Sigui pa e contenido

Sigui pa e index

Ki Apariencia Hesus Tabatin?

Ki Apariencia Hesus Tabatin?

Niun hende no tin potret di Hesus. Nunca nan no a pinta un plachi of traha un escultura di dje. Pero toch, a traves di siglonan el a sali den diferente obra di arte.

Ta claro cu e artistanan di e obranan ey no tabata sa ki apariencia Hesus tabatin. Ta e cultura di e epoca, e estilo di e artista of e smaak di e clientenan tabata determina con nan a pinta Hesus. Na su turno, nan pintura- y esculturanan por influencia e manera cu hende ta mira Hesus y su siñansanan.

Algun artista a pinta Hesus comosifuera e tabata un homber zwak cu cabey largo y cu un barba fini of nan a yega di pint’e cu cara tristo. Den otro obranan, Hesus ta parce un hende sobrehumano, cu un krans di luz of halo riba su cabes of un hende cu no ta interesa den otro hende. E obranan aki ta duna nos un bon idea con Hesus su apariencia tabata? Con nos por haya sa esey? Un manera cu nos por haya sa ta di analisa algun texto di Bijbel cu por yuda nos compronde ki apariencia Hesus tabatin. Ademas, nan lo yuda nos tin un punto di bista corecto di Hesus.

“BO A PREPARA UN CURPA PA MI”

Ora Hesus a batisa, el a bisa e palabranan ey den un oracion. (Hebreonan 10:5; Mateo 3:13-17) Con e curpa aki tabata? Un 30 aña prome, angel Gabriel a bisa Maria: “Lo bo sali na estado y duna luz na un yiu homber, ... [e] Yiu di Dios.” (Lucas 1:31, 35) Pues, Hesus tabata un homber perfecto, mescos cu Adam tabata ora Dios a cre’ele. (Lucas 3:38; 1 Corintionan 15:45) Hesus mester tabata un homber nechi, y muy probablemente e tabata parce su mama, Maria.

Na contraste cu e Romanonan, Hesus tabatin un barba pasobra esey tabata e custumber di e Hudiunan. E barba aki tabata un simbolo di dignidad y respet y no tabata largo ni slordig. Sin duda Hesus tabatin su barba y cabey nechi corta. Solamente e Israelitanan cu tabata Nazareo, manera Samson, no tabata corta nan cabey.—Numbernan 6:5; Huesnan 13:5.

Pa un gran parti di Hesus su 33 añanan di bida riba Tera el a traha como carpinte, y e no tabatin hermentnan moderno. (Marco 6:3) Pa e motibo aki, e mester tabata un homber fuerte. Por ehempel, na cuminsamento di su sirbishi, sin yudansa di niun hende, el “a core cu e carnenan y cu e bacanan for di tempel, hunto cu esnan cu tabata bende nan, y el a basha e monedanan di e cambiadonan di placa abou y bolter nan mesanan.” (Juan 2:14-17) Ta un homber cu hopi forsa so por haci algo asina. Pues Hesus a uza e curpa cu Dios a dun’e pa cumpli cu e asignacion cu Dios a dun’e. Hesus a bisa: “Mi tin cu declara e bon noticia di e Reino di Dios na e otro stadnan tambe, pasobra ta pa esaki Dios a manda mi.” (Lucas 4:43) Pa e por a logra esey, e mester tabatin hopi energia y resistencia pa cana na pia den Palestina pa declara e mensahe aki.

“BIN CERCA MI, ... Y LO MI REFRESCA BOSO”

Hesus su cara amabel y e manera bon cu e tabata trata hende lo mester a atrae esnan cu tabata “traha duro y cu [tabata] carga” pa scucha su siñansanan. (Mateo 11:28-30) Su amabilidad y  bondad a yuda hende cu kier a siña di dje mira cu lo el a refresca nan. Hasta mucha tabata kier ta cerca Hesus. Bijbel ta bisa: “El a brasa e muchanan.”—Marco 10:13-16.

Aunke cu Hesus a pasa dolor prome cu el a muri, e no tabata un hende tristo. Por ehempel, pa haci e momento mas gososo, el a cambia awa den biña di bon calidad ora e tabata na un fiesta di casamento na Cana. (Juan 2:1-11) Na otro ocasionnan, el a siña otro hende lesnan cu hamas nan lo a lubida.—Mateo 9:9-13; Juan 12:1-8.

Riba tur cos, e mensahe cu Hesus tabata predica a yuda hende cu tabata scuch’e haya e speransa di bida eterno. (Juan 11:25, 26; 17:3) Ora 70 di su discipelnan a bin cont’e tocante e exito cu nan tabatin den nan predicacion, el a “yena cu goso” y a bisa: “Alegra pasobra boso nomber a ser skirbi den cielo.”—Lucas 10:20, 21.

“MA BOSO NO MESTER TA ASINA”

Lidernan religioso den tempo di Hesus a busca manera pa hala atencion na nan mes y demostra nan autoridad. (Numbernan 15:38-40; Mateo 23:5-7) Na contraste cu nan, Hesus a siña su apostelnan pa no “domina” otro hende. (Lucas 22:25, 26) Tambe Hesus a spierta nan pa “tene cuidou cu e escribanan; nan gusta cana rond den paña largo y pa hende cuminda nan cu respet riba plasa.”—Marco 12:38.

Contrario na esey, Hesus su apariencia si no tabata diferente for di otro hende, y na algun ocasion nan no por a distinguie for di e hendenan den e multitud. (Juan 7:10, 11) Ademas, den sentido fisico, e no a diferencia hopi for di su 11 fiel apostelnan. Judas, esun cu a traiciona Hesus, a “palabra un señal” cu e hendenan cu a bay pa aresta Hesus. El a duna Hesus un sunchi, y esey a sirbi como señal pa nan por a identifica Hesus y arest’e.—Marco 14:44, 45.

Pues, aunke cu nos no tin tur detaye, ta obvio cu Hesus no tabata manera hopi biaha nan a pint’e. E manera cu awe nos ta mira Hesus ta mas importante cu haya sa ta con su apariencia tabata.

“UN POCO TEMPO MAS Y MUNDO LO NO MIRA MI MAS”

E mesun dia cu Hesus a bisa e palabranan ey, el a muri y nan a der’e. (Juan 14:19) El a duna su bida como un “rescate a cambio di hopi hende.” (Mateo 20:28) Riba e di tres dia, Dios a dun’e bida bek “den spirito” y “a laga” algun di su discipelnan mir’e. (1 Pedro 3:18; Echonan 10:40) Con e apariencia di Hesus tabata ora el a aparece na su discipelnan? Aparentemente e tabata mustra otro for di loke e tabata prome, pasobra hasta su mihor amigonan no a reconoc’e mesora. Maria Magdalena a kere cu e tabata un cunukero, y dos di su discipelnan cu tabata rumbo pa Emaus a kere cu e tabata un stranhero.—Lucas 24:13-18; Juan 20:1, 14, 15.

Con nos mester imagina cu Hesus ta aworaki? Mas cu 60 aña despues cu Hesus a muri, Juan, su apostel stima, a mira visionnan di Hesus. E no a mira Hesus ta muriendo na un cruz. Mas bien, el a mira e “Rey di reynan y Señor di señornan”, e Rey di e Reino di Dios, kende pronto lo vence e enemigonan di Dios, esta, angelnan y hende malbado, y trece bendicion eterno pa humanidad.—Revelacion 19:16; 21:3, 4.