Sigui pa e contenido

Informe di Reunion Anual 2014

100 Aña Cu E Reino Ta Goberna!

Informe di Reunion Anual 2014

Riba 4 di october 2014, tabatin como 19.000 persona cu a reuni hunto pa e di 130 reunion anual di Watch Tower Bible and Tract Society of Pennsylvania. E programa a tuma luga na e Salon di Asamblea di Testigonan di Jehova na Jersey City, Merca, y a ser transmiti pa otro sitionan.

Mark Sanderson, miembro di e Cuerpo Gobernante di testigonan di Jehova, a presidi e reunion. Den su palabra di introduccion, Ruman Sanderson a enfatisa cu e reunion aki tabata historico pasobra a conmemora 100 aña cu a establece e Reino Mesianico den cielo.

Ruman Sanderson a menciona tres cos importante cu e Reino a logra durante su prome 100 añanan di reinado:

  • Un trabou di predicacion mundial. Cu Jehova su bendicion, su pueblo a traha duro pa comparti e bon noticia di e Reino. Na 1914 tabatin un par di mil publicador pero durante e aña di sirbishi 2014 e cantidad a aumenta cu mas cu ocho miyon. Nos lo sigui predica cu celo te ora Jehova bisa cu e trabou a termina.

  • Proteha su ciudadanonan como grupo. Autoridadnan religioso y politico a opone testigonan di Jehova cruelmente. Nan a hasta trata na extermina nos completamente. Sinembargo, Jehova semper a proteha su sirbidornan como grupo. Un cantidad di victorianan legal, incluyendo esunnan di Corte Supremo di Merca y di Corte Europeo di Derechonan Humano, ta confirma cu Jehova ta sigui proteha nos.

  • Uni tur tipo di hende. E Reino di Dios a uni persona di diferente background, nacionalidad y idioma, y ta yuda nan vence tur tipo di problema y forma un grupo uni di adorador. Ruman Sanderson a bisa: “Esaki ta un milager cu ta Jehova Dios so por logra.” El a menciona un bes mas cu esnan den auditorio ta sinti un honor di ta presente na e reunion historico aki.

E Serie Bira Amigo di Jehova.

E siguiente parti di e programa a trata e serie pa mucha cu nos por a disfruta di dje pa dos aña caba. Prome, Ruman Sanderson a introduci un video cu entrevista di muchanan di rond mundo. E muchanan a papia cu frankesa y di curason tocante nan aprecio pa loke nan a siña di e videonan. Esey a conmove esnan presente masha hopi mes.

Despues a pasa un video nobo. E tin como tema “Yehova Lo Duna Bo Kurashi.” E video aki di 12 minuut a duna bida na e relato di Bijbel tocante e mucha muher Israelita cu a papia yen di curashi cu Naaman tocante Jehova. (2 Reynan 5:​1-​14) E video a subi jw.org dialuna, 6 di october 2014, y ta disponibel na mas cu 20 idioma.

JW Language.

Ruman Sanderson a anuncia e app nobo aki pa telefon, tablet y computer, diseña pa yuda testigonan di Jehova cu kier siña un otro idioma pa asina expande nan trabou di predica. E app aki ta inclui mas cu 4.000 palabra y frase den 18 idioma. Lo bay agrega mas palabra, frase, presentacion pa sirbishi y otro funcionnan.

JW Broadcasting.

Esnan presente a keda encanta di tende cu testigonan di Jehova lo sponsor un stacion di television nobo via internet. E tabata un test cu a sali solamente na Ingles. Desde e sede mundial na Brooklyn, New York, Merca, e stacion lo transmiti video, musica y lesamento dramatisa di Bijbel. Ademas, cada luna lo tin un programa cu ta ser presenta pa un miembro di Cuerpo Gobernante of un ayudante di un di e comitenan.

Ruman Sanderson a introduci un preview di e prome programa. Ruman Lett a presenta e programa aki cu a inclui un bista di loke a sosode tras di cortina mientras tabata prepara e stacion di television nobo aki. JW Broadcasting a bira disponibel riba 6 di october 2014, y por wak e via tv.jw.org.

“E Reino Ya Tin 100 Aña Ta Goberna y Lo E Sigui Goberna.”

Samuel Herd di e Cuerpo Gobernante a nara un video cu a splica con progresivamente e Reino di Dios a yuda nos crece y mehora nos sirbishi. Nan a combina filmacionnan bieu, reconstrui experencia y relata experencia di Testigonan cu tin hopi aña sirbiendo Jehova. E video a enfatisa e iniciativa cu testigonan di Jehova a tuma pa produci e “Foto-Drama di Creacion” y con hopi e rumannan a uz’e. Nan a mustra con e rumannan tabata uza tocadisco, carchi di testimonio, canamento cu pancarta, auto cu loudspeaker y tambe e scolnan pa train nos pa predica.

