Sigui pa e contenido

Sigui pa e index

Kico Nos Por Siña for di e Ehempel di Juana?

Kico Nos Por Siña for di e Ehempel di Juana?

CASI tur hende sa cu Hesus tabatin 12 apostel. Pero loke no ta dje conoci ey ta cu entre e discipelnan di Hesus tabatin varios hende muher cu tabatin un bon amistad cu ne. Un di nan tabata Juana.—Mat. 27:55; Luc. 8:3.

Con Juana a yuda Hesus, y kico nos por siña for di su ehempel?

KEN JUANA TABATA?

Juana tabata “esposa di Cuzas, kende tabata na encargo di e cas di Herodes.” Juana tabata entre e muhernan cu Hesus a cura y cu a compaña Hesus cu e apostelnan segun cu nan tabata bay di stad pa stad.—Luc. 8:1-3.

Rabinan hudiu a siña e pueblo cu hende homber mester a papia menos posibel cu hende muher y cu hende muher no tabatin mag di pasa tempo cu hende homber cu no tabata nan famia, mucho menos biaha cu nan. Pero Hesus no a sigui e tradicionnan ey. Pesey, el a permiti Juana y otro hende muher cu a pone fe den dje compaña su grupo.

Juana a core riesgo cu hende rond di dje lo a critic’e pasobra e tabata anda cu Hesus y su apostelnan. Tur hende cu a compaña Hesus mester tabata dispuesto pa haci sacrificio y ahuste, y esey a conta pa Juana tambe. Hesus a aprecia e actitud ey asina tanto cu el a bisa: “Mi mama y mi rumannan ta esnan aki cu ta tende e palabra di Dios y cumpli cu ne.” (Luc. 8:19-21; 18:28-30) Ta un gran animacion pa sa cu Hesus ta sintie asina pega cu hende cu ta haci sacrificio pa por siguie, no ta berdad?

EL A UZA SU PERTENENCIANAN PA SIRBI HESUS

Juana y hopi otro hende muher a “uza nan pertenencianan” pa sirbi Hesus y su 12 apostelnan. (Luc. 8:3) Segun un escritor: “Lucas no ta bisando su lectornan cu ta e hende muhernan tabata cushina, laba coy kibra y drecha paña kibra. Podise nan a haci e cosnan ey ..., pero Lucas no tabata papia di esey.” Mas bien ta parce cu e muhernan a uza nan placa, pertenencianan y propiedadnan pa percura pa e necesidadnan di Hesus y e apostelnan.

Como cu ni Hesus ni su apostelnan no tabata traha durante nan giranan di predicacion, nan no tabatin moda di cumpra cuminda y otro cosnan pa nan grupo, cu kisas a consisti di un 20 hende. Aunke hende aparentemente tabata ricibi nan hospitalariamente, e echo cu nan a cana cu un “caha di placa” a indica cu nan no tabata depende tur ora di hospitalidad. (Juan 12:6; 13:28, 29) Kisas Juana y e otro muhernan a duna contribucion pa cubri e gastonan.

Tin hende ta duda cu muhernan Hudiu lo por tabatin nan mes placa y propiedad. Pero,  manuscritonan Hudiu di e tempo ey ta indica cu tabatin varios manera cu un muher Hudiu por a yega na e recursonan ey. Por ehempel: (1) un herencia di su tata cu a muri sin laga yiu homber, (2) propiedad cu un hende a dun’e, (3) placa (stipula den un contract di matrimonio) cu e tin derecho riba dje den caso di divorcio, (4) placa of propiedad cu su difunto esposo a laga p’e of (5) entrada cu e mes a traha p’e.

Sin duda, e siguidornan di Hesus a contribui cu loke nan tabata por. Entre esnan cu a compañ’e por tabatin hende muher rico. Como cu Juana tabata casa cu e homber encarga cu e cas di Herodes, tin hende ta pensa cu e tabata bon para. Kisas ta un hende asina a duna Hesus e paña di abou caro sin nat cu e tabata bisti. (Juan 19:23, 24) Un comentarista riba e tema a comenta cu “casa di un piscador lo no por a paga” un paña asina.

Bijbel no ta bisa specificamente cu Juana a contribui cu placa. Pero nos por tin sigur cu el a haci loke e tabata por, y esaki ta siña nos un les importante. Cada un di nos sa kico nos por y kico nos no por contribui pa promove interesnan di Reino. Pero loke ta importante pa Dios ta cu nos ta haci loke nos por y cu nos ta haci esey cu alegria.—Mat. 6:33; Mar. 14:8; 2 Cor. 9:7.

JUANA TABATA LEAL NA HESUS

Aparentemente, Juana a presencia e ehecucion y morto di Hesus hunto cu otro hende muher cu “a compaña Hesus y [cu a] sirbie tempo cu e tabata na Galilea, y [tambe] hopi otro muher mas cu a subi bin Jerusalem hunto cu [Hesus].” (Mar. 15:41) Ora nan a baha e curpa di Hesus for di staca pa der’e, “e muhernan cu a bin hunto cu ne for di Galilea tambe a bay, y nan a wak e graf y a mira e manera cu nan a pone su curpa. Despues nan a bay bek pa prepara yerba di holo dushi y azeta perfuma.” Segun Lucas, e muhernan aki tabata “Maria Magdalena, Juana y Maria, mama di Santiago.” Nan a bay bek na e graf e dia despues di sabbat y ey nan a topa algun angel cu a bisa nan cu Hesus a resucita.—Luc. 23:55–24:10.

Juana y otro hende muher creyente a haci loke nan tabata por pa Hesus

Podise Juana tabata entre e discipelnan cu a reuni na Jerusalem na Pentecoste di aña 33 cu a inclui tambe e mama y rumannan di Hesus. (Echo. 1:12-14) Ademas, como cu Juana su esposo a traha pa Herodes Antipas, Juana talbes tabata esun cu a duna Lucas detayenan specifico tocante Herodes, specialmente en bista cu Lucas ta e unico escritor di Evangelio cu ta menciona Juana pa nomber.—Luc. 8:3; 9:7-9; 23:8-12; 24:10.

E relato di e señora aki ta siña nos algun les valioso. El a sirbi Hesus lo mihor cu e tabata por. Lo e mester a sintie hopi feliz si e fondonan cu el a contribui a yuda cu Hesus, e 12 apostelnan y e otro discipelnan por a haci nan giranan di predicacion. Juana a keda leal na Hesus a pesar di tur e dificultadnan cu Hesus y su compañeronan a pasa aden. E ta un bon ehempel pa muhernan cristian di awendia imita, ya cu el a sirbi Jehova cu henter su alma.