Sigui pa e contenido

Sigui pa e index

Bo Futuro Ta den Bo Man

Bo Futuro Ta den Bo Man

DI BERDAD BO FUTURO TA DEN BO MAN? Tin hende ta pensa cu nan no tin mucho control riba nan bida pasobra nan ta kere cu nan futuro ta predestina. Pesey ora nan no por logra un cierto meta cu nan tin, nan ta pensa cu no tin moda di haci, y cu e cos ey no tabata pa nan.

Otronan ta keda decepciona ora nan mira cu no tin solucion pa tur e opresion y inhusticia den e mundo aki. Kisas nan a purba mehora nan bida, pero bes tras bes, entre otro, guera, crimen, desaster natural y maleza ta daña nan plannan. Pesey nan ta pensa cu no ta bale la pena pa sigui lucha.

Ta berdad cu circunstancianan imprevisto den bida por stroba bo plannan. (Eclesiastes 9:11, NW) Pero ora ta trata di bo destinacion final si, ta abo tin cu scoge. Bijbel ta siña nos cu bo futuro ta depende di bo escogencia. Ban wak dicon.

Net prome cu e nacion di Israel a drenta e Tera Priminti, Dios a bisa nan mediante nan lider Moises: “Mi a pone bida y morto boso dilanti, e bendicion y e maldicion. Pesey, scoge bida pa bo biba, abo y bo descendientenan, door di stima SEÑOR bo Dios, door di obedece su bos y door di tene duro na dje.”Deuteronomio 30:15, 19, 20.

“Mi a pone bida y morto boso dilanti, e bendicion y e maldicion. Pesey, scoge bida.”​—Deuteronomio 30:19

En berdad Dios a libera e Israelitanan for di sclavitud na Egipto y a ofrece nan libertad y felicidad den e Tera Priminti. Pero nan lo no a haya e bendicionnan ey automaticamente. Loke nan mester a haci ta “scoge bida.” Con nan mester a haci esey? Door di stima Dios, obedece su bos y tene duro na dje.

Awe, Dios ta ofrece nos algo similar, y nos escogencia lo determina nos futuro. Si nos scoge pa stima Dios, obedec’e y tene duro na dje, en realidad nos ta scoge bida, si, bida eterno den un paradijs riba Tera. Pero kico e tres pasonan ey cu nos tin cu tuma ta encera?

STIMA DIOS

Apostel Juan a skirbi bou di inspiracion: “Dios ta amor”, pues esey ta su cualidad di mas importante. (1 Juan 4:8) Pesey, ora nan a puntra Hesus cua ta e mandamento di mas grandi, el a contesta: “Stima Jehova bo Dios cu henter bo curason, cu henter bo alma y cu henter bo mente.” (Mateo 22:37) Ora un hende tin un bon relacion cu Jehova Dios, esey no ta pasobra cu e tin miedo di dje of ta obedec’e ciegamente, sino pasobra e ta stim’e. Pero dicon nos tin cu stim’e?

Nos por compara Jehova su amor pa hende cu e amor cu un mayor amoroso tin pa su yiunan. Aunke mayornan ta imperfecto, nan ta siña nan yiunan, stima nan y disciplina nan pasobra nan kier pa nan yiunan ta feliz y pa tur cos bay bon cu nan. Pero kico e mayornan lo desea di haya a cambio? Nan kier pa nan yiunan stima nan y tuma na serio loke nan como mayornan a siña nan pa nan mes bon. Pues, no ta na su luga cu nos Tata celestial perfecto ta spera pa nos mustra amor y gratitud pa tur loke el a haci pa nos?

 OBEDECE SU BOS

Pa nos obedece Dios, nos mester haya sa kico e ta bisa. Y como cu nos no por tende Dios su stem literalmente, nos ta tend’e ora nos ta lesa y aplica loke su Palabra ta bisa.—1 Juan 5:3.

Pa mustra nos con importante ta pa obedece Dios su bos, dado momento Hesus a bisa: “Hende no mester biba di pan so, sino tambe di tur palabra cu ta sali for di boca di Jehova.” (Mateo 4:4) Cuminda fisico ta importante pa nos, pero alimenta nos mente cu conocemento di Dios mester ta mas importante ainda. Dicon? Rey Salomon, kende tabata hopi sabi, a splica: “Sabiduria ta proteccion mescos cu placa ta proteccion. Ma e bentaha di conocemento ta cu sabiduria ta preserva bida di esnan cu ta pose’e.” (Eclesiastes 7:12) Actualmente, conocemento y sabiduria di Dios por proteha nos y yuda nos tuma bon decision, y den futuro, nos por haya bida eterno.

TENE DURO NA DJE

Bo ta corda kico Hesus a bisa den e ilustracion cu nos a papia di dje den e articulo anterior? El a bisa: “E porta cu ta hiba na bida ta smal y e caminda ta preta, y poco ta esnan cu ta hay’e.” (Mateo 7:13, 14) Sigur lo ta hopi bon si nos tin un bon guia y keda cerca di dje pa nos yega nos destinacion final riba e caminda pa bida eterno. Pues, nos tin bon motibo pa keda cerca di Dios. (Salmo 16:8) Pero con nos por logra esey?

Tur dia tin hopi cos cu nos tin cu haci y hopi cos cu nos lo kier haci. Pero tur esey por tene nos asina ocupa y enfoca cu nos no tin tempo of masha poco tempo pa pensa riba loke Dios kier pa nos haci. Pa e motibo ey Bijbel ta corda nos pa “paga bon tino pa e manera cu [nos] ta cana no ta manera hende imprudente sino manera hende sabi, uzando [nos] tempo di e mihor manera, pasobra nos ta biba den temponan malo.” (Efesionan 5:15, 16) Nos por keda cerca di Dios door di pone nos relacion cu ne na prome luga den nos bida.—Mateo 6:33.

E DECISION TA DEN BO MAN

Aunke bo no por haci nada pa cambia bo pasado, tin cosnan cu abo por haci pa bo mes y bo sernan keri pa boso por tin un bon futuro. Bijbel ta bisa cu nos Tata celestial, Jehova Dios, ta stima nos masha hopi mes y cu e ta laga nos sa kico e ta desea pa nos haci. Wak kico profeta Mikeas ta bisa:

“El a bisa bo, o hende, loke ta bon; y kico SEÑOR ta exigi di bo, si no ta pa haci husticia, pa stima misericordia, y pa cana humildemente cu bo Dios?”​Mikeas 6:8.

Kico abo lo haci? Si bo acepta Jehova su invitacion, lo bo ricibi e bendicionnan eterno cu e tin prepara pa su amigonan. E decision ta den bo man.