Ki beneficio nos por haya ora nos reflexiona riba tur loke e Reino a logra den e 100 añanan? Wel, e Reino ta bira mas real pa nos y nos ta bira mas ansioso pa mira kico e lo logra den futuro.

Cantica pa Alaba Jehova.

Tur esnan presente a keda masha contento ora cu Ruman David Splane di e Cuerpo Gobernante a anuncia cu tin plan pa revisa e buki di cantica Kanta pa Yehova. Musica y cantamento tin un luga importante den nos adoracion, pesey e buki lo ser traha cu mesun material di kaft y rand di silver manera e New World Translation.

Ruman Splane a anuncia tambe cu lo pone mas cantica acerca den e buki aki. Sinembargo, nos no mester warda te ora nan imprimi e buki di cantica revisa aki pa cuminsa uz’e. Lo publica nan riba jw.org asina cu nan bira disponibel.

Durante siman e famia di Betel a train tres di e canticanan nobo cu a ser canta na e reunion anual. Ruman Splane a dirigi e coro cu a canta e cantica nobo “E Reino A Cuminsa Goberna​—Lag’e Bin.” E cantica aki a ser componi specialmente pa celebra e di 100 aña cu e Reino a ser estableci. Despues cu e coro a canta e cantica, esnan presente a canta hunto cu nan. Mas den e programa, e coro y esnan presente a canta un otro cantica nobo cu tin e titulo “Duna Nos Hopi Curashi.”

Entrevista.

Den un entrevista graba anteriormente, Ruman Gerrit Lösch a combersa cu tres pareha cu tin decadanan ta sirbi na Betel. Nan a relata un par di cambio cu nan a mira a traves di añanan, y a pone enfasis riba e echo cu Dios su pueblo no ta para keto. Ruman Lösch a comenta cu Bijbel a predeci mehoracion den e structura di e organisacion, y el a urgi tur hende pa sigui move hunto cu Jehova su organisacion.​—Isaias 60:17.

“Tipo y Antitipo.”

Ruman Splane a splica den e discurso aki dicon ultimo tempo nos publicacionnan no ta papia mucho mas di tipo y antitipo.

Antes, nos publicacionnan a bisa cu homber- y muhernan fiel menciona den Bijbel ta representa grupo di cristiannan fiel den nos tempo. Tambe nos a pensa cu algun relato di Bijbel tabata ehempelnan profetico di sucesonan relaciona cu sirbidornan di Dios awe. Nos tin cu admiti cu ta hopi interesante pa studia e comparacionnan aki. Pesey, dicon anto nos publicacionnan recien no ta papia mucho mas di tipo y antitipo?

Bijbel ta indica cu algun personahe y suceso ta representa un hende of algo mas grandi. Ora Bijbel ta mustra bon cla e relacion entre un tipo y antitipo, nos ta acepta esey. Ruman Splane a bisa : “Pero si Bijbel no ta bisa nada, nos tampoco no ta bisa nada.” Nos mester evita di busca nificacion tras di cada cos cu nos lesa. Ademas, si nos haya nos mes ta tuma mucho tempo ta busca tur detaye di tipo y antitipo, nos por perde for di bista e les practico cu relatonan di Bijbel por siña nos, sea cu nos tin speransa pa biba den cielo of riba Tera.​—Romanonan 15:4. *

“Abo Lo ‘Keda Vigila’?”

Den e discurso aki Ruman Lett a papia tocante un comprondemento nobo di e ilustracion cu Hesus a duna tocante e dies birgennan. (Mateo 25:​1-​13) Awor nos ta compronde e ilustracion asin’aki: E bruidegom ta Hesus y e birgennan ta e siguidornan ungi di Hesus. (Lucas 5:​34, 35; 2 Corintionan11:2) E ilustracion tin su cumplimento den e ultimo dianan y su parti culminante lo tuma luga durante e tribulacion grandi. Ora Hesus a papia di e cinco birgennan bobo, e no tabata kiermen cu hopi sirbidor ungi lo ta infiel y mester ser reemplasa. Mas bien, e tabata duna un advertencia importante. Cada ruman ungi tin dos opcion pa scoge: Prepara y keda vigila manera e cinco birgennan prudente, of bira desleal manera e cinco birgennan bobo.

Na harmonia cu loke a ser splica den e discurso di Ruman Lett, no ta sabi pa bay busca tur nificacion di delaster un detaye di e ilustracion aki. Ta mihor pa concentra riba e lesnan practico cu nos por saca di esaki. Sea cu nos ta ungi of “otro carne,” nos tur tin e responsabilidad di laga nos luz briya cla y “keda vigila.” (Juan 10:16; Marco 13:37; Mateo 5:16) Niun hende por ta fiel pa nos. Cada un di nos mester “scoge bida” door di keda alerta spiritualmente y activo den sirbishi.​—Deuteronomio 30:19.

