Sigui pa e contenido

Sigui pa e index

Ora un Ser Keri Fayece

Ora un Ser Keri Fayece

“Mi ruman homber mayo a muri diripiente y mi no por a haci nada pa evita esey. Y hasta lunanan despues, ora mi tabata corda riba dje, mi tabata sinti un dolor inmenso, comosifuera un cuchiu tabata hinca mi den mi curason. Y cu rabia mi tabata puntra mi mes: Pakico mi ruman mester a muri? Ademas, mi tabata sinti mi culpabel cu mi no a pasa mas tempo cu ne.”—Vanessa, Australia.

SI ABO tambe a perde un ser keri den morto, lo bo por sinti varios cos: tristeza, soledad y cu bo no por haci nada. Ademas, kisas bo a sinti rabia, miedo y cu bo ta culpabel. Y por ta hasta bo a puntra bo mes si ta bale la pena pa sigui biba.

Bo por ta sigur cu no ta nada malo pa sinti bo tristo, hasta si bo ta keda sinti asina pa hopi tempo. Eigenlijk, esey ta demostra cuanto bo ta stima bo ser keri cu a fayece. Pero ta posibel pa toch bo haya un cierto grado di alivio?

LOKE A YUDA ALGUN HENDE DEN E SITUACION AKI

Aunke kisas ta parce cu nada por calma bo dolor, podise e siguiente sugerencianan por yuda bo.

TUMA TEMPO PA EXPRESA BO TRISTEZA

No ta tur hende ta expresa nan tristeza na e mesun manera ni pa e mesun cantidad di tempo. Pero bo por haya alivio si bo yora. Vanessa, kende nos a menciona caba, a bisa: “Mi tabata gewoon yora; mi mester a desahoga mi mes.” Sofía, kende su ruman muher a muri diripiente, a bisa: “Tabata hopi doloroso pa pensa riba loke a pasa; tabata comosifuera nan a habri mi herida infecta pa limpi’e. E dolor tabata insoportabel, pero mester a haci esey pa e herida cura.”

DESAHOGA BO MES

Ta normal cu tin biaha bo ta sinti cu bo kier ta bo so, pero tristeza ta un carga mucho pisa pa bo  so carga. Jared, un hoben di 17 aña, kende a perde su tata, a bisa: “Casi sigur loke mi tabata bisa no tabatin sentido, pero e echo cu mi por a desahoga mi mes cu otro hende a yuda mi hopi.” Janice, kende nos a menciona den e prome articulo, a bisa cu tin un otro beneficio: “E echo cu mi a papia cu otro hende a echt consola mi; mi a sinti cu nan a compronde mi y cu mi no ta mi so.”

ACEPTA YUDANSA

Un psicologo a bisa: “Hende cu a perde un ser keri cu ta laga nan famia y amigonan yuda nan durante e prome etapa di tristeza hopi biaha ta supera e otro etapanan cu ta sigui mas facilmente.” Laga bo amigonan sa kico nan por haci pa yuda bo; probablemente nan kier yuda bo, pero nan no sa con.—Proverbionan 17:17.

HALA MAS CERCA DI DIOS

Tina a bisa: “Ora mi esposo a muri diripiente di cancer, mi a perde e persona cu mas mi tabata confia, pesey mi a cuminsa conta Dios tur mi problemanan, preocupacionnan y sintimentonan. Tur mainta, mi tabata pidi Dios pa duna mi forsa pa mi enfrenta e dia. Dios a yuda mi asina hopi cu mi a perde conteo.” Tarsha, kende tabatin 22 aña ora el a perde su mama, a bisa: “Mi tabata lesa Bijbel tur dia y esey ta loke tabata consola mi. Semper mi tabata haya algo positivo pa pensa ariba durante mi lesamento.”

IMAGINA E TEMPO ORA BO SER KERI LO RESUCITA

Tina a bisa tambe: “Na principio, e speransa di resureccion no tabata consola mi pasobra na e momento ey mi tabatin mester di mi casa y mi yiunan tabatin mester di nan tata. Pero awor, cuater aña despues, mi ta tene duro na e speransa ey. Esey ta mantene mi cabes riba awa. Esta un paz y felicidad lo mi sinti dia cu nos lo topa otro atrobe!”

Probablemente lo bo no haya alivio di biaha di bo dolor. Pero kisas loke Vanessa a conta por yuda bo. El a bisa: “Podise bo ta pensa cu nunca bo dolor lo pasa, pero pocopoco lo bo recupera.”

No lubida, maske nada no por yena e bashi cu bo ta sinti, toch ta bale la pena pa sigui biba. Dios ta stima bo, y cu su yudansa, bo por disfruta di amistad cu bon amigo y di un bida yen di proposito. Y pronto Dios lo resucita e mortonan. Dios ta desea pa bo brasa bo ser keri cu a muri atrobe y pa nunca mas bo sinti e dolor cu bo tin awor.