haci loke ta bon pa cu tur hende”, pero nos ta keda neutral den asunto politico y ta evita tur laso cu otro religion. (Galationan 6:10; 2 Corintionan 6:14) Pero nos ta respeta e decisionnan cu otro hende ta tuma den e asuntonan aki.—Romanonan 14:12.

Si bo tin mas pregunta tocante Testigonan di Jehova, bo por haya mas informacion riba nos website, y tambe bo por tuma contacto cu un di nos oficinanan, bishita reunion na un Salon di Reino of papia cu un Testigo den bo bisindario.

^ par. 4 Wak e buki Truth in Translation, pagina 165.

^ par. 10 Angel malbado a ser saca for di cielo, aunke nan ta sigui biba den e region spiritual.—Revelacion 12:7-9.