Sigui pa e contenido

Sigui pa e index

Promesanan Cu Lo Cumpli Sigur

Promesanan Cu Lo Cumpli Sigur

Manera Hesus a profetisa, e bon noticia di e Reino di Dios lo ser predica rond mundo. (Mateo 24:14) E buki biblico di Daniel ta bisa nos cu e Reino aki ta un gobierno di Dios. Capitulo 2 di e buki aki tin un profecia cu ta papia di algun gobierno, of reino, poderoso cu lo a bin na poder un tras di otro, for di tempo di Babilonia te den nos tempo. Versiculo 44 ta profetisa loke lo mester sosode:

“E Dios di cielo lo lanta un reino cu nunca lo no wordo destrui, y e reino ey lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.”

E profecia aki y otronan ta predeci cu e Reino di Dios lo reemplasa tur gobierno humano y zorg pa tin stabilidad y ordo riba Tera. Con bida lo ta bou di e Reino aki? Ban wak algun di e bunita promesanan cu pronto lo cumpli.

  • LO NO TIN GUERA MAS

    Salmo 46:9: “[Dios] ta haci gueranan stop te na e fin di Tera; e ta kibra boog y ta corta lansa na dos; e ta kima e garoshinan cu candela.”

    Imagina con bon mundo lo ta si tur e recursonan y conocemento cu nan ta uza pa traha arma ser uza pa yuda hende! E promesa ey lo bira realidad bou di e Reino di Dios.

  • LO NO TIN MALEZA MAS

    Isaias 33:24: “Ningun habitante lo no bisa: ‘Mi ta malo.’”

    Pensa un rato riba un mundo caminda ningun hende lo sufri mas di problema di curason, cancer, diabetes ni ningun otro maleza. Lo no tin mester di hospital ni remedi mas. Tur hende lo tin salud perfecto.

  • LO NO TIN HAMBER MAS

    Salmo 72:16: “Lo tin abundancia di maishi den e Tera, [y] riba cabes di e seronan.”

    E Tera lo produci suficiente cuminda y tur hende lo tin acceso na dje. Lo no tin hamber ni desnutricion mas.

  • LO NO TIN DOLOR, NI TRISTEZA NI MORTO MAS

    Revelacion 21:4: “[Dios lo] seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.”

    Hende lo ta perfecto y lo biba pa semper den un paradijs riba Tera. Esey ta loke nos amoroso Creador, Jehova Dios, a priminti.

 DIOS SU PROMESANAN LO CUMPLI

Acaso tur esaki ta parce mucho bunita pa kere? Aunke mayoria di hende mesora lo bay di acuerdo cu e bida eterno cu Bijbel ta priminti ta algo masha bunita, toch nan no ta kere cu hende por biba pa semper, pasobra nan no conoce ningun hende cu tin bida eterno.

Hende a bira esclavo di pica y morto, y mester a biba asina tanto tempo ta lucha cu dolor, sufrimento y problema cu nan ta pensa cu e manera di biba aki ta normal. Pero esey absolutamente no ta loke nos Creador, Jehova Dios, tabatin na mente pa hende.

Pa yuda nos compronde cu e ta cumpli sigur cu tur loke e priminti, Dios a bisa na un manera cla y raspa: “E lo no bolbe bashi cerca mi, sin cumpli cu loke mi ta desea, y sin alcansa e proposito cu cual mi a mand’e.”—Isaias 55:11.

Bijbel ta bisa cu Jehova Dios “no por gaña.” (Tito 1:2) Y ya cu ta el a priminti tur e cosnan bunita aki, lo ta sabi di nos parti pa analisa e siguiente preguntanan: Di berdad ta posibel pa hende biba pa semper den Paradijs riba Tera? Kico nos tin cu haci pa biba pa semper? Wel, e articulonan cu ta sigui lo contesta e preguntanan ey.