Sigui pa e contenido

Sigui pa e index

 TOPICO PRINCIPAL

Siña Conoce Testigonan di Jehova

Siña Conoce Testigonan di Jehova

“Mi conoce Mike pa hopi tempo caba. E ta un testigo di Jehova. Pero mi tabata haya su religion straño si. Ken Jehova ta? Pakico e Testigonan no ta celebra dianan di fiesta? Acaso Mike tabata den un secta?”—Becky, California, Merca.

“Ora un di mi bisiñanan a cuminsa studia Bijbel cu testigonan di Jehova, mi a puntra mi mes: Dicon nan ta yama nan mes testigonan di Jehova? Esey si ta un nomber straño pa un religion.”—Zenon, Ontario, Canada.

“Ami cu mi esposa tabata pensa cu e testigonan di Jehova ta bishita nos djis pa pone nos sinti culpabel pa e echo cu nos no ta bay misa. Y nos tabata sinti cu si e religionnan conoci no tin loke nos ta buscando, ki mishi un secta straño manera testigo di Jehova duna nos loke nos ta buscando.”—Kent, Washington, Merca.

“Francamente mi no tabata sa ken nan ta ni kico nan creencia ta.”—Cecilie, Esbjerg, Dinamarca.

Probablemente bo a mira nan ta predica di cas pa cas of na luganan publico pa ofrece literatura biblico y curso di Bijbel. Kisas bo a haya e revista aki for di un testigo di Jehova. Y podise bo ta pensa mescos cu un di e personanan cu nos a caba di menciona y ta puntra bo mes: Ken testigonan di Jehova realmente ta?

Si acaso bo tin e tipo di pregunta- of pensamentonan aki, cerca ken bo por bay pa haya contesta? Con bo por haya sa kico testigonan di Jehova realmente ta kere? Ademas, con nan ta cubri e gastonan di e obra di predica y di nan luganan di adoracion? Y pakico nan ta bishita bo na bo cas y acerca bo na luganan publico?

Cecilie cu nos a menciona caba, a bisa: “Mi a lesa hopi tocante testigonan di Jehova riba internet. Tambe mi a tende algun rumor y a scucha hopi cos malo di testigonan di Jehova for di hende cu tin prehuicio. Pesey mi a cuminsa pensa malo di testigonan di Jehova.” Pero despues cu Cecilie a papia personalmente cu testigonan di Jehova, el a haya contesta satisfactorio pa su preguntanan.

Abo kier haya contesta for di un fuente confiabel pa e preguntanan cu bo tin tocante testigonan di Jehova? Nos ta anima bo pa puntra esnan cu a publica e revista aki, esta, testigonan di Jehova. Dicon? Pasobra esnan cu sa mas hopi tocante testigonan di Jehova ta nan mes. (Proverbionan 14:15) Nos ta spera cu e siguiente articulonan lo yuda bo haya sa ken nos ta, kico nos creencia ta y tambe pakico nos ta predica.