Sigui pa e contenido

Sigui pa e index

Ta Bale la Pena pa Biba

Ta Bale la Pena pa Biba

Faizal mester a haci un operacion grandi di curason mas o menos un aña despues cu su esposa a fayece. El a bisa: “Ora mi a lesa e buki di Job, mi a ripara cu Jehova a pone e relato ey den Bijbel pa un motibo. Ora nos sinti nos hopi desanima y nos lesa den Bijbel di un hende cu a sinti su mes mescos cu nos, esey ta consola nos.” El a sigui bisa: “Ta bale la pena pa biba.”

Tarsha tabata jong ora su mama a muri. El a bisa: “Ora bo conoce bo Creador, lo bo tin proposito den bida, speransa y goso maske cu bo tin hopi problema. Nos por tin confianza cu Jehova por cuida nos y yuda nos.”

E ARTICULONAN anterior ta mustra con varios suceso tragico por laga bo sinti cu bida ta hopi duro. Ora bo ta lucha cu bo mesun problemanan, bo por cuminsa duda cu bida ta bale la pena of cu hende ta stima bo. Pero bo por ta sigur cu Dios ta stima bo y cu bo ta precioso p’e.

E escritor di Salmo 86 a expresa cu e tin confianza den Dios: “Den e dia di mi angustia lo mi sclama na bo, pasobra abo lo contesta mi.” (Salmo 86:7) Pero kisas bo ta puntra bo mes, Con Dios lo contesta mi “den e dia di mi angustia”?

Aunke Dios lo no kita bo problemanan di biaha, su Palabra, Bijbel, ta sigura bo cu Dios lo duna bo paz pa yuda bo deal cu bo problemanan: “No sea ansha tocante nada; mas bien, den tur cos, pa medio di oracion y suplica hunto cu gradicimento, laga Dios sa kico ta boso peticionnan; y e paz di Dios cu ta surpasa tur comprondemento lo proteha boso curason y boso pensamentonan.” (Filipensenan 4:6, 7, nota) Por fabor, considera con e siguiente textonan di Bijbel ta sigura bo cu Dios di berdad ta interesa den bo.

Dios Ta Interesa den Bo

“Dios no ta lubida ni un di [e mofinan] ... Boso ta bal mas cu hopi mofi.” Lucas 12:6, 7.

PENSA RIBA ESAKI: Aunke parhanan chikito manera mofi por parce insignificante, toch Dios ta interesa den cada un di nan. Tur ta precioso den Dios su bista. Pero hende ta hopi mas valioso pa Dios. Hende ta e parti mas importante di Dios su creacion riba Tera. Nan ta traha den Dios su “imagen” y ta capaz pa cultiva y desplega e cualidadnan maraviyoso di dje.—Genesis 1:26, 27.

“O SEÑOR, bo a samina mi y bo conoce mi ... Bo ta compronde mi pensamentonan ... Purba mi [of, “samina mi”, NW] y conoce mi pensamentonan.”Salmo 139:1, 2, 23.

PENSA RIBA ESAKI: Dios conoce bo personalmente. E conoce bo sintimento di mas profundo y bo preocupacionnan. Aunke otro hende kisas no ta compronde bo problemanan, Dios ta interesa den bo y kier yuda bo. Esey ta haci cu ta bale la pena pa biba.

 Bo Bida Tin Sentido

“Tende mi oracion, o SEÑOR! Y laga mi sclamacion pa yudansa yega cerca bo ... Inclina bo horea na mi; den e dia cu mi yama, contesta mi lihe ... El a considera e oracion di esnan desampara.”Salmo 102:1, 2, 17.

PENSA RIBA ESAKI: For di cuminsamento, Jehova ta consciente di cada lagrima cu a basha for di hende su wowo. (Salmo 56:8) Y esaki ta inclui bo lagrimanan tambe. Dios ta corda tur loke abo a pasa aden y tur e lagrimanan cu a basha for di bo wowo pasobra bo ta precioso p’e.

“No desmaya, pasobra mi ta bo Dios. Lo mi fortalece bo, si, lo mi yuda bo ... Ami ta SEÑOR bo Dios, ... kende ta bisa bo: ‘No tene miedo, lo mi yuda bo.’”Isaias 41:10, 13.

PENSA RIBA ESAKI: Dios ta cla pa yuda bo. Si bo cay, e lo lanta bo.

Tin Speransa pa un Mihor Futuro

“Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.”Juan 3:16.

PENSA RIBA ESAKI: Bo ta asina precioso pa Dios cu el a sacrifica su Yiu, Hesus, boluntariamente pa bo. E sacrificio aki ta duna bo e oportunidad pa haya un bida feliz y cu proposito pa semper. *

Aunke bo bida por ta duro, saca tempo pa studia Bijbel y fortalece bo fe den Dios su promesanan. Esey lo haci bo feliz y convence bo cu ta bale la pena pa biba

^ par. 19 Si bo kier haya sa mas tocante e beneficio di Hesus su sacrificio, wak e video Laga Nos Recorda Hesus Su Morto riba www.jw.org/pap-x-paa. Wak bou di PUBLICACION > VIDEO > NOS REUNIONNAN Y PREDICACION.