Sigui pa e contenido

Sigui pa e index

Un Punto di Bista Corecto di Nos Fayonan

Un Punto di Bista Corecto di Nos Fayonan

Don cu Margaret * a keda masha contento cu e bishita di nan yiu muher cu su famia. Pa e ultimo dia di nan bishita, Margaret, kende tabata un coki profesional cu a baha cu pensioen, a prepara macaroni cu keshi, un di e platonan faborito di su dos nietonan.

Despues cu tur hende tabata na mesa, Margaret a trece e plato principal y a pon’e riba mesa. Ora el a kita e tapa di e wea, pa su sorpresa, ta saus di keshi so tabatin den e wea. El a lubida di agrega e ingrediente principal, esta, macaroni. *

Nos tur, sin importa nos edad of experencia, ta haci fout. Kisas nos a papia algo sin pensa of a haci algo bon pero na e momento robes of kisas nos a lubida algo. Dicon nos ta haci fout? Kico nos por haci ora nos faya? Nos por evita fayo? Loke por yuda nos contesta e preguntanan aki ta ora nos tin un punto di bista corecto di nos fayonan.

CON NOS TA MIRA FAYO Y CON DIOS TA MIRA NAN

Ora nos haci algo bon, gustosamente nos ta acepta e elogio y reconocemento cu nos ta pensa cu nos merece. Ora nos comete un fayo, hasta si nos no por a yuda of si hende no a ripar’e, nos ta acepta cu nos a faya? Wel, nos mester ta humilde pa haci esey.

Si nos ta kere cu nos ta masha cos, kisas nos ta purba di hustifica nos fout, tira falta riba otro hende of hasta nenga cu nos a faya. Esey hopi biaha ta trece su consecuencianan. E problema no ta haya solucion y otro hende ta haya falta inhustamente. Hasta si aworaki nos logra scapa di e consecuencianan, nos mester tene na mente cu al final, “cada un di nos lo duna cuenta y rason na Dios pa nos accionnan.”—Romanonan 14:12.

Dios tin un punto di bista realistico di nos fayonan. E buki di Salmo ta bisa cu Dios ta “yen di compasion y gracia” y “e lo no reprende pa semper, ni keda rabia pa semper.” E sa cu nos ta imperfecto y ta compronde nos debilidadnan, y e ta “corda cu ta stof nos ta.”—Salmo 103:8, 9, 14.

Ademas, mescos cu un tata yen di misericordia, Dios kier pa nos, su yiunan, mira nos fayonan manera e ta mira nan. (Salmo 130:3) Su Palabra ta duna nos hopi conseho pa yuda nos trata cu nos mes fayonan of cu fayo di otro hende.

LOKE NOS POR HACI ORA NOS FAYA

Ora hende faya, hopi biaha nan ta gasta hopi tempo y energia na culpa otro hende of hustifica loke nan a bisa of haci. En bes di esey, ora bo hurt un hende cu loke bo a bisa, ta mihor bo djis pidi despensa, drecha e asunto y asina mantene bo amistad cu e persona. Bo a haci algo robes cu a perhudica bo mes of otro hende? En bes di rabia cu bo mes of acusa otro hende, purba di drecha e asunto. Si bo keda insisti cu ta otro hende tin falta, esey lo trece mas tension y e problema lo bira  pio. Mas bien, siña di bo fout, corigi esey y sigui padilanti.

Di otro banda, ora un otro hende haci un fout, ta masha facil pa nos reacciona na un manera cu ta mustra cu nos no a keda contento. Ta mucho mas mihor pa nos sigui e conseho di Hesucristo, kende a bisa: “Tur loke boso kier pa hende haci cu boso, boso tambe mester haci cu nan.” (Mateo 7:12) Ora bo comete un fayo, pa chikito cu e por parce, sin duda lo bo kier pa otro hende tin compasion cu bo of hasta pasa por halto di bo fayo. Pues pakico no haci esfuerso pa mustra e mesun bondad ey na otro hende?—Efesionan 4:32.

PRINCIPIONAN CU POR YUDA BO COMETE MENOS FAYO

Segun un diccionario, nos ta haci fout pasobra “nos a yega na un conclusion robes, nos falta informacion of nos no a presta bon atencion.” Nos tin cu admiti cu na dado momento, nos tur ta faya pa un of mas di e motibonan ey. Sinembargo, ora nos analisa algun principio fundamental di e Scritura, nos lo comete menos fayo.

Nos ta haya un di e principionan ey na Proverbionan 18:13, cu ta bisa: “Esun cu responde prome cu e scucha, esey ta bobedad y berguensa p’e.” Pues si bo tuma un rato mas pa scucha e detayenan y pensa kico lo bo responde, esey lo evita cu bo ta bisa algo sin pensa of reacciona na un manera impulsivo. E informacion cu bo ta haya ora bo presta bon atencion ta masha importante pa yuda bo evita di yega na un conclusion robes, y asina bo ta evita di comete un fayo.

Un otro principio di Bijbel ta bisa: “Si ta posibel, te asina leu cu ta depende di boso, keda na paz cu tur hende.” (Romanonan 12:18) Pues haci bo esfuerso pa promove paz y union. Ora bo ta traha cu otro hende, mustra consideracion y respet y haci esfuerso pa elogia y anima nan. Den un ambiente asina, ta mas facil pa pasa por halto di palabranan papia sin pensa of accionnan descabeya. Y hasta e fayonan mas grave por ser resolvi na un manera amigabel.

Ademas, purba di siña for di e fayonan cu bo a comete. En bes di busca excuus pa loke bo a bisa of haci, mira esaki como un oportunidad pa desaroya bon cualidadnan. Kisas bo mester mustra mas pasenshi, bondad of dominio propio? Y kico di suavidad, paz y amor? (Galationan 5:22, 23) Por lo menos, bo por siña kico bo no mester haci e siguiente biaha. Anto no tuma bo mes mucho na serio, pero tampoco bo no mester ta iresponsabel. Un sentido di humor sigur por yuda alivia tension.

E BENEFICIONAN DI TIN UN PUNTO DI BISTA CORECTO

Ora nos tin un punto di bista corecto di nos fayonan, nos por reacciona na un manera positivo ora nan sosode. Nos lo ta na paz cu nos mes y cu otro hende. Si nos haci nos best pa siña di nos fayonan, nos lo bira mas sabi y nos lo ta hendenan mas agradabel. Nos lo no bira demasiado tristo ni pensa malo di nos mes. Ora nos ta compronde cu otro hende tambe ta lucha cu nan fayonan, nos lo bira mas pega cu nan. Mas importante ainda, ora nos siña imita Dios su amor y ta dispuesto pa pordona libremente mescos cu ne, esey lo ta bon pa nos mes.—Colosensenan 3:13.

E fayo di Margaret, menciona na comienso, a daña e ocasion di e famia? Di ningun manera. Tur hende a haya esey pret, vooral Margaret, y nan a disfruta di e cuminda sin macaroni. Añanan despues, e dos nietonan di Margaret a conta nan yiunan di e suceso ey y a corda e grato recuerdonan cu nan tabatin di nan welonan. Al fin y al cabo, tabata djis un fayo.

^ par. 2 A cambia e nombernan.

^ par. 3 Macaroni cu keshi ta un plato cu ta consisti principalmente di macaroni cu saus di keshi riba dje.