Sigui pa e contenido

Sigui pa e index

 NOS LECTORNAN TA PUNTRA ...

Pasco Ta un Celebracion pa Cristian?

Pasco Ta un Celebracion pa Cristian?

Miyones di hende rond mundo ta kere cu Pasco ta e celebracion di e cumpleaños di Hesucristo. Pero bo a yega di puntra bo mes si e prome cristiannan, esnan cu tabata mas pega cu Hesus, a celebra Pasco? Bo sa kico Bijbel ta bisa tocante hacimento di aña? Nos por haya sa si Pasco ta un celebracion pa cristian ora nos haya contesta riba e preguntanan ey.

Na prome luga, Bijbel no ta menciona celebracion di cumpleaños di Hesus ni di niun otro fiel sirbidor di Dios. E scritura ta referi solamente na dos hende cu a celebra nan hacimento di aña. Niun di nan dos no tabata sirbidor di Jehova, e Dios cu Bijbel ta papia di dje, y tur dos hacimento di aña a caba malo. (Genesis 40:20; Marco 6:21) Segun Encyclopædia Britannica, e prome cristiannan tabata contra di e “custumber pagano di celebra hacimento di aña.”

Ki dia Hesus a nace?

Bijbel no ta bisa exactamente ki dia Hesus a nace. Segun e Cyclopedia di McClintock y Strong, “ni e T[estament] N[obo] ni niun otro fuente no ta menciona e fecha di nacemento di Cristo.” Siguramente anto, si Hesus tabata kier pa su siguidornan celebra su hacimento di aña, lo el a haci sigur pa nan sa ki dia el a nace.

Di dos, niun caminda den Bijbel nos ta mira cu Hesus of su discipelnan a celebra Pasco. Segun e New Catholic Encyclopedia, celebracion di Pasco a ser menciona pa prome biaha “den e Cronografo di Filocalo, un kalender Romano cu ta bay bek te na aña 336 [despues di Cristo].” Ta bisto cu esey tabata hopi tempo despues cu Bijbel a ser completa y siglonan despues cu Hesus tabata riba Tera. Pesey, McClintock y Strong ta bisa cu “e celebracion di Pasco no ta un mandato di Dios ni e no ta den e T[estament] N[obo].” *

Ki evento Hesus a bisa su discipelnan pa conmemora?

Como e Gran Maestro, Hesus a duna instruccion bon cla ta kico e tabata kier pa su siguidornan haci, y nos por haya e instruccionnan aki den Bijbel. Sinembargo, celebracion di Pasco no ta un di nan. Mescos cu un docente no kier pa su studiantenan bay mas leu di loke el a bisa nan pa haci, Hesus no kier pa su siguidornan “bay mas leu di loke ta para skirbi” den e Scritura Santo.—1 Corintionan 4:6.

Di otro banda, tin un evento importante cu e prome cristiannan tabata conoce, esta, e Memorial, of Conmemoracion di e morto di Hesus. Hesus mes a bisa su discipelnan ki dia nan mester tene e evento ey y a mustra nan con pa haci esey. E instruccionnan specifico aki y tambe e fecha di Hesus su morto ta skirbi den Bijbel.—Lucas 22:19; 1 Corintionan 11:25.

Manera nos a mira, Pasco ta un celebracion di hacimento di aña, y e prome cristiannan no a sigui e custumber pagano aki. Ademas, Bijbel no ta menciona cu Hesus of otro hende a celebra Pasco. En bista di e puntonan aki, miyones di cristian rond mundo a yega na e conclusion cu nan no ta celebra pasco.

^ par. 6 Pa mas informacion tocante e origen di mayoria di tradicion di Pasco, wak e articulo “Nos Lectornan Ta Puntra ... Dicon Tin Hende No Ta Celebra Pasco di Nacemento?” den E Toren di Vigilancia di 1 di december 2014, disponibel online tambe riba www.jw.org.