Sigui pa e contenido

Sigui pa e index

Dios Ta Worry ora Nos Ta Sufri?

Dios Ta Worry ora Nos Ta Sufri?

KICO E MANERA CU NOS A SER CREA TA SIÑA NOS?

Empatia ta e capacidad di pone bo mes den sapato di otro hende y compronde su sintimento- y pensamentonan. Dr. Rick Hanson, un experto riba tereno di salud mental, a bisa cu “empatia ta den nos sanger.”

ALGO PA PENSA RIBA: Dicon nos si por mustra empatia pero un bestia no? Bijbel ta splica cu Dios a crea hende den su imagen. (Genesis 1:26) Esey kiermen cu te na cierto grado nos por imita su bunita cualidadnan. Pues, ora un hende ta sintie conmovi pa yuda un otro hende, e ta refleha e empatia di su compasivo Creador, Jehova Dios.—Proverbionan 14:31.

KICO BIJBEL TA SIÑA NOS TOCANTE DIOS SU EMPATIA?

Dios tin empatia pa nos y e no ta gusta niun tiki pa mira nos sufri. Tocante e periodo di sclavitud cruel cu e Israelitanan a pasa aden na Egipto y di e 40 añanan largo cu nan a pasa den desierto, Bijbel ta bisa: “Den tur nan afliccion e tabata afligi.” (Isaias 63:9) Tuma nota cu Dios no solamente tabata sa cu su pueblo tabata sufri, sino cu el a sinti nan dolor tambe. El a bisa: “Mi ta consciente di nan sufrimentonan.” (Exodo 3:7) Tambe el a bisa: “Esun cu mishi cu boso ta mishi cu [mi] pret’i wowo.” (Zacarias 2:8) Pues, ora otro hende haci nos daño, ta comosifuera nan ta haci e daño.

Bijbel ta sigura nos cu maske nos ta sinti cu nos no merece Dios su compasion, “Dios ta mas grandi cu nos curason y sa tur cos.” (1 Juan 3:19, 20) Dios conoce nos mas mihor cu nos conoce nos mes. E sa bon kico nos ta pasa aden, kico nos ta pensa y ta sinti, anto e ta compronde pa nos.

Ora nos ta enfrenta problema, nos por acudi na Dios pa haya consuelo, sabiduria y apoyo, y nos por tin confianza cu e lo yuda nos

Bijbel ta sigura nos:

  • “Lo bo yama, y SEÑOR lo contesta; lo bo sclama, y e lo bisa: ‘At’ami aki.’”—ISAIAS 58:9.

  • “‘Pasobra mi sa e plannan cu mi tin pa boso’, SEÑOR ta declara, ‘plannan pa paz y no pa calamidad, pa duna boso un futuro y un speransa. Anto boso lo sclama na mi y bin haci oracion na mi, y lo mi scucha boso.’”—JEREMIAS 29:11, 12.

  • “Pone mi lagrimanan den bo butishi; nan no ta den bo buki?”—SALMO 56:8.

 DIOS CONOCE NOS, TA COMPRONDE NOS Y TA SINTI PA NOS

Si bo sa cu Dios ta compronde bo, esey lo yuda bo enfrenta problema cu exito? Ban wak e caso di Maria:

“Mira mi yiu homber lucha dos aña contra cancer y perde e bataya ora e tabatin 18 aña tabata algo sumamente doloroso. Mi tabata sinti cu bida ta inhusto y cruel. Mi tabata rabia cu Jehova no a interveni!

Mi tabata sinti cu Jehova no ta stima mi. Pero seis aña despues, un amiga hopi amoroso y compasivo den congregacion a laga mi desahoga mi mes. Despues di scucha mi pa oranan largo sin interumpi mi, el a cita 1 Juan 3:19 y 20. E texto di Bijbel aki a conmove mi. E ta bisa cu ‘Dios ta mas grandi cu nos curason y sa tur cos.’ Y el a splica mi cu Jehova ta compronde kico nos ta pasa aden.

Ma toch, mi a keda rabia. Pero dado momento, mi a lesa Salmo 94:19 cu ta bisa: ‘Den e multitud di mi preocupacionnan den mi, bo consuelonan ta alegra mi alma.’ Mi a sinti cu e texto ey tabata net loke mi tabatin mester. Porfin, mi por a papia cu Jehova tocante mi sufrimento pasobra mi tabatin confianza cu e ta scucha mi y compronde mi. Esey a duna mi paz.”

Esta un consuelo pa sa cu Jehova ta compronde nos y ta sinti pa nos! Pero ta dicon tin tanto sufrimento anto? Acaso ta pasobra Dios ta castiga nos pa e picanan cu nos a haci? Dios lo caba cu tur sufrimento? Nos lo haya contesta riba e preguntanan aki den e siguiente articulonan.