“E Ilustracion di e Talentonan.”

Ruman Anthony Morris a presenta su discurso cu un splicacion nobo di e ilustracion tocante e talentonan. (Mateo 25:14-​30) Awor nos ta compronde cu e doño den e ilustracion aki (Hesus) lo recompensa e esclavonan (su fiel siguidornan ungi riba Tera) den futuro ora e yega y duna nan bida den cielo. Ora el a papia di loke lo sosode cu e “esclavo floho y malbado,” Hesus no tabata kiermen cu hopi ungi lo bira infiel. Mas bien, e tabata duna un advertencia pa nan ta diligente y evita e actitud y accionnan di e esclavo malbado.

Ki lesnan practico nos por saca di e ilustracion aki? E doño den e ilustracion a encarga e esclavonan cu algo di gran balor. Asina tambe, Hesus a encarga su siguidornan cu algo cu e ta mira como precioso, esta, e trabou di predica y haci discipel. E ta spera for di cada un di nos cu nos ta participa diligentemente den e trabou di predica di acuerdo cu nos circunstancia. Ruman Morris a elogia tur esnan presente pa e celo cu nan ta demostra den actividadnan relaciona cu e Reino.

“Ken Lo Ataca e Pueblo di Dios Pronto?”

E tema aki a lanta curiosidad di tur esnan presente. Ruman Geoffrey Jackson di e Cuerpo Gobernante a splica tocante e futuro atake cu Gog di Magog lo lansa contra Dios su pueblo.​—Ezekiel 38:14-​23.

Den pasado nos tabata kere cu Gog tabata un otro nomber pa Satanas e Diabel despues cu el a wordo saca for di cielo. Sinembargo, Ruman Jackson a analisa varios pregunta importante cu a surgi cu e splicacion ey. Por ehempel, Jehova a predeci cu ora Gog ser derota, Jehova lo duna Gog “como cuminda na tur sorto di parha [cu ta jaag] y na bestia di mondi.” (Ezekiel 39:4) Jehova a predeci tambe cu e lo duna “Gog ... hunto cu henter su multitud” un luga pa dera nan riba Tera. (Ezekiel 39:11) Pero con ta posibel cu e cosnan ey por sosode cu un criatura spiritual? Lo tira Satanas den abismo pa mil aña, nada lo com’e ni lo der’e. (Revelacion 20:​1, 2) Ademas, na fin di mil aña, lo los Satanas di e abismo y “lo e sali bay pa gaña e nacionnan na e cuater skinanan di tera, Gog y Magog.” (Revelacion 20:7, 8) Ta bisto anto cu Satanas no por gaña Gog si e mes ta Gog.

Ruman Jackson a splica cu den e profecia di Ezekiel, Gog di Magog mester representa, no Satanas, sino un coalicion di nacion cu lo ataca e pueblo di Dios den futuro. Probablemente e atake di Gog ta e mesun atake di “e rey di Noord” y “e reynan di Tera”.​—Daniel 11:40, 44, 45; Revelacion 17:12-14; 19:19.

Na ken “e rey di Noord” ta referi? Nos mester warda pa haya sa. En todo caso, nos fe ta bira mas fuerte segun cu nos ta mira con nos comprondemento tocante futuro ta ser refina segun cu su cumplimento ta yega cerca. Dios su pueblo no tin miedo di e atake di Gog di Magog, pasobra ora e cuminsa cu su atake, nos sa cu e lo ser derota y destrui completamente, pero Dios su pueblo si lo keda pa semper. *

Conclusion.

Ruman Sanderson a anuncia cu e New World Translation ta disponibel awor na tamaño chikito. Tambe el a menciona cu a cuminsa prepara grabacion di Bijbel lesa. Lo uza diferente stem pa cada personahe biblico. Tiki tiki e grabacionnan aki lo ta disponibel riba jw.org cuminsando cu e buki di Mateo.

Ruman Sanderson a anuncia cu nos texto di aña pa 2015 ta Salmo 106:1 (NW): “Gradici Jehova, pasobra e ta bon.” El a anima tur esnan presente pa tur dia busca motibonan pa duna gradicimento na Jehova.

E cantica di conclusion tabata e di tres cantica nobo cu tin e titulo “Bo Nomber Ta Jehova.” Tur shete miembro di e Cuerpo Gobernante a canta e bunita cantica aki hunto cu e coro y tur esnan presente. Un final remarcabel pa un reunion historico.

^ par. 22 E discurso aki hunto cu e dosnan cu a sigui ta basa riba e articulonan cu lo aparece den e edicion di E Toren di Vigilancia di 15 di maart 2015.

^ par. 30 E discurso aki ta basa riba un articulo cu lo aparece den e edicion di E Toren di Vigilancia di 15 di mei 2015.