Sigui pa e contenido

Sigui pa e index

“Bo wowonan a mira mi substancia sin forma.”—SALMO 139:16

Dios Ta Compronde Bo?

Dios Ta Compronde Bo?

KICO E MANERA CU NOS A SER CREA TA SIÑA NOS?

Reflexiona un rato riba e relacion hopi pega cu morochonan identico tin. Nan tin un laso intimo cu ta masha special. E directora di Twin Studies Center, Nancy Segal, kende su mes tambe ta un morocho, a bisa cu algun morocho “ta compronde otro hopi bon sin duna splicacion.” Un señora a describi e relacion cu ta existi entre e cu su ruman muher morocho di e siguiente manera: “Nos conoce otro bon bon.”

Con bin morochonan ta compronde otro asina bon? Aunke e ambiente cu nan a lanta aden y tambe e manera cu nan a lanta ta contribui na esey, tin estudionan cu ta indica cu nan genenan cu ta hopi parecido ta hunga un rol masha importante.

ALGO PA PENSA RIBA: Dios a crea e genenan maraviyoso. Pesey, nos por conclui cu no tin ningun persona cu ta compronde nos mas mihor cu ne. Cu rason salmista David a bisa: “Bo a weef mi, forma mi den bariga di mi mama. Mi wesonan no tabata scondi pa bo, tempo cu mi a wordo traha na secreto ... Bo wowonan a mira mi substancia sin forma [of embryo]; ... tur [su partinan] tabata skirbi den bo buki.” (Salmo 139:13, 15, 16) Ta Dios so conoce y ta compronde nos composicion genetico, pero no ta esey so, e sa tambe kico tur nos a pasa aden cu a forma nos personalidad. Pesey nos por tin sigur cu no tin ningun persona cu ta compronde nos mas mihor cu ne.

KICO BIJBEL TA SIÑA NOS TOCANTE CON BON DIOS TA COMPRONDE NOS?

David a resa: “O SEÑOR, bo a samina mi y bo conoce mi. Bo sa ki ora mi ta sinta y ki ora mi ta lanta; bo ta comprendi mi pensamentonan di aleu. Prome cu tin un palabra riba mi lenga, ya bo conoce esaki caba, o SEÑOR.” (Salmo 139:1, 2, 4) Ademas, Jehova conoce nos sintimentonan di mas profundo y hasta “ta compronde tur intencion di e pensamentonan.” (1 Cronicanan 28:9; 1 Samuel 16:6, 7) Kico e versiculonan aki ta siña nos tocante Dios?

Nos Creador no solamente ta wak kico nos ta haci sino tambe ta compronde pakico nos ta haci esey, maske kisas nos no ta expresa tur nos pensamento- y sintimentonan ora nos ta haci oracion na dje. Ademas, e sa kico nos lo haci si nos circunstancia ta diferente. Sin duda, debi na e echo cu Dios mes a crea nos cu e capacidad di stima, nos por tin sigur cu e ta desea of hasta ta ansioso pa haya sa y compronde nos pensamento- y intencionnan cu ta bon y cu ta pone nos reacciona na un manera amoroso.—1 Juan 4:7-10.

Nada ta scapa Dios su atencion. E ta consciente di nos sufrimentonan hasta si otro hende no ta compronde dje bon ey of no sa kico nos ta pasando aden

 Bijbel ta sigura nos:

  • “Jehova su wowo ta riba e hustonan, y su horea ta habri pa nan suplica.” —1 PEDRO 3:12.

  • Dios ta priminti: “Lo mi instrui bo y siña bo e caminda cu bo tin cu cana; lo mi conseha bo; mi wowo ta riba bo.”—SALMO 32:8.

DIOS TIN MASHA HOPI COMPASION

Bo ta kere cu si bo sa cu Dios ta compronde bo situacion, esey lo yuda bo enfrenta problema cu exito? Wak kico a pasa cu Anna, di Nigeria. El a bisa: “Pa motibo di mi circunstancianan hopi dificil, mi tabata duda cu ta bale la pena pa sigui biba. Ora dokter a constata cu ami tin cancer na pecho, mi casa tabata morto y mi mester a lanta mi yiu muher mi so. Mi yiu muher tabatin waterhoofd (su drenahe di awa den celebro tabata blokia) y e tabata den hospital. Tabata algo hopi duro pa mi cu mi mester tabata den hospital na e mesun momento cu mi yiu muher pa mi opera, haya chemotherapie y bestraling.”

Kico a yuda Anna? “Mi tabata medita riba textonan manera Filipensenan 4:6 y 7, cu ta bisa cu ‘e paz di Dios cu ta surpasa tur comprondemento lo proteha boso curason y boso mente.’ Cada bes cu mi tabata corda riba e texto aki, mi tabata sinti hopi pega cu Jehova pasobra e ta compronde mi mas mihor cu ami ta compronde mi mes. Mi a haya hopi animacion tambe di mi kerido rumannan spiritual di e congregacion cristian.

Aunke mi ta lucha keto bay cu mi salud, e situacion di ami cu mi yiu muher a mehora. Y nos a siña pa ta positivo ora nos ta enfrenta problema pasobra nos sa cu Jehova semper ta cu nos. Santiago 5:11 ta sigura nos: ‘Nos ta proclama cu esnan cu a persevera ta feliz! Boso a tende di e perseverancia di Job y boso sa di e bendicion cu Jehova a dun’e, y na esaki boso a mira cu Jehova tin masha cariño, compasion y misericordia.’” Jehova a compronde Job su situacion bon bon, y nos por tin sigur cu e ta compronde cualkier situacion cu nos pasa aden bon bon tambe.