Sigui pa e contenido

Sigui pa e index

Sufrimento Ta un Castigo di Dios?

Sufrimento Ta un Castigo di Dios?

LUZIA TA COCOCHA RIBA SU PIA ROBES. Na mucha, el a haya polio, un maleza sumamente contagioso cu ta ataca e sistema nervioso. Ora e tabatin 16 aña, un señora cu Luzia tabata traha p’e a bisa Luzia: “Ta Dios a castiga bo cu paralisis pasobra bo a desobedece bo mama y a perde respet p’e.” Hopi tempo despues, ainda Luzia tabata corda cuanto daño e palabranan ey a caus’e.

ORA DAMARIS A HAYA SA CU E TIN UN TUMOR CELEBRAL, su tata a puntr’e: “Ta kico bo a haci? Bo mester a haci algo hopi malo cu Dios a castiga bo.” Su comentario a pone Damaris sintie hopi kibra.

Pa miles di aña caba, hende ta kere cu maleza ta un castigo di Dios. E buki Manners and Customs of Bible Lands ta bisa cu den tempo di Cristo hopi hende a kere cu “sea ta pica di e hende cu ta enfermo, of pica di su famianan, ta causa maleza, y cu maleza ta un castigo pa su pica.” E buki Medieval Medicine and the Plague ta bisa cu den Edad Medio “algun hende tabata kere cu Dios tabata castiga nan pa nan picanan mediante plaga.” Acaso esey kiermen cu ora miyones di hende na Europa a muri di e plaga di siglo 14 ta Dios a castiga nan? Of ta un infeccion di bacteria a causa esey, manera ciencia a comproba despues? Tin hende kisas ta puntra nan mes, ta berdad cu Dios ta uza maleza pa castiga hende pa nan picanan? *

ALGO PA PENSA RIBA: Dicon Hesus lo a cura hende si maleza tabata un castigo mereci di Dios? Esey lo no a nifica cuestiona e husticia di Dios? (Mateo 4:23, 24) Nunca Hesus lo no a haci algo pa bay contra Dios. Hesus a bisa: “Semper mi ta haci loke ta agrad’e” y, “mi ta haci precies manera e Tata a manda mi haci.”—Juan 8:29; 14:31.

Bijbel ta bisa na un manera masha cla cu Jehova Dios ta “sin inhusticia.” (Deuteronomio 32:4) Por ehempel, Dios nunca lo mata cientos di hende inocente den un accidente di avion pa e castiga djis un hende abordo. Abraham, un fiel sirbidor di Dios, tabata sa cu nunca Dios lo “destrui e husto hunto cu e malbado.” El a bisa tambe: “E Hues di henter mundo lo no haci husticia?” (Genesis 18:23, 25) Bijbel ta bisa tambe cu “leu sea di Dios di haci maldad”; e no ta “comete inikidad.”—Job 34:10-12.

KICO BIJBEL TA SIÑA NOS TOCANTE SUFRIMENTO?

Ora nos ta sufri, no ta Dios ta castiga nos pa un pica cu nos a comete. Hesus a bisa esey na un manera cla y raspa ora e cu su discipelnan a topa un homber cu a nace ciego. “Su discipelnan a puntr’e: ‘Rabi, ta ken a peca cu e homber aki a nace ciego, e of su mayornan?’ Hesus a contesta nan: ‘No ta pica di e homber aki ni di su mayornan a pon’e nace ciego; pero ta pa hende por mira e obra di Dios pa medio di su caso.’”—Juan 9:1-3.

Debi na e idea robes cu tabata reina e tempo ey, Hesus su discipelnan lo mester a keda sorprendi ora el a bisa nan cu ni e homber mes ni su mayornan a comete un pica cu merece castigo. Na e momento ey, Hesus no solamente a cura e homber ciego sino tambe el a corigi e pensamento robes cu sufrimento ta un castigo di Dios. (Juan 9:6, 7) Esta un gran consuelo esey ta pa esnan den nos tempo cu tin problema di salud!

Ta pakico Hesus lo a cura maleza si esey ta un castigo di Dios?

Bijbel ta sigura nos:

  • “Pasobra ningun hende no por pone Dios na prueba cu cos malo, y e mes tampoco no ta pone ningun hende na prueba cu cos malo.” (SANTIAGO 1:13) Y no esey so, pronto Dios lo elimina tur “cos malo” cu a pone hende sufri pa siglonan, entre otro, maleza, dolor y morto.

  • Hesucristo “a cura tur cu tabata malo.” (MATEO 8:16) Tur e curacionnan cu e Yiu di Dios a haci ta un muestra di loke e Reino di Dios ta bay haci na un escala mundial.

  • “[Dios lo] seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.”—REVELACION 21:3-5.

 KEN TA CULPABEL?

Pero ta dicon tin tanto sufrimento riba e mundo aki? Pa hopi siglo hende ta haci nan mes e pregunta ey. Si Dios no ta culpabel, ta ken ta culpabel anto? Nos lo contesta e preguntanan aki den e siguiente articulo.

^ par. 4 Aunke den pasado Dios a yega di castiga hende cu, entre otro, maleza of desaster natural pa nan picanan, Bijbel no ta bisa cu Jehova ta haci esey den nos tempo.